■ අමන්දිකා කුරේ
බන්ධනාගාරගත කර සිටින සිරකරුවන් බන්ධනාගාරයෙන් පිටතට රැගෙන යාම නීති විරෝධී කටයුත්තක් බව සිරකරු අයිතිවාසිකම් සුරැකීමේ කමිටුවේ සභාපති නීතීඥ සේනක පෙරේරා පවසයි.
නොවැම්බර් 15 වැනිදා කොල්ලුපිටියේ ගොඩනැගිලි ඉදිකිරීමේ ආයතනයක සේවයේ යොදවා සිටි වටරැක පාදුක්ක බන්ධනගාරයේ සිරකරුවෙකු පැනයාමේ සිදු වීමක් නොවැම්බර් 18 නිකුත් කළ පොලිස් මාධ්‍ය නිවේදනයේ සඳහන් විය.
ඒ පිළිබඳව අදහස් විමසීමේදී නීතිඥ සේනක පවසන්නේ එය බන්ධනාගාර ආඥාපනතට පටහැණි බවත් ආගමික කටයුත්තකට හැර එලෙස සිරකරුවන් පිටතට රැගෙන යාම සිරකරුගේ පමණක් නොව අනෙකුත් පුද්ගලයන්ගේද ජීවිතවලට තර්ජනයක් විය හැකි බවයි. වැඩිදුරටත් අදහස්
දක්වමින් ඔහු පවසන්නේ සිරකරුවන්ට ගෙවීමක් නොකර හෝ අතිශය සුළු මුදලක් ගෙවීමෙන් ඔවුන්ගේ ශ්‍රමය වැඩ සඳහා යොදාගැනීමට හැකි හෙයින් පසුගිය කාලයක් පුරාවට ම මෙම නීති විරෝධී ක්‍රියාව නොනිල වශයෙන් ක්‍රියාත්මක වූ බවයි. ඊට විරුද්ධව සිය සංවිධානය ද වරින් වර විරෝධය දැක්වූ බව ද ඔහු සඳහන් කළේ ය.
මේ සම්බන්ධයෙන් අදහස් විමසීම සඳහා බන්ධනාගාර මාධ්‍ය ප්‍රකාෂක චන්දන එකනායක දුරකථනයට සම්බන්ධ කර ගැනීමට උත්සහ කළද එය අසාර්ථක වීය■
