මේ ලිපිය ලියැවෙන්නේ 7 වැනිදා සන්ධ්‍යාවේය. හාත්පස අඳුර වෙලාගත් මහා වර්ෂාවක් ය. ගනසැරයට විදුලි එළිද අකුණුද පුපුරයි. මිනිසුන්ගේ හිත් තුළ ද අකුණු නිර්මාණය කළාට යහපාලන ජනපතිට පිං ය. එක එක මැසේජ මුහුණු පොතේ මගේ බිත මත පතිත වෙයි. එකකින් කියන්නේ සමාජ මාධ්‍ය තුළ ජනපතිට එරෙහිව සැර මත පළ කරන්නන් අධිකරණ නියමයකින් තොරව අත්අඩංගුවට ගන්නා බවය. තවත් එකකින් කියවෙන්නේ ව්‍යවස්ථාවට පටහැනිව පාර්ලිමේන්තුව විසුරුවා හැරීම පිළිබඳව ජනාධිපතිවරයා කල්පනා කරමින් සිටින බවය. පොලිස්පති පූජිත් ජයසුන්දර මාධ්‍ය හමුවක් තබමින් කියන්නේ තමන් පිළිගන්නේ ජනාධිපතිගේ නියෝග පමණක් බවය. ඒ නීතිය හා සාමය පිළිබඳ නීතියට අනුව ඇමති රංජිත් මද්දුම බණ්ඩාර පොලිස්පති අරබයා ලියූ ලියුමකට ප‍්‍රතිචාර ලෙසය. මෙවැනි බියකරු කතා බොහෝමයකට තටු ලැබී දසත සරයි. බියකරු මර්දනයක මූලික පසුබිම සමාජය මත සැකසෙමින් තිබෙන බව පෙනෙයි. 2015 ජනවාරි 8 වෙනිදා මෙරට බහුතරයක් ජනතාව පැතුවේ ප‍්‍රජාතන්ත‍්‍රවාදය මිනිස් නිදහස රැඳි නවීන රටක් ය. දැන්?.. දැන් උදාවී ඇත්තේ 2015දී රාජපක්ෂ රෙජීමය පරාජය කරන විට තිබූ තත්ත්වයට වඩා බියකරු වටපිටාවක් පිරි රටක් ය. මෙම බියකරු තත්ත්වය තුළ මේ කොදෙව්ව ලෝකයෙන් හුදකලා වෙමින් තිබෙන්නේ ය. මේ ආණ්ඩුව පැමිණියේ හොරුන් මිනීමරුවන් අල්ලන්නටය. අවසන සිද්ධ වුණේ හොරු මිනීමරුවන් ජනාධිපති සිරිසේන සමග එකතුවී ආණ්ඩුව ඇල්ලීමය.
‘මහින්ද රාජපක්ෂ, ගෝඨාභය රාජපක්ෂ, ශිරන්ති රාජපක්ෂ මේ තුන්දෙනාටම විරුද්ධව තියෙන බරපතළ චෝදනාවලට නීතිය ක්රියාත්මක කිරීම මෛත‍්‍රීපාල සිරිසේන සහ රනිල් වික‍්‍රමසිංහ සැලසුම් සහගතව වැළැක්වූවා’ චම්පික අමාත්‍යවරයා යහපාලන ආණ්ඩුවේ අතීත කෙරුවාව යට සැඟවුණ යථාර්ථය හෙළිකරන්නේ එසේය. පසුගිය කාලයේ තත්ත්වය එය නම් දැන් අලූ‍තින් පත්වී සිටින නීති විරෝධී ජුන්ටාව යටතේ තත්ත්වය කෙබඳු විය හැකිද?…
මේ පිළිබඳ කදිම පැහැදිලි කිරීමක් කරන සිදුවීමක් පසුගියදා එනම් නීති විරෝධී ජුන්ටාවේ නව ආරක්ෂක ලේකම් ලෙස හේමසිරි ප‍්‍රනාන්දු වැඩ භාර ගැනීමේ දා සිදුවිය. එනම් මේ වැඩභාර ගැනීමේ අවස්ථාවේදී පොලිස්පති පූජිත් ජයසුන්දරද අධිකරණයෙන් නොපමාව අත්අඩංගුවට ගන්න යැයි නම්කර සිටින ත‍්‍රිවිධ හමුදා මාණ්ඩලික ප‍්‍රධානී අද්මිරාල් රවි විජයගුණරත්නද එකම ඡුායාරූපයකට පෙනී සිටීමය. මේ ඡුායාරූපය වර්තමාන නීතිවිරෝධී ජුන්ටාවේ කළු චිත‍්‍රය අපට පෙන්වන්නේය. කතාවට කියන්නේ කණ කොක් සුද පේන්නේ ඉගිලෙනකොට කියාය. දැන් කොකා ගුවනේ ය. අපි බලා සිටින්නෙමු.
දැන් එක එක කතාය. බොදුබලයේ මාගල්කන්දේ සුදත්ත නම් චීවරධාරියා කියන්නේ තම නායක හිමියන්ද, දුමින්ද සිල්වාද, නිදහස් කළ යුතු බවය. මේ දෙදෙනාම අධිකරණය ඉදිරියේ වැරදිකරුවන් වී දැන් සිටින්නේ බන්ධනාග ාරයේ ය. බන්ධනාගාරයේ සිටින වැරදිකරුවෙක් නිවැරදිකරුවෙක් කර එළියට විසිකිරීමේ බලය මේ ව්‍යවස්ථාව යටතේ ජනාධිපතිට තිබෙන බව අප අමතක නොකළ යුතුය. දැන් තිබෙන්නේ අනීතික පාලනයක් ය. වෙන්නට බැරි දෙයක් නැත.
පසුගිය කාලයේ නාමල් කුමාර නම් චර පුරුෂයෙකු කරළියට පැමිණ ජනපතිගේ මේ ව්‍යවස්ථා කුමන්ත‍්‍රණයට කදිම රඟමඩලක් සදා දුන්නේය. නාමල් කුමාර ගිරා බසින් කියූ බොහෝ දේ වර්තමාන ජනපති සිරිසේන දේවභාෂිතය සේ පිළිගත්තේය. දැන් නාමල් කුමාර අම්පාරේ මහඔය බොහෝ ආරක්ෂිතව දිවි ගෙවන බව සැලවේ. මේවා අසන විට අපගේ සිත් සලිත වීම නතරකරනු නොහේ.
එෆ්සීඅයිඞීය
මේ අතර පසුගියදා කතාවක් ගියේ පොලිස් මූල්‍ය අපරාධ කොට්ඨාසය සතු පරීක්ෂණ ගොනු ඇවිදින්නට ගිය කතාවක් ය. ඊට පසුව එම ගොනු නැවත පොලීසියට පැමිණියද ඒවායේ තිබූ වැදගත් තොරතුරු සාක්ෂි අතුරුදන් බව වාර්තාවිය. මේ පිළිබඳව පොලීසියෙන් කරුණු විමසීමේදී එය එසේ වී නැති බව කීවේය. පොලීසිය එසේ කීවද මෙවැනි අනීතික පාලනයක් යටතේ රට අරාජික වී තිබෙන තත්ත්වය යටතේ එම තොරතුර නිවැරදි වන්නටද පුළුවන් ය. එම තොරතුර නිවැරදි නම් වෙන්නේ කුමක්ද?.. වෙන්නේ හොරුන් වංචාකරුවන් නීතියෙන් ගැළවීයාමය. එළැඹෙන මැතිවරණයක්දී පහසුවෙන් බලය ගන්නට තිබියදී රාජපක්ෂවරුන් සිරිසේන ජනාධිපතිවරයා සමග කුමන්ත‍්‍රණය කර නීති විරෝධී ආණ්ඩුවක් අටවා ගැනීමේ අරමුණ මේ කෙටි පාලනය තුළ තම පවුලට හිසරදයක්වූ මේ පරීක්ෂණවලට කෙළවීම විය හැකිය. අනෙක් පැත්තෙන් දැනගන්නට තිබෙන ලෙස පොලිස් මූල්‍ය අපරාධ කොට්ඨාසයේ නියෝජ්‍ය පොලිස්පති රවී විද්‍යාලංකාර රාජක්ෂවාදියෙක්‍ ය. මේ සියලූ දේවල් එකට ගැටගසා කල්පනා කිරීමේදී පොලීසිය එහෙම දෙයක් වෙලා නෑ කීවද අප තුළ තිබෙන සැකය බැහැර කළ නොහැකිය. රාජපක්ෂවරුන්ට හිසරදයක් වූ සිද්ධින් 62ක් අරබයා පරීක්ෂණ මේ පොලිස් කොට්ඨාසය තුළ සිදුවෙමින් සහ අවසන් වී ඇත. එම පරීක්ෂණවලට අදාළ සිද්ධීන් ආශ‍්‍රීතව මුදල් බිලියන ගණනින් වංචා වී ඇත. සිරිලිය සවිය, රාජපක්ෂ පවුලේ සොහොන් නිර්මාණය, මිග් යානා ගනුදෙනුව, රෝහිත රාජපක්ෂ පුතාගේ රොකට් යැවීමේ සිද්ධිය, ඬේසි ආච්චිගේ මැණික් මල්ලේ සිද්ධිය, නාමල් රාජපක්ෂ පුතාගේ ව්‍යාපාර අරබයා පවතින පරීක්ෂණ, යෝෂිත රාජපක්ෂගේ සීඑස්එන් සිද්ධිය, මහින්ද රාජපක්ෂ සම්බන්ධ ලංගම සිද්ධිය, මහින්ද රාජපක්ෂගේ මස්සිනා ශ‍්‍රී ලංකන් ගුවන්සේවයේ ලොක්කා ලෙස කටයුතු කළ කාලයට අදාළ පරීක්ෂණ, නාමල් රාජපක්ෂගේ ක‍්‍රිස් ගනුදෙනු ආදි කෙලින්ම රාජපක්ෂ පවුල හා බැඳුණු සිද්ධීන් අරබයා පරීක්ෂණවලට සහ නඩු කටයුතුවලට, ඉදිරියේදී මේ නීති විරෝධි පාලන ජුන්ටාව පැවතියහොත් කුමක් සිදුවනු ඇතිද?… අනෙක් පැත්තෙන් විමල් වීරවංශ, ශෂී වීරවංශ ප‍්‍රමුඛ රාජපක්ෂ සුරතලූ‍න්ට විරුද්ධව තිබෙන පරීක්ෂණවලට සහ නඩු කටයුතුවලට කුමක් සිදුවනු ඇතිද?.. ඒවාට අබ සරණම ලැබෙනු ඇත. මෙම සිද්ධීන් ආශ‍්‍රිතව පරීක්ෂණ මෙහෙයවූ නියෝජ්‍ය පොලිස්පතිවරයාගෙන් පහළ නිලධාරීන්ට කුමක් සිදුවනු ඇතිද?.. රාජපක්ෂවරුන්ගේ ඉතිහාසය දන්නා බොහෝ දෙනෙකු නම් මේ නිලධාරීන්ට අත්වන්නට නියමිත ඉරණම දන්නවා ඇත.
සීඅයිඞී පරීක්ෂණ
අප මුලින් කතා කළේ පොලිස් මූල්‍ය අපරාධ කොට්ඨාසය ගැනය. දැන් අප කතාකරන්නට යන්නේ අපරාධ පරීක්ෂණ දෙපාර්තමේන්තුව ගැනය. මෙහි රාජපක්ෂ පවුලට විරුද්ධව කෙරෙන ප‍්‍රධානම මෙන්ම ප‍්‍රබලම පරීක්ෂණය රගර් ක‍්‍රීඩක වසීම් තාජුඞීන්ගේ ඝාතනයට අදාළ පරීක්ෂණය. එම පරීක්ෂණවලට වර්තමාන ජනාධිපතිවරයාගේ ජනාධිපති කාර්යාල නිලධාරීන් දැනටත් අවශ්‍ය සහාය දෙන්නේ නැත. ඒ නිසා මේ ඝාතනය සිදුවූ දිනයේදී එවක ජනාධිපති නිවසින් සහ කාර්යාලයෙන් ගිය දුරකථන ඇමතුම් විශ්ලේෂණය අසීරු රාජකාරියක් වී ඇත. එම තත්ත්වය තුළ මෙන්ම වර්තමාන ජනාධිපති සිරිසේනගේ ඍජු අතපෙවීම් නිසා එම පරීක්ෂණ ඉදිරියට යන්නේ ඉබිගමනින් ය. එම ඉබිගමනත් වර්තමාන නීති විරෝධී ජුන්ටාව නවත්වා දමනවා ඇත. එය එලෙස නොවෙනවා නම් පුදුමයක් ය. එනිසා මේ නිතී විරෝධි පාලනය පාර්ලිමේතුවේදී අත් 113ක් එසවී සුජාතකර්ණය වුවහොත් තාජුඞීන් නැවත වළ දමනවා ඇත. සමහර විට දැනට ඝාතනයක් කියන මේ මිනීමැරුම නැවත රිය අනතුරක් ලෙස ප‍්‍රතිනිර්මාණය වන්නට පුළුවන් ය. එවිට මෙහි පරීක්ෂණ නිලධාරීන් සිපිරි ගෙදර ලගිනවා ඇත. ඒ බොරු සිද්ධියක් නිර්මාණය කළ වරදටය.
දැනට සාර්ථකව පරීක්ෂණ ඉදිරියට ගොස්, යුද්ධ හමුදාව ජනාධිපති සිරිසේනගේ ආශීර්වාදයෙන් තොරතුරු නොදී සිටීම නිසා අතරමග නැවතී තිබෙන (මෙම පරීක්ෂණයේ ගොනු මේ වනවිට නීතිපති දෙපාර්තමේන්තුවට යැවීම සඳහා සූදානම් කරමින් තිබෙන බව දැනගන්නට ලැබේ) අතුරුදන් මාධ්‍යවේදී ප‍්‍රගීත් එක්නැලිගොඩ සිද්ධියට අදාළ පරීක්ෂණවලට සහ එහි නඩු පැවරීම් ආදියට ඉදිරියේදී කුමක් සිදුවනු ඇතිද?.. මෙම පරීක්ෂණයේදී තොරතුරු අනාවරණය වී රහස් පොලීසිය අධිකරණයට කරුණු වාර්තා කරන්නේ එවක ආරක්ෂක ලේකම්වරයාගේ නියෝග මත මේ අතුදන්කිරීම සිදුකර ඇති බවය. එහෙත් පරීක්ෂණ එම තොරතුරු සනාථ කරන තරම් දුරකට තවමත් ගොස් නැත. එහෙත් දැන් තිබෙන මට්ටම තුළදී දැනට සැකරුවන් සේ අත්අඩංගුවට ගෙන ඇප ලබා සිටින යුද්ධ හමුදාවේ බුද්ධි නිලධාරින් වැරදිකරුවන් සේ සනාථ කිරීම සඳහා පර්වේෂණීය සාක්ෂි උපරිමය. එහෙත් පරීක්ෂණ සියට සියයක් අවසන් නොවී නීතිපති දෙපාර්තමේන්තුවට යන මේ ගොනුවට අදාළව මේ වර්තමාන කල්ලි පාලනය තුළ නඩු ගොනුකරයිද? ප‍්‍රශ්නාර්ථයක් ය.
නාවික හමුදාවේ ඝාතක කල්ලියක් විසින් පැහැරගෙන ගොස් කප්පම් ලබාගෙන දසවධ දී මරා මුහුදට විසිකළා යැයි කියන තරුණයින් 11 දෙනාට අදාළ සිද්ධිය පිළිබඳ පරීක්ෂණද සාර්ථකව ඉදිරියට යන සමාජයේම අවධානයට ලක්වූ පරීක්ෂණයක් ය. එම සිද්ධියේ ප‍්‍රධාන සැකකරුවන් අතර හිටපු නාවික හමුදාපති වසන්ත කරන්නාගොඩ, වර්තමානයේ ත‍්‍රිවිධ හමුදා මාණ්ඩලික ප‍්‍රධානි අද්මිරාල් විජයගුණරත්න ආදිහු වෙති. එහෙත් මොවුන් තවමත් අත්අඩංගුවට ගන්නට හැකිවී නැත. ඒ එකෙකු රාජපක්ෂ සුරතලෙකු ද අනෙකා සිරිසේන සුරතලෙකුද වන නිසාය. අනෙක් පැත්තෙන් මේ දෙදෙනාම ‘රණවිරුවන්’ වීම නිසාය. මෙම සිධියේ ප‍්‍රධන සැකකරු නේවි සම්පත් නොහොත් හෙට්ටිආරච්චි නැමතැත්තාට රැුකවරණ සැලසීම ඔහු ආරක්ෂිතව රටින් පිටමං කිරීම ආදි චෝදනා් රැුසක් රහස් පොලීසිය හමුදා මාණ්ඩලික ප‍්‍රධානියාට විරුද්ධව ගොනුකර ඇත. ඒ අනුව අධිකරණයද කිහිපවතාවක් ඔහු අත්අඩංගුවට ගන්නයැයි නියෝග නිකුත් කර ඇත. එහෙත් ජනාධිපති සිරිසේනගේ අනුග‍්‍රහය නිසා ඔහු යෙහෙන් සිටින්නේය. මේ නීති විරෝධි ජුන්ටාව තවදුරටත් පැවතිය හොත් මේ පරීක්ෂණයටද අබ සරණය.
පැහැරගෙන ගොස් පහරදී දසවධ දී මුදාහළ මාධ්‍යවේදී කීත් නොයාර් පිළිබඳ පරීක්ෂණ අවසන් කර එම ගොනු මේ වනවිට නීතිපති දෙපාර්තමේන්තුවට යවා ඇත. නඩු පවරනවාද කුමක් කරනවාද දැන් තීරණය තිබෙන්නේ නීතිපති අතේය. මෙම තත්ත්වය දිගටම පැවතුණහොත් එම පරීක්ෂණයටද අබ සරණ ලැබෙනවා ඇත.
මාධ්‍යවේදී ලසන්ත වික‍්‍රමතුංග මරාදැමීම පිළිබඳ පරීක්ෂණද ඉදිරියට සාර්ථකව යමින් තිබෙන්නේ ය. තවත් සැකකරුවන් බොහෝ දෙනෙක් ඉදිරියේදී අත්අඩංගුවට ගන්නට නියමිතය. මෙම පරීක්ෂණද දැනට තිබෙන තොරතුරු අනුව ගිහිං හේත්තුවන්නේ රාජපක්ෂ පවුලේ ප‍්‍රබලයෙකු ළඟය. එම තත්ත්වය තුළ මේ ජුන්ටාව ඉදිරියටත් පැවතුණහොත් මේ පරීක්ෂණයද අයාලේ යනු නියතය. මොන ආණ්ඩුව ආවත් නීතිය සැමට සාධාරණව ක්රියාත්මක කරන අධිකරණයක් හෝ පොලීසියක් අපට තවමත් නැත. ඒනිසා මේ පරීක්ෂණවල ඉදිරිය ඇත්තේ අනතුරකය. රහස් පොලිසියේ නියෝජ්‍ය පොලිස්පති රවී සෙනෙවිරත්න සහ රහස් පොලීසියේ අධ්‍යක්ෂ ශානි අබේසේකර යන විශිෂ්ට නිලධාරීන් දේශපාලක වන්දනයේ නොයෙන නිලධාරීන් යැයි දැනගන්නට ලැබෙන පසුබිමක මෙම පරීක්ෂණ යම් තාක් දුරකට ඉදිරියට යනු ඇත. එහෙත් ඔවුන් එම තනතුරුවලින් ඉවත්කර දේශපාලකයන්ගේ පදයට නටන්න බලාගෙන සිටින පූජිත පන්නයේ නිලධාරියෙකු අපරාධ පරීක්ෂණ දෙපාර්තමේන්තුවට පත්කළ හොත් කුමක් විය හැකිද? අනෙක ඔවුන්ට උව මේ තර්ජන ඝර්ජන හැමදාමත් ඉවසන්නට, ඒ තර්ජන ඉදිරියේ නොසැලී වැඩකරන්නට බැරිවනු ඇත. ඒ ඔවුන්ද මිනිසුන් බැවින් ය. අප නොවෙන්නේ යැයි අනුමාන කරන බොහෝ දේ නීති විරෝධි ජුන්ටාවක් යටතේ සිදුවන්නට නියමිතය. ඒ නිසා මේ නීති විරෝධි පාලනය අවසන් කර දැමීමට ඉදිරියට පැමිණිය යුතුය. නැතිනම් ඝාතකයන් නිවසේ දොරට තට්ටු කරන කාලය වැඩි ඈතක නැත.
