ජනාධිපතිවරයාගේ සභාපතිත්වයෙන් යුත් ජාතික ආර්ථික සභාවට සහාය වීම සඳහා දහසය දෙනෙකුගෙන් යුත් ආර්ථික උපදේශක කමිටුවක් මාර්තු 14 වැනිදා පැවති කැබිනට් මණ්ඩල රැස්වීමේදී පත් කිරීම සඳහා අනුමැතිය හිමිවී ඇත. ඒ ජනාධිපති ගෝඨාභය රාජපක්ෂ විසින් ඉදිරිපත් කරන ලද යෝජනාවක් සැලකිල්ලට ගැනීමෙන් අනතුරුවය.
මහාචාර්ය එච්වී කරුණාරත්න, මහාචාර්ය ශිරන්ත හීන්කෙන්ද, ආචාර්ය දුෂ්නි වීරකෝන්, ධම්මික පෙරේරා, ක්‍රිෂාන් බාලේන්ද්‍ර, අෂ්රෆ් ඔමාර්, ආචාර්ය හාන්ස් විජේසූරිය, විශ් ගෝවින්දසාමි, එස් රෙන්ගනාදන්, රංජිත් පේජ්, සුරේෂ් ද මෙල්, ප්‍රභාෂ් සුබසිංහ, දුමින්ද හුලංගමුව, සුජීව මුදලිගේ, අශෝක් පතිරගේ, මොහාන් පණ්ඩිතගේ එම ආර්ථික උපදේශක කමිටුවේ සාමාජිකයින් බව ජනාධිපති මාධ්‍ය අංශය නිවේදනය කර ඇත. මේ අය අතරින් 14 දෙනෙකු ජනාධිපතිවරයා මුලින් පත්කරනු ලැබූ අතර ඒ සඳහා අශෝක් පතිරගේ හා මොහාන් පණ්ඩිතගේ පත්කරනු ලැබුයේ ඊට පසුවය. ඒ අනුව ජනාධිපතිවරයාට අමතක වූ අය මේ සඳහා ඉදිරියටත් පත්විය හැකිය.
එම ආර්ථික උපදේශක කමිටුව උපදෙස් ලබාදීමට බලාපොරොත්තු වන ජාතික ආර්ථික සභාව මාර්තු 07 වැනිදා පැවති කැබිනට් මණ්ඩල රැස්වීමට ජනාධිපතිවරයා ඉදිරිපත් කරන ලද යෝජනාවක් අනුව පත්කෙරුණු අතර එය ශ්‍රී ලංකාව මුහුණ දෙන වත්මන් ආර්ථික අර්බුදය කළමනාකරණයට උපදෙස් ලබාදීම සඳහා පත්කරන ලද මැති ඇමතිවරුන් හා නිලධාරීන්ගෙන් සමන්විතව එකක් බව වාර්තා කරනු ලැබීය.
ජනාධිපති ගෝඨාභය රාජපක්ෂ සභාපතිත්වය දරන එම ජාතික ආර්ථික සභාවේ සෙසු සාමාජිකයින් ලෙස අග්‍රාමාත්‍ය මහින්ද රාජපක්ෂ, වෙළඳ අමාත්‍ය බන්දුල ගුණවර්ධන, මහාමාර්ග අමාත්‍ය ජොන්ස්ටන් ප්‍රනාන්දු, මුදල් අමාත්‍ය බැසිල් රාජපක්ෂ, කෘෂිකර්ම අමාත්‍ය මහින්දානන්ද අලුත්ගමගේ, වැවිලි අමාත්‍ය රමේෂ් පතිරණ, මහා බැංකු අධිපති අජිත් නිවාඩ් කබ්රාල්, ජනාධිපති ලේකම් ගාමිණී සෙනරත්, භාණ්ඩාගාර ලේකම් එස්ආර් ආටිගල හා ශ්‍රී ලංකා මහා බැංකුවේ නියෝජ්‍ය අධිපති ධම්මික නානායක්කාර කටයුතු කරනු ලබයි.
මෙම ජාතික ආර්ථික සභාව මාර්තු 14 රැස්වූ බවද, ඔවුන්ට උපදෙස් ලබාදීම සඳහා පත්කර ඇති විශේෂඥ කමිටුව සමඟ ඔවුන් එදින රැස්වීමට නියමිත බවද වාර්තා වී තිබුණී. ජනාධිපතිවරයා ප්‍රමුඛ මැති ඇමතිවරුන්ගෙන් හා නිලධාරීන් කිහිප දෙනෙකුගෙන් සමන්විත එම ආර්ථික සභාව පිහිටුවීම සම්බන්ධයෙන් මාර්තු 07 වැනිදා කැබිනට් මණ්ඩල තීරණ දැනුම් දීමේ නිවේදනයේ සඳහන් වන්නේ මෙසේය.
‘සාර්ව ආර්ථික ප්‍රතිපත්ති, කොවිඩ් 19 වසංගත තත්වයෙන් පසුව ජාතික ආර්ථිකයේ ක්‍රියාකාරිත්වය, ආර්ථික ප්‍රතිව්‍යුහගත කිරීම්, රජයේ ආර්ථික ප්‍රතිපත්ති හා මූල්‍ය ප්‍රතිපත්ති සඳහා සෘජු බලපෑමක් ඇති කරන ප්‍රධාන සංවර්ධන ව්‍යාපෘති ඇතුළුව දේශීය ආර්ථික ප්‍රතිපත්තීන් පිළිබඳව වඩාත් ගැඹුරින් සාකච්ඡා කර සමස්ත ආර්ථික කළමනාකරණය සිදුකිරීම මඟින් මෙරට ආර්ථික වර්ධනය වේගවත් කිරීම අරමුණු කරගෙන ‘ආර්ථික සභාව’ සතිපතා කැඳවීමට අතිගරු ජනාධිපතිතුමා විසින් තීරණය කර ඇත. එම සභාවේ උපදෙස් හා මඟ පෙන්වීම් අනුව අදාළ අමාත්‍යාංශ, දෙපාර්තමේන්තු හා ව්‍යවස්ථාපිත ආයතන විසින් අවශ්‍ය අවස්ථාවලදී අමාත්‍ය මණ්ඩලයේ අනුමැතිය මත අදාළ තීරණ ක්‍රියාත්මක කිරීමටත්, ආර්ථික සභාවේ රැස්වීම් සඳහා අවශ්‍ය පරිදි එක් එක් ක්ෂේත්‍රයන්හි ප්‍රාමාණික විද්වතුන් කැඳවීමටත් අතිගරු ජනාධිපතිතුමා විසින් ගනු ලැබීමට අපේක්ෂිත පියවරයන් සම්බන්ධයෙන් අමාත්‍ය මණ්ඩලයේ එකඟතාව ලබාදීමට තීරණය කරන ලදි.’
මෙම කරුණ ගැන අවධානය යොමු කිරීමට සිතුණේ මෙම සටහන ලියන මොහොතෙන් පැය කිහිපයකට පසු මාර්තු 16 වැනිදා රාත්‍රි ජනාධිපතිවරයා ජාතිය ඇමතීමට නියමිතව තිබූ නිසාය. ජනාධිපතිවරයාගේ එම ජාතිය ඇමතීම නිසාම එදින රටපුරා සිදුකරන විදුලිය කැපීමද ‘ජාතිය ඇමතීමේ’ වේලාව තුළ සිදුනොකරන බව ශ්‍රී ලංකා මහජන උපයෝගිතා කොමිසම විදුලිය කැපීම සම්බන්ධයෙන් නිකුත් කර ඇති සටහන අනුව දැනුම් දී ඇත.
රට වෙළාගෙන ඇති ඉන්ධන, ගෑස්, කිරිපිටි, ඖෂධ ඇතුළු අත්‍යවශ්‍ය භාණ්ඩ හිගයන් සහ භාණ්ඩ හා සේවාවල අසමාන මිල ඉහළ යාමත් හේතුවෙන් ජනතාව දිවා රෑ නොබලා තැන නොතැන නොතකා මේ දිනවල ජනාධිපතිවරයාව අමතමින් සිටින අවස්ථාවක ජනාධිපතිවරයා රූපවාහිනී තිරයක් මගින් හෝ ජාතිය ඇමතීම ඔහුගේ ශරීර සෞඛ්‍යයට හොඳය. මන්ද ආරක්ෂකයින්ද නොමැතිව ප්‍රසිද්ධ ස්ථානයක සිට ඔහු ජාතිය ඇමතුවේ නම් ජනතාව කටින් පමණක් නොව අතින් පයින්ද ඔහුව ඇමතිය හැකි බව පෙනෙන්නට තිබෙන නිසාය.
ඉහත සඳහන් කරන ලද රට වෙළාගත් දහසකුත් එකක් ව්‍යාධිවලින් ජනතාව ගලවා ගැනීම සඳහා සිය ආශ්චර්යයන් ජනාධිපතිවරයා ජාතිය අමතා රටට කියනු ඇතැයි තවමත් ‘රාජපක්ෂ’ වහල් මානසිකත්වයේ සිටින පිරිස් සිතනවා විය හැකි වූවත් අනෙක් ජනතාව නම් මේ මොහොතේ සිතන්නේ ඔහු ජනාධිපති තනතුරෙන් ඉල්ලා අස්වී දැනට බිරිඳට හා පුත්‍රයාට පුරවැසිභාවය ඇති ඔහුගේ පෙර රට වන ඇමරිකාව බලා යන බවට ජාතිය අමතමින් ප්‍රකාශ කරනු ඇති බවය.
එහිදී ජනාධිපතිවරයා ජාතිය අමතා ප්‍රකාශ කරන්නේ කුමක්දැයි නිශ්චිතවම කිය නොහැකි වූවත් ඔහු ඉල්ලා අස්වී ඇමරිකාවට යන බවක් කියනු ඇතැයි සිතිය නොහැකිය. එවැනි අදහසක් ඇත්නම් ඔහුගේ ප්‍රධානත්වයෙන් ‘ජාතික ආර්ථික සභාවක්’ හා එයට උපදෙස් ලබා ගැනීම සඳහා ආර්ථික උපදේශක කමිටුවක් පත් කරන්නේ නැත.
මෙහිදී අපට පැනනඟින ප්‍රශ්නය වන්නේ මේ ජාතික ආර්ථික සභාවට හා එයට උපදෙස් දෙන්නට පත්කර ඇති ආර්ථික උපදේශක කමිටුවට වත්මන් ආර්ථික හා සමාජ අර්බුදයෙන් රට ගොඩ ගැනීම සඳහා විසඳුම් ඇත්ද යන්නය. ඊට හේතුව මෙම ජාතික ආර්ථික සභාවේ හා ආර්ථික උපදේශක කමිටුවේ සිටින අති බහුතරය මෙන්ම බොහෝ දෙනා මෙම ආණ්ඩුවේ මේ මොහොතේත් කටයුතු කරන හා ඊට සම්බන්ධව සිටින හෝ ඊට සම්බන්ධව සිටි අය වන නිසාය.
ජාතික ආර්ථික සභාව ගතහොත් එහි ගන්නටම දෙයක් නැත. එහි සභාපති ජනාධිපතිවරයා ඇතුළු ඇමතිවරුන් සියල්ලම මේ වනවිට ‘ෆේල්’ චරිත පමණය. පසුගිය අවුරුදු දෙකකට වැඩි කාලයක් තිස්සේ ඔවුන් අමාත්‍ය ධුර දරන විෂයන්වල පවා කැපී පෙනෙන වෙනසක් කරන්නට හැකි වූයේ නැත. කොහොමත් මේ පිරිස කැබිනට් මණ්ඩලය ලෙස සිටින නිසා ඒ අය අතරිනුත් අමුතු සභා පිහිටුවීම අවශ්‍ය වන්නේ නැත. මන්ද මේ ආර්ථික සභාවේත් අවසාන තීරණය කැබිනට් මණ්ඩලය හා ජනාධිපතිවරයා බව සඳහන් කර ඇති නිසාය. එම සභාවේ සිටින මහා බැංකු අධිපති අජිත් නිවාඩ් කබ්රාල් හා භාණ්ඩාගාර ලේකම් එස්ආර් ආටිගල ගැනද අමුතුවෙන් කිව යුත්තක් නැත. කබ්රාල් හිටපු රාජ්‍ය ඇමතිවරයකු ලෙස හා වත්මන් මහා බැංකු අධිපතිවරයා ලෙස මෙන්ම හිටපු මහා බැංකු අධිපතිවරයකු ලෙස කළකී දෑවල කෙරුවාව හෙවත් නොහැකියාව මේ වනවිට රටේ දැනුම් තේරුම් ඇති කිසිවෙක් නොදන්නේ නැත. රටේ ආර්ථිකය සම්බන්ධයෙන් උපදෙස් ගන්නට තරම් දෙයක් ඔහු සතුව වර්තමානයේ මෙන්ම අතීතයේද තිබුණේ නැත. ඔහු සුදුසු වන්නේ රාජපක්ෂවරුන්ට කොන්දේසි විරහිතව කඩේ යෑමට හා ඒ වෙනුවෙන් ඇත්ත නැත්ත කිරීමටත් නැත්ත ඇත්ත කිරීමටත් පමණය. ඊටත් එහාට ගොස් නාමල් රාජපක්ෂ වැනි චරිත සමඟ කෝච්චි පෙට්ටි නැටුම් නැටීමට පමණය.
භාණ්ඩාගාර ලේකම් එස්ආර් ආටිගල, ජනාධිපති ලේකම්වරයා ලෙස හිටපු භාණ්ඩාගාර ලේකම් ආචාර්ය පීබී ජයසුන්දර සිටියදී ආර්ථිකය සම්බන්ධයෙන් ආතතියට පත්වී සිටියත් ආචාර්ය ජයසුන්දරගේ ඉවත් වීමෙන් පසු කළ යමක් නැත. ඔහු කරන්නේත් මුදල් අමාත්‍ය බැසිල් රාජපක්ෂට වුවමනා දේවල් මිස වෙනකක් නොවේ. එම ආර්ථික සභාවේ සිටින නම එතරම් සුපුරුදු නොවන චරිතය මහා බැංකු නියෝජ්‍ය අධිපති ධම්මික නානායක්කාර පමණය. ඔහුගේ කෙරුවාව ගැන අප එතරම් දන්නේ නැතත් ඔහුට එහි සිටිනා අනිකුත් ජරාජීර්ණ පිරිසත් සමඟ කළ හැකි යමක් ඇතැයි අපි නොසිතමු.
ජාතික ආර්ථික සභාවට උපදෙස් ලබාගැනීමට පත්කර ඇති උපදේශක කමිටුව ගැන ගත් කලද එහි විශේෂත්වයක් නැත. එහි කිහිප දෙනෙකු ශ්‍රී ලංකාවේ ව්‍යාපාරික ලෝකයේ ප්‍රධාන පෙළේ අය වුවද ඒ අය පසුගිය කාලයේ රාජපක්ෂවරුන් සමඟ ඇති දේශපාලන සබඳතා ඔස්සේ ව්‍යාපාර ක්ෂේත්‍රයේ ඉහළට ආ අය බව කරුණු දන්නා කවුරුත් දනිති. මේ අයගෙන් සමහරකු වත්මන් රාජපක්ෂ ආණ්ඩුව යටතේ මෙන්ම පසුගිය රාජපක්ෂ ආණ්ඩු යටතේ රාජ්‍ය ආයතනවල විවිධ තනතුරු දරා තිබේ. එහෙත් එම රාජ්‍ය ආයතන තිබුණ තත්වයෙන් වෙනස් වූයේ නැත. සමහර තැන්වල සිදුවූයේ තිබුණාටත් වඩා ඒවා ආපස්සට යෑමය.
ජනාධිපති ගෝඨාභය රාජපක්ෂගේ එක් ප්‍රශ්න විසඳීමේ ක්‍රමවේදයක් වූයේ රටේ සෑම ප්‍රශ්නයක් හෝ ක්ෂේත්‍රයක් සම්බන්ධයෙන්ම කාර්ය සාධක බලකා පිහිටුවීමය. 2020 ජනවාරි 25 වැනිදා දින සහිතව එසේ පිහිටුවන ලද පළමු කාර්ය සාධක බලකාය වූයේ දරිද්‍රතාව තුරන් කිරීම සහ ජීවනෝපාය සංවර්ධනය සඳහා වන ජනාධිපති කාර්ය සාධක බලකායයි. දේශපාලනඥ හා රාජ්‍ය නිලධාරි චරිතවලට අමතරව එම කාර්ය සාධක බලකාය තුළ ජාතික ආර්ථික සභාවට උපදෙස් දීම සඳහා පත්කර ඇති ආර්ථික උපදේශක කමිටුවේ සාමාජික මහාචාර්ය ශිරන්ත හීන්කෙන්ද කටයුතු කළේය. එම කාර්ය සාධක බලකාය එදා සිට මේ දක්වා එය පිහිටුවීමේ නමේ ඇති කාර්ය සඳහා සිදුකළේ මොනවාදැයි කිසිවකු දන්නේ නැත. එම කාර්ය සාධක බලකාය පත්කළ දා සිට අද දක්වා සිදුවී ඇත්තේ රටේ දරිද්‍රතාව ඉහළ යෑමත් ජනතාවට ජීවනෝපාය අහිමි වීමත්ය.
එම ආර්ථික කමිටුවේ සිටින ධම්මික පෙරේරා, අශෝක් පතිරගේ, සුරේෂ් ද මෙල් ආදින් රාජ්‍ය ආයතනවල තනතුරු මෙන්ම ජනාධිපති කාර්ය සාධක බලකා සාමාජිකයින් වශයෙන් කටයුතු කර තිබේ. ඒ යටතේ ඔවුන් කර ඇති වෙනසක් නම් අප දන්නේ නැත.
ජාතික ආර්ථික සභාවේ සිටින මුදල් අමාත්‍ය බැසිල් රාජපක්ෂ, (ඔහු 20 වන සංශෝධනය යටතේ පාර්ලිමේන්තුවට පැමිණීමට පෙර) ජනාධිපති ලේකම් ගාමිණී සෙනරත් මෙන්ම භාණ්ඩාගාර ලේකම් එස්ආර් ආටිගල යන අයද ජනාධිපතිවරයා පත්කරන ලද විවිධ කාරණාවලට අදාළ කාර්ය සාධක බලකාවල කටයුතු කරයි. එහෙත් රට ආපස්සට මිසක් ඉදිරියට ගෙන යන්නට එම කාර්ය සාධක බලකාවලට මෙතෙක් හැකිවී නැත. ජාතික ආර්ථික සභාවේ සිටින අනිකුත් මැති ඇමතිවරුන් සම්බන්ධයෙන්ද අඩු වැඩි වශයෙන් තත්වය එසේය. ඔවුන්ද කාර්ය සාධක බලකා ගණනාවක් නියෝජනය කරයි. ඒවායින් සිදුවූයේ කුමක්දැයි කවුරුත් දන්නේ නැත. ඒවා තවමත් පවතින්නේද යන්නද කවුරුත් දන්නේ නැත. සමහරවිට එය දන්නේ ජනාධිපතිවරයා පමණක් විය හැකිය.
ජනාධිපතිවරයා පත්කළ කාර්ය සාධක බලකා අතුරින් දැනට ක්‍රියාත්මක වන්නේ ගලගොඩඅත්තේ ඥානසාර හිමිගේ ප්‍රධානත්වයෙන් යුත් එක රටක් එක නීතියක් සඳහා වූ කාර්ය සාධක බලකාය පමණක් යැයි පෙනේ. ඒ ජනාධිපතිවරයා අවසන් වරට 2022 පෙබරවාරි 28 දින අති විශේෂ ගැසට් පත්‍රයක් මගින් තවත් මාස තුනක කාලයකට එම කාර්ය සාධක බලකායේ කාලය දීර්ඝ කළ නිසාය.
මේ සියලු කරුණුවලින් අපට එළඹිය හැකි නිගමනය වන්නේ රටේ සමාජ ආර්ථික ප්‍රශ්න විසඳීම සඳහා ජනාධිපතිවරයා පත්කරන ලද කාර්ය සාධක බලකා මෙන්ම වත්මන් ආර්ථික අර්බුදය විසඳීම සඳහා පත්කර ඇති ජාතික ආර්ථික සභාව මෙන්ම ඊට උපදෙස් ලබා ගැනීමට පත්කර ඇති ආර්ථික උපදේශක කමිටුවද මෙම අර්බුදවලට විසඳුම් සෙවිය නොහැකි පුද්ගලයින්ගෙන් සමන්විත හුදු ‘සභා’ හා ‘කමිටු’ පමණක් බවය. ඒවා මෙතෙක් ප්‍රමාණවත් වූයේ ජනතාව රැවටීමට පමණක් බවය.
ඒ නිසා මෙම ජාතික ආර්ථික සභාව හා එයට උපදෙස් දෙන්නට පත්කර ඇති ආර්ථික උපදේශක කමිටුව අපට හඳුන්වා දීමට හැක්කේ අලුත් බෝතල්වල දැමූ පරණ වයින් ලෙස මිස අලුත් වයින් ලෙස නොවේ.■
