රජයට අයත් ගම්පොළ සංස්කෘතික මධ්‍යස්ථාන භුමියේ හා එහි ගොඩනැගිලිවල අනවසරයෙන් සිටින අධිකරණ හා බන්ධනාගාර රාජ්‍ය ඇමති අනුරාධ ලංකා ජයරත්නට එහි රජයේ භුක්තිය බාරදෙන ලෙස රජයේ ඉඩම් සන්තකය ආපසු ගැනීමේ පනත යටතේ නිවේදනයක් නිකුත් කර ඇත.
ඒ ගම්පොළ ප්‍රදේශය අයත් වන උඩපළාත ප්‍රාදේශිය ලේකම් ආත්මා දිලුක්ෂි ජයරත්න විසින් පසුගිය දෙසැම්බර් 29 දින සහිතවය. එම දිනයේදී ගම්පොළ සංස්කෘතික මධ්‍යස්ථානයේ ගොඩනැගිලිවල එම නිවේදනය අලවා ඇති අතර 2024.02.12 දින හෝ එදිනට පෙර එම ඉඩමේ නිරවුල් සන්තකය ප්‍රාදේශීය ලේකම්වරියට හෝ 1164 අංගම්මන බටහිර වසමේ ග්‍රාම නිලධාරී වඩුගෙදර චමින්ද ප්‍රභාත් සඳරත් වෙත භාර දෙන ලෙසයි.
එය එම නිවේදනයේ පැහැදිලි කර ඇත්තේ මේ ආකාරයටය. ‘රජයේ ඉඩම් (සන්තකය ආපසු ලබා ගැනීමේ) පනතේ කාර්යය සඳහා නිසි බලධරයකු වූ උඩපළාත ප්‍රාදේශීය ලේකම් කොට්ඨාශයේ ප්‍රාදේශීය ලේකම් ආත්මා දිලුක්ෂි ජයරත්න වන මම අනුරාධ ලංකා ජයරත්න වන ඔබ මෙහි උපලේඛනයේ විස්තර කර ඇති රජයේ ඉඩමෙහි අනවසරයෙන් සන්තකය දරන බව/ පදිංචිව සිටින බව මගේ මතය හෙයින් එම පනතේ 3 වන වගන්තියෙන් මා වෙත පැවරී ඇති බලතල ප්‍රකාර (අ) ඔබේ යැපෙන්නන් කිසිවකු වෙතොත් ඔවුන්ද සමග ඒ ඉඩම අතහැර යන ලෙස ස සහ (ආ) ඒ ඉඩමේ නිරවුල් සන්තකය 2024.02.12 වන දින හෝ එදිනට පෙර මේ පනතේ කාර්යයන් සඳහා නියම බලධාරියකු වන මා වෙත හෝ 1164 අංගම්මන බටහිර වසමේ ග්‍රාම නිලධාරි වඩුගෙදර චමින්ද ප්‍රභාත් සඳරත් වෙත භාර දෙන ලෙස අනුරාධ ලංකා ජයරත්න වන ඔබට නියම කරමි.’ යනුවෙන්ය.
ගම්පොළ සංස්කෘතික මධ්‍යස්ථානය භූමිය රජයට අයත් එකක් වන අතර එහි ඇති ගොඩනැගිලිද රජයේ මුදල් යොදවා ඉදිකර ඇති ඒවා වේ. එහෙත් එහි ඇති ගොඩනැගිලි කිහිපයක් මේ වනවිට පෞද්ගලික අංශය සඳහා කුලියට හෝ බද්දට ලබාදී ඇති අතර එම කටයුතු අනුරාධ ජයරත්න හා ඔහුගේ පවුලේ අය විසින් සිදුකරන බව පැවසේ. මෙම සංස්කෘතික මධ්‍යස්ථානය පිහිටි භූමියේම දි.මු. ජයරත්න ජාතික උරුම ක්‍රීඩාංගණය, එහි ක්‍රීඩා මණ්ඩපය සහ දි.මු. ජයරත්න සම්මන්ත්‍රණ ශාලාව පිහිටා තිබේ.
මේ සම්බන්ධයෙන් සිය ෆේස්බුක් ගිණුමේ සටහනක් තබමින් ප්‍රාදේශීය ලේකම්වරිය සඳහන් කර ඇත්තේ මෙම අනවසර කටයුත්ත සම්බන්ධයෙන් ඇය සියලු වගකිව යුතු ආයතන දැනුවත් කර ඇතත් අනවසරකරු බලගතු බවයි. ඒ නිසා ඇය කරනු ලබන සෙසු රාජකාරිවලටද විවිධ ආයතන හා පුද්ගලයින් යොදා බාධා සිදුකරන බවයි. එමෙන්ම ඇයගේ දරු දෙදෙනාට අම්මෙකු අවශ්‍ය බැවින් මෙම කටයුත්තට අත නොගසන ලෙස ඇයගේ මිතුරන් කියූ බවත්, එහෙත් රටේම දරුවන්ට අනාගතයක් තිබිය යුතු යැයි ඇය සිතන බවත්ය. මේ සම්බන්ධයෙන් කරුණු විමසීම සඳහා අප අධිකරණ හා බන්ධනාගාර රාජ්‍ය ඇමති අනුරාධ ලංකා ජයරත්න ඇමතුවත් ඔහු දුරකතනයට සම්බන්ධ කර ගැනීමට නොහැකි විය.
