අරගලය හේතුවෙන් ලංකාවේ පුරවැසියන්ට කොන්දේසි රහිතව පිළිගන්නට හැකි වී තිබෙන සත්‍යයක් වන්නේ අප ජීවත් වන්නේ චෞරයන්ගේ දේශයක බවයි. වසර හැත්තෑ හතරක් රට දේශපාලකයන් විනාශ කළේය යන්න නිවැරදි නැති බව ද මෙහිදී අප වටහා ගත යුතු යයි සිතමි. රට විනාශ මුඛයට ශීඝ්‍රයෙන් තල්ලු වන්නේ හැත්තෑ අටේ සම්මත වුණ ආණ්ඩුක්‍රම ව්‍යවස්ථාව නිසාය යන්න නිසාය යන්නත් සත්‍යයම නොවේ. දේශපාලනය සහ බලය කෙටි කලක් තුළ දී නීතියේ ආධිපත්‍යයට කළ හදියත්, අධ්‍යාපන වරප්‍රසාදයෙන් පිබිදුණ පුද්ගලයන්, විශේෂයෙන් ඉහළ වෘත්තිකයන් බලයෙහි අතකොලු බවට පත්වීමත් හේතුවෙන් රට විනාශ මුඛයට පත්වී ඇත.
දේශපාලන දැක්මක් නැති, ආර්ථික දැක්මක් නැති, නිසි අධ්‍යාපනයක් නැති, පුද්ගලයන් දේශපාලනයට අවතීර්ණවීම හා බලය අත්පත් කර ගන්නට කරුණු කාරණ යෙදීම වරදක් ලෙස නොදැකීම ලංකාවේ රාජ්‍ය පාලනයේ ඛේදයයි. මේ ඛේදයේ කූට ප්‍රාප්තිය මහින්ද රාජපක්ෂගේ දේශපාලන ආගමනයයි. කරුණු කාරණ අනාවරණය වන අන්දමට මහින්ද රාජපක්ෂගේ දරුවන් තිදෙනා අනීතිකව රැස්කරගෙන තිබෙන ධනස්කන්ධය හා විනාශ කර තිබෙන ධනස්කන්ධය සුළු පටු නොවේ. ඔවුන් ද දේශපාලන දැක්මක් නැති, ආර්ථික දැක්මක් නැති, නිසි අධ්‍යාපනයක් නැති, පුද්ගලයන් බව කිව යුතු නැත. මෙවැනි බොල් චරිත ගල් පිළිම බවට පත් වනු වළක්වා ලීම කෙසේ වෙතත්, ඔවුන්ට අභිමත අන්දමට රාජ්‍ය බලය පරිහරණය කිරීමට ඉඩ නොදී සිටින්නට බැරි තරමට ලංකාවේ ඉහළ තලයේ වෘත්තිකයන් නිවට වීම මොන තරම් ඛේදයක් ද?
මහජන බැංකුව
මහජන බැංකුව නිර්මාණය කිරීම හා සම්බන්ධ ඉතිහාසය විධිමත්ව ලේඛනගතව තිබේ. ඒ ඉතිහාසය කියවන විට අද මහජන බැංකුවට අත්ව තිබෙන ඉරණම එක අතකින් හද සසල කරවයි, අනෙක් අතින් හද කුපිත කරයි. අන්ත අසරණයන්ගේ මුදලින් ගොඩ නැඟී වැඩී වර්ධනය වුණ මහජන බැංකුව දේශපාලන බලය අතට ගන්නට සමත් වුණ පුද්ගලයන් අනීතික අන්දමට පරිහරණය කළ බලය හේතුවෙන් කාබාසිනියා වී ඇති බවය අසන්නට ලැබෙන්නේ.
කලක සිට මහජන බැංකුවට පත් කරන සභාපතිවරුන් (ලංකා බැංකුවට ද අදාළ යයි සිතමි) සහ අධ්‍යක්ෂ මණ්ඩල සාමාජිකයන් බහුතරය බැංකු ක්ෂේත්‍රයේ අභිවෘද්ධියට දායක වීමට සුදුසුකම් ඇති අය නොවන වග පෙන්වා දිය යුතු නැත. මේ පත් කිරීම්වල ඒකායන පරමාර්ථය ආණ්ඩුවේ සහ නායකයන්ගේ අභිමතාර්ථ වෙනුවෙන් බැංකුවේ මුදල් පරිහරණයට අවශ්‍ය සේවය ලබා ගැනීමය. එක නිදසුනක් පමණක් දක්වමි.
යහ පාලන ආණ්ඩුව පැවති සමයේ පොළොන්නරුවේ කුප්‍රකට සහල් ව්‍යාපාරිකයා මහජන බැංකුවේ සභාපතිට බල කරන්නේ රාජපක්ෂ පුතුන් සතුව පැවති සීඑස්එන් නාළිකාව සම්බන්ධ මහජන බැංකුවේ බැඳීම් අයින්කර දමන්න යන්නය. අධිකරණයේ නඩුවක් තිබෙන බැවින් එය කළ නොහැකි බව සභාපති පවසා සිටි විට නඩුව ගැන තමන් බලා ගන්නම් යයි ඔහු පවසා ඇත. කෙටි වේලාවක් තුළ දී ජනාධිපති සිරිසේන ළඟ සේවය කළ තවත් කුප්‍රකට චරිතයක් සභාපතිට කතා කර පවසා තිබෙන්නේ ජනාධිපතිගේ අවශ්‍යතාව ඉටු කළ යුතු බවය.
මේ සභාපතිට – අධ්‍යක්ෂ මණ්ඩලයට ස්වාධීන තීරණයක් ගත හැකි ද? පත්වීම් දේශපාලන පත්වීම් බැවින් ඒවා පිරුවට වන නිසා අකමැත්තෙන් හෝ නිවට වීමය සිදු වන්නේ. සත්‍ය වශයෙන් කලක සිට මහජන බැංකුව අර්බුදය කරා පියමං කළේ සභාපති පදවියේ සිට අධ්‍යක්ෂ මණ්ඩලය දක්වා අදාළ පදවිවලට අති බහුතරය නුසුදුසු අය පත් කිරීමේ හේතුව නිසා බව ඇත්තකි. අදාළ දේශපාලන බලවතාට උදව් කර තිබෙන නිසා කෘත ගුණ ලෙසිනි මේ පදවි පිරිනමන්නේ. රාජ්‍ය බැංකු රාජ්‍ය සංස්ථා රාශියක් (ලාභ ලබමින් තිබුණ) බංකොළොත් වන්නට අදාළ හේතුව මෙය බව නොරහසකි.
දයා ගමගේ
දයා ගමගේ සම්බන්ධව පාර්ලිමේන්තු මන්ත්‍රී රාසමාණික්කම් කළ ප්‍රකාශයට පිළිතුරු දීමට දයා ගමගේ මාධ්‍ය හමුවක් කැඳවා තිබුණි. ඔහුට සිය මාධ්‍ය හමුවේදී රාසමාණික්කම් මන්ත්‍රීවරයා කළ ප්‍රකාශයන් කිසිවක් සාවද්‍ය බව සනාථ කරන්නට හැකි නොවීය. ඔහු හිරිකිතයක් නැතිව පැවසුවේ තමා මහජන බැංකුවෙන් තඹ සතයක් ණයට ගෙන නැති බවය. ණය ලබා තිබෙන්නේ ‘දයා ඇපරල්‘ ව්‍යාපාරය බවය. මේ තක්කඩි කතාවට අමු හිංගලෙන් හැර ශිෂ්ට සම්පන්න සිංහලෙන් පිළිතුරු දිය හැකි ද? දයා ගමගේ උජාරුවෙන් පවසා සිටියේ තමාට තම ව්‍යාපාරවල සාර්ථකත්වය වෙනුවෙන් අපමණ සම්මාන හිමිව ඇති බවය. ඔහු පුටුවෙන් නැගිට ඒවා පෙන්වමින් කට මැත දෙඩවීය. ඔහු මහජන බැංකුවට මිලියන ගාණක් පොලී ගෙවා ඇති බව ද පැවසීය. ඒ පිනට ද? ණය ගත් ප්‍රමාණයට පොලී ගෙවීම කවුරුත් කරති. ඔහු තව කතාවක් කීවේය. දයා ඇපරල් ණය ගන්නා විට තමාට එහි සම්බන්ධයක් නැති බවත්, තමා ඒ ව්‍යාපාරය පසුව ලබා ගත් බවත්ය ඔහු කියන්නට උත්සාහ කළේ. ඒ කියන්නේ ‘දයා ඇපරල්‘ නමින් කවුරුන් හෝ මේ ව්‍යාපාරය ගොඩ නඟා ඇත්තේ අනාගතයේ ප්‍රාදුර්භූතවන දයා කෙනෙකු වෙනුවෙන් බවද? මේ පුද්ගලයන් ජන වරමක් ලබන්නේ කෙසේ ද? මේ පුද්ගලයන් යහපත් ආණ්ඩුකරණයකට දායක වන්නේ කෙලෙසද? කෙලෙසින්වත් නොහැකිය.
යහ පාලන ආණ්ඩු සමයේ මහාමාර්ග ඉදි කිරීම් සම්බන්ධ ලබාගෙන තිබුණ කොන්තරාත් නිසි ලෙස ඉටු කර නැති නිසා ඔහුට මුදල් අය කර ගන්නට නොහැකි වී තිබේ. මොහු මාර්ග සංවර්ධන අධිකාරියේ සභාපති වෙත බිල් පතක් යොමු කරමින් මුදල් ලබා දෙන ලෙස ඉල්ලා ඇත. සභාපති දයා ගමගේ මිත්‍රයෙකි. එහෙත් සභාපති පවසන්නේ නියමාකාර ක්‍රමයට බිල් පත තමා වෙත ලැබුණොත් පමණක් මුදල් ගෙවන්නට හැකි බවය. ඔහු ඒ වන විට සැකහැර දැනගෙන සිටින්නේ අදාළ ඉදිකිරීම් සිදු කර නැති බවය. මේ සභාපති නිර්භීතව පවසා තිබෙන්නේ මිත්‍රකමට මෙය කළ නොහැකි බවය. ඇත්ත වශයෙන්ම මේ අහඹුවකි. මට මෙහිදී පැහැදිලි කරන්නට අවශ්‍ය වන්නේ දේශපාලන පත්වීමක් ලද කෙනෙකු වුව හෘදය සාක්ෂියට අනුව තම වගකීම් ඉටු කරනවා නම් දයා ගමගේලා වැනි තවත් අයට බලය අවභාවිත කළ නොහැකි බවය. අභාග්‍යය නිසි සුදුසුකම් ඇති පුද්ගලයන් යම් තනතුරුවලට පත්වුණත් තනතුරු ලෝභය හේතුවෙන් හොරකමට තම අත්සන් ගැසීමය. මෙය වළකා ගන්නට එකම ක්‍රමය අදාළ තනතුරුවලට පිටතින් පුද්ගලයන් පත් නොකිරීම ද? නැත. රාජපක්ෂලාට වැඩියෙන්ම හොරකම් කරන්නට පුළුවන් වී තිබෙන්නේ නිසි පත්වීම් ලද රාජ්‍ය නිලධාරීන් හරහාය. නම් දරාපු නිලධාරීන් හරහාය. දැන් අප වටහා ගත යුත්තේ රට අගාධයකට ඇද වැටීමට අදාළ යථාර්ථයයි. සහ සුද්දෙන්ම මැති ඇමතිලාට රාජ්‍ය මුදල් තනි මතයට අවභාවිත කළ නොහැකිය. ඊට නිලධාරීන්ගේ සහාය – මැදිහත්වීම හා උපදෙස් අවශ්‍යම වේ. ඒ වග සනාථ කරන විශිෂ්ටතම නිදසුන ලලිත් වීරතුංග සිරදඬුවම් ලද සිල් රෙදි ජාවාරමය.
ලංකාව ශීලාචාර රටක් කරන්නට – ‘සිස්ටම් චේන්ජ්‘ එකක් කිරීමට දයා ගමගේලා ආණ්ඩුකරණයට වරම් ලැබීම වළක්වා ලීමෙන් පමණක් කළ නොහැකිය. රාජ්‍ය යාන්ත්‍රණය දුවන්නේ සැබවින්ම දේශපාලනඥයන්ගෙන් නොවේ, නිලධාරීන්ගෙන්ය. පසු ගිය කාලයේ අති බහුතරයක් නිලධාරීන්ට සිදු වන්නේ නිවටයන් සේ අණ පිළිපැදීමටය. ගෝඨාභය ආණ්ඩුවේ වැඩ කළ නොහැකි බව පවසමින් කිහිප දෙනෙකු අස්වුණ බව, විශ්‍රාම ගත් බව අපි දනිමු. එහෙත් නිර්භීත තීරණයක් කෙනෙකු ගන්නා විට දීනයන් පෝලිමක් සිටින විට ප්‍රතිඵලය කුමක් ද? ලේනාට සිය වලගයෙන් මුහුද හිස් කළ නොහැකි බව ද අප වටහා ගත යුත්තේ? නැත. රාජ්‍ය මුදල් අවභාවිතයට එරෙහිව රටේ නීතිය බලාත්මක වන්නේ නම් යම් පාලනයක් කළ හැකිය. නීතිය බලාත්මක කිරීමට හැකිවන්නේ සිවිල් පුරවැසියන්ටය. රාජපක්ෂලා සිවිල් පුරවැසියන් බුරුතු පිටින් හීලෑ කර ගැනීම හේතුවෙන් සිදු වුණේ නීතිය ක්‍රියාත්මක වීමට එරෙහිව මහමගට බසින පුරවැසියන් බිහිවීමය. ඔවුන්ට නායකත්වය දුන්නේ කවුරුන් ද? පිරිහුණු සංඝයා නොවේ ද?
දේශපාලනඥයන්ගේ ව්‍යාජ බෞද්ධකම
ලංකාවේ දේශපාලනඥයන් අති බහුතරය ශ්‍රද්ධාසම්පන්න දායකයෝ වෙති. මැති ඇමතිලා ඉහළින්මය. ඔවුන් පින් පිණිස දන් දෙති. දන් දෙන්නේද මහජන මුදල්වලිනි. මහනායක හිමිවරුන් බැහැ දකින්නට යන විට ගෙනයන අටපිරිකර හා පලතුරු වට්ටිවලට ද අවසන ගෙවා තිබෙන්නේ මහජන මුදලිනි. දයා ගමගේ ද ශ්‍රද්ධාසම්පන්න දායකයෙකි. දුමින්ද සිල්වා සහ ඔහුගේ සොයුරු රේනෝ සිල්වා ද ශ්‍රද්ධා සම්පන්න දායකයෝ වෙති. ගෝඨාභයත් ශ්‍රද්ධා සම්පන්න දායකයෙකි. ඉතින් වැඩි විස්තර කුමට මහින්ද රාජපක්ෂ! ඔහු පුරාණ රජෙක් වන් ශ්‍රද්ධා සම්පන්න දායක වස්තුවක් නොවැ!
ලංකාවේ රාජ්‍යයේ පිරිහීමට බරපතළ අන්දමට වග කිව යුතු භික්ෂූන්ගෙන් සැදුම් ලත් පන්සල් සංස්කෘතියක් තිබේ. (ධර්මයෙහි හැසිරෙන යහපත් භික්ෂූන් වහන්සේලාට නිසි බුහුමන දක්වන බව ද සඳහන් කරනු කැමැත්තෙමි) පිරිහුණු භික්ෂූන් තමන්ට හැමදාම දානමාන දෙන දායකයින්ගේ ජීවිතවලට වඩා වැදගත් කොට සලකන්නේ දේශපාලනඥයන්ගේ ජීවිතවල අභිවෘද්ධියයි.
යහ පාලන ආණ්ඩුව අබල දුබල කිරීමට මුළින්ම පෙරමුණ ගත්තේ පිරිහුණු භික්ෂූන්ය. දූෂණය – වංචාව – අපරාධ පිටු දකින දේශපාලන සංස්කෘතියක් වෙනුවෙන් අපරාධ පරීක්ෂණ දෙපාර්තමේන්තුව – මුල්‍ය අපරාධ කොට්ඨාසය මූලික වශයෙන් ඉදිරිගාමී කටයුවල නිමග්න විය. මුළින්ම සැකහැර නීතියෙන් දඬුවම් ලබන්නට සිටි රාජපක්ෂ සමාගමේ සාමාජිකයන් අතර සිටියේ ගෝඨාභය රාජපක්ෂයි. ඔහු අල්ලස් හෝ දූෂණ විමර්ශන කොමිෂන් සභාවට කැඳවන ලද අවස්ථාවේ භීතියෙන් පසුවුණ බවය දැන ගන්නට ලැබුණේ. වැරදි කර නැත්නම් ඇයි භීතියට පත් වන්නේ?
ගෝඨාභය අල්ලස් කොමිසමට කැඳවන ලද දා බෞද්ධාලෝක මාවත කසාවත්වලින් වැසිණි. පෙරමුණ ගත් අය අතර චණ්ඩියෙකු සේ කතා කළේ මුරුත්තෙට්ටුවේ ආනන්ද හිමිය. මේ කැඳවීම කුමකට වුවත් කොන්දේසි විරහිතව ගෝඨාභය රකින තැනකය මේ පිරිහුණු භික්ෂූන් සිටියේ. කරුමය නම් තවත් ව්‍යාජ ශ්‍රද්ධාවන්තයෙකුම යහපාලනයක් වෙනුවෙන් පත්වුණ ජනාධිපති වීමය. ඔහු බෞද්ධාලෝක මාවත වැසුණ කසාපැහැයට බියට පත් වෙයි. ගෝඨාභයට එරෙහිව නීතිය ක්‍රියාත්මක කිරීම කණපිට හැරවිණි. අල්ලස් කොමිසමට සිරිසේන ප්‍රසිද්ධියේම දෙසුවේය. ගෝඨාභය තමන් කළ සියලු වැරදිවලින් නිදහස් වන්නට හොඳම පළිහ ලෙස වටහා ගන්නේ කසාවතයි.
දේශපාලනඥයන් යනු බලය වෙනුවෙන් බුද්ධාගම අවභාවිත කරන්නෝ වෙති. පිරිහුණු භික්ෂූන් යනු දේශපාලනඥයන්ගේ අභිවෘද්ධිය හා තමන්ගේ සුඛ විහරණ වෙනුවෙන් බුද්ධාගම අවභාවිත කරන්නෝ වෙති.
හෙට දවසේ මහින්ද රාජපක්ෂ කළ අපරාධ වෙනුවෙන් ඔහුව අත් අඩංගුවට ගත හොත් පිරිහුණු සංඝයා කුමක් කරාවි ද? පෙර දවස මෙන් පාරට බැස චණ්ඩිකම් කරන්නට හයියක් නැතත් පන්සල්වල මහින්ද සරණ ගච්චාමි පින්කම් පටන් ගනු නියතය.
මෙහිදී පැහැදිලි කිරීමට උත්සාහ කළේ ලංකාවේ දේශපාලන සංස්කෘතිය වෙනස් කිරීමට – ‘සිස්ටම් චේන්ජ්‘ එකට පිරිහිණු භික්ෂූන්ගෙන් සැදුම් සංඝ සමාජය මහාපිළිලයක් බවය. රටම විපතට පත්ව සිටින අවකාශයක මහ මගට ඇවිත් මහජනයා වෙනුවෙන් සිටගෙන සිටින භික්ෂූන් ප්‍රමාණයෙන් අතලොස්සක් වීම කොතරම් අභාග්‍යයක් ද?
අධිකරණයට ලංකාව බේරා ගත හැකිය
පිටතින් සිට නිරීක්ෂණයක යෙදෙන විට පෙනී යන්නේ ලංකාව දරුණු ආර්ථික ආගාධයකට තල්ලුවීම ගැන අධිකරණ ක්ෂේත්‍රයේ කම්පනයක් – අවංක කම්පනයක් තිබෙන බවය. නීතිඥවරුන් පිරිසක් නීතිපතිගේ කාර්යාලය වට කිරීම ද බරපතළ කටයුත්තකි. අරගලයට එරෙහිව මර්දනය ක්‍රියාත්මක කිරීම පාලනය කිරීමට නීතිඥ සංගමය පෙනී සිටීම පුරවැසියන්ගේ ගෞරවයට බඳුන්ව තිබේ.
සැබවින්ම ලංකාව බේරා ගන්නට – ‘සිස්ටම් චේන්ජ්‘ එක්ක වෙනුවෙන් පදනම දමන්නට පරම බලය තිබෙන්නේ අධිකරණයට බවය හැඟී යන්නේ. එහිදී ජනතාවට ලැබිය යුතු වැදගත් සංඥාවන් තිබේ.
ලංකාවේ දේශපාලන බලවතුන් – දේශපාලන බලයෙන් චෞරකම්වල නිමග්නව සිටින්නන් – අපරාධකරුවන් රැසක් ආණ්ඩුකරණයෙහි නිමග්න වීමට ජන වරම් ලබා සිටින බව නොරහසකි. මිනීමරුවන් ලෙස දඩුවම් ලද්දන් – දඬුවම් ලබන්නට හැකි අය ද මැති සභයේ සිටින බව ප්‍රකටය. මේ වාතාවරණයට හේතුව කුමක් ද?
එක් ප්‍රධාන හේතුවක් වන්නේ අධිකරණයක නඩු විභාගය අසාමාන්‍ය ලෙස ප්‍රමාද වීමය. ආසන්න උදාහරණයක් වන්නේ ශෂි වීරවංශ දඬුවම් ලද නඩුවයි. මේ නඩුව වසර හතක් තිස්සේ විභාග කෙරුණ බව – නැත්නම් වසර හතක් පැරණි නඩුවක් බවය මාධ්‍ය ඔස්සේ වාර්තා වූයේ. රටේ නීති ගරුක පුරවැසියන්ට තිබෙන සාධාරණ ප්‍රශ්නයක් වන්නේ මේ නඩුව විභාග කොට තීන්දුවක් ලබා දෙන්නට මේ තරම් කාලයක් වැය වූයේ කුමන සාධක මත නිසා ද යන්නය.
මනුෂ්‍ය ඝාතනයක් – බරපතළ මුල්‍ය අපරාධයක් සම්බන්ධ නඩුවක් විභාග කරන්නට කාලයක් ගත විය හැකිය යන්න පහසුවෙන් වටහා ගත හැකිය. අද දරුවෙකුගේ නීත්‍යානුකූල පියා කවුරුන්දැයි දැන ගැනීමට ඩීඑන්ඒ පරීක්ෂණයක් සිදු කොට ප්‍රතිඵල ලබා ගන්නට යන්නේ ද කෙටි කාලයකි. එවන් යථාර්ථයක පැහැදිලිව ලිඛිත සාධක පවතින නඩුවක වරද විනිශ්චය කිරීමට දීර්ඝ කාලයක් වැය වන්නේ නම් එය, ‘නීතිය ශක්තිමත්ව පවතින රටකය අප ජීවත් වන්නේ‘ යන අදහස ජන සමාජයේ ස්ථාපිත වන්නට හොඳ වාතාවරණයක් නොවේ යයි සිතමි.
එක්තරා කුප්‍රකට සමාගමක් බැංකුවකට කළ වංචාවට එරෙහි නඩුවෙන් පැරදුණ බව මාධ්‍යයෙන් දැක ගන්නට ලැබිණි. ඒ නඩුවද කලක් තිස්සේ විභාග කෙරුණකි. මෙවන් පසුබිමක දයා ගමගේට නඩුවක් පැවරුණහොත් කුමකින් කුමක් සිදු වේ ද? බැරි වෙලා හෝ දයා ගමගේට එරෙහිව පවරන නඩුවෙන්, ණය ලබාගෙන තිබෙන්නේ දයා ගමගේ නොව දයා ඇපරල් ව්‍යාපාරයයි ඔප්පු වුවහොත් දයා ගමගේට තව තවත් කොම්පැණිවලට ණය ලබා ගන්නට ඉන් ලැබෙන නෛතික දිරිය අපමණ යයි සිතමි.
දුමින්ද සිල්වාට එරෙහිව මනුෂ්‍ය ඝාතනයක් සම්බන්ධව පැවරී තිබුණ නඩුව විභාග වුණ අන්දම එහි පසුබිම හා ඊට ගත වුණ කාලය ගැන හැඟීමක් පුරවැසියන්ට ඇත. නඩුවෙන් ඔහු වරදකරු විය. මහාධිකරණයෙන් ලබා දුන් තීන්දුව ශ්‍රේෂ්ඨාධිකරණයෙන් ද අනුමත විය. දීර්ඝ කාලයක් ගත වුණත් දුමින්ද සිල්වා මිනීමරුවෙකු බව ලංකාවේ අධිකරණ ක්ෂේත්‍රයේ සෙමින් විභාග වන ක්‍රියාවලියක් හරහා ඔප්පු විය. ඔහුට ජනාධිපති සමාව ලැබිණි. ජනාධිපති සමාව ලබන දුමින්ද සිල්වා සංස්ථා සභාපති කෙනෙකි. මේ සියල්ලට වඩා රසවත් අන්දරයක් දුමින්ද සිල්වා සම්බන්ධයෙන් පවතී. එය නම් සිර දඬුවම් නියම වුණ දුමින්ද සිල්වා එක දවසක් හෝ හිර මැදිරියක කාලය ගත නොකිරීමය. බන්ධනාගාර රෝහලේ විශේෂ වාට්ටුවක ඔහු සුව පහසු දිවි පෙවෙතක් ගත කළේය. එසේ බන්ධනාගාර රෝහලේ කාලය ගත කළේ අසනීපයකින් සුව වන්නට නොවේ. තමන්ගේ පවුල සතු ධන බලය හා මාධ්‍ය බලය නොමසුරුව වැයකොට ජනාධිපතිවරයෙකු බලයට පත් කර ඔහුගෙන් ජනාධිපති සමාව ලබා ගැනීමටය. මෙවන් පුවත් මෙනෙහි වන විට ‘සිස්ටම් චේන්ජ්‘ එක සිහිනයක් දෝයි සිතේ. සිහිනයක් නොව යථාර්ථයකි යන්න විශද කරන්නට හැක්කේ කාට ද? එය කළ හැක්කේ අධිකරණයට පමණක් යයි සිතමි.
චෞර නායකයන්ට ලෝකය මුළා කළ නොහැකිය
අද අපට ලෝකය දුර නොවේ. ලෝකයට ලංකාව තුළ සිදුව ඇති දෑ හා සිදුවන දෑ මෙන්ම සිදුවිය හැකි දෑද කිසිසේත් අමුතු හෝ අද්භූත ඒවා ද නොවේ. ගෝඨාභය මොන වෙට්ටු දැම්මත් ඒවාට මුසපත්ව ලංකාවට අගාධයෙන් ගොඩ එන්නට ආධාර ලබා දෙනු නැත. ආධාර නොලැබෙන බවට තිබෙන සාධක වැඩිය. රාජපක්ෂලා සාපරාධී අන්දමට රාජ්‍ය මුදල් අවභාවිත කිරීම හා මකොල්ලකෑම ලෝකයට රහසක් නොවේ. තව දුරටත් මංකොල්ල කන්නට ආධාර දෙන්නට තරම් අනුවණ තත්වයක් ලොව කොහේ හෝ තිබිය හැකි ද?
රනිල්ට ආධාර ලැබෙනවා නම් ඔහු ඉදිරියට ඉතා අසීරු කාලයක් ගතවන බව පුන පුනා කියන්නේ ඇයි? ආහාර හිඟයක් ඇතිවන බව මැති ඇමතිවරුන් කියවන්නේ ඇයි?
දිනෙන් දින අභ්‍යන්තරයෙන් කුණු වෙන තුවාලයක් බවටය ලංකාවේ ආර්ථික දේහය අසාධ්‍ය වන්නේ. රාජපක්ෂලා බලය අල්ලාගෙන සිටින තුරු කිසිම ආර්ථික සැත්කමක් කරන්නට බැරි බව ද පැහැදිලිය. රනිල් සුපුරුදු කමිටු පත් කිරීමේ සෙප්පඩ විජ්ජාවකින් කල් මරන්නට හදන වග ඉතා පැහැදිලිය. මහින්ද රාජපක්ෂ පසුගිය කාලයේ මැති සභය තුළ කිසිම ප්‍රශ්නයක් ගැන හරවත් යමක් කතා කළේ නැත. එහෙම කතා කරන්නට ඔහුට පුළුවන්කමක් ද නැත. මැති සභයට එන්නේ හෝ රැඳී සිටින්නේ ද නැත. එහෙත් අදටත් ඔහු ගමන බිමන ගුවනිනි. මොහු මොන තරම් දරුණු – හිතක් පපුවක් නැති අවිනීත පුද්ගලයෙක් ද? මොහුට තව දුරටත් බලය භුක්ති විඳින්නට ආධාර උපකාර ලබා දෙනවා නම් ලෝක නායකයන්ටත් පිස්සුය.
අද වන විට අරගලය තුළ ජවය අඩු වී ඇති බවක් පෙනේ. එහෙත් අරගලය ලබා දුන් ආරම්භය අති ප්‍රබලය. එබැවින් ජනතාව රාජ්‍ය පාලනයේ වෙනසක් ඇති කර ගැනීමට කැපවීමෙන් කටයුතු කළ යුතුව ඇත. ගෝඨාභය බලය අත් හරින තුරු සාමකාමී විරෝධතා රට පුරා පැවැත්වීම අවශ්‍ය වේ. ගෝඨාභයට බලහත්කාරයෙන් බලයේ රැඳී සිටින්නට බැරි තරමට විරෝධතා බලවත් විය යුතුය. තරුණ අරගලය ලබා දුන් ආරම්භය ඇතුළෙන් පොදු මහජන අරගලයක් දීප ව්‍යාප්තව ගොඩ නැඟිය යුතුව තිබේ. එහි තේරුම ගෝඨාභය බලයේ සිටින තුරු ලංකාවට හෙටක් නැත යන්නය.
අනුවණ ලෙස බොරුකාරයෙකුට මුසපත්ව අසාමාන්‍ය බලයක් උරුම කර දී දුක් විඳින ජනතාව තමන් විශාල වරදක් කරගත් බව හොඳින් වටහාගෙන සිටින බව පැහැදිලිය. ජනතාවගේ කිසිම ප්‍රශ්නයක් විසඳීමට පාර්ලිමේන්තුවට – ජනාධිපතිට පුළුවන්කමක් නැති බව සක් සුදක් සේ පැහැදිලිය. එය සනාථ වන්නේ හරීන් සහ මනූෂ අමාත්‍ය පදවි දෙකක් ඩැහැ ගැනීමෙනි. මේ චෞර රාජ්‍යයෙහි දේශපාලනය නම් හැකි පළමු මොහොතේම බලය භුක්ති විඳීමය. මහා චෞර මහින්ද රාජපක්ෂ රටම හොරකම් කළත් තව දුරටත් ඔහුට බලය අවශ්‍යය. පසු පසින් සිටින හැම චරිතයකටම ඉක්මනින් අවශ්‍ය බලය යි. එබැවින් මේ පාර්ලිමේන්තුවට හෝ මේ ජනාධිපතිට හෝ මේ අගමැතිට හෝ ලංකාව විපතින් මුදවා ගන්නට නොහැකිය. ජනතාවගේ අරගලය බලගැන්විය යුත්තේ බලය අත් නොහරින චෞර නායකයන් පන්නා දැමීමට මැතිවරණයක් දිනා ගැනීමටය. රනිල්ට කළ හැකි එකම දෙයකි ඇත්තේ. ඒ රාජපක්ෂලාට රැකවරණය ලබන්නට කල් අල්ලා සිටීමටය. එහෙත් පුරවැසියන් කල්පනා කළ යුත්තේ රටට රැකවරණය සලසා ගැනීමටය. ඊට අරගලයම හැර විකල්පයක් ද නැත.■
