සෙලින්කෝ සමූහ ව්‍යාපාරයේ හිටපු අධිපති ලලිත් කොතලාවල මහතාගේ මරණය සැක සහිත බවට ඔහුගේ බිරිඳගේ සහෝදරියක කර ඇති පැමිණිල්ලක් හේතුවෙන් ඒ පිළිබඳ අධිකරණ පරීක්ෂණයක් ආරම්භ කර ඇත.
එම ඥාතියා චෝදනා කර තිබුණේ ලලිත් කොතලාවල මහතාගේ මරණය ස්වාභාවික මරණයක් ලෙස සැලසුම් සහගතව සිදුකර ඇති බවයි. ඔහුට ලබාදුන් ආහාර වෙනස් කර ඇති බවද ඇය කියා ඇත. ඒ සඳහා ඔහු ළඟ සිටි කණ්ඩායම් කටයුතු කර ඇති බවද, ඔහුගේ දේපළ එම කණ්ඩායම් බලහත්කාරයෙන් අත්පත් කරගෙන ඇති බවද ඇය චෝදනා කර ඇත.
ඇය අධිකරණයට කියා ඇත්තේ ලලිත් කොතලාවල මහතා කොළඹ 05, එලිබෑන්ක් පාර අංක 28 යන නිවසේ පදිංචිව සිටි බවත්, එම කණ්ඩායම් ඔහුව කොළඹ 4, ඩික්මන් පටුමග අංක 13 යන නිවසට රැගෙන ගොස් රඳවා තබාගෙන සිටි බවත්ය.
මෙම මහේස්ත්‍රාත් අධිකරණ පරීක්ෂණය සඳහා ලලිත් කොතලාවල මහතාගේ බිරිඳගේ සහෝදරිය වන චෝදනා එල්ල කරන ෂෙරීන් පේෂන් විජේරත්නට අමතරව බම්බලපිටිය පොලීසියේ සැරයන්වරයකු, කොතලාවල මහතාගේ සේවකයින් කිහිප දෙනෙකු ඇතුළු පිරිසක් සාක්ෂි ලබාදී ඇත. කොළඹ අතිරේක මහේස්ත්‍රාත් පසන් අමරසිංහ දැනුම් දී ඇත්තේ ලලිත් කොතලාවල මහතාගේ මරණ පරීක්ෂණයේ තීන්දුව නොවැම්බර් 14 දින ප්‍රකාශයට පත්කරන බවයි.
