■අමන්දිකා කුරේ
තමාගේ දැනුමට අනුව ඉදිරියේ දී අනිවාර්යයෙන්ම ආහාර හිඟයක් ඇති වීමට නියමිත බව කෘෂිකර්ම අමාත්‍යාංශයේ හිටපු ලේකම් මහාචාර්ය උදිත් කේ. ජයසිංහ පවසයි.
දෙසැම්බර් 23 ඔහු විසින් පැවැත්වූ මාධ්‍ය හමුවේ දී මාධ්‍යවේදියෙකු නැගූ ප්‍රශ්නයකට පිළිතුරු දෙමින් ඔහු මේ බව පැවසුවේ ය.
‘ආහාර හිඟයක් මේ කියන තත්ත්වය යටතේ ඇති වෙනවා. ඒක ඇති වෙන්නේ නැත්තේ නෑ- මේ දැන් වවලා තියෙන කුඹුරු දැක්කාම එළවළු හා පළතුරු වගාව දැක්කාම ආහාර හිඟයක් ඇති වෙන්නේ නැත්නම් ප්‍රාතිහාරයක් වෙන්න ඕනෑ.’
තමා මේ කරුණු ඉදිරිපත් කළේ ජනතාව දැනුවත් කිරීමට බවත් ජනතාව දැනුවත් කිරීමට ගොස් සිය ලේකම් ධුරය අහිමි වුවද එයින් ජනතාව හෝ දැනුවත් වූයේ යැයි සෑහීමකට පත් විය හැකි බවත් ඔහු පවසයි.
මහාචාර්ය උදිත් පවසන්නේ තමාව අස්කළ බවට ජනාධිපති ලේකම් කාර්යාලයෙන් දූරකථනයෙන් දැනුම් දුන් බවත්, මේ වන තෙක් අස් කිරීමේ ලිපියක් ලැබී නොමැති බවත් ඒ වෙනුවට අලුතෙන් පත් කළ ලේකම්වරයාගේ පත්කිරීමේ ලිපිය පමණක් ලැබී ඇති බවත්ය.
දෙසැම්බර් 22 වන දින මාධ්‍යයට අදහස් දක්වමින් ලේකම්වරයා පවසා තිබුණේ ඉදිරියේ දී ආහාර හිඟයක් ඇති වීමේ අවදානමක් තිබෙන බැවින් එසේ වුවහොත් දරුවන්ට හා වැඩිහිටියන්ට ප්‍රමුඛතාව ලබා දී ආහාර සලාක ක්‍රමයට ලබා දීමට සිදු වනු ඇති බවයි.
පසුව එදින ම සවස ඔහු සේවයෙන් ඉවත් කර නව ලේකම්වරයෙකු පත් කළ බවට ජනාධිපති මාධ්‍ය අංශය නිවේදනය කර තිබේ.
මේ ආණ්ඩුව යටතේ කෘෂිකර්ම අමාත්‍යංශයට පත් වූ පස්වැනි ලේකම්වරයා වන මහාචාර්ය උදිත් කේ. ජයසිංහ ශ්‍රී ලංකා වයඹ විශ්වවිද්‍යාලයේ හිටපු උපකුලපතිවරයාය.■
