ලෝකයේ දියුණු යැයි කියන අධ්‍යාපනයක් ඇති රටවල් සමග සංසන්දනයේදී අප රටේ පාසල් අධ්‍යාපනය සම්බන්ධයෙන් වත්මන් එක් ඇත්තක් වන්නේ දරුවන් වැඩි වසර ගණනක් පාසල් තුළ අධ්‍යාපනය ලැබීමයි. සම්මත පාසලට වයස අවුරුදු පහ සම්පූර්ණ වූ විට ඇතුළත් වන දරුවා උසස් පෙළ විභාගයෙන් පසු පාසලෙන් නික්ම යන්නේ වයස අවුරුදු විස්ස පමණ වෙද්දීය.
වත්මන් අධ්‍යාපන ඇමති සුසිල් ප්‍රේම්ජයන්ත් අධ්‍යාපන ප්‍රතිසංස්කරණ යටතේ ඉදිරියට ක්‍රියාත්මක කරනවා යැයි කියා ඇත්තේ මේ වනවිට එක වසර සිට දහතුන වසර දක්වා ඇති පාසල් අධ්‍යාපනය වසර දොළහක් දක්වා අඩු කරන බවයි. ඒ අනුව පෙර තිබූ පරිදිම උසස් පෙළ විභාගයට දොළහ වසරේදී හෝ ශ්‍රේණියේදී දරුවන්ට මුහුණ දිය හැකි වනු ඇත.
ලෝකයේ දියුණු අධ්‍යාපන ක්‍රම පවතින රටවල වයස අවුරුදු හතේදී පාසල් අධ්‍යාපනය ආරම්භ කර ඔවුහු වයස අවුරුදු දහසය, දහහත වනවිට එය අවසන් කරති. ඉන්පසුව එළඹෙන්නේ ඔවුන්ගේ උසස් අධ්‍යාපන අවස්ථාවයි. එම උසස් අධ්‍යාපන අවස්ථාද ඉතා ඉක්මණින් අවසන් කිරීමේ පහසුකම් එම රටවල පවතී. ඒ නිසාම ඉක්මණින් රැකියාවකට යෑමේ අවස්ථාව එම රටවල දරුවන්ට හිමිවේ.
අප රටේ රජයේ විශ්ව විද්‍යාලවලට යන දරුවන්ගේ එක් චෝදනාවක් වන්නේ වසර තුනක හෝ හතරක කාලයක් හැදෑරීමට තරම් දෙයක් ඔවුන් ඇතුළත් වන පාඨමාලාවල නැති බවයි. බොහෝ විට ඔවුන් නිකරුණේ කාලය ගත කරන බවයි. ඔවුන්ට හැදෑරීමට ඇති දේවල්වලට එතරම් කාලයක් අවශ්‍ය නොවන බවයි.
මෙම තත්වය වෘත්තීය අධ්‍යාපනය සම්බන්ධයෙන්ද අදාළ වේ. අප මේ කියන්නට යන කතාවද එක් පුද්ගලයකුගේ කතාවක් සේ පෙනුණද එවැන්නකි. වෘත්තීය පුහුණු අධිකාරියට අයත් මහරගම පුහුණු මධ්‍යස්ථානය මගින් අර්ධකාලීන පරිගණක ග්‍රැපික් ඩිසයින් පාඨමාලාවක් ආරම්භ කර ඇත. ඒ තෘතිය හා වෘත්තීය අධ්‍යාපන කොමිෂන් සභාවේ අනුමැතිය ඇතිව ජාතික වෘත්තීය සුදුසුකම් හෙවත් කවුරුත් දන්නා ලෙස එන්වීකිව් 4 පාඨමාලාවක් වශයෙන්ය. එම පාඨමාලාවේ විශේෂත්වය වී ඇත්තේ එය මාස 4ක කාලයකින් අවසන් කිරීම සඳහා නිර්මාණය කර තිබීමත්, ඒ සඳහා තෘතිය හා වෘත්තීය අධ්‍යාපන කොමිසමේ අනුමැතිය හිමිවී තිබීමත්ය. මෙම පාඨමාලාව නිර්මාණය කර ඇත්තේ හා එහි පුහුණු උපදේශිකාව වශයෙන් කටයුතු කර ඇත්තේ එස්පීඑම් වීරවර්ධන මහත්මියයි.
එම පාඨමාලාව කණ්ඩායම් දෙකක් සාර්ථකව අවසන් කර එන්වීකිව් 4 සහතිකය ලබා ගනිමින් රැකියා ක්ෂේත්‍රයට පිවිස ඇති අතර වෘත්තීය පුහුණු අධිකාරියේ ෆේස්බුක් පිටුවෙන් හා පුහුණුව ලැබූවන්ගේ දැනුවත් කිරීම් මත එම පාඨමාලාව සඳහා තවත් කණ්ඩායම් දෙකක් ඉල්ලුම් කිරීමෙන් පසු බඳවාගෙන තිබේ. ඉන් එක් කණ්ඩායමකට මේ වනවිටත් මුදල් ගෙවා ඉල්ලුම් කරන ලද පාඨමාලාවට සම්බන්ධ වීමට අවස්ථාව ලැබී නැති අතර අනෙක් කණ්ඩායමට පාඨමාලාව අවසන් කිරීම සඳහා අවසන් විභාගවලට පෙනී සිටීමට නොහැකි වී ඇත.
ඒ තෘතිය හා වෘත්තීය අධ්‍යාපන කොමිසම විසින් 2022 මාර්තු 23 සිට 2025 මාර්තු 22 දක්වා එම අර්ධ කාලීන පාඨමාලාවට ලබාදුන් අනුමැතිය අත්හිටුවීම නිසාය. එම පාඨමාලාව මාස 6ක කාලයකින් සිදුකරන්නේ නම් ඒ සඳහා අවසර දෙන බවට එම කොමිසමේ නිලධාරියකු පුහුණු උපදේශිකාවට බලකෙරී ඇති බව දැන ගන්නට ලැබේ. ඒ සඳහා මෙම පාඨමාලාවට අකමැත්ත පළකරන ශ්‍රී ලංකා වෘත්තීය පුහුණු අධිකාරියේ නිලධාරීන් පිරිසක් මුල් වී ඇතැයිද, එම පුහුණු උපදේශිකාව සම්බන්ධයෙන් වන පෞද්ගලික ඊර්ෂ්‍යාවක් ඊට බලපා ඇතැයිද වැඩිදුරටත් දැන ගන්නට ලැබේ.
එම අකමැත්ත හා ඊර්ෂ්‍යාව සඳහා හේතු වී ඇත්තේ මෙම පාඨමාලාව සාර්ථකව අවසන් වීමත්, එහි සමත් ප්‍රතිශතය ඉහළ අගයක් ගැනීමත්, ඒ නිසාම පාඨමාලාව සඳහා ඉල්ලුම දිනෙන් දින වර්ධනය වීමත්, ඉල්ලුම වැඩිවීම නිසා පුහුණු උපදේශකවරියට අමතරව ලැබෙන මුදල් ප්‍රමාණය වැඩිවීමත්ය. අර්ධ කාලීන පාඨමාලාවලදී වෘත්තීය පුහුණු අධිකාරියට ලැබෙන මුදලින් යම් කොටසක් පුහුණු උපදේශිකාවට ලැබෙන අතර ඉල්ලුම අඩු පාඨමාලාවලදී පුහුණුවන්නන් අඩු නිසා ඒවායේ පුහුණු උපදේශකයන්ට ලැබෙන මුදල් ප්‍රමාණය අඩුවේ.
මෙම අසාධාරණය සම්බන්ධයෙන් ශ්‍රී ලංකා වෘත්තීය පුහුණු අධිකාරිය අයත් අමාත්‍යාංශයේ ඇමතිවරයා වන අධ්‍යාපන ඇමති සුසිල් ප්‍රේම්ජයන්තට එහි වත්මන් හා ආදි සිසුන් විසින් ලිඛිත පැමිණිල්ලක් ඉදිරිපත් කර ඇති අතර ඒ මගින් දැනුම් දී ඇත්තේ එම පාඨමාලාව සම්බන්ධයෙන් සිදුකර ඇති අසාධාරණය ඉවත් කිරීම සඳහා මැදිහත් වන ලෙසය. එමෙන්ම එම පාඨමාලාව රාජ්‍ය ආයතනයක් විසින් එන්වීකිව් 4 මට්ටම ලබාදෙන එකම පාඨමාලාව බවය.
එමෙන්ම මෙම තත්වය සම්බන්ධයෙන් ජනාධිපතිවරයාට මෙන්ම අගමැතිවරයාටද ආදි හා වත්මන් සිසුන්ගේ පැමිණිලි යොමුවී තිබේ. එම පැමිණිලිවල ඇති කරුණු සම්බන්ධයෙන් පිළිතුරු ඉල්ලා ජනාධිපති කාර්යාලයෙන් මෙන්ම අගමැති කාර්යාලයෙන්ද අධ්‍යාපන අමාත්‍යාංශයට මෙන්ම වෘත්තීය පුහුණු අධිකාරියටද යොමු කිරීම් සිදුකර ඇත. ඒ කිසිවකින් මෙතෙක් ප්‍රතිඵලයක් අත්වී ඇති බවක් දැන ගන්නට නැත. දැන ගන්නට ඇති එකම දෙය නම් එම පාඨමාලාව නිර්මාණය කළ හා එහි උපදේශිකාව වශයෙන් කටයුතු කළ එස්පීඑම් වීරවර්ධන මහත්මියව ගම්පහ ප්‍රදේශයේ පුහුණු මධ්‍යස්ථානයකට මාරු කිරීම හා ඇයව එම පුහුණු කටයුතුවලින් ඉවත් කිරීමය.
මෙම සිදුවීමේදී අපට ප්‍රශ්න කිහිපයක් මතුවේ. එකක් වෘත්තීය පුහුණු අධිකාරියට එන්වීකිව් 4 මට්ටමේ කෙටි කාලයකින් අවසන් කළ හැකි පුහුණු පාඨමාලා අනවශ්‍යද යන්නය. පුහුණු වීමේ කාලය අඩුකර පුහුණු වන්නන් ආදායම් උත්පාදකයන් බවට ඉක්මණින් පත් කිරීමට වෘත්තීය පුහුණු අධිකාරිය ඒ නිසාම අකමැතිද යන්නය. දැනට රැකියාවල නිරත පිරිස්වලට පහසු ආකාරයට සති අන්ත, නිවාඩු දිනවල හා ඔන්ලයින් මාර්ගයෙන් සිදුකරන මෙවැනි අර්ධ කාලීන පාඨමාලා අවශ්‍ය නොවේද යන්නය.
එමෙන්ම තෘතිය හා වෘත්තීය අධ්‍යාපන කොමිසම ජාතික වෘත්තීය සුදුසුකමට ගැලපෙන බවට 2025 වර්ෂය දක්වා අනුමැතිය ලබාදුන් පාඨමාලාවක් මේ ආකාරයට අත්හිටුවීමට හේතු කවරේද යන්නද ප්‍රශ්න සහගතය. ඒ සඳහා එක් හේතුවක් වශයෙන් සඳහන් වන්නේ මෙම පුහුණු පාඨමාලාව පැවැත්වූ මහරගම හා ඒ අවට ප්‍රදේශයේ පෞද්ගලික අංශය සිදුකරන එම විෂයට අයත් පාඨමාලා සඳහා ඉඩ ලබාදීමට මෙවැන්නක් සිදුවූ බවයි.
කෙසේ හෝ මුලින් සඳහන් කළ ආකාරයට වෘත්තීය පුහුණුවේදී පවා මෙවන් කෙටි කාලීන පාඨමාලා අහිමිවීමෙන් සිදුවන්නේ පුහුණුවන්නන් අනවශ්‍ය කාලයක් පුහුණු පාඨමාලාවල කාලය ගත කිරීමෙන් ආදායම් උත්පාදකයන් බවට ඉක්මණින් පත්වීමට නොහැකිව ඔවුන්ගේ වටිනා කාලය නාස්තිකර ගැනීම පමණය. දරුවන් පාසල් තුළ ගතකරන කාලය සම්බන්ධයෙන් මෙන්ම මේ සම්බන්ධයෙන්ද විෂය භාර ඇමතිවරයා ලෙස ඇමති සුසිල් ප්‍රේම්ජයන්ත්ගේ අවධානය යොමු වුවහොත් වෘත්තීය පුහුණුවේ අනවශ්‍ය කාලයද අපට අඩුකර ගැනීමට හැකි වනු ඇත.
