චන්දිම වීරක්කොඩිගේ වරප්‍රසාද චෝදනාවේ කිසිදු පදනමක් නැහැ

සරත් වීරසේකර කථානායකට දන්වයි.
සරත් වීරසේකර විසින් කථානායකට යැවූ සම්පූර්ණ ලිපිය පහත සඳහන් පරිදි වේ.
ගරු කථානායකතුමනි,

ජාතික ආරක්ෂාව පිළිබඳ ආංශික අධීක්ෂණ කමිටු සභාපති ලෙස මා විසින් රාජ්‍ය ආරක්ෂක අමාත්‍යතුමාට 2023.10.19 වන දින යවන ලද ලිපිය සම්බන්ධයෙන් පාර්ලිමෙන්තු වරප්‍රසාද කඩවී ඇතැයි චන්දිම වීරක්කොඩි මන්ත්‍රීතුමා පැමිණිලි කොට තිබේ. ඔහු විසින් පාර්ලිමේන්තුවේදී කරන ලද සම්පූර්ණ ප්‍රකාශය “අනිද්දා” පුවත්පතෙහි “සරත් වීරසේකර ලියුම ලිවීමෙන් පාර්ලිමේන්තු වරප්‍රසාද කඩලා” යනුවෙන් සම්පූර්ණයෙන් පළවී ඇති අතර, එදින ඔහු මීට පෙර එම පුවත්පතෙහි පළ වී තිබූ “සරත් වීරසේකරට අහුවුණු ආංශික කාරක සභා දැලි පිහිය” නැමති ලිපියද ඉදිරිපත් කරන ලදි. චන්දිම වීරක්කොඩි මන්ත්‍රීවරයා එමගින් පාර්ලිමේන්තුව සහ ජනතාව නොමග යැවීමට උත්සාහ කර ඇති බැවින් මෙසේ ඊට ප්‍රතිචාර දැක්වීම සුදුසු යැයි සිතමි.

ප්‍රධාන වශයෙන් ආරක්ෂක අමාත්‍යාංශයේ සහ ත්‍රිවිධ හමුදාවේ ප්‍රගති වාර්තා සලකා බැලීම සඳහා ආංශික අධීක්ෂණ සභාව ඔක්තෝබර් මස 05 වන දින රැස්විණ. ඒ සඳහා ආරක්ෂක ලේකම්තුමා ඇතුළු ත්‍රිවිධ හමුදාපතිවරු ජ්‍යෙෂ්ඨ හමුදා නිලධාරීන්ද ආරක්ෂක අමාත්‍යාංශයේ ජ්‍යෙෂ්ඨ සිවිල් නිලධාරීන්ද විදේශ කටයුතු පිළිබඳ අමාත්‍යාංශයේ ජ්‍යෙෂ්ඨ නිලධාරීන්ද සහභාගී විය.

මෙහිදී “රඹුක්කන වෙඩි තැබීමේ සිද්ධිය” සහ ඊට දින 20 කට පසු “අරගලය” කාලය තුළදී හමුදාව සහ පොලීසිය සන්නද්ධව සිටියදී ඔවුන් සමීපයේම පාර්ලිමේන්තු මන්ත්‍රී අමරකීර්ති අතුකෝරාල සහ ඔහුගේ ආරක්ෂක නිලධාරී මැර පිරිසක් විසින් අමානුෂික ආකාරයෙන් ඝාතනය කළ සිද්ධිය පිළිබඳවද දීර්ඝ ලෙස සාකච්ඡා කරන ලදී. එම ඝාතනය සිදුවූ දිනයේම නිවාස / දේපල ගිණිතැබීම්, මනුෂ්‍ය ඝාතන, මැර ප්‍රහාර සිදුවන විට පොලීසිය සහ හමුදාව ඒවා වැලැක්වීමට කිසිදු පියවරක් නොගැනීමට හේතූන්ද දිර්ඝ වශයෙන් සාකච්ඡා කළ අතර අවසානයේ ඒ සම්බන්ධයෙන් රාජ්‍ය ආරක්ෂක අමාත්‍යතුමාට නිල වශයෙන් ලිපියක් ලිවීමට සභාව තීරණය කරන ලදී. එසේම බාහිර ආයතන මගින් කරන්නා වූ ජාතික ආරක්ෂාවට බලපාන පැමිණිලි සම්බන්ධයෙන් පියවර ගැනීමට තීරණය කරන ලදී. (ඔක්තෝබර් මස 05 වන දින සභා වාර්තාවේ එම තීරණය සඳහන්ව ඇත)

ඒ අනුව මා විසින් උක්ත ලිපිය සකස් කරන ලද අතර එම කෙටුම්පත කමිටු සාමාජිකයන්ගේ දැනගැනීම / අනුමැතිය සඳහා ආංශික අධීක්ෂණ කොමිටුවේ වට්ස්ඇප් ගිණුමට ඇතුලත් කරන ලදී.

එම වට්ස්ඇප් ගිණුමේ සටහන් මගින් තහවුරු වන පරිදි කමිටු සාමාජික මන්ත්‍රීන් බහුතරයක් එම ලිපිය කියවා ඇත. එහි සඳහන්ව ඇති ධනාත්මක සටහන් අතර විරුද්ධ වී තිබුණේ චන්දිම වීරක්කොඩි මන්ත්‍රීවරයා පමණි. එහිදී ඔහු අසා තිබුණේ මා එම ලිපිය යවන්නේ කුමන ස්ථාවර නියෝගයක් යටතේද කියාය.

ගරු කථානායකතුමනි, ජාතික ආරක්ෂාව පිළිබඳ ආංශික අධීක්ෂණ කමිටුව ලෙස අපගේ යුතුකම වනුයේ ජාතික ආරක්ෂාවට සෘජුව අහිතකර ලෙස බලපාන කරුණක් වේ නම් වහාම එය ආරක්ෂක අමාත්‍යාංශයට දැන්වීමයි. මන්ද එම තත්වය දිගටම පැවතුණහොත් තවත් විනාශයක් වීමට ඉඩ ඇති බැවිනි.

රඹුක්කන වෙඩි තැබීමේ සිද්ධිය සම්බන්ධයෙන් මා විසින් රාජ්‍ය ඇමතිගෙන් ඉල්ලා ඇත්තේ ඒ සියළු කරුනු සම්බන්ධයෙන් අවධානය යොමු කොට සුදුසු ක්‍රියා මාර්ග ගන්නා ලෙසය.

එදින කළහකාරීන් විසින් ඉන්ධන බවුසර් දෙකක් නවත්වා රියැදුරන්ට පහර දී එලවා රේල්පාර හරස් කොට එම බවුසර් දෙක තමන් භාරයට ගෙන ඇත. කලහකාරීන්ගෙන් කොටසක් ඉන්ධන හලට දැඩි ලෙස අලාභහානි කරමින් සිට ඇති අතර, (පොම්ප තුනක් ගිනි තබා ලක්ෂ 40 ක පමණ අලාභයක් කර ඇත) අනෙක් අය බවුසර්වල ටයර් කපමින් බට ගලවමින් එයට ගිනි තැබීමට සැරසී ඇත. (වීඩියෝ පටවලින් එය පැහැදිලි වේ) එය නැවැත්වීමට සැරසුනු පොලීසියට ගල් මුල්වලින් පහර දී ඇති අතර ජ්‍යෙෂ්ඨ පොලිස් අධිකාරී, සහකාර පොලිස් අධිකාරී ඇතුළු 20 කට බරපතල තුවාල සිදුවී තිබුනි.

කඳුලු ගෑස් ප්‍රහාර එල්ල කලද පිරිස විසිර ගොස් නැත. අවසානයේ එක් බවුසරයක තෙල් ටැංකියක මූඩිය කැඩීමට මැරයින් සමත් වූ අතර එයින් තෙල් බිංදු වෑහෙන්නට පටන් ගෙන ඇති අතර, එකෙකු ලයිටරයක් පත්තු කිරීමට සැරසින. ජ්‍යෙෂ්ඨ පොලිස් අධිකාරී කීර්තිරත්න එම පුද්ගලයාට දනහිසෙන් පහලට වෙඩි තැබීමට අණ කලේ ඒ මොහොතේය. මැරයින් පලාගොස් ඇත්තේ එම වෙඩි තැබීමෙන් පසුව වන අතර, ඉන්ධන පිරවූ බවුසර් දෙකට ගිණි ඇවිලීම නතර කර ඇත්තේ ඒ අයුරිනි. (මෙම බවුසර් දෙකෙහිම ලීටර් 39,000 බැගින් පෙට්‍රල් තිබී ඇත)

වීඩියෝ පටවලින් සනාථ වන පරිදි එම සිද්ධිය වන අවස්ථාවේ 3,000 කට අධික පිරිසක් එහි රැඳී සිට ඇත. එක් බවුසරයක් හෝ ගිනි ඇවිලී පිපිරී ගියා නම් මිනිසුන් විශාල සංඛ්‍යාවක් මිය යන අතර, පලාතේ නිවාස / වෙළඳසැල්ද විනාශ වනු ඇත. ජ්‍යෙෂ්ඨ පොලිස් අධිකාරීවරයා වලකා ඇත්තේ එවන් විනාශයකි.

මෙවන් භයානක අවස්ථාවකදී එය වලක්වාලීමට පොලීසියට මරණය දක්වා ක්‍රියා කල හැකි බැව් දණ්ඩ නීති සංග්‍රහයේත්, අපරාධ නඩු විධාන සංග්‍රහයේත්, පොලිස් දෙපාර්තමේන්තුවේ ් 19 නියෝගවලත් පැහැදිලිව සඳහන්ව තිබේ. එසේනම් ජේ.පො.අ. කීර්තිරත්න ලබාදී ඇත්තේ නීත්‍යනුකූල නියෝගයකි. නමුත් සිදුවූයේ කුමක්ද ? ඔහුට සහ තවත් පොලිස් නිලධාරීන් තුන් දෙනෙකුට මාස 05 ක් රිමාන්ඩ් සිරභාරයේ සිටීම සහ තම පුද්ගලික මුදල් වැය කරමින් නීතීඥ සහාය පැතීමය.

මෙම සිද්ධියන් දින 20 කට පසු “අරගලය” පැවැත්වුනු අවස්ථාවේ මැයි 09 වන දින මැරයින් විසින් පහත සඳහන් ම්ලේච්ඡ ක්‍රියා සිදුකරන ලදී.
අහිංසක කාන්තාවන් / මිනිසුන් බේරේවැවේ ගිල්වීම් (සමහර අයගේ ඇස් අන්ධ වී ඇත), බස්වල ගමන් ගත් මගීන් බස්සවා, කාන්තාවන් නිරුවත් කොට අමානුෂික අයුරින් පහරදීම, ගරු මන්ත්‍රී අතුකෝරාල ඇතුළු 08 දෙනෙකු අමානුෂික අයුරින් ඝාතනය කිරීම., නිවාස / දේපල 150 කට වැඩි ප්‍රමාණයක් ගිනි තබා විනාශ කිරීම.

මේ සියළු දේ වන විට ඉතිහාසයේ කෙදිනකවත් සිදුනොවුනු පරිදි හමුදාව සහ පොලීසිය සන්නද්ධව සිටියත් ඒවා වැලැක්වීමට කිසිදු පියවරක් නොගන්නා ලදී. එයට හේතුව ඊට දින 20 කට පෙර මනුෂ්‍ය / දේපල විනාශයක් වැලැක්වීමට නීත්‍යානුකූල ලෙස වෙඩි තැබීමට අණ දුන් පොලිස් නිලධාරියෙක් ඒ වන විටත් කිසිදු පිළිසරණක් නැතිව රිමාන්ඩ් සිරභාරයේ සිටීමද? නීතිමය ප්‍රතිපාදන අනුව ක්‍රියා කොට උක්ත ඝාතන / දේපල හානි වැලැක්වුවහොත් තමන්ටත් ජ්‍යෙෂ්ඨ පොලිස් අධිකාරිවරයාට මෙන් සිරගෙයි ලැගීමට වනු ඇතැයි හමුදාව සහ පොලීසිය සිතූ නිසාද?

ජේ.පො.අ. කීර්තිරත්න ඇප ලබා රිමාන්ඩ් භාරයෙන් පිටතට විත් මෙතෙක් තම පුද්ගලික මුදලින් නීතිඥයින් සඳහා ලක්ෂ ගනන් වැය කරන බැවින් ඉදිරියේදීත් මෙවැනිම විනාශයක් සිදුවුව හොත් හමුදාව සහ පොලීසිය නැවත වරක් එය වැලැක්වීමට කිසිදු පියවරක් නොගෙන සිටීද?

එසේ තීරණාත්මක අවස්ථාවක පොලීසිය සහ හමුදාව අකර්මන්‍ය වීම ජාතික ආරක්ෂාවට තර්ජනයක් නොවන්නේද? එසේනම් එම තත්වය රාජ්‍ය ආරක්ෂක ඇමතිතුමාගේ අවධානයට යොමු කොට සුදුසු පියවර ගන්නා ලෙස දැන්වීම ස්ථාවර නියෝග ප්‍රකාරව දඬුවම් ලැබිය යුතු වරදක්ද ?

මැයි මස 09 වන දින සිදුවූ මනුෂ්‍ය ඝාතන / දේපල, නිවාස විනාශ කිරීම් සම්බන්ධයෙන් ජනාධිපතිතුමා පත්කල කරන්නාගොඩ කොමිසම පවා කරුනු දක්වා සිටින්නේ එම අවස්ථාවේ පොලීසිය සහ හමුදාව නීතිය ක්‍රියාත්මක නොකිරීමට එක් හේතුවක් වූයේත් “රඹුක්කන” සිද්ධියේදී නීතිය නිසි පරිදි ක්‍රියාත්මක කල පොලිස් නිලධාරීන් වෙනුවෙන් රජය පෙනී නොසිටි නිසා බවය.

කරුණු එසේ වන විට ඇමෙරිකානු තානාපතිනිය ලෝකයට ප්‍රකාශ කරන්නේ පොලීසිය නිරායුධ උද්ඝෝෂකයින්ට වෙඩි තැබීම පිළිබඳ පරීක්ෂණයක් කල යුතු බව සහ සාමකාමී උද්ඝෝෂන කිරීමට ජනතාව සතු අයිතිය තහවුරු කිරීම කල යුතු බවත්ය.

පාරේ ටයර් දමා පුච්චමින්, මහා මාර්ගය සහ දුම්රිය මාර්ගය හරස් කරමින් ඉන්ධන හල් විනාශ කරමින්, තෙල් බවුසර්වල ටයර් කපමින් එයට ගිනි දැල්වීමට තැත්කරමින්, පොලීසියට ගල් මුල් ප්‍රහාර එල්ල කරමින් කරන ලද උද්ඝෝෂනය සාමකාමීද නැද්ද යන වග තානාපතිනිය හොඳින් දනී. එසේ දැනගෙන මෙවන් ප්‍රකාශ නිකුත් කිරීම හිතාමතාම පොලීසිය සහ රජය පිළිබඳව වැරදි ප්‍රතිරූපයක් මවා පෑමකි. ආරක්ෂක අමාත්‍යාංශයට ඇයට ඒ පිළිබඳව අනතුරු ඇඟවීම සුදුසු බැව් දන්වා සිටියේ එබැවිනි. එසේ එවන් සාවද්‍ය ප්‍රකාශයකට විරුද්ධ නොවීම අපේ නිවට බව විදහා පාන්නක් වන බැවිනි.

මානව හිමිකම් කොමිසම විසින් ඒ සම්බන්ධව පත් කල පරීක්ෂණ මණ්ඩලය මා ද ඉතා ගරු කරන ජනාධිපති නීතිඥ ප්‍රසාන්ත ද අල්විස් ඇතුළු කීර්තිමත් විද්වතුන්ගෙන් සමන්විත වූ බැව් මා දැන නොසිටියෙමි. එබැවින් මගේ ලිපියෙන් ඔවුන් යම් අපහසුතාවයකට පත්වූයේ නම් මා අතිශයින් කනගාටු වෙමි.

නමුත් එම පරීක්ෂණ මණ්ඩලයද උද්ඝෝෂකයන්ගේ කලහකාරී හැසිරීම සහ තෙල් බවුසරයට ගිනි තැබීමට සැරසීම පිළිබඳව වීඩියෝ පටවලින් තහවුරු වන බව සඳහන් කර ඇත. එසේ නම් කඳුලු ගෑස් ප්‍රහාර ඇතුළුව කලහකාරීන් විසුරුවා හැරීමට ගත් සියළු ක්‍රියාවලින් පසුව ගල්මුල් ප්‍රහාරවලටද ලක්ව අවසානයේ, සියළුම අදාල නීති සංග්‍රහවලට අනුව මහත් විනාශයක් වලක්වාලීමට වෙඩි තැබීමට අණ කිරීම නීති ප්‍රකාර නියෝගයකි. එබැවින් ඔවුන් විසින් “නීතිවිරෝධී ලෙස වෙඩි තැබීමට අණ කල ජ්‍යෙෂ්ඨ පොලිස් අධිකාරීවරයාට විනයානුකූල පියවර ගන්නා ලෙස” කරන ලද නිර්දේශයට ආංශික අධීක්ෂණ කාරක සභාව එකඟ නොවන්නේ එබැවිනි. මන්ද එය මහා විනාශයක් වැලැක්වූ නීත්‍යනුකූල නියෝගයක් බැවිනි.

චන්දිම වීරක්කොඩි මන්ත්‍රීවරයා මා විසින් උසාවිය ඉදිරියේ විභාග වෙමින් පවතින නඩුවක තීරණයක් ප්‍රකාශ කොට ඇතැයි පවසයි. නමුත් තවම ඒ සම්බන්ධයෙන් නඩු කටයුත්තක් නොපවතී. පොලිසිය විසින් අධිකරණයට බී වාර්තාවක් මගින් කරුනු වාර්තා කර ඇති අතර, අපරාධ පරීක්ෂණ දෙපාර්තමේන්තුව විමර්ශනය කොට නීතිපති උපදෙස් පතා ඇති අතර, මෙතෙක් නීතිපති කිසිදු නඩු කටයුත්තක් ඉදිරිපත් කොට නොමැත. තවද පොලිස් අධිකාරීවරයා තවම විත්තිකරුවෙක් නොවේ. සැකකරුවෙක් පමනි. එබැවින් මන්ත්‍රීවරයාගේ උක්ත ප්‍රකාශය ඉතා සාවද්‍යය.

තවද එම මන්ත්‍රීවරයා නොවැම්බර් 12 වනදා අනිද්දා පත්තරයට ජනාධිපති නීතිඥ ප්‍රසන්ත ලාල් ද අල්විස් විසින් “සරත් වීරසේකරට අසුවුන ආංශික කාරක සභා දැලි පිහිය” නමින් ලිපියක් පළකලා යැයි පවසයි. එය සම්පූර්ණ අසත්‍යයකි. එම ජනාධිපති නීතිඥවරයාගේ ලිපියේ සිරස වනුයේ “අපේ වාර්තා අපක්ෂපාතී, නිවැරදියි” යන්නයි. තවද මන්ත්‍රීවරයා විසින් ප්‍රසන්ත ලාල් නීතිඥතුමා කීවා යැයි පවසන “ආංශික කාරක සභාවල විසුළු ස්වරූපය / ජාතික ආරක්ෂක සභාවේ විකාරරූපීභාවය / අමනෝඥ පුද්ගලයන් මුල් පුටුවලට පත් කිරීමෙන් කරන මුග්ධ ප්‍රකාශන” යනාදියද අමූලික බොරුවකි. එතුමා එසේ කිසිවක් ප්‍රකාශ කර නැති බව එම ලිපියෙන් මනාව ගම්‍ය වේ. ඒ බව පාර්ලිමේන්තු සභා ගර්භය තුළ කියවීම තුළින් ඉතා වැදගත් ලෙස තම කරුනු දක්වා ඇති ජනාධිපති නීතිඥ ප්‍රසන්ත ලාල් ද අල්විස් මහතාගේ තත්වයද මොහු හෑල්ලුවට පත් කර තිබේ.

චන්දිම වීරක්කොඩි මන්ත්‍රීවරයා ප්‍රකාශ කර සිටින්නේ මාගේ ලිපිය මගින් පාර්ලිමේන්තු (බලතල හා වරප්‍රසාද) පනතේ ආ (9) කොටස සහ පාර්ලිමේන්තු ස්ථාවර නියෝග 111 (10) සහ (12) උල්ළංඝණය කර ඇති බවය. වරප්‍රසාද පනතේ ආ (9) සඳහන්වන්නේ පාර්ලිමේන්තු කාරක සභාවක කටයුතු කිසිවක් පාර්ලිමෙන්තුව වෙත වාර්තා කිරීමට පෙර ඒවා ප්‍රකාශණය කිරීම වැරැද්දක් බවය. නමුත් මා විසින් කර ඇත්තේ කාරක සභාව තීරණය කල පරිදි ලිපිය සකස් කොට කාරක සභාවේ බහුතරයක් සාමාජිකයන් දැනුවත් කොට බහුතරයකගේ එකඟතාවය මත එම ලිපිය රාජ්‍ය ආරක්ෂක අමාත්‍යවරයා වෙත යැවීමයි.

එයින් ඉල්ලා ඇත්තේ එහි අඩංගු කරුනු පිළිබඳව අමාත්‍යතුමාගේ අවධානය යොමු කොට නිසි ක්‍රියා මාර්ග ගන්නා ලෙස ඉල්ලීමයි. අද පවතින තාක්ෂණය අනුව කාරක සභාවල කටයුතු එවෙලේම සජීවීව ජනතාවගේ දැනගැනීම සඳහා විකාශණය වන අවස්ථාද ඇත. ඉන්පසු නිල වශයෙන් මාධ්‍යවලට නිකුත් කිරීමද කරනු ලැබේ. ඒ සඳහා පාර්ලිමේන්තුවේ අවසරය අවශ්‍ය නොවේ. අවශ්‍ය වන්නේ කාරක සභාපතිවරයාගේ අනුමැතිය පමනය. එබැවින් උක්ත ආ (9) වගන්තිය කාරක සභාවේ තීරණය පරිදි සියළුම සාමාජිකයින් දැනුවත් කොට මා යැවූ ලිපියට අදාල නොවේ. මීට පෙර උක්ත වගන්තිය හා ස්ථාවර නියෝග අනුව සභාවේ වාර්තා ප්‍රකාශණය කිරීමට පෙර පාර්ලිමේන්තුව වෙත ඉදිරිපත් කොට තිබේ.

මෙම මන්ත්‍රීවරයා විසින් පවසන ලද ස්ථාවර නියෝග 111 (10) සහ (12) එයට කිසිසේත්ම අදාල නොවේ. එහි සඳහන් වන්නේ ආංශික අධීක්ෂණ සභාවට සභික මන්ත්‍රීවරුන් පත්කිරීම සහ කාරක සභාවට සභාපතිවරයෙකු පත්කිරීම පිළිබඳවය. එහි 17 වන වගන්තිය අනුව සියළුම වාර්තා පාර්ලිමේන්තුව වෙත ඉදිරිපත් කල යුතු වේ. නමුත් පෙර සඳහන් කල පරිදි මෙය සභාවේ තීරණය පරිදි ආරක්ෂක අමාත්‍යවරයාගේ අවධානය සහ සුදුසු කටයුතු සඳහා යැවූ ලිපියක් පමණි.

පාර්ලිමේන්තු මන්ත්‍රීවරයෙකු ඇතුළු 08 දෙනෙක් මැරයින් විසින් මහදවාලේ අමානුෂික ලෙස පහර දී ඝාතනය කරන විට ආයුධ සන්නද්ධ යුද හමුදාව කිසිත් නොකර බලා සිටියේ ඇයිද යන්න පැහැදිලිය. ඒ රඹුක්කන සිද්ධියේ නීතිය ක්‍රියාත්මක කල පොලිස් නිලධාරියාට සිරගතවීමට සිදු වූ බැවිනි. එම නිලධාරියාට මෙතෙක් සාධාරණය ඉටු වී නොමැති නිසා ඉදිරියේදී එවන් තත්වයක් උදා විය හැක. එය ජාතික ආරක්ෂාවට තර්ජනයක් බැව් අමුතුවෙන් කිව යුතු නොවේ. ඒ ගැන අවධානය යොමුකරන මෙන් ආරක්ෂක අමාත්‍යාංශයට යැවූ ලිපියක් ස්ථාවර නියෝගවලට පටහැනි යැයි කිව හැක්කේ ජාතික ආරක්ෂාව ගැන අල්ප මාත්‍රයකුදු දැනුමක් / හැඟීමක් නැති කෙනෙක්ට පමනි.