රට පුරා කලාප වශයෙන් විදුලිය කපන ලද පසුගිය දිනවල විදුලිය කපන බවට නිවේදනය කර තිබූ කලාපවලට අයත් මිරිහානේ ජනාධිපතිවරයාගේ පෙද්ගලික නිවස පිහිටි ප්‍රදේශයේ හා මාදිවෙල මන්ත්‍රී නිල නිවාස පිහිටි ප්‍රදේශයේ විදුලිය කපා නැති බව වාර්තාවේ.
ජනාධිපතිවරයාගේ මිරිහාන නිවස පිහිටි ප්‍රදේශයේ පදිංචිකරුවෙකු ඒ සම්බන්ධයෙන් කරන ලද විමසීමකදී ඔවුන්ගේ ප්‍රදේශයට විදුලිය නොකැපූ බව පැවසූ අතර මාදිවෙල පිහිටි මන්ත්‍රී නිවාසවල විදුලිය කැපීමක් සිදු නොවූ බව සමාජ මාධ්‍ය වාර්තාවල දැක්වේ. එම වාර්තා පළකර ඇත්තේ විදුලිය කැපීම පිළිබඳ මහජන උපයෝගිතා කොමිසම, ලංකා විදුලි බල මණ්ඩලය හා ලෙකෝ සමාගමේ අදාළ විමසීම් අංශවලට අමතන ලද ඇමතුම් විස්තර සහිතවය. විදුලිය කපන කලාප ලැයිස්තුවේ කොළඹ නගරය ඇතුළත්ව නොතිබුණ අතර ඒ අනුව කොළඹ නගරයට විදුලිය කැපීමක් එම දිනවල සිදු නොවීය. ඒ සම්බන්ධයෙන් විරෝධය එල්ල වීමත් සමඟ පෙබරවාරි 24 දින සිට කොළඹ නගරයට විදුලිය කපන බව මේ වනවිට නිවේදනය කර තිබේ.■
