බිමල් රත්නායක ජනතා විමුක්ති පෙරමුණ
එක්සත් ජාතික පක්ෂයට හිතවාදී විදියට කටයුතු කරනවායැයි ඇතැම් කණ්ඩායම්වලින් චෝදනා එල්ලවුණත්, ඇතිවෙලා තියෙන දේශපාලන කුමන්ත්‍රණය හමුවේ ජනතා විමුක්ති පෙරමුණ ව්‍යාජ මධ්‍යස්ථභාවයක් නොපෙන්වා ඍජුව කටයුතු කරන්නට තීන්දු කරලා තියෙනවා…..
ප්‍රශ්නය දිහා බලන විදිය අනුවයි වාසිය කාටද වගේ තර්කක නැඟෙන්නෙ. ප්‍රජාතන්ත්‍රවාදයට ගරු කරන කෙනෙක්ට ඔය ප්‍රශ්නය නැඟෙන්නෙන නැහැ. රනිල්ට වාසිද මහින්දට වාසිද කියලා බැලු‍වොත් කාටහරි කියන්න පුලු‍වන් අපි මේ අරගෙන තියෙන ක්‍රියාමාර්ගවලදී මහින්දට අවාසයි රනිල්ට වාසියි කියලා. අපි ගන්න ඕනෑම දේශපාලන ක්‍රියාමාර්ගයක් ගැන ඒක හෝ ඒකේ අනෙක් පැත්ත කියන්න පුලු‍වන්. එහෙත් අපි ක්‍රියාමාර්ගයක් තෝරන්නේ ජනතාවට සහ ජනතා විමුක්ති පෙරමුණට වාසිද අවාසිද කියන කාරණය මත. මේ වෙලාවේ රාජපක්ෂලා බලයට ආපු විදිය ගත්තාම ඒක ප්‍රජාතන්ත්‍රවාදයට අනතුරක්. හෙට රනිල් වික්‍රමසිංහත් මේක පූර්වාදර්ශයක් විදියට පාවිච්චි කරන්න පුලු‍වන්. තියෙන ප්‍රජාතන්ත්‍රවාදයත් නැතිවීම රටට හානියක්. අපි ප්‍රජාතන්ත්‍රවාදය නැතිකම නිසා ඉතිහාසයේ ගොඩක් බැට කෑ පක්ෂයක්.
මේ සිදුවීමට මාසයකට පමණ පෙර අනිද්දා පුවත්පත ඔබ සමඟ සිදුකරපු සංවාදයකදී සාකච්ඡා කරපු මාතෘකාවක් අද ප්‍රායෝගික ලෙස දකින්න ලැබෙනවා. විධායක ජනාධිපති ක්‍රමය අහෝසි කිරීම අත්‍යාවශ්‍ය කාරණයක් නොවන බව ඒ මොහොතේ ප්‍රගතිශීලී බලවේග අතර පවා මතයක් තියෙන බව අපි සාකච්ඡා කළා. අද සියලු‍දෙනාටම විධායක ජනාධිපති ක්‍රමය අහෝසි කිරීමේ වැදගත්කම වැටහී ගිහින් නේද?
මුහුද සන්සුන් වෙලාවට, කාලගුණය සන්සුන් වෙලාවට කුණාටු ගැන කල්පනා නොකර ඉන්න එක සාමාන්‍ය මිනිස්සුන්ගේ ස්වභාවයක්. ඒත් අපි දේශපාලන පක්ෂයක් විදියට ඒ සන්සුන් කාලයේදී කුණාටුවක් ආවොත් මොකද වෙන්නෙ කියලා හිතනවා. එහෙම නැත්නම් කුණාටුව එද්දී හැමෝම විනාශ වෙනවා. අපි විධායක ජනාධිපති ක්‍රමය නිසා ඇති පදම් ගුටි කාපු රටක්. ඉදිරියේදීත් බැට කන්න නියමිත රටක්. මෛත්‍රීපාල සිරිසේනට හරිහැටි ආණ්ඩු බලයක් නොතිබුණ නිසා ටික කාලයක් යනතෙක් ඒකාධිපතියෙක් ලෙස කටයුතු කරන්න ඔහුට බැරිවුණා. අපි හිතන්නෙ නැහැ එහෙම වුණේ මෛත්‍රීපාල සිරිසේනට බලය පාවිච්චි කරන්න ඕනෑ නැති වුණ නිසා කියලා.
ඉතින් අපි විසිවැනි සංශෝධනය ගෙනාවේ ජනාධිපති මෛත්‍රීපාල සිරිසේන හෝ වෙන ඕනෑම කෙනෙක් විධායක ජනාධිපති ක්‍රමය අත්තනෝමතික ලෙස පාවිච්චි කරන බව අපි දැනගෙන හිටිය නිසා. එතකොට ලංකාවෙ සැලකිය යුතු පිරිසක් සහ සිවිල් සමාජයේ ඇතැම් අය පවා කියන්න ගත්තා විධායක ජනාධිපති ක්‍රමය අහෝසි කිරීම අවශ්‍ය නැහැ, දැනටමත් බලතල සීමා කරලයි තියෙන්නේ කියලා. ජනවරමක් නැති, ආණ්ඩු බලයක් නැති ජනාධිපතිවරයෙක්ට කොපමණ විනාශයක් කරන්න පුලු‍වන්ද කියලා මේ වෙලාවේ ජනාධිපති මෛත්‍රීපාල සිරිසේන මහතා පෙන්වා තිබෙනවා. අපි පෙන්වූ අනතුර සැබෑවක් බව ඔප්පු කරලා තියෙනවා. රට ලේ විලක් බවට පත්කිරීමේ තත්වෙකට විධායක ජනාධිපතිවරයා විසින් රට ගෙනල්ලා තියෙනවා. ඇත්තටම විධායක ජනාධිපති ක්‍රමයේ භයානකකම පෙන්වීම ගැන මෛත්‍රීපාල සිරිසේන ජනාධිපතිවරයාට ස්තූතිවන්ත වෙන්න ඕනෑ. හොරට නිදාගන්න අයගේත්, පොඞ්ඩක් මුහුද සන්සුන් වුණාම කුණාටු එන්නෙ නැහැ කියලා හිටපු අයගේත් ඇස් ඇරුණේ ඒ නිසා.
විධායක ජනාධිපති ක්‍රමය කියන්නේ රටට උඩින් සවි කරපු පරමාණු බෝම්බයක්. රට ඕනෑ වෙලාවක පුපුරවලා දාන්න වුණත් පුලු‍වන්. ඒ නිසා වහාම ජනාධිපතිවරණ ගැන කතාන්දර කියන ඒවා පැත්තකින් තියලා විසිවැනි සංශෝධනය ගෙනැල්ලා අහෝසි කරන්න ඕනෑ. නැත්නම් මේ අනතුර මීට වඩා බරපතළ විදියට එන්න පුලු‍වන්. අපි පක්ෂය විදියට ඒකට කටයුතු කරනවා. කලින් සැසිවාරය අහෝසි වීම නිසා පාර්ලිමේන්තු න්‍යායපත්‍රවලින් අපි ඉදිරිපත් කරලා තිබුණු විසිවැනි සංශෝධන යෝජනාව ඉවත් වෙලා තියෙනවා. ඒ නිසා අපි නැවතත් ඒ යෝජනාව ඉදිරිපත් කරන්න බලාපොරොත්තු වෙනවා.
ජනතා විමුක්ති පෙරමුණත් 2015 දි නව ජනවරමක් ලබාග ැනීම වෙනුවෙන් දැඩිව මැදිහත් වුණා. ඒ ජනමතයට පිටුපෑම ගැන අදහස මොකක්ද?
ඇත්තටම පේන්න තියෙන්නෙ අපේ රටේ හැම දේශපාලන නායකයෙක්ම, තමන්ගේ ජනවරම පාවා දීලා තියෙනවා. එහෙත් සීයට සීයක් ජනවරම පාවාදුන්න පළවැනි ලාංකිකයා මෛත්‍රීපාල සිරිසේන. ලෝක ඉතිහාසයේත් මේ වගේ උදාහරණ ගොඩක් තියෙනවායැයි මම හිතන්නෙ නැහැ.
අනෙක් පැත්තෙන් ජනාධිපතිවරයාව බලයට පත්කිරීමේදී ඒකට දායක වුණ ප්‍රධාන පක්ෂය එක්සත් ජාතික පක්ෂය. එජාපයේ නායකත්වයටත් එවැනි සමාජ දේශපාලන ප්‍රතිසංස්කරණයක් පිළිබඳව අවබෝධයක් තිබුණේ නැහැ. විසිඑක්වැනි සියවස ඉල්ලා සිටින රට කුමක්ද, විසිඑක්වැනි සියවස ඉල්ලා සිටින සමාජ දේශපාලන මට්ටම මොකක්ද කියන එක ගැන එජාපයටත් කියැවීමක් තිබුණෙ නැහැ. එජාපයත් ඒ ජනවරම සහමුලින් පැත්තකට දාලා තිබුණා. ඒ වෙනුවට හැත්තෑඅටේ එජාප ආණ්ඩුවයැයි හිතමින් වැඩ කරන්න ගත්තා. ඒකත් මේ අර්බුදයට හේතුවුණා. අනෙක කලින් ආණ්ඩුවට වඩා අඩු වුණත්, යහපාලන ආණ්ඩුව ගේන්නට කටයුතු කරපු සිවිල් සංවිධාන අතර සිටි යම් පිරිසක් යහපාලන ආණ්ඩුවේ ඕනෑ එකක් අනුමත කරන තත්ත්වයට පත්වුණා. මේවා බිස්නස් බවට පත් කරගත්තා. ඇත්තටම එක්සත් ජාතික පක්ෂයට ඕනෑ වුණෙත් තමන් බලයට ආවාට පස්සෙ යහපාලන සංකල්පයේ සාරය මරා දමන්න. ජනාධිපතිවරයාටත් වුවමනා වුණේ ඒක.
ඒත් ජනවරම වෙනුවෙන් සැබෑ ලෙස පෙනී සිටි අය ඒක අත්හැරියේ නැහැ. අද මෛත්‍රීපාල සිරිසේන මහතා මුහුණදීලා තියෙන්නෙ යහපාලන සාරය සම්පූර්ණයෙන් මරා දමන්න නොහැකි වීමේ අර්බුදයට. රනිල් වික්‍රමසිංහ මොන අපරාධ කළත්, මෛත්‍රීපාල සිරිසේන මොන පාවාදීම කළත් තමන් විශ්වාස කරපු යහපාලනය මත පදනම් වූ දේශපාලනය තවමත් විශ්වාස කරන ජනතාවක් ඉතිරි වුණා. හැටදෙලක්ෂය නියෝජනය කරපු විද්වත්, වෘත්තිකයන් පිරිසක් අදටත් ජනවරම රැකිය යුතුය කියන විශ්වාසයේ ඉන්නවා.
දැන් මෛත්‍රීපාල සිරිසේන ජනාධිපතිවරයා පාර්ලිමේන්තුව කටයුතු කළයුතු ආකාරය ගැන උපදෙස් දෙනවා. උපදෙස් වලට අනුව කටයුතු කළාට ස්තූතියි කියලා කියනවා…
ස්ථාවර නියෝග අත්හිටුවන්න වුණේ මෛත්‍රීපාල සිරිසේන ජනාධිපතිවරයා පාර්ලිමේන්තුව කල් තබමින් අත්තනෝමතික ලෙස ක්‍රියාකරන නිසා. පාර්ලිමේන්තුව හිතුමතේ විසුරුවාහරින නිසා. අපි හිතුවා මේ ප්‍රතිපත්ති විරහිත පුද්ගලයාගෙන් අපට විශ්වාසය බලාපොරොත්තු නොවිය හැකි බව. වැදගත්ම දේ තමයි දැන් ආණ්ඩුවයැයි කියාගන්නා කණ්ඩායමට පාර්ලිමේන්තුවේ බහුතරයක් තියෙනවාද කියන එක සොයාබැලීම. මේ නිශ්චිත මොහොතේ තිබෙන ප්‍රධානම ප්‍රශ්ණය ඒක. පාර්ලිමේන්තුවේ මන්ත්‍රීවරු හඬින්, නැඟිටලා වගේම අත්සන් කරලාත් රටට පෙන්වුවා මේ ආණ්ඩුවට බහුතර බලයක් නැති බව.
මෛත්‍රීපාල සිරිසේන මහත්තයාට පාර්ලිමේන්තුව කටයුතු කළ යුතු ආකාරය කියන්න කිසිම අයිතියක් නැහැ. පාර්ලිමේන්තුවේ යෝජනාවක් සම්මත වෙලා ඒක දැනුම්දුන්නාට පස්සෙ ටිපෙක්ස් කළාද, අත්සන් නැද්ද කීම ඇතුළුව ඔහු කළ දේවල් බාල වර්ගයේ වැඩ. විශ්වාසභංගය අත්සන් කෙරෙව්වෙත්, ඒක සකස් කළේත්, ඒක කථානායකවරයාට බාරදුන්නේත් අපි. මන්ත්‍රීවරුන් 122 ම එදින උදේ තමයි අත්සන් කළේ. වංචනික විදියට අත්සන් කළානම් එවැනි මන්ත්‍රීවරයෙක් ලව්වා මාධ්‍ය සාකච්ඡාවක් පවත්වලා නීතිමය ක්‍රියාමාර්ග ගන්න ජනාධිපතිවරයාට පුලු‍වන්. අනෙක් කාරණය තමයි පාර්ලිමේන්තු සම්ප්‍රදායන් ඉෂ්ඨ කරන්න බැරි ආකාරයෙන් තමයි මෛත්‍රීපාල සිරිසේන කණ්ඩායම හැසිරෙන්නේ. කවදාවත් අහපු නැති ජාතියේ විශාල බාධාකිරීම් කරද්දී පාර්ලිමේන්තු ප්‍රජාතන්ත්‍රවාදය රකින්න පුලු‍වන් උපරිම ආකාරයට තමයි කථානායකවරයාත් කටයුතු කළේ. අනෙක ලෝකයේ පාර්ලිමේන්තු හැම එකේම ඡන්දය ගන්න තියෙන ප්‍රධාන ක්‍රමය තමයි හඬින් ගන්න එක. අපි ඉල්ලු‍වා නමෙන් ගන්න ඕනෑ කියලා.
ආණ්ඩුව කියන්නේ ජනාධිපතිවරයා නෙවෙයි. විධායකය, ව්‍යවස්ථාදායකය, අධිකරණය කියන ආයතන තුන. මේ මොහොතේ ප්‍රධාන ධාරාවේ මාධ්‍ය ආයතන සියල්ලම පාහේ පැහැදිළිවම ව්‍යස්ථාදායකය ප්‍රතික්ෂේප කරමින් විධායකයට ඕනෑ විදියට ක්‍රියාත්මක වෙනවා නේද?
ඔබ කී කාරණයට සම්පූර්ණයෙන් එකඟයි. ඒකේ මූලධාර්මික වැරැද්ද තියෙන්නේ මෛත්‍රීපාල සිරිසේනගේ පමණක් නෙවෙයි. මේ ව්‍යවස්ථාව හදලා තියෙන්නේම විධායකයට ව්‍යවස්ථාදායකයත් අධිකරණයත් යට කරලා. ඒ දේ තමයි තාම දුවන්නෙ. මෛත්‍රීපාල සිරිසේනට ඒ පිස්සුව නටන්න හිතෙන්නේ ඒක ඇතුලේ. ඕනෑම දේශපාලනඥයෙක් ඡන්දයෙන් බලයට පත්වීමට වඩා බරපතළ දේ තමයි බලහත්කාරයෙන් බලය අල්ලාගැනීම. ඕනෑම පාලකයෙක් නීතිවිරෝධීව බලයට ආවාට පස්සේ බලය නැතිවීම ගැන දෙගුණයක් බියෙන් ඉන්නවා. ඡන්දෙයන් ආවාට වඩා තමන්ගෙ තනතුර නැතිවේවි කියලා එවැනි මොහොතක බයෙන් ඉන්නෙ. මහින්ද රාජපක්ෂ මේ බලය අල්ලාගත් විදියට එක්ක ඔහුට කටයුතු කරන්න වෙන්නේම බලහත්කාරය දෙගුණයක් පාවිච්චි කරලා. තමන්ට ජනවරමක් නැති බව ඔහු දන්නවා. එතකොට ඩෝසර් වෙන්නේ ජේවීපී එකයි, වෘත්තිය සමිතියි, මේකට සම්පූර්ණයෙන් විරුද්ධ වෙන මාධ්‍ය ආයතනයි පමණක් නෙවෙයි. මර්දනය එල්ලවෙන්නෙ මේ කුමන්ත්‍රණයට විරුද්ධව පැහැදිළිවම කටයුතු කරන අයට විතරක් නෙවෙයි. මේකට හුරේ දාන අයටත් මර්දනය එල්ලවෙනවා. රාජපක්ෂට 2014 වඩා මර්දනය දැන් අවශ්‍ය වෙනවා. එදා රාජපක්ෂට නැවුණේ ඉණෙන් නම්, අද පසඟ පිහිටුවලා වඳින්න වෙනවා. ටිකක් කොන්ද පෙන්වන්න හැදුවත් පහර වදින්න ඉඩ තියෙනවා.
එදාත් රාජපක්ෂලා තමන්ට ඉතාම හිතවත්ව හිටපු සියත මාධ්‍ය ජාලයට බෝම්බ ගැහුවා. සියත කියන්නෙ රාජපක්ෂලාගේ නිවස පසුපස තිබුණු මාධ්‍ය ආයතනයක්. ඒ වෙද්දී හිටපු හිමිකරු රාජපක්ෂලා ළඟ වැඩකරපු නිලධාරියෙක්. අද රාජපක්ෂලාට විරුද්ධව එළිපිටම කඬේ යන පෞද්ගලික විද්‍යුත් නාලිකා සහ පුවත්පත් තියෙන්නේ. අනිවාර්යයෙන්ම ඒවායේ බෙලි උඩින් රාජපක්ෂලා යනවා. කිසිම සැකයක් තියාගන්න අවශ්‍යතාවයක් නැහැ. පාලකයා ඒකාධිපති වෙනකොට අසීමාන්තික ලෙස ඔහුට සමපාත වෙන්න වෙනවා. කිසිම රටක එක සීමාවකින් එහාට ඒ අනුගත වීම දරාගන්න බැරිවෙනවා. අද ඉතාම තක්කඩි කළු මාධ්‍ය ජාලයක් තියෙනවා. මෛත්‍රීපාල සිරිසේන කරපු දේ තරම්ම මාධ්‍ය කරමින් සිටින දේ රටට හානිදායකයි. ඒ නිසා අපි කියනවා මාධ්‍යවේදීන්වත් මේ රටට මහා පරිමාණ අපරාධයට සම්බන්ධ නොවී ඉන්න කියලා. මම කියන්නේ මාධ්‍යවේදීන් ඔය තක්කඩි මාධ්‍ය ආයතනවලින් ඉල්ලා අස්වෙන්න ඕනෑ කියලයි. ඔය ලේ වැකි කුමන්ත්‍රණයට උදව් කරන හැම බලවේගයක්ම සම්පූර්ණයෙන්ම පරාජයට පත්කිරීම අධිෂ්ඨාන කරගන්න ඕනෑ.
ඉදිරියේදී විය හැකි දේවල් ගැන ඔබේ තක්සේරුව මො නවගේද?
ඔවුන්ගේ සැලැස්ම තමයි මේක බලහත්කාරයෙන් අල්ලගෙන ඉඳලා ජනමතය මැතිවරණයක් දක්වා තල්ලු කිරීම. ජ.වි.පෙ. විශ්වාස කරනවා මේ තත්වය යම් ප්‍රමාණයකට සමනය කරන්න පුලු‍වන් මැතිවරණයකින් තමයි. ඒත් ත්‍රාඩ කල්ලියක් බලහත්කාරයෙන් බලය අල්ලාගෙන කරන මැතිවරණයක් සාධාරණ එකක් වෙන්නේ නැහැ. ඒක ඡන්ද මංකොල්ලයක් වේවි. ඒ නිසා ජ.වි.පෙ. දරණ ස්ථාවරය තමයි මේ හොර කල්ලිය ආණ්ඩුවෙන් එළවලා දාලා, සාධාරණ තත්ත්වයක් යටතේ මැතිවරණයක් එන එක තමයි හොඳ කියලා. ඒත් දැන් මෙයාලාගේ අරමුණ වෙන්නේ තව අල්ලාගෙන ඉඳලා, මිනිස්සුන්ව විඩාවට පත් කරලා ඡන්දෙකට යන එක. එහෙම වුණොත් රටේ විශාල දේශපාලන, සමාජ, ආර්ථික ගැටලු උද්ගත වෙයි.
දැන් කුමන්ත්‍රණය 99% ක් පරාද වෙලා තියෙන්නෙ. ඒක අධිකරණයේදී පරාජය වුණා. පාර්ලිමේන්තුවේදී පරාජය වුණා. ඒ වගේම ජනතාව ඉදිරියේත් පරාජය වුණා. ඔය මිරිස්කුඩු දේශපාලනයට ජනතාව විරුද්ධ වුණා. ඒ නිසා අපි දිගටම දේශපාලන වශයෙන් මැදිහත් වෙමින් කුමන්ත්‍රණය පරාජය කළහැකිය කියන විශ්වාසයේ ඉන්නවා. නීතිවිරෝධී ඇමතිවරුන් යැයි කියාගන්න අය මහජන මුදල් නීතිවිරෝධී විදියට වියදම් කරන්නට ගන්නා උත්සාහය පාර්ලිමේන්තුවේදී පරාජය කරන්න ඉදිරියේදී කටයුතු කරනවා.■
