ව්‍යවස්ථානුකූලව ලබන වසරේ එළඹීමට නියමිත ජනාධිපතිවරණයට පෙර පාර්ලිමේන්තුව විසුරුවා හැර මහ මැතිවරණයක් පැවැත්වීම කෙරෙහි ජනාධිපතිවරයාගේ හා ආණ්ඩුවේ අවධානය යොමු වී ඇතැයි වාර්තාවේ.
ඒ සඳහා හේතු වී ඇත්තේ ජනාධිපතිවරණයක් පවත්වා වත්මන් ජනාධිපති රනිල් වික්‍රමසිංහ හෝ ආණ්ඩුව වෙනුවෙන් ඉදිරිපත් වන අපේක්ෂකයා පරාජයට පත්වීමෙන් පසු පවත්වන මහ මැතිවරණයකදී ජනාධිපතිවරණ පරාජයත් සමග ඉතා විශාල පරාජයකට ආණ්ඩුවට හා ජනාධිපතිවරයාගේ පක්ෂයට මුහුණ දීමට සිදුවෙතැයි කර ඇති ගණනය කිරීමය. එහෙත් මුලින් මහ මැතිවරණයක් පැවැත් වුවහොත් ඉතා දරුණු පරාජයකින් බේරීමේ අවස්ථාව තිබෙන බව ගණන් බැලීම වී තිබේ.
එමෙන්ම මුලින් මහ මැතිවරණයක් පවත්වා විපක්ෂයේ කවර කණ්ඩායමක් බලයට පත් වුවද, ඔවුන්ට වත්මන් ජනාධිපතිවරයා යටතේ ආණ්ඩුව පිහිටුවීමට සිදුවීමත්, රටේ හා කැබිනට් මණ්ඩලයේ ප්‍රධානියා ලෙස ජනාධිපතිවරයාට ඊලග ජනාධිපතිවරණය තෙක් කටයුතු කිරීමට අවස්ථාව ලැබීමත්, 19 වැනි ආණ්ඩුක්‍රම ව්‍යවස්ථා සංශෝධනය මෙන් අමාත්‍යවරුන් පත් කිරීම සහ ඉවත් කිරීම් සම්බන්ධයෙන් වත්මන් වත්මන් 20 වන සංශෝධනය යටතේ අගමැතිවරයාට බලයක් නොතිබීමත් මෙහිදී අවධානයට යොමු වී තිබේ.
පසුගිය මහ මැතිවරණයේදී අන්ත පරාජයට පත්වූ එක්සත් ජාතික පක්ෂයේ ඊලග නායකත්ව මට්ටමේ සිටින පිරිස් ජනාධිපතිවරයාගෙන් ඉල්ලා ඇත්තේ ද මුලින් මහ මැතිවරණයක් පවත්වන ලෙස වන අතර ඒ ජනාධිපතිවරණ පරාජයකින් පසු ඔවුන්ට පාර්ලිමේන්තුවට තේරී පත්වීම කළ නොහැකි බවට කරන ලද ගණනය කිරීමය. ඔවුන් ජනාධිපතිවරයාට අවධාරණය කර ඇත්තේ එම පක්ෂයේ යම් නියෝජනයක් හෝ පාර්ලිමේන්තුව තුළ පවත්වා ගැනීමට නම් මුලින් මහ මැතිවරණය පවත්වන ලෙසය.
එසේම ජනාධිපතිවරයා ඊලග ජනාධිපතිවරණයට ඉදිරිපත් වීම සැක සහිත වීමද, ආණ්ඩුව වන ශ්‍රී ලංකා පොදුජන පෙරමුණ ජනාධිපතිවරයාට සහයෝගය ලබානොදී ඔවුන්ගේ අපේක්ෂකයකු ජනාධිපතිවරණයට ඉදිරිපත් කරාවිද යන සැකයද මෙම මහ මැතිවරණ ඉල්ලීමට හේතු වී තිබෙන බව වදුරටත් වාර්තාවේ.
