සති දෙකකට පෙර විශ්‍රාම ගන්වන ලද හිටපු හමුදාපති හා වත්මන් ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා යම් වරදකට කොටුකර ගැනීමේ මෙහෙයුමක් සිදුවෙමින් පවතින බව වාර්තා වේ.
මෙම මෙහෙයුම සිදුවන්නේ මාර්තු 31 වැනිදා මිරිහානේ පිහිටි ජනාධිපතිවරයාගේ නිවස ඉදිරිපිට සිදුවූ කළහකාරී සිදුවීම් සම්බන්ධයෙන් සහ මැයි 09 වැනිදා අරලියගහ මන්දිරය අවට හා ගෝල්ෆේස්හි සිදුවීම්වලදී ත්‍රිවිධ හමුදාව වෙතින් යම් අත පසුවීමක් සිදුවීද යන්න සොයා බැලීම සඳහා ජනාධිපතිවරයා පත්කළ කමිටුව තුළදී බව වැඩිදුරටත් වාර්තාවේ.
එම කමිටුවට හිටපු නාවික හමුදාපතිවරයකු වන අද්මිරාල් ඔෆ් ද ෆීලීට් වසන්ත කරන්නාගොඩ, හිටපු ගුවන් හමුදාපතිවරයකු වන මාර්ෂල් ඔෆ් ද එයාර් ෆෝස් රොෂාන් ගුණතිලක හා හිටපු යුද හමුදාපතිවරයකු වූ ජෙනරාල් දයා රත්නායක පත් කර ඇති අතර එහි සභාපතිත්වය දරන්නේ වසන්ත කරන්නාගොඩ මහතාය. මෙම කමිටුව හමුවට එම සිදුවීම් සිදුවූ දිනවල කොළඹ ප්‍රදේශ බාරව සිටි යුද හමුදා සේනාංකාධිපතිවරුන්ව හා බල සේනාධිපතිවරුන්ව ගෙන්වා කරුණු විමසීම් සිදුකර ඇත. අපගේ ආරංචි මාර්ග තහවුරු කරන්නේ එම කරුණු විමසීම්වලදී වසන්ත කරන්නාගොඩ මහතා පැහැදිලිවම අසා ඇත්තේ එකී දිනවල හමුදාව උද්ඝෝෂකයින්ට වෙඩි නොතිබ්බේ ඇයිද යන්න හා යුද හමුදාපති ශවේන්ද්‍ර සිල්වා එම අවස්ථාවල ලබාදුන් උපදෙස් මොනවාද යන්න බවයි.
මෙම කමිටුව පත් කිරීමටත්, එසේ කරුණු විමසීමටත් හේතු වී ඇත්තේ මිරිහානේ ජනාධිපතිවරයාගේ නිවස අසල සිද්ධියේදී එය වළක්වා ගැනීම සඳහා හමුදාවට වෙඩි තැබීමේ හැකියාව තිබියදීත් එය නොකළේ ඇයිද යන්න හා අරලියගහ මන්දිරය අසල රාත්‍රියේදී සිදුවූ සිද්ධියේදී එවක අගමැති මහින්ද රාජපක්ෂ ඇතුළු සිරවී සිටි පිරිස බේරා ගැනීමට වෙඩි නොතිබ්බේ ඇයිද යන බලවත් සැකය නිසාය.■
