■ ඇන්තනී වෙරංග පුෂ්පික
දැන් ආණ්ඩුව යන ගමන ගැන ඔබේ අදහස මොකද්ද?
මේ වගේ ලෝක තත්ත්වයක් යටතේ ඉතාමත් අපහසු කාල සීමාවක් අපි පසුකරමින් සිටින්නේ. මේ කොරෝනා අර්බුදය හේතුවෙන් ලෝකයේ රටවල් සියල්ලකම පාහේ ආර්ථිකයට විශාල ගැටලු මතුවෙලා තියෙනවා. ඒ ගැටලු අබිබවා යමින් සෞඛ්‍යසම්පන්න ආරක්ෂිත ක්‍රමවේදයක් අනුගමනය කරමින් රට යථාවත් කළ යුතුයි. එහි මූලික පියවර අපි ජයග්‍රහණය කරලා තියෙනවා. ඉදිරියේ දී මෙම ආර්ථික බිඳවැටීමෙන් පසු නැවත රට නඟා සිටුවීම සඳහා වැඩසටහන් කිහිපයක් ඉදිරිපත් කරන්නට බැසිල් රාජපක්ෂ මැතිතුමා ලෑස්තිවෙලා ඉන්නවා. සංචාරක ව්‍යාපාරය යළි පිබිදීමත් සමග බිහිවන වෘත්තීන් වැඩි වශයෙන් යථාවත් කිරීමට ඇති ක්‍රියාමාර්ග සමග ලබන අවුරුද්දේ මුල් කාර්තුව වෙන විට ආර්ථික වශයෙන් රට යහපත් අතට හැරෙයි. ඒ හැරෙන්නට රටක් විදිහට ගෝඨාභය රාජපක්ෂ ජනාධිපතිතුමා විසින් ඉටුකරන ලද කාර්ය රාශියකුත් පසුගිය කාලයේදී තිබෙන බව සඳහන් කිරීමට කැමතියි.
මේ ආණ්ඩුව හැම දේකටම දෙන උත්තරේ තමයි කොරෝනා වසංගතය කියන එක. ඔබ කියන්නෙත් මේ වගේ ආර්ථික දේශපාලන වශයෙන් අර්බුදයක් ඇති වෙන්න හේතුව කොරෝනා වසංගතය විතරමයි කියලාද?
ආර්ථික අර්බුදය පිළිබඳ හොඳම උදාහරණ ලෝකයේ රටවල ආර්ථික වර්ධනය පිළිබඳ දත්ත පසුගිය වසර පිළිබඳ සැලකීමයි. ඉන්දියාවේ -18 යි. ලෝකයේ සෙසු රටවල -10 ට ආසන්නයි. කලාපයේ සියලුම රටවල් සෘණ අගයක් වාර්තා කරලා තියෙනවා. ඉතින් ලෝකයේ සෑම රටක්ම එවන් පසුබිමක ලංකාව සමග ගැළපීමේදී එහි අනිවාර්ය ප්‍රතිඵල රටට පෙනෙනවා. ඒ ඇරෙන්නට අපි ක්‍රියාත්මක කළ හැකි වැඩසටහන් සියල්ලක්ම ක්‍රියාත්මක කරනවා. සමාජ සුභසාධන පැත්තෙන් ජනතාවට අවස්ථා කිහිපයකදීම ප්‍රතිපාදන ලබා දීලා තියෙනවා. කර්මාන්තවල වැඩ කටයුතු කෙරෙනවා. රැකියා ලබා දීලා තියෙනවා, උපාධිධාරීන්ට- අඩු ආදායම්ලාභීන්ට. ඉතින් මේ ආදි සංවර්ධන වැඩ සෑහෙන්න ප්‍රමාණයක් බාධක මැද්දේ කරගෙන ඇවිත් තියෙනවා.
කෙටි කාලයක් තුළ ආණ්ඩුවට ජනතා අප්‍රසාදයක් ඇතිවෙලා තියෙනවා. මේ ආණ්ඩුවට ජනතාවගේ ප්‍රශ්න විසඳන්න බැරිද?
ජනතා අප්‍රසාදයක් ඇති වී තිබෙන බව ඇත්ත. කිසිම ආණ්ඩුවක් කැමති නැහැ තමන්ගේ රජයක් තියෙනකොට බඩු මිල වැඩි වෙනවා දකින්න. කිසිම රජයක් කැමති නෑ තමන්ගේ රජය තියෙන කාලෙ පෝලිම් ඇති වෙනවා දකින්න. හැබැයි මේ සමහරක් කරුණු අපේ පාලනයෙන් පරිබාහිර ඇති උදාහරණයක් හැටියට ලෝකයේ තෙල් මිල ඉහළ ගිහිල්ලා. ගෑස් මිල ඉහළ ගිහිල්ලා. සිමෙන්ති මිල ඉහළ ගිහිල්ලා. කිරිපිට මිල ඉහළ ගිහිල්ලා. එක පැත්තකින් හැම දේකම මිල ඉහළ ගිහිල්ලා. අනිත් පැත්තෙන් සැපයුම් දාම පිළිබඳ ගැටලු ඇතිවෙලා. මොකද රටට විදේශ විනිමය හිඟකම නිසා පසුගිය වසර තුනේදී සංචාරක ව්‍යාපාරයට පමණක් අහිමි වෙච්ච විදේශ විනිමය ප්‍රමාණය ඩොලර් බිලියන 10ක්. ඉතිං අපේ ආනයන අඛණ්ඩව සිදු කරමින් අඩු අපනයන ප්‍රමාණයක් පවත්වාගෙන යමින් ආර්ථිකය පවත්වාගෙන යන එක ඉතාම අසීරු කාරණයක්.
සුළු පක්ෂ දිගින් දිගටම කියන කාරණයක් තමයි කැබිනට් එකේ ගන්න තීරණ සම්බන්ධයෙන් ඔවුන් දැනුවත් නැති බව. සමහර දේවල් සම්බන්ධයෙන් සැලකිය යුතු සාකච්ඡාවක් වුණේ නැහැ කියන එක. එතකොට ඇත්තටම එහෙම සාකච්ඡාවක් වෙන්නේ නැද්ද කැබිනට් එකේ ?
එතුමන්ලා සඳහන් කරන්නේ හේතු වුණු එක් කාරණයක් පිළිබඳ විතරයි. පසුගිය අවුරුද්ද පුරා සති පනස් දෙකක් කැබිනට් මණ්ඩලය රැස්වෙලා තියෙනවා. පසුගිය මාස කිහිපයේදී ආසන්න වශයෙන් කැබිනට් පත්‍රිකා තුන්දාහක් පමණ නිකුත්වෙලා තියෙනවා. එක කැබිනට් පත්‍රිකාවක් ගැන තමයි මෙතුමන්ලා මේ චෝදනා කරන්නේ. ප්‍රමාණවත්ව ඔවුන්ට සෑහෙන පරිදි සාකච්ඡාව නොවුණා කියලා ඔවුන් ප්‍රකාශ කරන්නේ එක සිදුවීමක් පදනම් කරගෙන.
අපි දැක්කා දින කිහිපයකට කලින් කෙරවලපිටිය යුදගනවි විදුලි බලාගාරය ඇතුළු මේ ආණ්ඩුවේ ක්‍රියාකලාපයන් සම්බන්ධයෙන් පක්ෂ එකොළහක් රැස්වෙලා ජනතා මන්ත්‍රණ සභාවක් පවත්වනවා. මිනිසුන්ට හිතෙන්නේ මේ ආණ්ඩුව ඇතුළෙම තවත් විපක්ෂයක් ඉන්නවා කියලා වගේ අදහසක් නේද ?
මම එහෙම දකින්නේ නෑ. ඒක ඔවුන්ගේ නොසැලකිලිමත්කම. කලින් මතුකළා වගේම පක්ෂය සම්බන්ධ කාරණාවලදී සැලකිලිමත්ව ඔවුන්ගේ මතවාද ඉදිරිපත් කළ යුතුයි. යුදගනවි බලාගාරයේ කොටස් ලබා දීමටත් වඩා අඛණ්ඩ ගෑස් සැපයුම ඇමරිකානු සමාගමකට ලබා දීම පිළිබඳව මෙහි දී ගත හැකි ක්‍රියාමාර්ග පිළිබඳ ආණ්ඩුව ඉදිරියේ දී වඩාත් නම්‍යශීලීව කටයුතු කරනවා කියලා මට කියන්න පුළුවන්.
රසායනික පොහොර ගෙන්වීම මුළුමනින්ම තහනම් කිරීමට ගත්ත තීරණය ප්‍රායෝගික නෑ නේද ?
අපි සැලකිය යුත්තේ මේ තීන්දුව ගැනීමට පසුබිම් වූ කාරණය පිළිබඳවයි. ජනතාවගේ සෞඛ්‍ය ආරක්ෂාව වෙනුවෙන්, ඔබගේත් මගේත් දූ දරුවන්ගේත් මතු පරපුරේ ආරක්ෂාව වෙනුවෙන් තමයි මේ තීන්දුව ජනාධිපතිතුමා අරගන්නේ. එය ක්‍රියාත්මක කිරීමේ දී යම් ගැටලු ගණනාවක් මතු වෙමින් තිබෙන බව අපට පිළිගන්නට අවශ්‍යයි. ඒක නිසා ජනතාව අපහසුතාවට පත්වෙලා තියෙන බවත් අපි පිළිගන්න අවශ්‍යයි. අපි ඉතාම පැහැදිලිව කියනවා එය ඉදිරි කාල පරාසය තුළ නිරවුල් වෙයි. දේශීය කාබනික පොහොර නිෂ්පාදනය ප්‍රමාණවත් නැති මොහොතක තමයි ඒ තීන්දුව අරගෙන ක්‍රියාත්මක කරන්න ලෑස්ති වුණේ. එහිදී මතුවන ගැටලුවලට නම්‍යශීලී වෙලා කටයුතු කරන්නට ආණ්ඩුව කටයුතු කරනවා.
චීන පොහොර නැව ලංකා මුහුදු සීමාවේ තවම තියෙනවා. අහිතකර ක්ෂුද්‍ර ජීවීන් ඉන්නවා කියලා දෙපාරක්ම තහවුරු වෙච්ච පොහොර තමයි ලංකාවට දෙන්න ඔවුන් උත්සාහ කරන්නේ. ඇත්තටම දැන් තුන්වැනි වතාවටත් පරීක්ෂණයට ලක්කරලා විෂ පොහොර ටිකමද නැවත ගන්න හදන්නේ ?
එම පොහොර ලංකාවට භාර ගැනීම සම්බන්ධව කිසිදු සාකච්ඡාවක් නැහැ. පැහැදිලිව දන්වා තිබෙනවා අහිතකර ක්ෂුද්‍ර ජීවීන් සහිත පොහොර ප්‍රමාණය ප්‍රතික්ෂේප කරනවා කියලා. හැබැයි පොහොරවලට ගෙවීම් පිළිබඳව ප්‍රශ්නයක් මතු වෙලා තියෙනවා. මොකද දැනටමත් ණයවර ලිපි විවෘත කරලා තියෙන නිසා. ඔවුන්ගේ ණයවර ලිපිවලට අදාළ ගෙවීම් කටයුතු සිද්ධ වුණත් අදාළ සමාගම නැවත අපට දිය යුත්තේ ප්‍රමිතියෙන් බාල පොහොර නෙමෙයි, ප්‍රමිතියට අනුකූල පොහොර එවන්න ඕනෑ. පරීක්ෂා කිරීමකින් තොරව නැවත පොහොර ලබා ගැනීමක් සිදු වෙන්නේ නැහැ කිසිසේත්ම.
මහජන බැංකුව චීන රජය විසින් අසාදු ලේඛනගත කරලා තියෙනවා. මේකට හේතුව මහජන බැංකුව විසින් රටේ අධිකරණ නියෝගයක් ඉටුකිරීම පමණයි. මහජන බැංකුව අසාදු ලේඛනගත කිරීම තුළින් චීන රජය කළේ ලංකාවට තර්ජනයක් නෙමෙයිද?
මහජන බැංකුවේ ප්‍රශ්නයට මැදිහත් වෙනවා කියන එක උසාවියට අදාළ කාරණයක් නිසා රජයට මැදිහත් වෙන්න අමාරුයි. උසාවියේ නැවත නඩුව කැඳවෙනවා ඊළඟ සිකුරාදා දිනයේ. ඒ අධිකරණ තීරණ අනුව රජයක් හැටියට ඉදිරියේ දී මැදිහත්වීම කරනවා.
ඥානසාර හාමුදුරුවෝ එක රටක් එක නීතියක් කාර්ය සාධක බළකායේ සභාපති හැටියට පත් කරලා තියෙනවා. ඒක කරන්නේ මොන අවශ්‍යතාවක් මත ද? ඥානසාර හිමියන් පත්වෙන්නේ කාගේ උවමනාවකට ද?
ඥානසාර හාමුදුරුවන්ගේ ප්‍රශ්නයට මට මේ වෙලාවේ පිළිතුරක් දෙන්න අපහසුයි.
පසුගිය දවසක බැසිල් ඇමතිතුමාගෙන් මාධ්‍යවේදියෙක් නගපු ප්‍රශ්නයකට ඔහු ප්‍රකාශ කළේ ‘ජනතාවට සහන මොනවත් ලැබෙන්නේ නැහැ. ජනතාවගෙන් තමා ගන්න වෙන්නේ’ කියලා. ඒ කියන්නේ ඉදිරියේදී එන්න නියමිත අයවැයෙන්වත් ජනතාවට සහනයක් ලැබෙන්නේ නැද්ද?
සහන නොලැබුණා නෙමෙයි. පසුගිය වසර එකහමාර කාලය පුරාවට මිලියන අසූවක් වෙන්කරලා තියෙනවා ජනතාව වෙනුවෙන්. කොරෝනා සමයේ අවස්ථා කිහිපයකදීම පන්දාහෙ දීමනාව ලබා දුන්නා. දිරිදීමනා සියල්ල ලබාදීලා තියෙනවා කප්පාදුවකින් තොරව. නමුත් රටක ආර්ථිකය පවත්වා ගෙන යාම පිළිබඳ කාරණයේදී රටේ බදු ආදායම මත තීරණය වෙනවා. රටේ බදු ආදායම වැඩිවෙන්න නම් බදු ප්‍රමාණය වැඩි වෙන්න ඕනේ. හැබැයි බදු පිළිබඳ කාරණයේදී අපි හිතන්නේ බදු පදනම පුළුල් කිරීමට මීට වඩා හැකියාවක් ඇති පිරිස් බදු ආදායමට දායක විය යුතු ආකාරය තීරණය කිරීම පිළිබඳවයි.
ගොවියො, ධීවරයො, ගුරුවරු, කම්කරුවො මේ සියල්ලන්ම අයිතීන් ඉල්ලලා අරගල කරනවා. මිනිස්සු හැම පැත්තෙන්ම පීඩාවට ලක්වෙලා. රටේ ජනතාව කියන්නෙ ආණ්ඩුවට ජනතාවගේ ප්‍රශ්නවලට උත්තර දෙන්න බැහැ කියන එක. මොකක්ද ඉදිරි වැඩපිළිවෙළ ජනතාවගේ ප්‍රශ්නවලට උත්තර දෙන්න තියෙන?
ලෝකයේ එක වතාවක් පමණක් ඇතිවන අර්බුදයකට අපි මුහුණ මුහුණ දීලා තියෙනවා. අපිට මේ වගේ අර්බුදයක් ආයේ හමු වෙන එකක් නැහැ කියලා හිතෙනවා. ගොවියෝ වෙනුවෙන් ලබාදීමට හැකි සියල්ලම ලබා දෙනවා. වැටුප් වැඩි කිරීමට කාලයක් නොවුණත් අපි ඒ සඳහාත් කටයුතු කරනවා. ගොවියන්ගේ ප්‍රශ්නයට ආණ්ඩුව සාධාරණව ඒ ගැන සොයාබලලා ඔවුන්ගේ අස්වනු හානි පියවීමට රජයක් විදිහට සූදානමින් ඉන්නවා.■
