ක්‍රිකට් පිළිබඳ විවාදය හා කතාබහ අවසන් වන අයුරක් පෙනෙන්නට නැත. දිනෙන් දින සිදුවන්නේ ඒ පිළිබඳ කතා අලුත් වීමය. එම බොහෝ කතා අතර ක්‍රීඩා මාධ්‍යවේදීන් යැයි කියා ගන්නා ක්‍රීඩාව ගැන පමණක් වාර්තාකරණයේ යෙදෙන හෝ ඒ සම්බන්ධයෙන් වැඩි උනන්දුවක් දක්වා වාර්තාකරණයේ යෙදෙන පිරිස් ගැන කතාබහ ද අලුත් වී තිබේ. ඒ ශ්‍රී ලංකා ක්‍රිකට් මෙතරම් දූෂිත තත්වයකට පත්වීම සඳහා ක්‍රීඩා මාධ්‍යවේදීන්ද ප්‍රබල දායකත්වයක් ලබාදී ඇතිය යන්න කියමින්ය.
ඒ සඳහා හේතුව වශයෙන් පෙන්වා දෙන්නේ පසුගිය කාලය පුරා ශ්‍රී ලංකා ක්‍රිකට් දූෂණ අක්‍රමිකතා සම්බන්ධයෙන් මෙම ක්‍රීඩා මාධ්‍යවේදීන් කසාය බිව් ගොළුවන් සේ හැසිරී ඇති නිසාය. පසුගිය කාලය පැත්තකට දැමුවත් වර්තමානයේදී පවා ඔවුන්ගේ හැසිරීම එයාකාරය. ශ්‍රී ලංකා ක්‍රිකට් වංචා දූෂණ සොයා බලා ගැඹුරු වාර්තාකරණයක් නැත. ඒ වෙනුවට කරන්නේ උඩින් පල්ලෙන් ක්‍රිකට් ප්‍රවෘත්ති වාර්තා කිරීම පමණය.
ක්‍රීඩා ඇමතිවරයා ශ්‍රී ලංකා ක්‍රිකට් වත්මන් නිලධාරි මණ්ඩලයේ කටයුතු අත්හිටුවා එහි පරිපාලනය සඳහා අතුරු කමිටුවක් පත් කිරීමේ වත්මන් ආසන්නතම අර්බුදයට පෙරත් ක්‍රීඩා මාධ්‍යවේදීන්ට ඒ සඳහා ඉතා අනගි අවස්ථාවක් උදාවිය. ඒ විගණකාධිපතිවරයා විසින් 2022 ටී 20 පිරිමි ලෝක කුසලාන තරගාවලිය ගැන නිකුත් කළ විශේෂ විගණන වාර්තාවේ ඇති කරුණු වාර්තා කිරීම සම්බන්ධයෙන්ය. එහෙත් ඔවුන් එම අවස්ථාව උදාකර ගත්තේ නැත. ඇත්තටම එම අවස්ථාව ඊට පෙරම ඔවුන්ට උදාකර ගන්නට තිබුණි.
ඒ එම විශේෂ විගණන වාර්තාවට පෙර ඒ සම්බන්ධයෙන් නිකුත් කළ කෙටුම්පත් වාර්තාව සම්බන්ධයෙන් සොයා බලා කරුණු වාර්තා කිරීම මගින්ය. මන්ද එම කෙටුම්පත් වාර්තාව සම්බන්ධයෙන් පාර්ලිමේන්තු මන්ත්‍රී හේෂා විතානගේ කරුණු හෙළි කිරීමත්, මන්ත්‍රීවරයාට විරුද්ධව ශ්‍රී ලංකා ක්‍රිකට් බලධාරීන් එම අවස්ථාවේදීත් අධිකරණ නියෝග ලබාගැනීමත් නිසාය. ක්‍රීඩාව සමඟ කටයුතු කරන හා ශ්‍රී ලංකා ක්‍රිකට් ආයතනය සමඟ සම්බන්ධතා ඇති ක්‍රීඩා මාධ්‍යවේදීන් යැයි කියා ගන්නා පිරිසට අනෙක් මාධ්‍යවේදීන්ට තරම් ඒ සඳහා වැඩි උත්සාහයක් ගැනීමට සිදු වන්නේ නැත. මන්ද ඔවුන්ට එම ක්ෂේත්‍රයේ තොරතුරු ලබාගත හැකි මාර්ග අන් මාධ්‍යවේදීන්ට වඩා විවෘත නිසාය.
එහෙත් තවමත් ඒ සඳහා ඔවුන් අත ගසන බවක් පෙනෙන්නට නැත. ඒ සඳහා වූ පෙන්වා දිය හැකි එක් හේතුවක් විගණකාධිපතිවරයාගේ විශේෂ විගණන වාර්තාවේද ඇතුළත්ය. ඒ එම ලෝක කුසලාන තරගාවලිය ආවරණය කිරීම සඳහා ශ්‍රී ලංකා ක්‍රිකට් ආයතනයෙන් අනුග්‍රහය ලබාදී ඇති ක්‍රීඩා මාධ්‍යවේදීන්ගේ ලැයිස්තුවය. මේ එක් තරගාවලියක වාර්තාවක් නිසා අනෙකුත් තරගාවලි දක්වා ආපස්සට යෑමේදී බොහෝ ක්‍රීඩා මාධ්‍යවේදීන් පිරිසකගේ නම් සොයා ගැනීමට හැකි වනු ඇත. එසේ ශ්‍රී ලංකා ක්‍රිකට් ආයතනය වෙතින් අවස්ථාව ලැබෙන්නේ ඔවුන් සමඟ සුවිශේෂ ගනුදෙනුවක් සිදුකරන මාධ්‍ය ආයතනවලට හා මාධ්‍යවේදීන්ට බව විගණකාධිපතිවරයාගේ විශේෂ විගණන වාර්තාවෙන්ද හඳුනා ගත හැකි දෙයකි.
එම තරගාවලිය ආවරණය සඳහා ඉල්ලූ ශ්‍රී ලංකා රූපවාහිනී සංස්ථාව ඇතුළු රාජ්‍ය මාධ්‍ය ආයතන සඳහා ශ්‍රී ලංකා ක්‍රිකට් ආයතනය අවස්ථාව ලබා නොදී ප්‍රතික්ෂේප කර තිබේ.
ක්‍රිකට් ක්‍රීඩාව සම්බන්ධයෙන් ගත්තද, වෙනත් ක්‍රීඩාවක් සම්බන්ධයෙන් ගත්තද මේ ක්‍රීඩා මාධ්‍යවේදීන් යැයි කියා ගන්නා බොහෝ පිරිසක් සිදු කරන්නේ තරගයේ ලකුණු වාර්තා, ජය පරාජයන්, ලබා ගන්නා ස්ථානයන් හා කාලයන් වාර්තා කිරීම පමණය. අමතරව ඒ අතරට එම තරගයේ හෝ තරගාවලියේ ඕපාදූපයක් ලෙස ගැනිය හැකි තාක්ෂණික දෝෂයක් හෝ ඒ හා සමාන වෙනත් දෙයක් වාර්තා කිරීම පමණය.
නොඑසේව ඒ ඒ ක්‍රීඩාව විශ්ලේෂණය කිරීම, විග්‍රහ කිරීම හෝ විවේචනය කිරීම සිදු කරන්නේ නැත. එවැන්නක් හෝ නොකරන ක්‍රීඩා මාධ්‍යවේදීන් ක්‍රීඩාවේ වංචා දූෂණ ගැන වාර්තා කරති යැයි අපට සිතිය නොහැකිය. එවැනි වාර්තා කිරීම්වල ඔවුන් නොයෙදෙන්නේ ශ්‍රී ලංකා ක්‍රිකට් වැනි අති විශාල මුදල් කන්දරාවක් තිබෙන ක්‍රීඩා සංගම්වලින් මෙන්ම එසේ නොමැති ක්‍රීඩා සංගම්වලින් ද ඔවුන්ට ලැබෙන පහසුකම් හා වරප්‍රසාද අහිමි කර ගැනීමට නොකැමති නිසාය.
ජාත්‍යන්තර වශයෙන් තරගවල යෙදෙන සෑම ක්‍රීඩා කණ්ඩායමක් සමඟම එම ක්‍රීඩා සංගම්වල අනුග්‍රහයෙන් හෝ ක්‍රීඩා සංගම් විසින් සම්බන්ධකර දෙන සම්බන්ධතා මගින් අනුග්‍රහය ලබාගෙන තරග ආවරණය කිරීමේ විදේශ සංචාරවල යෙදීම මේ ක්‍රීඩා මාධ්‍යවේදීන්ගේ වාර්තාකරණයේ අත්හැරීමට අකමැති එක් වැදගත් ක්‍රියාකාරකමකි.
පුරවැසියාගේ අත්දැකීම වන්නේ මෙම ක්‍රීඩා මාධ්‍යවේදීන් ණය ගනුදෙනු පවා සිදුකර ගන්නේ හා ඒවා පියවන්නේ ඩොලර් යූරෝ වැනි විදේශ ව්‍යවහාර මුදල් මගින් බවය. මන්ද කොවිඩ් සමයට පෙර වසරට කිහිප වතාවත් ක්‍රීඩා කණ්ඩායම් සමඟ විදේශ සංචාරවල යෙදීම ඔවුන්ගේ දින චර්යාවේ කොටසක් බැවිනි. ක්‍රීඩා මාධ්‍යවේදීන් නොවන ඉඳහිට ක්‍රීඩාව ගැන ලියන මාධ්‍යවේදියකුගේ විවේචනාත්මක වාර්තාකරණයක් දුටුවිට මේ ක්‍රීඩා මාධ්‍යවේදීන් කියන්නේ ඒකනම් මරු කියාය. මරු කියා දැනෙන එම විවේචනය ඔවුන් ලියන්නේ නැත. ඒ ක්‍රීඩා සංගම්වලින් ලබාදෙන වරදාන වරප්‍රසාද ඔවුන් අහිමි කර ගන්නට අකමැති නිසාය.
ශ්‍රී ලංකාවේ ක්‍රීඩා මාධ්‍යවේදීන්ගේ තත්වය එසේ හෙයින් ක්‍රිකට් ක්‍රීඩාව සම්බන්ධයෙන් පමණක් නොව අනෙකුත් ක්‍රීඩා සම්බන්ධයෙන්ද අපට හෙටටත් අත්දකින්නට වන්නේ දුෂණ වංචාවලින් ඉවහා ගිය තත්වයක් මිස ඉතා හොඳ තත්වයක් නොවේ. මන්ද ක්‍රීඩාව පිළිබඳ ජනමාධ්‍යයේ මුරපල්ලාගේ කාර්ය ඔවුන් අතින් ඉටු නොවන නිසාය.
