■ අමන්දිකා කුරේ
එක්ස්ප්‍රස් පර්ල් නෞකාවෙන් සිදු වූ පරිසර හානියට අදාළ වන්දි මුදල්වලින් තවම ලැබී ඇත්තේ ඩොලර් මිලියන 3.6ක් බව සමුද්‍රීය පරිසර ආරක්ෂණ අධිකාරියේ සභාපති නීතිඥ දර්ශනී ලහඳපුර ප්‍රකාශ කළා ය.
වියදම් හා අලාභ සම්බන්ධයෙන් දැනට ඩොලර් මිලියන 40ක වන්දියක් ඉල්ලා ඇති අතර ඒ සිදුවූ වියදම්වලට අමතරව ඉදිරියේදී කළ යුතු වියදම් ඇස්තමේන්තු කිරීමෙන් ය.
එක්ස්ප්‍රස් පර්ල් වෙනුවෙන් වන්දි ගෙවනු ලබන රක්ෂණ සමාගම දැනුම් දී තිබෙන්නේ
දැනට සිදුව ඇති සියලු වියදම්වලට ගෙවීම් කිරීමට බලාපොරොත්තු වන බව හා ඉදිරියේදී වියදම් වනු ඇතැයි ඇස්තමේන්තු කර ඇති මුදල් ඒවා වියදම් වීමෙන් පසුව ලේඛන ඉදිරිපත් කළ විට ඉදිරිකාලයේදී ගෙවීමට බලාපොරොත්තු වන බව යැයි ඇය කීවාය.
මීට අමතරව පාරිසරික හානිය සම්බන්ධයෙන් තවම ඇස්තමේන්තු කර නොමැති අතර ඒ සඳහා ද වන්දි මුදලක් ලබා ගැනීමට බලාපොරොත්තු වන බව දර්ශනී ලහඳපුර මහත්මිය ප්‍රකාශ කළා ය.
”පාරිසරික හානිය සම්බන්ධයෙන් ගණනය කරන්න විශේෂඥ කමිටුවක් පත් කරලා තියෙනවා. ඒ යටතේ අනුකමිටු 11ක් එක් එක් පරිසර හානි සම්බන්ධයෙන් අධ්‍යයනය කරනවා. ඊට අමතරව අධිකරණ ඇමති ඇතුළු විෂයභාර ඇමතිවරුත් මේ සම්බන්ධයෙන් අධීක්ෂණයක් කරනවා. සමුද්‍රීය නීති සම්බන්ධයෙන් ඕස්ටේ්‍රලියානු නීතිඥ සමාගමකින් අපි නීති උපදෙස් ගත්තා. පාරිසරික හානිය පිළිබඳ වාර්තාව නොවැම්බර් අග වන විට අවසන් කරන්න බලාපොරොත්තු වෙනවා” ඇය කීවාය.■
