මේ වනවිට කිසිදු ක්‍රියාමාර්ගයක් තෝරාගත නොහැකි තත්ත්වයකට තම කණ්ඩායම පත්වී තිබෙන බවත්, ආණ්ඩුව ඉදිරියට ගෙනයෑම පිළිබඳව බරපතළ අවිනිශ්චිතතාවක් උද්ගත වී තිබෙන බවත් අනිද්දා සමග අදහස් දැක්වූ මහින්ද රාජපක්ෂ කණ්ඩායමේ නීතිවිරෝධී අමාත්‍යවරයෙක් අනිද්දා කළ විමසීමකදී පැවසීය.
තම කණ්ඩායමට මේ වනවිට 113 ක බලයක් නොමැත් බවත්, 113 ක් ලබාගැනීම සඳහා අවශ්‍ය මන්ත්‍රී කණ්ඩායම සම්පූර්ණ කරගැනීම අවිනිශ්චිත බවත් අනිද්දා සමග අදහස් දක්වමින් එම නීතිවිරෝධී අමාත්‍යවරයා කීය. 113 ක බහුතර බලයක් ලබාගැනීම හෝ ශ්‍රේෂ්ඨාධිකරණය තමන්ට වාසි සහගත තීන්දුවක් ලබාදීම යන දෙකෙන් එකක් සිදුනොවුණහොත් තම කණ්ඩායමට ආණ්ඩුව පවත්වාගෙන යා නොහැකි වනු ඇතැයිද ඔහු පැවසීය. එහෙත්, එම අවස්ථා දෙකම සිදු නොවීමේ වැඩි සම්භාවිතාවක් ඇතැයි ඔහු ප්‍රකාශ කළේය.
නීති විරෝධී කැබිනට් මණ්ඩලය විසින් අතුරු සම්මත ගිණුමකට අනුමැතිය ලබාගෙන තිබුණද, එයට පාර්ලිමේන්තුවේ අනුමැතිය ලබාගත නොහැකිව සිටින බව ඔහු පැවසීය.
ඉන් පසුව කුමක් කළ යුතුදැයි මේ වනවිට තීරණයකට පැමිණ නොමැති බවත්, ඉතිරි වී ඇති තෝරාගැනීම් දෙක වන ජනාධිපතිවරණය සහ ජනමත විචාරණය යන ඍජු ජනමතය විමසීමේ අවස්ථා දෙකෙන්ම තම කණ්ඩායම පරාජය වීමේ වැඩි ඉඩක් ඇති බවත් ඔහු කීය. එම මැතිවරණ දෙකම ජයගැනීමට නම් ජනගහනයෙන් 50% කට වඩා තම කණඩායමට වාසි සහගත ලෙස ඡන්දය ලබාදිය යුතු බව එම නීති විරෝධී අමාත්‍යවරයා පෙන්වා දුන්නේය. පාර්ලිමේන්තුවේ බහුතරයක් නොමැතිව දීර්ඝකාලීනව කටයුතු කිරීමද කළ නොහැක්කක් බවත්, පාර්ලිමේන්තුවේ බහුතරය නොමැතිව පළාත් සභා මැතිවරණයට යෑමද කළ නොහැක්කක් බවත් ඔහු පෙන්වාදුන්නේය. ඒ නිසා මේ වනවිට තම කණ්ඩායම තෝරාගැනීම් නොමැති තත්වයකට පත්ව ඇතැයි ඔහු වැඩිදුරටත් අවධාරණය කළේය.
