■ ඇන්තනී වෙරංග පුෂ්පික
ඔබ නියෝජනය කරන්නේ වාමාංශික දේශපාලනයක්. ඒ මතවාදයත් එක්ක බැලුවාම දැන් දේශපාලනය කරන තැන හරිද?
1950දී අපේ පක්ෂ සම්මේලනයේ අපි කල්පනා කළ කාරණය තමයි සභාග රජයක් එහෙමත් නැත්නම් සන්ධාන රජයක් තුළ සිවිල් අයිතිවාසිකම් දිනාගැනීම සඳහා මැදිහත් වීම් වෙන්න ඕනෑ කියලා. ඒක අපේ රටේ විතරක් නෙවෙයි ලෝකෙම පිළිගෙන තියෙන දේ. වර්තමානයේ උනත් අපි කල්පනා කරන්නේ මිනිස්සු වෙනුවෙන් යම් කාර්යභාරයක් කරන්න. නමුත් ඇතිවෙච්ච එකඟතාවන් ඉෂ්ට වීමේදී යම් ප්‍රශ්න පැනනගින අවස්ථා එනවා. ඒ පවතින තත්වයන් ගැන කල්පනා කරලා තමයි දේශපාලන තීන්දු තීරණ ගන්නේ. මේ කතා කරන මොහොතෙ පවා අපි බිහිකළ අපේ රජය සහ සන්ධානයේ ගමන් මග පිළිබඳව යම් දේශපාලන කතිකාවතක් සිදුවෙමින් පවතිනවා. ඒ ගැනත් කල්පනා කරමින් තමයි අපි කටයුතු කරන්නේ.
මේ ආණ්ඩුව පිහිටුවන්නේ ඔබ නියෝජනය කරන පක්ෂය ඇතුළු තවත් හවුල්කාර පක්ෂ ගණනාවක් එකතු වෙලා. දැන් හවුල්කාර පක්ෂ කියන දේවල් මේ ආණ්ඩුව අහන්නේ නැද්ද ?
පසුගිය ජනාධිපතිවරණය වෙනකොට අපි කාගේත් පොදු අපේක්ෂකයා විදිහට තමයි ගෝඨාභය රාජපක්ෂ මහත්මයා පත්කළේ. ඒ වෙලාවෙ තිබුණ ලොකු සංවාදයක් තුළ සෞභාග්‍යයේ දැක්ම නිර්මාණය වෙනවා. ඊට පස්සේ මහ මැතිවරණය වෙනකොට ඕනෑකම තිබුණා මේ සියලු දේශපාලන පක්ෂවල විධිමත් සංවිධානයක් ගොඩනගන්න. එතැනදී ශ්‍රී ලංකා නිදහස් පොදුජන සන්ධානය කියලා සියලුම දේශපාලන පක්ෂ සමඟ සාකච්ඡා කරලා සන්ධානයක් ගොඩනැගුණා. අවාසනාවකට ඒ සන්ධානය යටතේ නෙමෙයි අපට මැතිවරණයට මුහුණ දෙන්න සිද්ධ වුණේ. ඒක නිසා ඒ සන්ධානය තුළ වෙන්න ඕනෑ සාකච්ඡා සහ සංවාදයන් ඒ මොහොතේ සිදු නොවීම සම්බන්ධව යම් ප්‍රශ්නයක් නිර්මාණය වෙලා තියෙනවා.
ආණ්ඩුවත් එක්ක ගමන් කිරීමේ ප්‍රධාන ප්‍රශ්නය බවට පත්වෙලා තියෙන්නේ ආණ්ඩුව ගන්න ක්‍රියාමාර්ග සම්බන්ධව පුළුල් කතිකාවතක්, අඩුම ගානෙ ආණ්ඩුව ගොඩනඟන්න මැදිහත් වෙච්ච පාර්ශ්වයන් සමග හෝ නොමැති වීම. මේ ගෙවිච්ච වසරක කාලය තුළ ඒක බරපතළම ප්‍රශ්නය බවට පත්වෙලා තියෙනවා. ඒ පිළිබඳව දිගින් දිගටම අපි කරුණු ඉදිරිපත් කළා. මං හිතන්නේ අද වෙනකොට තීව්‍ර තැනකට ඇවිත් තියෙනවා සංවාදයක් නොමැතිය කියන කාරණාව.
මේ වගේ අර්බුදයක් ඇතිවෙන්න 20වෙනි සංශෝධනය ගෙනැල්ලා 19න් කප්පාදු කළ විධායක බලතල ජනාධිපතිවරයා නැවත අත්පත්කර ගැනීම හේතුවක් වුණේ නැද්ද?
විසිවෙනි සංශෝධනය ගේන්න බලපෑ ප්‍රධාන කාරණාවක් තමයි ඊට කලින් මහින්ද රාජපක්ෂ ජනාධිපතිතුමාගේ කාල පරිච්ඡේදය තුළ ගෙනාව 18 වැනි ආණ්ඩුක්‍රම ව්‍යවස්ථා සංශෝධනයෙන් හැදිච්ච ස්වාධීන කොමිෂන් සභා සහ වෙනත් ආයතනවලට යම් බලපෑමක් සිද්ධ වුණ එක. ඒ වගේම විධායක ජනාධිපති ක්‍රමය ඉතාමත් ශක්තිමත් එකක් බවට පත්වුණා. ඒ වගේම අමතක කරන්න හොඳ නෑ පාර්ලිමේන්තුවේ හිටපු 225 දෙනාගෙන් එක් කෙනෙක් දෙන්නෙක් ඇරෙන්න සියලු දෙනාම අත උස්සලා තමයි දහනම වෙනි ආණ්ඩුක්‍රම ව්‍යවස්ථා සංශෝධනය කළේ. එදා දහනව වැනි සංශෝධනය කරන්න කටයුතු කිරීමේදී එකඟතාවක් තිබුණා, මැතිවරණ ක්‍රමයේ වෙනසකුත් මේ හා සමානව එනවා කියලා. එතකොට දහනවවැනි ව්‍යවස්ථා සංශෝධනයෙන් ජනාධිපති බලතල අඩුකරලා පාර්ලිමේන්තුවට බලය එනවා නම් පාර්ලිමේන්තු මැතිවරණ ක්‍රමයත් වෙනස් වෙන්න ඕනෑ. නමුත් යහපාලන ආණ්ඩුව වසර පහක් අවසන් වෙනකොට ඒ සංශෝධනය ගෙනාවෙත් නෑ. නව ආණ්ඩුක්‍රම ව්‍යවස්ථාව ගෙනාවෙත් නැහැ. ඒක තුළ දහනව වැනි ව්‍යවස්ථා සංශෝධනයෙන් ආණ්ඩුක්‍රම විකෘතියක් සිද්ධ වුණා කියන එක තමයි අපේ පක්ෂයේ අපි කල්පනා කරන ආකාරය. ඒ විකෘතිය යම් ප්‍රකෘතියක් බවට පත් කරන්න තමයි විසිවෙනි ආණ්ඩුක්‍රම ව්‍යවස්ථා සංශෝධනය අවශ්‍ය වුණේ.
රටේ අලුත් ආණ්ඩුක්‍රම ව්‍යවස්ථාවක් වෙන තෙක් විසිවෙනි සංශෝධනය ගෙන ඒම තමයි සිද්ධ වුණේ. මේ මොහොතේ අපි කල්පනා කරන්නේ නැහැ මේවා විසිවෙනි සංශෝධනය නිසාම ඇති වෙච්ච කාරණා කියලා.
මේ වෙනකොටත් කෙරවලපිටිය යුගදනවි බලාගාරය ඇමෙරිකානු සමාගමකට දෙන්න ගිවිසුම් අත්සන් කරලා ඉවරයි. මේ සඳහා ඔබගන්න ක්‍රියාමාර්ගය මොකක්ද?
කෙරවලපිටිය යුගදනවි බලාගාරය සම්බන්ධ මේ ප්‍රශ්නය සිදුනොවිය යුත්තක් ලෙසයි මමත් මගේ පක්ෂයත් අපේ කණ්ඩායමත් විශ්වාස කරන්නෙ. මොකද මේ රටේ බලශක්තිය කියන එක තීරණාත්මක කාරණාවක්. ඒක රාජ්‍යය සතු විය යුතුයි. ආයෝජන ගෙනැල්ලා ආයෝජනයන් ලබාගැනීමට කටයුතු කිරීම ප්‍රශ්නයක් වෙන්නේ නැහැ. නමුත් මේ ආයෝජනයන් තුළ ඒකාධිකාරයක් යම් පුද්ගලයකුට හෝ ආයතනයකට රටකට ගොඩනැගෙනවා නම් ඒ රටේ ජාතික ආරක්ෂාවට එක පැත්තකින් ප්‍රශ්නයක්. අනිත් පැත්තෙන් අපේ රටේ බලශක්ති නීතියට ප්‍රශ්නයක්. ඒ නිසා මේ අත්සන් කළ කෙරවලපිටිය ගිවිසුම සම්බන්ධව අපේ තියෙන්නෙ දැඩි විවේචනයක්. වහාම එහි කොන්දේසි වෙනස් කරමින් ජනතාවට සහ රටට ගැළපෙන ආකාරයට සකස් විය යුතුයි කියලා තමයි අපි මේ මොහොතේ කල්පනා කරන්නේ. කෙරවලපිටිය යුගදනවි බලාගාරය සම්බන්ධ ගිවිසුම තවම අවසන් වෙලා නැහැ. ඒ ගිවිසුමේ කොටසක් විතරයි දැනට අත්සන් කරලා තියෙන්නේ. ඒක යථාර්ථයක් බවට ක්‍රියාත්මක කිරීමට තවත් එකඟතාවන් අවශ්‍යයි. ඒ නිසා අපේ පක්ෂය සහ තවත් පක්ෂ ගණනාවකුත් ඉදිරිපත් කරලා තියෙන කාරණාවක් තමයි වහාම මේ ගිවිසුම සංශෝධනය කළ යුතුයි කියන එක. ඒ වෙනුවෙන් කළ හැකි උපරිම අරගලය ආණ්ඩු පක්ෂය තුළ ඉඳගෙනත් ඉන් බාහිරවත් කටයුතු කරනවා.
ගුරු අරගලය සම්බන්ධව ඔබේ පක්ෂයේ ස්ථාවරය කුමක්ද?
ගුරු අරගලය සම්බන්ධව කොමියුනිස්ට් පක්ෂයේ ස්ථාවරය තමයි ගුරු විදුහල්පති වැටුප් විෂමතා ඉවත් කිරීමේ අරගලය සීයට දාහක් සාධාරණ අරගලයක්. පැහැදිලිවම වැටුප් විෂමතා ඉවත් විය යුතුයි. හොඳ වැටුපක් ලැබෙන රාජ්‍ය සේවකයන් අතර ගුරුවරු මේ රටේ ඉහළම තලයක ඉන්න ඕනෑ කියන කාරණාව තමයි අපි විශ්වාස කරන්නේ. ඒ වගේම මේ ගැන සෞභාග්‍යයේ දැක්ම ප්‍රතිපත්ති ප්‍රකාශයෙත් මහ මැතිවරණ ප්‍රකාශයෙත් තිබුණා. ඒ නිසා මේ වර්ජනයේ අවසානයක් දකින්න අපිට ඕනෑකමක් තිබුණා.
පක්ෂයේ සභාපති රාජා කොල්ලුරේ මහත්මයා ගුරු අරගලයට එරෙහිව ගිය නිසාද නැත්නම් වෙන හේතුවක් නිසාද සභාපතිකමෙන් ඉවත් කෙරෙන්නේ?
ගුරු අරගලය සම්බන්ධයෙන් අපේ පක්ෂය එක ස්ථාවරයක හිටියා. අපේ පක්ෂය වෘත්තීය සමිති සමඟ සාකච්ඡා කළා. ගුරුවරු සමග සාකච්ඡා කළා. අපි හිටියේ ගුරුවරුන් කළ අරගලය සාධාරණයි කියන තැන. අපි ඒ ගැන රජයත් සමග වෙනම සාකච්ඡා කළා. මේ වර්ජනය අවසානයක් දකින්න. පක්ෂයේ මතයට පටහැනිව යමින් යම් ප්‍රකාශයක් කිරීම නිසා ඔහු අපේ පක්ෂයට ලොකු හානියක් කළා. රාජා කොල්ලුරේ මහත්මයා වයඹ පළාතේ ආණ්ඩුකාරවරයා බව සැබෑව. නමුත් ඔහු ශ්‍රී ලංකා කොමියුනිස්ට් පක්ෂයේ සභාපතිවරයා ලෙස තමයි කටයුතු කළේ. ඒක නිසා සමාජය තුළ ලොකු කතිකාවතක් නිර්මාණය වෙන්න පටන් ගත්තා කොමියුනිස්ට් පක්ෂයේ සභාපතිවරයා ගුරු අරගලයට එරෙහිව මතවාදයක් ඉදිරිපත් කළා කියන කාරණාව ගැන. ඒ වගේම ඉදිරිපත් කළ කාරණා තාර්කික හා ප්‍රායෝගික කාරණා නෙවෙයි. ඒක නිසා පක්ෂය තුළ පුළුල් සාකච්ඡාවක් ඇතිවෙලා තමයි විනය ක්‍රියාමාර්ග ගන්න සිද්ධවුණේ. සදාචාරය පිළිබඳව මතු වෙච්ච කාරණාවක් විදිහට අපිට වෙන විකල්පයක් නැහැ.
මෙච්චර කාලයක් ගෝඨාභය රාජපක්ෂ මහත්මයට බැරිවුණ නිසා ද එක රටක් එක නීතියක් හදන වගකීම ඥානසාර හාමුදුරුවන්ට බාර දුන්නෙ?
ඒ ගැසට් නිවේදනය දැක්ක ගමන් මමත් පුදුම වුණා. පක්ෂය තුළ නම් මේ ගැන සාකච්ඡාවක් ඇති වුණේ නැහැ. පෞද්ගලිකව වීරසුමන වීරසිංහ විදිහට ඒ කාරණාව අනුමත කරන්න බැහැ. ඒ වගේම ඥානසාර හාමුදුරුවන්ගේ ඉතිහාසය දිහා බැලුවාමත් එක රටක් එක නීතියක් කියන වචනෙට පවා පරිබාහිර හැසිරීමක් තමයි උන්වහන්සේගේ ඉතිහාසය පුරාම තිබුණේ. උන්වහන්සේ මේ රටේ ගොඩක් වෙලාවට ජාතික සමගිය බිඳවට්ටන්නට ජාතීන් අතර අසමගිය ඇති කරන්නට ද්වේෂසහගත විදිහට හැසිරිච්ච හාමුදුරුවන් වහන්සේ නමක්. ඒ නිසා මේ වගේ භාරධුර වැඩක් ඔහු වෙත පැවරීම මම දන්නැහැ කුමන අරමුණක් වෙනුවෙන් කළාද කියලා.
ආණ්ඩුව කෙරෙහි ජනතාව දවසින් දවස අප්‍රසාදයට පත්වෙමින් ඉන්නේ. ඔබ තවදුරටත් ජනතාව පීඩනයට පත් කරන ජනතාවගේ ප්‍රශ්නවලට උත්තර දෙන්න අසමත් වෙච්ච ආණ්ඩුවක් එක්ක රැඳිලා ඉන්නවාද?
මේ වෙලාවේ ආණ්ඩුව මුහුණ දෙන ප්‍රශ්න ප්‍රමාණයේ කාණ්ඩ දෙකක් තියෙනවා. එකක් තමයි අපිට වළක්වාගන්න බැරි ප්‍රශ්න ප්‍රමාණයක් නිර්මාණය වුණා. විශේෂයෙන්ම කොවිඩ් අර්බුදයත් ලෝක ආර්ථික අර්බුදයත් නිසා වළක්වාගන්න බැරි අර්බුද ගණනාවක් ම නිර්මාණය වෙලා තියෙන්නේ. උදාහරණයක් විදිහට ගත්තම හාල්, තෙල් මිල සම්බන්ධව වෙන්න පුළුවන්. ආනයනික භාණ්ඩ සම්බන්ධව වෙන්න පුළුවන්. මේ කාරණා කිසිවක්ම අපිට වළක්වාගන්න පුළුවන් සීමාවේ තියන කාරණා නෙමෙයි. ඒක නිසා ඒ කාරණා පිළිබඳ ජනතාවට ඇත්ත පැහැදිලි කිරීම තමයි අපේ පැත්තෙන් වෙන්න ඕනෑ.
හැබැයි ආණ්ඩුව පැත්තෙන් පසුගිය කාලයේ අපි විසින් නිර්මාණය කරගත්ත ප්‍රශ්න ප්‍රමාණයකුත් තියෙනවා. සමහර ඒවා ඉතාමත් සාධනීය අරමුණු වෙනුවෙන් ගත්ත ක්‍රියාමාර්ග. නමුත් අපි නිසි කාලයට අනුව එම තීරණ නොගත්ත නිසා බරපතළ අර්බුද පුමාණයක් ඇතිවෙලා තියෙනවා. උදාහරණයක් විදිහට රසායනික පොහොර සම්බන්ධව ගත්ත තීන්දුව හොඳ තීන්දුවක්. නමුත් මොන තරම් සද්භාවයෙන් ගත්තා වුණත් ඒ තීන්දුව ක්‍රියාත්මක කරන යාන්ත්‍රණය ඒක කරගෙන යන්න කටයුතු කළේ නැහැ. ඒක නිසා අද ජනතාව ඉස්සරහ රසායනික පොහොර නැවැත්වීමට ගත්ත තීරණය ජනතාවට වගේම ආණ්ඩුවටත් අර්බුදයක් බවට පත්වෙලා. ඒ වගේම අද වෙන විට ආණ්ඩුව ජනතාව ප්‍රශ්න කරන තැනට පත්වෙලා තියෙනවා. එක පැත්තකින් ආණ්ඩුවට යම්කිසි විරෝධයක් තියෙන බව අපිත් පිළිගන්නවා. අනෙක් පැත්තෙන් ආණ්ඩුවේ ම පුද්ගලයන් සහ ක්‍රියාකාරකම් සම්බන්ධයෙනුත් ලොකු විරෝධයක් ගොඩනැගිලා තියෙනවා. ඒ නිසා ආණ්ඩුව ගෙනා ඇතැම් තීරණ ආපස්සට හරවන්න අපිට කළ හැකි මැදිහත්වීම් කළා. මේ වෙනකන් ආණ්ඩුව ගන්න හොඳ ක්‍රියාමාර්ග ශක්තිමත් කරන්න අපිට තියන උපරිම දායකත්වය ලබාදුන්නා. ඉදිරි කාලයේදී ඒක තීරණය වෙන්නේ ආණ්ඩුව ගන්න අනෙකුත් ක්‍රියාමාර්ගත් එක්ක තමයි.■
