■ අමන්දිකා කුරේ
එච්අයිවී ඒඩ්ස් හෙවත් මානව ප්‍රතිශක්තිකරණ ඌනතා වෛරස පරීක්ෂාවට අවශ්‍ය ප්‍රතික්‍රියක හා උපකරණ හිඟයක් හේතුවෙන් ගැබිණි මවුවරුන්ට සිදු කරන ඒඩ්ස් පරීක්ෂාව නැවතී තිබේ.
ලිංගාශ්‍රිතව සම්ප්‍රේෂණය වන මෙම රෝගය ආසාදිත මවකගෙන් දරුවාට ද වැළඳීමට ඉඩ ඇති නිසා සියළු ගර්භිණිී මවුවරුන්ට මෙම පරීක්ෂණය සිදු කරන බව වෛද්‍ය රසායනාගාර විද්‍යාඥ වෘත්තීයවේදීන්ගේ විද්වත් සංගමයේ සභාපති රවී කුමුදේශ් පෙන්වා දෙයි.
සාමාන්‍යයෙන් වසරකට ගැබිණි මවුවරුන් ලක්ෂ තුනකට පමණ මෙම පරීක්ෂණය සිදු කරන බව ඔහු පවසයි.
පසුගිය වසර වන විට ශ්‍රී ලංකාවේ මවගෙන් දරුවාට ඒඩ්ස් බෝවීම සම්පූර්ණයෙන් ම නවත්වා දැමූ රටක් වූ අතර ලෝක සෞඛ්‍ය සංවිධානය විසින් ඒ සඳහා සහතිකයක් ද ලබා දෙන ලදි.
මීට අමතරව අනෙකුත් ලිංගාශ්‍රිතව බෝවන රෝග හඳුනාගැනීමට අවශ්‍ය වීආර්ඩීඑල් පරීක්ෂණ සඳහා ද ප්‍රතික්‍රියක හිඟයක් පවතින බව රවී කුමුදේශ් මහතා පැවසුවේ ය.■
