මම කැමතියි පිටපතක් මට හම්බුණාම ඒක මම කියවනකොටම මට මුලින්ම එන අදහසට. මම හිතනවා ඒ එන අදහස හරිම එකක් කියලා. ගොඩාක් පිටපත් මම ප්‍රතික්ෂේප කරලා තියෙනවා ඒ විදිහට මම කැමති නොවුණු.
■ අමන්දිකා කුරේ
ඔබ රංගනයට පිවිසෙන්නේ කොහොමද?
මම කුඩා කාලයේ පටන් ම කලාවට නැඹුරුවක් තිබුණා. පාසල් යන්නත් කලින් ඉඳන් ම දහම් පාසල් යන්න පටන් ගත්තා. එහිදී මම පද්‍ය ගායනා, පාලි පද්‍යගායනා වගේ තරගවලටත් ඉදිරිපත් වුණා. පාසලේදීත් මම ජන ගී සරල ගී, හින්දි ගීත වගේ ගායනාවලට එකතු වුණා. මේ දේවල්වලින් මට ජයග්‍රහණත් ලබාගන්න හැකි වුණා. මුලින් ම ගායනය පැත්තට තමයි මගේ නැඹුරුවක් තිබුණේ.
2005 වර්ෂයේ දී බන්දුල කුරුවිට ආරච්චි මහත්මයා ළමා නාට්‍ය උළෙලෙ ඉදිරිපත් කළ ළමා නාට්‍යයකට සම්බන්ධ වුණා. 2008 වසරේදී රාජ්‍ය ළමා නාට්‍ය උළෙලේ හොඳම නළුවාට හිමි සම්මානය ලබා ගත්තා. ඊට පස්සේ මම පාසල් වේදිකාවෙත් රංගනයෙන් දායක වුණා.
මගේ ජීවිතයේ හැරවුම් ලක්ෂ්‍යය කියන්න පුළුවන් ජයලත් මනෝරත්නයන්ගේ තලමල පිපිලා වේදිකා නාට්‍යයට සම්බන්ධ වෙන්න අවස්ථාව ලැබුණා. ඊට පස්සෙ මට අවස්ථාව ලැබුණා 2008 වසරේ දී තිරගත වුණු සෝමරත්න දිසානායක මහත්මයා අධ්‍යක්ෂණය කළ රේණුකා බාලසූරිය මහත්මිය නිෂ්පාදනය කළ ‘සිරි රජ සිරි’ චිත්‍රපටයට රංගනයෙන් දායක වෙන්න. අන්තර්ජාතික ළමා චිත්‍රපට උළෙල රැසකදී එයට සම්මාන ලැබුණා. දසවන වරට චීනයේ පැවති අන්තර්ජාතික ළමා චිත්‍රපට උළෙලේ දී හොඳම නළුවාට හිමි සම්මානයත් මට හිමි වුණා.
මේ විදිහට මට උත්තේජනයක් ලැබුණා රංගනයට පිවිසෙන්න. මම විශාල තෘප්තියක් ලැබුවා රංගනයෙන්. ටෙලිනාට්‍ය ගත්තොත් මට ආනන්ද අබේනායක මහත්මයාගේ ‘උණුසුම’ කියන ටෙලි වෘතාන්තයෙ රඟපාන්න අවස්ථාවක් ලැබුණා. එහිදීත් රූපවාහිනි රාජ්‍ය සම්මාන හොඳම නළුවාට හිමි සම්මනය ලැබුණා. මම රංගනයෙන් දායක වුණු හැම නිර්මාණයකම වගේ මට සම්මානයක් ලබා ගන්න හැකි වුණා. ඒත් එක්කම මට ලංකාවෙ ප්‍රවීණයන් එක්ක වැඩකරන්න අවස්ථාවත් ලැබුණා. ඒ විදිහට තමයි මගේ රංගන ජීවිතය මේ දක්වා ගලාගෙන ඇවිල්ලා තියෙන්නේ.
ජයලත් මනෝරත්න සමීපයේ ගෙවුණ කාලය ගැන ඔබේ අත්දැකීම මොකක්ද?
ඒ කාලය මට නැවත ගන්න පුළුවන් නම් මට අද මට ඒක ගොඩක් වටිනවා. මේ වෙනකොට මට ඉගෙනගන්න, අහගන්න, හොයාගන්න ගොඩක් දේවල් තියෙනවා. මට බොහොම සරල විදිහට ඉන්න කෙනෙක්. ඒ දේවල් ගොඩනැගෙන්නෙම මම වැඩ කළ ඒ වගේ ප්‍රවීණයන්ගේ ආභාසය නිසායි. ජයලත් මනෝරත්නයන් සමග මම ඔහුගේ අධ්‍යක්ෂණයන් වන වේදිකා නාට්‍ය දෙකක රඟ පැවා. ඒ ‘තල මල පිපිලා’ සහ ‘මකරා’ කියන නාට්‍ය දෙක. ලංකාව පුරා දර්ශන වාර සඳහා මම මනෝ මාමාත් එක්ක ගිහිල්ලා තියෙනවා.
ඔබ මේ වන විට ටෙලිනාට්‍ය කිහිපයකම එකිනෙකට වෙනස් විවිධාකාර චරිත නිරූපණය කරනවා. ඒ චරිත නිරූපණය කිරීමේදී ඒවාට අදාළ ආදර්ශ ලබා ගන්නේ කොහොම ද?
මම කැමතියි චරිතාංග නළුවෙක් විදිහට ඉදිරියට යන්න. එකම විදිහෙ චරිතවලින් පෙනී ඉන්න මම කැමති නෑ. මම ගොඩක් සමාජයත් එක්ක ඉන්න කෙනෙක්. සමාජයේ හැම පන්තියකම අයව මම ඇසුරු කරනවා. එතකොට මම හොඳ හොරෙක්. කෙනෙක්ගේ පසුම්බිය මම සොරකම් නොකළාට කෙනෙක්ගෙ සියුම් ඉසියුම් ඉරියව් මම හොරකම් කරලා මගේ ඇතුළෙ තියෙන පුස්තකාලෙක ගබඩා කරගන්නවා. ඒ ගබඩා කරගන්න දේවල් මට චරිතයක් ලැබුණාට පස්සේ ඒ ඒ චරිතෙට ගැළපෙන විදිහට මම යොදලා බලනවා. ඒවා මම මගේ තිරපිටපත් රචකයා එක්ක, අධ්‍යක්ෂවරයා එක්ක කතා කරලා යම් යම් දේවල් වෙනස් කරගන්නවා. මම කැමතියි පිටපතක් මට හම්බුණාම ඒක මම කියවනකොටම මට මුලින්ම එන අදහසට. මම හිතනවා ඒ එන අදහස හරිම එකක් කියලා. ගොඩාක් පිටපත් මම ප්‍රතික්ෂේප කරලා තියෙනවා ඒ විදිහට මම කැමති නොවුණු. එහෙම මාව කැමති කරගන්න පුළුවන් වචන ටිකකට, අකුරු ටිකකට, පිටපතකට තමයි මම කැමති වුණේ. සමාජයේ හැම පන්තියකම කෙනෙක් එක්කම ජීවත් වෙන කෙනෙක් හැටියට සරලව මම ඉන්න නිසාම තමයි මේ වගේ විවිධ වූ චරිතවලට යන්න හැකියාව ලැබිලා තියෙන්නේ කියලා මම හිතනවා.
ඔබ පිටපතක් තෝරාගන්නේ හෝ ප්‍රතික්ෂේප කරන්නේ මොන වගේ හේතු නිසා ද?
ඕනෑම නිර්මාණයක පිටපත ප්‍රබල විය යුතුයි කියලා මම හිතනවා. නළුවාට වඩා පිටපත ප්‍රබල නම් ඒ නළුවාට ඒක ඇතුළේ හොයන්න කරන්න දේවල් වැඩියි. පුස් පිටපතකට වඩා ප්‍රබල පිටපතකට පුළුවන් ප්‍රබල නළුවෙක් හා ප්‍රබල නිර්මාණයක් බිහි කරන්න. නමුත් මම විශ්වාස කරනවා හොඳ වැඩ එනකම් ඉන්නේ නැතිව ලැබෙන වැඩේ හොඳට කරන්න ඕනෑ කියලා. මගේ විරාමයක් තිබුණා හොඳ වැඩ එනකන් බලාගෙන හිටපු. ඊට පස්සෙ මම තීරණය කළා හොඳ වැඩ ම එන්නේ නෑ. එන වැඩේ හොඳට කරගන්නවා කියලා. පිටපත කියන එක වැදගත්. ඒක නැතිනම් හරියට නිර්මාණයක් නෑ. අපි චරිතයක් ගොඩනැගුවාට පස්සේ පිටපතෙන් එහාට ගිහින් යම් යම් දේවල් එකතු කරන්න මම කැමතියි. රචකයා හා අධ්‍යක්ෂවරයා එක්ක කතා කරලා ඒ චරිතේ ගොඩනගා ගන්න මම කැමතියි.
ඔබ ‘නාඩගම්කාරයෝ’ ටෙලිනාට්‍යයේ නාගරික තරුණයෙකුගේ චරිතයක් නිරූපණය කරනවා. එහිදී එක එක චරිත සමග ගනුදෙනු කිරීමේදී එක් අවස්ථාවක සෙල්ලක්කාර චරිතයකුත් තවත් අවස්ථාවක බැරෑරුම් විදිහටත් රඟපානවා. එකම චරිතයක් ඇතුළේ කොහොමද ඔබ විවිධත්වයක් ගොඩනගා ගන්නේ?
මම නිරූපණය කරන්නේ චරිතයක් තමයි. නමුත් චරිතයක් කියන්නේත් මනුෂ්‍යයෙක්නේ. අපි සෙල්ලක්කාර චරිතයක් කියලා ගත්තාම සෙල්ලක්කර, විකාරරූපී, තියෙනවාටත් වඩා දේවල් පෙන්නන්න හදන චරිතයක ඇත්තටම මනුස්සකමක්, ගරු කිරීමක්, ගුණවත්කමක් වගේ දේවල් එළියට ගන්න අපට ඒ පිටපතේම දෙනවා පොඩි පොඩි අවස්ථා. අපි ඒ දේවල් අඳුනාගත්තොත් මේ කියන කාරණාව, සරාගේ අක්කා එක්ක ගනුදෙනු කරද්දී මම පෙන්නන්න ඕනෑ මොන වගේ දෙයක් ද?, මාස්ටර්ගෙ පොඩි දුවත් එක්ක ගනුදෙනු කරන්නේ කොහොම ද?, ලොකු දුවත් එක්ක ගනුදෙනු කරන්නේ කොහොම ද?, ජානු එක්ක ගනුදෙනු කරන්නේ කොහොම ද? කියන දේ හරියට වෙන් වෙන් වශයෙන් හඳුනගත්තාට පස්සෙ අපට පුළුවන් වෙන් වෙන් වශයෙන් ඒ චරිතෙ මතුපිටින් නිරූපණය කරන දේට එහා ගිහින් මනුස්සකමකින් ඒ චරිතේ නිරූපණය කරන්න.
මේ දිනවල ඔබ රංගනයෙන් දායක වන රැල්ල වෙරළට ආදරෙයි නාට්‍යය නිර්මාණය වන්නේ මලයාලම් චිත්‍රපටයක් ඇසුරින්. පළමුවෙන් කළ නිර්මාණයක් තිබෙන නිසා එම නාට්‍යයේ චරිතය ඔබට අභියෝගයක් වුණා ද?
අනිවාර්යයෙන් ම අභියෝගයක්. මට විතරක් නෙවෙයි ඒ නාට්‍යයෙ රඟපාන සියලු‍ම ශිල්පීන්ට ඒක ලොකු අභියෝගයක්. ඒ වගේම අපි ඒ චිත්‍රපටය සම්පූර්ණයෙන් ම අනුකරණය කරලා නෑ. ප්‍රතිනිර්මාණයක් තමයි කරලා තියෙන්නේ. විනාඩි 90ක 100ක විතර චිත්‍රපටයක් අපිට නාට්‍ය කොටස් 200කට වඩා අදින්න වෙලා තියෙනවා. එතකොට ඒකෙ තියෙනවා ලොකු අභියෝගයක්. චරිතයක තියෙන ශක්තිය, ප්‍රබලත්වය, නිරූපණය එක දිගට තියාගන්න ඕනෑ. පැය එකහමාරකින් ඉවර කරපු වැඩක් අපි කොටස් දෙසීයක විතර ඒ කියපු දේවල් අඛණ්ඩව තියාගෙන ඉන්න ඕනෑ වගේම ලංකාවට ගැළපෙන විදිහට ඒ නිර්මාණය කරන්න ඕනෑ.
රංගන ශිල්පියෙක් වගේම ඔබ ගායකයෙක්. ඔබේ ගීතයක් පසුගිය දවසක එළිදැක්වූවා. ඒ ගැන අපි දැනගන්න කැමතියි.
නොවැම්බර් 01 මගේ උපන්දිනය. එදාම මට උවමනාව තිබුණා මගේම ගීතයක් ජනගත කරන්න. ඒ නිර්මාණය වෙනුවෙන් මාත් එක්ක සැහෙන්න පිරිසක් මහන්සි වුණා හා සහභාගි වුණා. මම මේ ගීතය ගායනා කරන්න ආරාධනාවකින් ලැබුණ දෙයක්. ප්‍රවීණ ගීත රචිකාවක වන අනුරාධා රවිචන්ද්‍රන් නැන්දා තමයි මේ ගීතය රචනා කළේ. ඇය තමයි මට මේ ගීතය ගායනා කරන්න ආරාධනා කළේ. සංගීතවත් කළේ සචිත් බෝගොඩ සහෝදරයා. ඊට අමතරව විශේෂම දෙය තමයි ඒ ගීතය ගායනා කළාට අමතරව එහි වීඩියෝපටයේ කතා වස්තුව, අධ්‍යක්ෂණය හා රංග වින්‍යාසය කියන දේවල් මමයි සිදු කළේ. වීඩියෝවට සුනන්ද හා මාත් සමග ලංකාවේ ජනප්‍රිය නිළියක් වන රොශෙල් රොජර්ස් සම්බන්ධ වුණා. මට උවමනාව තිබුණා මෙහි අධ්‍යක්ෂවරයා වශයෙනුත්, රොශෙල්ව මේ වෙනකොට ලංකාවෙ පෙනිලා නොතිබුණු විදිහකට එයාගෙ නිරූපණය ලබා ගන්න. එයා මාත් එක්ක ඉතාම නම්‍යශීලී විදිහට ඒ වෙනුවෙන් වැඩ කළා. ඒ වගේම ගීතය රචනා කළ කෙනාමයි මෙහි නිෂ්පාදනය සිදු කළේත්. ඒකට විශාල පිරිවැයක්
දැරුවා. ඒ විදිහට නොවැම්බර් පළමුවෙනිදා කෝකිල පවන් ජයසූරිය කියන යූ ටියුබ් නාලිකාව හරහා මේ ගීතය ජනගත කළා. ගීතයේ නම ”රහසින්”.
මේක මගේ පළවෙනි අධ්‍යක්ෂණය. සින්දුව බැලු‍වාට පස්සෙ මට උවමනා වුණා ප්‍රේමයක් ඇතුළෙ තමන්ගේ තෝරාගැනීම, හිමිවීම, වෙන්වීම කියන එක පෙන්වන්න. එතකොට මම මුලින්ම කියපු මගේ ඇතුළේ තියෙන පුස්තකාලේ තියෙන දේවල් ටිකත් මම එළියට ගත්තා. පාසල් වේදිකාවෙ, වේදිකාවල මම ලබා ගත්ත අත්දැකීම් මම මේකට යොදාගත්තා. ඇත්තටම මේක මම රූගත කළේ වේදිකාවක් උඩ. මම ඒක උසස් මනසකට තමයි නිර්මාණ කළේ. මම විශ්වාස කරනවා කලාකරුවෙක් වටහාගන්න ඒ කලාකරුවා තරම්ම වූ හෝ ඒ කලාකරුවාට වඩා ඒක නරඹන ප්‍රේක්ෂකයා යාවත්කාලීන විය යුතුයි කියලා. මම උත්සාහ කළා මගේ කණ්ඩායමත් එක්ක ඒ වගේ උසස් මනසකට නිර්මාණයක් කරන්න. මම හිතනවා ඒක ලංකාවෙ මේ වෙනකන් නොතිබ්බ වෙනස්ම විදිහෙ නිර්මාණයක් කියලා. මගේ ඔළු‍වෙන් ම මැවිච්ච චිත්‍රයක් තමයි මම ඒ විදිහට එළියට දාලා තියෙන්නේ.
පළමු අධ්‍යක්ෂණයේදීම ඇයි මේ තරම් අවදානමක් හා අභියෝගයක් ගත්තේ?
මම තරග කරන්නේ මාත් එක්කමයි. මට වෙන කිසිම කෙනෙක් එක්ක තරගයක් නෑ. ඒ කියන්නේ මම මම ගැන අධිතක්සේරුවක ඉන්නවා කියන එක නෙවෙයි. එහෙම මම මාත් එක්කම තරග කරනකොට මම විශ්වාස කරනවා මා තුළින් මතුවෙන්න ඕනෑ මේ වගේ වෙනස් විදිහෙ නිර්මාණ. ඒක මම මටම තමයි අභියෝග කරගන්නේ. මේ නිර්මාණය කළාට පස්සෙ මම ඇත්තටම සෑහීමකට පත්වුණා. සාමාන්‍යයෙන් මම මගේ නිර්මාණවලදී රංගනයේදී ගායනයේ දී මම පිළිබඳවම සැහීමකට පත් වෙන්නේ නෑ. මගේ පළවෙනි අධ්‍යක්ෂණය සම්බන්ධයෙන් මම සෑහෙන්න සෑහීමකට පත් වෙනවා. වෙනස් විදිහෙ සහ ගීතයට හරියටම ගැළපෙන විදිහෙ නිර්මාණයක් විදිහට කරන්න හැකිවුණා කියලා මම හිතනවා. ඒ වෙනුවෙන් මට උදවු කරපු සියලු‍ම දෙනාට ඒ වටිනාකම හිමි විය යුතුයි.
ඉදිරි කලා නිර්මාණ මොනවාද?
මේ අවුරුද්දෙ මම තවත් ගීතයක් ජනගත කරන්න බලාපොරොත්තුවෙන් ඉන්නවා. ඒ වගේම තුෂාරි අබේසේකර නැන්දා අධ්‍යක්ෂණය කළ ඉතාම ලස්සන ටෙලිවෘත්තාන්තයක් විකාශය වීමට නියමිතයි. මේ වෙනකොට මම නිර්මාණ කිහිපයකටම මම සම්බන්ධ වෙලා ඉන්නවා.
තරුණ කලාකරුවෙක් හැටියට සමාජයට දෙන පණිවිඩය මොකක්ද?
අපිත් එක්ක රැඳී ඉන්න. ලංකාවෙ කලාව විශ්වාස කරන්න. ඒ වගේම අංකුර කලාකරුවො ගොඩක් ලංකාවේ ඉන්නවා. ඔවුන්ට අත දෙන්න. විශ්වාස කරන්න. ඒ විශ්වාසය තුළින් ඔවුන් ලංකාවට හා ලෝකයට වැඩ කරාවි. අපේ කලාව වෙනම මාවතකට අරන් යයි. මට ආදරය කරනවා වගේම ඔවුන්ට ප්‍රේක්ෂකයන්ට මම නැවත පෙරළා ආදරයක් දක්වනවා කියන එක කියන්න කැමතියි. ■
