ජනාධිපති මෛත‍්‍රීපාල සිරිසේනගේ හා පාර්ලිමේන්තු මන්ත‍්‍රී මහින්ද රාජපක්ෂගේ ප‍්‍රධානත්වයෙන් බත්තරමුල්ල ‘අපේ ගම’ පරිශ‍‍්‍රයේදී නොවැම්බර් 8 දින සවස පැවැත්වීමට නියමිතව තිබූ ශී‍‍්‍ර ලංකා නිදහස් පක්ෂයේ විධායක සභා හා සමස්ත ලංකා කාරක සභා රැස්වීමට සභාගි වන්නන්ට ජංගම දුරකථන රැගෙන නොඑන ලෙස දැනුම් දී ඇත.
එස්එම්එස් පණිවිඩයක් යවමින් ඊට සභාගිවන්නන්ට සංවිධායකයන් එම තහනම පිළිබඳ දැනුම් දීම සිදුකර ඇත.
ශී‍‍්‍ර ලංකා නිදහස් පක්ෂයේ විධායක සභාව එහි සියලූම ආසන සංවිධායකයන් නියෝජනය කරන අතර සමස්ත ලංකා කාරක සභාව ආසන සංවිධායකයන්ට අමතරව පළාත් පාලන ආයතනවල නගරාධිපති, සභාපති හෝ විපක්‍ෂනායක යන තනතුරු දරන්නන්ද, ආසන බලමණ්ඩලවල සභාපති හා ලේකම් තනතුරු දරන්නන්ද නියෝජනය කරයි.
මීට අමතරව එම කාලයේ, එජාප විරෝධතාවක් බත්තරමුල්ල ප‍‍්‍රදේශයේ පැවැත්වෙන බවද දැඩි වාහන තදබදයක් ඇතිවිය හැකි බවද ඒවා මඟහැර අපේ ගම පරිශ‍‍්‍රයට පැමිණෙන ලෙසද ඊට සහභාගිවන්නන් දැනුවත් කර තිබේ.
ඉඳුවර බණ්ඩාර
