කොළඹ ගෝල්ෆේස්හි ගෝ ගෝටා ගම සාමකාමී විරෝධතාකරුවන්ට පහරදීමට පැමිණ කෝපයට පත් මහජනයාගේ පහරකෑමට ලක්වූ ශ්‍රී ලංකා පොදුජන පෙරමුණේ ආධාරකරුවන්ට යුද හමුදා රෝහලට ඇතුලත් කර ප්‍රතිකාර ලබාදී ඇත.
යුද හමුදාවට කිසිඳු සම්බන්ධයක් නැති මෙවැනි සිවිල් පුද්ගලයින්ට ප්‍රතිකාර ලබාදීමේ හැකියාවක් යුද හමුදාවට නැති බව මේ සම්බන්ධයෙන් කරන ලද විමසීමකදී සිය නම් සඳහන් නොකරන්නැයි ඉල්ලා සිටි හිටපු යුද හමුදා නිලධාරීන් කිහිප දෙනෙකු පැවසූහ.
ඔවුන් පැහැදිලි කරනු ලැබුයේ දැනට යුද හමුදා සේවයේ නිතරත සාමාජිකයින්ට හා ඔවුන්ගේ ආසන්නම පවුලේ සාමාජිකයින්ට සහ හිටපු යුද හමුදා සාමාජිකයින්ට හා ඔවුන්ගේ ආසන්නම පවුලේ සාමාජිකයින්ට පමණක් යුද හමුදා රෝහලෙන් ප්‍රතිකාර ලබාගත හැකි බවයි.
මේ සම්බන්ධයෙන් කරන ලද විමසීමේදී යුද හමුදා මාධ්‍ය ප්‍රකාශක බි්‍රගේඩියර් නිලන්ත ප්‍රේමරත්න පැවසුවේ එවැන්නක් ඔහු නොදන්නා බැවින් සොයා බලා පිළිතුරක් ලබාදෙන බවය. එහෙත් පුවත්පත මුද්‍රණයට යනතෙක්ම ඔහුගෙන් පිළිතුරක් ලැබුණේ නැත.■
