ලංකා ඛනිජ තෙල් නීතිගත සංස්ථාවට අයත් මාතර පොල්හේන ප්‍රදේශයේ ඇති සංචාරක බංගලාව වෙන් කිරීම එහි සේවකයින්ට තහනම් කර ඇමතිවරයාගේ පරිහරණය සඳහා පමණක් ලබාදී ඇතැයි වාර්තාවේ.
නිවාඩු දිනවලදී එහි සේවකයින විසින් මෙම සංචාරක බංගලාව මෙන්ම රටේ අනෙකුත් ප්‍රදේශවල පිහිටි එම ආයතනයට අයත් සංචාරක බංගලා වෙන්කර ඒවායේ නවාතැන් ගැනීමට යන බවත්, පොල්හේන සංචාරක බංගලාව පමණක් මේ දිනවල වෙන් කිරීම්වලට ලබානොදෙන බවත්, ඒ පිළිබඳව විමසීමේදී ඇමති කංචන විජේසේකරගේ පරිහරණය සඳහා එය වෙන්කර ඇති බැවින් සේවකයින්ට වෙන් කිරීම් ලබානොදෙන ලෙස එහි කළමනාකාර අධ්‍යක්ෂවරයා විසින් වෙන් කිරීම් නිලධාරියාට දන්වා ඇති බවත් එහි සේවකයෝ පවසති.
මේ වනවිට ඇමතිවරයාගේ දේශපාලන ආධාරකරුවන් එම සංචාරක බංගලාවේ නවාතැන් ගෙන සිටින බවත්, ඔවුන්ගේ පරිහරණය සඳහා මයික්‍රවේව් උදුන් ඇතුළු භාණ්ඩ මිලදී ගනිමින් එම සංචාරක බංගලාවට ලබාදෙමින් පවතින බවත් එහි සේවකයෝ වැඩිදුරටත් පවසති.
