ක්ෂුද්ර ජීවීන් සිටින බවට තහවුරු වූ චීනයේ ඝන කාබනික පොහොර රටට ගෙන්වා ගැනීම සඳහා ඒ සඳහා පවතින ප්රමිතිය වෙනස් කිරීම හෝ අලුත් ප්රමිතියක් සකස් කරන ලෙසට ආණ්ඩුව පාර්ශවයෙන් කරන ලද ඉල්ලීමක් ශ්රී ලංකා ප්රමිති ආයතනය ප්රතික්ෂේප කර ඇතැයි වාර්තාවේ.
ජනවාරි 11 වැනිදා පැවති සාකච්ඡාවකදී රජයේ පොහොර සමාගම්වල හා කෘෂිකර්ම අමාත්යාංශයේ නිලධාරීන් කළ ඉල්ලීමක් මෙලෙස ප්රතික්ෂේප වී තිබේ.
ආනයනික ඝන පොහොර සම්බන්ධයෙන් දැනට පවතින ශ්රී ලංකා ප්රමිතිය වන්නේ අංක 1704 යනුවෙන් යුතු ශ්රී ලංකා ප්රමිති ආයතන ප්රමිතිය වන අතර එයට අනුව කිසිඳු ක්ෂුද්ර ජීවියකු අඩංගු ඝන කාබනික පොහොරක් ශ්රී ලංකාවට ආනයනය කළ නොහැකිය. ඝන කාබනික පොහොර ආනයනය කිරීමේදී ඒ සඳහා අනුමැතිය ලබාදීමට කෘෂිකර්ම දෙපාර්තමේන්තුවේ ශාක නිරෝධායන සේවය අංක 1704 ප්රමිතියට අනුකූලදැයි පරික්ෂාවට ලක්කරන අතර එය ඒ මගින් ලබාදෙන බලපත්ර කොන්දේසිවලට ඇතුළත් කර තිබේ. චීන සමාගමෙන් ඝන කාබනික පොහොර ගෙන්වීමේ ගනුදෙනුව සමථයකට පත්වීමෙන් පසු ශ්රී ලංකාව ණයවර ලිපි ප්රකාරව ගෙවන ලද ඇමරිකානු ඩොලර් මිලියන 6.7ක මුදල වෙනුවෙන් හා ඉන්පසු ගෙවීමට නියමිත මුදල වෙනුවෙන් යළි පොහොර තොගයක් පැමිණීමට නියමිත බව ආණ්ඩුව පාර්ශ්වයෙන් ප්රකාශ කර ඇත. මීට දින කිහිපයකට පෙර පොහොර විෂය භාර රාජ්ය ඇමති ශෂින්ද්ර රාජපක්ෂ ප්රකාශ කර තිබුණේ සිංගප්පූරු රසායනාගාරවලින් ප්රමිතිය සමත් වූ එම චීන සමාගමේ පොහොර ශ්රී ලංකාවේ රසායනාගාරවලින් අසමත්වීම සැකයක් බැවින් ඒ පිළිබඳ පරීක්ෂණ සිදුකළ යුතු බවයි.■
