■ අමන්දිකා කුරේ
බොරැල්ල සියලු ශාන්තුවරයන්ගේ දේවස්ථානයේ බෝම්බ සිදුවීමට අදාළව අත්අඩංගුවට ගනු ලැබූ විශ්‍රාමික වෛද්‍යවරයා බෝම්බය ලබා ගත් ආකාරය පිළිබඳව කරුණු සැඟවීමක් කරන බවත් මේ සිදුවීම පසුපස තවත් කණ්ඩායමක් සිටින බවට සැක කරන බවත් නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පීරිස් අධිකරණයේ දී ප්‍රකාශ කර තිබේ.
රට තුළ නියමිත අරක්ෂාවක් නොමැති බව පෙන්වීමට සහ මහජන කැළඹීමක් ඇතිකිරීමේ අරමුණින් මෙම බෝම්බ තබා ඇති බවට ද නියෝජ්‍ය සොලිසිටර් ජනරාල්වරයා පවසා තිබේ.
කෙසේවුවත් පසුගිය කාලයේ පොලිසිය විසින් මාධ්‍යයට ලබා දුන් කරුණුවල අඩංගු වූයේ සිය බිරිඳ හා විවාහය සම්බන්ධ හේතු නිසා වෛද්‍යවරයා බෝම්බ තබා ඇති බවකි.
මෙම බෝම්බ සිදුවීමට අදාළව බෝම්බ තැබූ පුද්ගලයා බවට මුලින් ම පොලිසිය ප්‍රකාශ කළ සියලු ශාන්තුවරයන්ගේ දේවස්ථානයේ සන්ක්‍රිස්තියන්වරයා වන මුනීන්ද්‍රන් ඇප මත නිදහස් කිරීමට කොළඹ අතිරේක මහේස්ත්‍රාත් රජීන්ද්‍රා ජයසූරිය පෙබරවාරි 09 වන දින නඩුව කැඳවූ අවස්ථාවේ නියෝග කරන ලදි.
මෙම නඩුව යළි කැඳවීම මාර්තු 29 දක්වා කල් තබා ඇති අතර විමර්ශන කටයුතු කඩිනමින් අවසන් කර එහි ප්‍රගතිය එදිනට වාර්තා කරන ලෙස අතිරේක මහේස්ත්‍රාත්වරිය කොළඹ අපරාධ කොට්ඨාසයට නියෝග කර තිබේ.
කෙසේ වෙතත් සැකකාර වෛද්‍යවරයාගේ පුත්‍රයා වන ඕෂල හේරත් මහතා සිය පියා ත්‍රස්තවාදය වැළැක්වීමේ පනත යටතේ රඳවාගෙන ඔහුට බොරු චෝදනා එල්ල කරන බව කියමින් ජාත්‍යන්තර මානව හිමිකම් කවුන්සිලයට හා එක්සත් ජාතීන්ගේ සංවිධානයට ලිපි දෙකක් ද යොමු කර තිබේ.
ඊට අමතරව වෛද්‍යවරයා වෙනුවෙන් මූලික අයිතිවාසිකම් පෙත්සමක් ගොනු කර තිබෙන අතර පෙබරවාරි 14 ශ්‍රේෂ්ඨාධිකරණයේ දී එය කැඳවීමට නියමිතය.■
