අලුත් අවුරුද්ද පටන් ගන්නෙම දේශපාලන පිම්මකින්.
මම ශ්‍රී ලංකා නිදහස් පක්ෂයට සම්බන්ධ වුණේ මට ඡන්ද බලයක්වත් නැති ශිෂ්‍ය ජීවිතයේදීම. මේ ගෙවුණු අවුරුදු 45 ඇතුළත එක විනාඩියක්වත් මම පක්ෂයෙන් බැහැරව ගිහින් නැහැ. පක්ෂය ඇතුළේ එහෙම හිටපු කෙනෙක් තමයි මම.
ඒ වුණත් මම මේක කියන්නම ඕනෑ. මේ තීරණය ගන්න පක්ෂයෙන් කිසිම බලපෑමක් හෝ පක්ෂයෙන් කිසිම අසාධාරණයක් මට වුණේ නැහැ. නායකත්වයෙන් ගැටලුවක් වුණෙත් නැහැ. නමුත් අපි කරන දේශපාලනය තුළ රටටත්, පාක්ෂිකයන්ටත්, පොදු ජනතාවටත් සේවයක් කරන්න බැරි නම් ඒ කරන දේශපාලනයෙන් තේරුමක් නැහැ. ඒ නිසා මම කල්පනා කළා ජනතාවට දරා ගන්න බැරි තරමටම පීඩාවට පත් කරන මේ පාලනයේ වෙනසක් කළ යුතුය කියලා. එය ප්‍රජාතන්ත්‍රවාදීව මැතිවරණයක දී තමයි කරන්න පුළුවන්කම ලැබෙන්නේ. ස්ථිර වශයෙන්ම මේ වසර තුළ අනිවාර්යයෙන්ම ජනාධිපතිවරණය පැවැත්විය යුතුයි.
ඒ එක්කම ජනාධිපතිතුමාත් කියන ආකාරයට පාර්ලිමේන්තු මැතිවරණයත් පවත්වන්නට බොහෝ ඉඩකඩක් තියෙනවා. ජනාධිපතිතුමාට එම තීරණය ඕනෑම වෙලාවක ගන්න පුළුවන්. ඒ නිසා රටේ පාලන බලයට සෘජුව බලපාන ප්‍රධානතම මැතිවරණයක දී පාලන ක්‍රමයේ වෙනසක් සඳහා පුළුල් ජනතා බලවේගයක අවශ්‍යතාව තියෙනවා. ඒ නිසා අපි අදහන දේශපාලනයට වඩාත් සමීප දේශපාලන කණ්ඩායමක් එක්ක තමයි අපි එකතුවෙන්නට ඕනෑ. අන්න ඒ නිසා තමයි අපි දකින හොඳම විසඳුම විදියට පුළුල් ජනතා බලවේගයක් තිබෙන ජනතා සංවිධාන රැසක් එකට එකතු කරලා පවතින පාලනයේ වෙනසක් කළ හැකි ජනතා නායකයෙක් විදියට සජිත් ප්‍රේමදාස මැතිතුමා හඳුනාගෙන එතුමා එක්ක එකට එකතුවෙලා මේ ගමන යන්න තීරණය කළේ.
එක පාරටම මෙච්චර කාලයක් දේශපාලනය කරපු අවුරුදු 45ක් හිටපු තැන දාලා යන්න බලපෑ හේතුවකුත් ඇති.
මේක පක්ෂයේ ප්‍රතිපත්තිය හෝ දර්ශනය පිළිබඳ කාරණයක් නෙමෙයි. නමුත් අද රටේ ජීවත්වන ඇස් පෙනෙන, කන් ඇහෙන ඕනෑම කෙනෙක් දන්නවා ශ්‍රී ලංකා නිදහස් පක්ෂය ඉන්නේ මොන වගේ තැනකද කියලා. අපිට පැහැදිලිව පෙනෙනවා අද තිබෙන තත්වයන් තුළ සතුටුවිය හැකි මට්ටමක නෙමෙයි කියලා තිබෙන්නේ. අපි මේ බව පක්ෂයට හා පක්ෂ නායකත්වයට විවිධ අවස්ථාවල කරුණු කාරණා කියලා තියෙනවා. ඉතින් මේවාට අපි බලාපොරොත්තු වුණු ආකාරයේ විසඳුම් සහ ප්‍රතිකර්ම යෙදුණේ නැහැ. එවැනි තත්වයක් තුළ තවදුරටත් ඒ විදියට රැඳී සිටීම තුළ ශ්‍රී ලංකා නිදහස් පක්ෂ පාක්ෂිකයන්ට වගේම රටේ ජනතාවටත් කරන්නේ විශාල අසාධාරණයක්. ඒ නිසා අපේ පාක්ෂිකයන් වෙනුවෙන් සහ සමස්ත රටවැසියන් වෙනුවෙන් යම් සේවයක් කිරීමේ අපේක්ෂාව තුළ තමයි මෙහෙම තැනකට ආවේ. ඒ ඇරෙන්න වෙන හේතුවක් බලපෑවේ නැහැ.
ශ්‍රී ලංකා නිදහස් පක්ෂය තුළ පහුගිය කාලයම අර්බුද නේද?
පක්ෂය තුළ පහුගිය කාලවකවානුව තුළ ඇතිවුණු ගැටලු ප්‍රශ්නවලට මම හිතනවා අවශ්‍ය අවස්ථාවේදී ලබා දියයුතු නිසි විසඳුම නිසි ලෙසට ලබා නොදීම නිසා ඒ තත්වයන් තවත් උත්සන්න වුණා කියලා. යම් ගැටලුවක් වූ අවස්ථාවක ඒකට කල් මරන්නේ නැතිව ලබා දිය යුතු හොඳම විසඳුම ලබා දීම තමයි යුතුකම සහ වගකීම වෙන්නේ පක්ෂයේ නායකත්වයේ. මේ අඩුපාඩුව පහුගිය වතාවල අපි දුටුවා. ඒ නිසාම තමයි පක්ෂය දවසින් දවස අර්බුදයටම ගමන් කළේ. ඕනෑම පක්ෂයක විවිධ මත අදහස් තියෙන්න පුළුවන්. ඒක ප්‍රජාතන්ත්‍රවාදී පක්ෂයක් ගති ලක්ෂණයක්. නමුත් අපේ පක්ෂය තුළ ඇති වූ ප්‍රශ්නවල දී ලබා දිය යුතු සහ අනුගමනය කළ යුතු නිසි ක්‍රියාමාර්ග නිසි ලෙසට සහ නිසි කලට ක්‍රියාත්මක නොවීම පක්ෂය දුර්වල වෙන්නටත් එක් ප්‍රධාන හේතුවක් විදියට මම දකිනවා.
සමගි ජන බලවේගයත් එක්ක යන්න හදන මේ දේශපාලන ගමන මොන වගේ එකක්ද?
රටේ ප්‍රධානතම දේශපාලන පක්ෂ අතර ලොකු ලොකු වෙනස්කම් ඇත්තේ නැහැ. ඉස්සර නම් සාම්ප්‍රදායික වමේ දේශපාලන පක්ෂ සහ දක්ෂිණාංශික දේශපාලන පක්ෂ විදියට යම් පැහැදිලි ඉරක් ගහලා බෙදා වෙන් කිරීමට හැකියාව තිබුණා. නමුත් අද රටේ බොහෝ දේශපාලන පක්ෂවල ප්‍රතිපත්තිය, දර්ශනය සහ වැඩපිළිවෙළ අතර පොඩි පොඩි වෙනස්කම් ඇරෙන්න බොහෝ දුරට සමානයි. ඒ නිසා පවතින ඡන්ද ක්‍රමය තුළ කිසිම දේශපාලන පක්ෂයකට මැතිවරණයක දී තනිව ජයග්‍රහණය කරන්න පුළුවන් කියලා මම නම් කිසිසේතම විශ්වාස කරන්නේ නැහැ. ඒ සඳහා පුළුල් පෙරමුණක් සන්ධානයක් අනිවාර්යයෙන්ම අවශ්‍යයි.
දේශපාලන පක්ෂ විශාල ප්‍රමාණයක් තිබෙන රටක පොදු පෙරමුණු සහ සන්ධාන හැදීමේදී හැම දෙයකින්ම සමානවෙන හැමදෙනාටම 100%ක් එකඟ වෙන්න පුළුවන් වීම ප්‍රායෝගිකව අසීරු කාර්යයක්. හැබැයි අපිට එකට එකතුවෙන්න පුළුවන් පොදු කාරණා විශාල ප්‍රමාණයක් තිබෙනවා නම් එකඟ නොවිය හැකි සුළු ප්‍රමාණය අමතක කරලා, එකට එකතු විය හැකි දේ ගැන කල්පනා කරලා අපි එකට එකතුවෙලා ඒ වැඩ කටයුත්ත කරන්නට ඕනෑ. මා තුළ විශ්වාසයක් තිබෙනවා සමගි ජන බලවේගයේ නායක සජිත් ප්‍රේමදාස මැතිතුමාගේ නායකත්වයෙන් ජනතාවට වින කරන මේ පාලන තන්ත්‍රය වෙනස් කිරීමට පුළුවන්කමක් තිබේය කියලා. අපි ඒ විශ්වාසය තුළ කටයුතු කරනවා. ඒ වෙනුවෙන් අපේ උපරිම ශක්ති ප්‍රමාණයෙන් ඇපකැප වෙලා ක්‍රියා කරනවා.
නමුත් සමගි ජන බලවේගයේත් හිටපු කණ්ඩායම් පවා විසිරිලා තිබෙන්නේ. පක්ෂයක් ලෙස එකට වැඩ කරන බවක් පෙනෙන්නටවත් නැහැ.
ඔබ කියන කාරණය පිළිබඳ සහ තවත් අය දකින දෘෂ්ටිකෝණයන් තුළ එක එක මත අදහස් තිබෙන්නට පුළුවන්. හැබැයි ඒ වගේ පුද්ගලානුබද්ධ සාධක සහ පෞද්ගලික දේශපාලන න්‍යාය පත්‍රයන්ට අනුව කටයුතු කරන අයත් පක්ෂ තුළ සිටිනවා. ඒක වළක්වන්න පුළුවන් දෙයක් නෙමෙයි. නමුත් අද දවසේ අපි දකින පුළුල්තම ආණ්ඩු විරෝධී දේශපාලනය තිබෙන බලවේගය හැටියට තමයි අපි සමගි ජන බලවේගය හඳුනාගෙන තියෙන්නේ. ඒ නිසා දිවයිනේ සෑම ප්‍රදේශයක් තුළම සෑම ආසනයක් තුළම සමගි ජන බලවේගයේ විශාල පිරිසක් සිටිනවා. ඒ ඉන්න තැනට තමයි තව පිරිසක් එකතු කරලා මේක ශක්තිමත් කරන්න පුළුවන්. එහෙම නැතිව පහළම මට්ටමේ තිබෙන තැනකට ජයග්‍රහණය කරා ගෙන යාම ප්‍රායෝගිකව දුෂ්කර කාරණයක්.
දවසින් දවස හිරවෙන මිනිස්සුන්ගේ ජීවිතත් එක්ක රටේ දේශපාලන තත්වය ගැන මොකද හිතෙන්නේ?
බලයට පත්වන ඕනෑම ආණ්ඩුවක් තමන්ගේ සම්පූර්ණ කාලසීමාව තුළම යම් ස්ථාවර මට්ටමකින් පවත්වා ගන්න ඔවුන්ගේ බලය ශක්තිය යොදවලා කටයුතු කිරීම ඉතිහාසයේ ඉදලම සිදුවුණු දෙයක්. හැබැයි ගෝඨාභය රාජපක්ෂ මැතිතුමාට තමයි එය කරගන්න අසීරු වුණේ. එහෙම නැත්නම් හිටපු ජනාධිපතිවරුත් බොහෝ අවස්ථාවල දෙවන වතාවටත් ඉල්ලලා, ජයග්‍රහණය කරලා තියෙනවා. ඒ නිසා මෙවැනි අවස්ථාවක මේ ආණ්ඩුවත් ඒ ආකාරයටම කටයුතු කරනවා.
අද වන විට රට තුළ ප්‍රජාතන්ත්‍රවාදයක් නැහැ. ප්‍රජාතන්ත්‍රවාදී අයිතීන් සියල්ල ආණ්ඩුව උදුරාගෙන තියෙන්නේ. අඩුම තරමේ සාමකාමීව තමන්ගේ විරෝධතා ඉදිරිපත් කරන්නවත් අද ඉඩකඩක් නැහැ. තර්ජනයෙන්, මර්දනයෙන් සහ පීඩනයෙන් ගෙන යන පාලන තන්ත්‍රයක් තමයි අද තිබෙන්නේ. ඒ නිසා අපි දකිනවා මේ ආණ්ඩුවට මේ ඇතිවෙලා තිබෙන අර්බුදයට තාවකාලිකව යම් යම් විසඳුම් ලබා දෙන්න පුළුවන්කම ලැබුණත් සාර්ථක දීර්ඝකාලීන විසඳුමක් ලබා දීමට පුළුවන්කමක් නැහැ. මොකද අද ආණ්ඩුවේ එකම ප්‍රතිපත්තිය වෙලා තියෙන්නේ ණය ගැනීමයි බදු අය කිරීමයි විතරයි. විශේෂයෙන්ම අපනයන ආර්ථිකය පිළිබඳ අබමල් රේණුවක අවධානයක් යොමු කරන්නේ නැහැ. රටේ නිෂ්පාදනය ගැන, සංවර්ධන ක්‍රියාවලිය ගැන, රටේ මිනිසුන්ගේ මූලික අවශ්‍යතා ගැන කිසිම තැකීමක් නැහැ.
කතා කරන විදියටම මේ අර්බුදයට ක්ෂණික විසඳුම් ලබා දීම අසීරු බව අපි දන්නවා. සෑම අවස්ථාවකම රට තව අවුරුදු ගණනාවකින් සංවර්ධනය වෙනවා කියලා කතා කළාට, අද දවසේ ජනතාවට යම් සහනයක් ලබා දීමට නොහැකි වුණොත් ජනතාව කොහොමද ජීවත් වෙන්නේ. අද දවසේ මේ තියෙන මේ අර්බුදය ඉදිරියේ දී තවත් උත්සන්න වෙනවා. මේ අතරේම තමයි ජනාධිපතිතුමා අවුරුදු 25ක් එහා ගැන කතා කරමින් යම් ඉලක්කයන් සහ සිහින මාලිගාවලට මේ රටේ ජනතාව ගෙන යාමට උත්සාහ කරන්නේ. ජනතාව සිහින ලෝකයකට අරගෙන ගිහිල්ලා අද තියෙන ප්‍රශ්න අමතක කරන්න හදනවා නම් ඒක සාර්ථක විසඳුමක් හැටියට මම දකින්නේ නැහැ.
ඔබ සමගි ජන බලවේගයට එකතුවෙන්නේ පවතින පාලන තන්ත්‍රය අවසන් කරන්න හැකියාව සහ ශක්තිය තිබෙනවායැයි තිබෙන බවට විශ්වාසයටනේ. ඒ අර්ථයෙන් නම් ජාතික ජන බලවේගය වටාත් ජනතාව එකතුවෙමින් සිටින බව බැලූ බැල්මට පෙනෙන්නට තිබෙන දෙයක්.
ජාතික ජන බලවේගයේ ප්‍රධාන තේමාව සහ සටන් පාඨය වෙලා තියෙන්නේ පසුගිය අවුරුදු 75ම වෙනත් උදවිය රට පාලනය කළා, ඒ ඒ පාලන තන්ත්‍ර තුළ තමයි මේ තත්ව ඇති වුණේ කියලා. හැබැයි අපි දකිනවා බලය ගිය පාලන තන්ත්‍ර ගණනාවකටම නියමයෙන් සහ අනියමෙන් ජනතා විමුක්ති පෙරමුණත් දායක වුණා කියලා. සමහර අවස්ථාවල පෙරමුණු සන්ධාන තුළ ඇමතිකම් කළා. තවත් අවස්ථාවල එළියෙන් ඉඳිමින් යම් යම් දේවල්වලට දායක වුණා. එහෙම තත්වයක් තුළ ඒ අයට අනෙක් අයට චෝදනා කරලා ඒකෙන් බේරෙන්න පුළුවන්කමක් නැහැ. ජනතා විමුක්ති පෙරමුණ අද ජාතික ජන බලවේගය කියලා වෙනත් නමකින් එන්නේ. ඒ කෙසේ වෙතත් ඔවුන්ගේ ඉතිහාසය ගැනත් මේ රටේ ජනතාව හොඳින් දන්නවා පාලන බලය නැතුවත් යම් යම් අවස්ථාවල කොහොමද කටයුතු කළේ කියන එක. ඒ නිසා මම පෞද්ගලිකව සමගි ජන බලවේගයත් එක්ක තිබෙන විශ්වාසය නිසා තමයි මේ කටයුත්ත කිරීමට ඉදිරිපත් වුණේ.
මේ වෙද්දි හදිසි තත්වයක් ඇතිවෙලා තියෙනවානේ, මිනිස්සුන්ගේ ජීවිත පිළිබඳව. මේ තත්වයෙන් මුදවා ගන්න සමගි ජන බලවේගයට කඩිනම් වැඩපිළිවෙළක් තියෙනවාද?
ජනතාවගේ ජන ජීවිතයට සෘජුව බලපාන විෂය ක්ෂේත්‍ර ගණනාවක් පිළිබඳව ඉදිරියේ දී ඇතිවන ආණ්ඩුවක් තුළ සිදු කිරීමට අවශ්‍ය සැලසුම් මේ වන විටත් සකස් කරලා අවසන්. මම සම්බන්ධ වෙනකොටත් අපි ඒ පිළිබඳව යම් විමසීමක් කරලා ඒ පිළිබඳව යම් දැනුවත් වීමක් ලබා ගත්තා. ඒ ඒ ක්ෂේත්‍ර සම්බන්ධ විශ්වවිද්‍යාල ආචාර්ය මහාචාර්යවරු වගේම හිටපු අමාත්‍යාංශ ලේකම්වරු, දෙපාර්තමේන්තු ප්‍රධානීන් සහ දේශපාලනඥයන් සියලු දෙනාගෙන්ම සැදුම්ලත් කමිටු ගණනාවක් දීර්ඝ කාලයක් තිස්සේ මේ පිළිබඳව දැඩි විමර්ශනයට ලක් කරලා වැඩපිළිවෙළක් හදලා තියෙනවා. වැඩපිළිවෙළක් නැතුව නෙමෙයි සමගි ජන බලවේගය ජනතාව ඉස්සරහට ඇවිල්ලා පාලන බලය ඉල්ලන්නේ.
