රාජපක්‍ෂ මහතාණෙනි, ගාමිණී සෙනරත් බබෙක්ද?

ලසන්ත රුහුණගේ
කන්තලේ සීනි සමාගම සතු යකඩ ඉන්දීය ජාතිකයෙකුට විකිණීම සඳහා ඉල්ලූ අල්ලස් මුදලක් ලබාගනිද්දී ජනාධිපති කාර්ය මණ්ඩල ප‍්‍රධානී කේ. මහානාම සහ රාජ්‍ය දැව සංස්ථාවේ සභාපති පී. දිසානායක අත්අඩංගුවට පත්වූයේ පසුගිය මැයි 03 වැනිදාය. එම අත්අඩංගුවට ගැනීමෙන් පසුව එම නිලධාරීහු දෙදෙනා මේ වනවිට රිමාන්ඞ් බන්ධනාගාරයේ පසුවෙති.
මෙම සිදුවීම ආශ‍්‍රයෙන් දේශපාලන ක්ෂේත‍්‍රයේ කතාබහ තවම නිමවී නැත. ඒ පිළිබඳව විවිධ අර්ථකථන දේශපාලනඥයන් විසින් ලබාදෙනු ලබන අතර ඒකාබද්ධ විපක්ෂයේ සමහරුන් එම අල්ලස් සිදුවීම හඳුන්වන්නේ ජනාධිපතිවරයා අපහසුවට පත්කිරීම සඳහා අගමැතිවරයා විසින් සකස් කළ සැලසුමක් බවය. කෙසේ වෙතත් ජනාධිපති මෛත‍්‍රීපාල සිරිසේන නම් ඒ ගැන කියන්නේ තමාගේ කාර්ය මණ්ඩල ප‍්‍රධානියා මෙන්ම, හිටපු ජනාධිපති මහින්ද රාජපක්ෂගේ කාර්ය මණ්ඩල ප‍්‍රධානී ගාමිණී සෙනරත් ද, හිටපු ජනාධිපතිනි චන්ද්‍රිකා කුමාරතුංගගේ කාර්ය මණ්ඩල ප‍්‍රධානී පී. දිසානායකද (අත්අඩංගුවට පත්වූ රාජ්‍ය දැව සංස්ථාවේ සභාපති ඔහුය.) එවන් දුෂණ සම්බන්ධයෙන් රිමාන්ඞ් බන්ධනාගාරයට පත්වූවන් බවය.
එහෙත් මාධ්‍ය කරන ලද විමසීමේදී හිටපු ජනාධිපති මහින්ද රාජපක්ෂ වත්මන් ජනාධිපතිවරයාගේ එම ප‍්‍රකාශය ප‍්‍රතික්ෂේප කරමින් ඔහුගේ කාර්ය මණ්ඩල ප‍්‍රධානියාට විරුද්ධව පොදු දේපල පනත යටතේ චෝදනා නොමැති බව පවසා ඇත. ඔහු ඇප මත නිදහස්ව සිටින්නේ ඒ නිසා බව ඔහු කියා ඇත. මේ වූ කලි තමාගේ කාර්ය මණ්ඩල ප‍්‍රධානියා වූ ගාමිණී සෙනරත් රාජ්‍ය සම්පත් හෝ පොදු දේපල අවභාවිත නොකරන ලද වංචාවට, දුෂණයට ගෑවිලාවත් නැති සුදනෙකු බව පෙන්වීමට මහින්ද රාජපක්ෂ කරන ලද ප‍්‍රකාශයකි. එහි සත්‍යතාවක් නැත.
ගාමිණී සෙනරත් රිමාන්ඞ් භාරයට පත්වන්නේ හම්බන්තොට හෝටල් ව්‍යාපෘතියට අදාල රාජ්‍ය මුදල් අවභාවිත කිරීම සම්බන්ධයෙන්ය. ඔහු සමඟ එහිදී රාජපක්ෂ සමයේදී ගාමිණි සෙනරත් සමග කටයුතු කළ පියදාස කුඩාබාලගේ හා නීල් බණ්ඩාර හපුහින්නද රිමාන්ඞ් බන්ධනාගාරයට පත්වෙති. මෙම ව්‍යාපෘතිය සම්බන්ධයෙන් පරීක්ෂණ සිදුකරනු ලබන්නේ පොලිස් මූල්‍ය අපරාධ කොට්ඨාසය හෙවත් එෆ්සීඅයිඞීයය. ඒ සම්බන්ධයෙන් ප‍්‍රකාශයක් ලබාදෙන්නට ගාමිණි සෙනරත්ට එෆ්සීඅයිඞීයට එන්නැයි කියන සෑම අවස්ථාවකදීම ඔහු එය මඟහරින්නේය. අධිකරණය හරහා ප‍්‍රකාශ ලබාදෙන්නැයි කරන ඉල්ලීම්ද මඟහරියි.
ඔහු අත්අඩංගුවට ගැනීම වළක්වන ලෙස ඉල්ලමින් ශ්‍රේෂ්ඨාධිකරණය හමුවේ මූලික අයිතිවාසිකම් නඩුවක් පවා ගොනුකරයි. එය හරියටම ගෝඨාභය රාජපක්ෂගේ රංගනයටම සමානකම් දක්වයි. ගෝඨාභය රාජපක්ෂද රටේ හැම අධිකරණයටම ගොස් ඔහු අත්අඩංගුවට ගැනීම වළක්වන නියෝග ලබාගනිමින් වියත් මඟ දේශන තබමින් රට වටේ යයි. ඔහුගේ නිකැළැල් පාරිශුද්ධභාවය පිළිබඳව චරිත සහිතක ඔහුම ඉදිරිපත් කරයි. වෙනස ඇත්තේ ගාමිණී සෙනරත් වෙනුවෙන් චරිත සහතික ඔහුගේ හාම්පුතා මහින්ද රාජපක්ෂ විසින් ලබාදීම පමණය.
මේ හම්බන්තොට හෝටල් ව්‍යාපෘතිය කුමක්ද? හම්බන්තොටට එන්නට පෙර එහි නිදාන කතාවක් තිබේ. එය මෙසේය.
ගෝල්ඩන් කී මූල්‍ය අර්බුදයත් සමඟ සෙලින්කෝ සමූහය අර්බුදයට යමින් තිබෙන අවස්ථාවේ සෙලින්කෝ සමූහය විසින් කොළඹ ගාලූ‍පාරේ සුපිරි නිවාස ව්‍යාපෘතියක් ක‍්‍රියාත්මක කරමින් සිටියේය. එය සත් ගුණවත් ගෝඨාභය රාජපක්ෂ විසින් ඔහු යටතේ තිබූ නාගරික සංවර්ධන අධිකාරියට පවරාගත්තේය. (පවරාගැනීමේ නිල බලය ඇත්තේ මහින්ද රාජපක්ෂ නම් වූ ඔහුගේ සොහොයුරාට බව සලකන්න. )
ඉන්පසු එම සෙලින්කෝ ඉදිකිරීම තරු හෝටලයක් බවට පත් කරන්නට රාජපක්ෂ පාලනය තීරණය කරනු ලැබීය. එහි ඉදිකිරීම් වැය ශ‍්‍රී ලංකාව විසින් දැරීමටත්, ඉදිකිරීමෙන් පසු හෝටලයේ කළමනාකාරීත්වය හයට් ජාත්‍යන්තරයට පැවරීමටත් තීරණය විය.
එම තරු හෝටලය ඉදිකිරීම සහා වැය වන මුදල වශයෙන් රුපියල් බිලියන 18.5ක් හෙවත් රුපියල් කෝටි 1850ක් වැය කිරීමට නියමිතව තිබුණි. එම මුදල් ශ‍්‍රී ලංකා රක්ෂණ සංස්ථාව, ලිට්රෝ ගෑස් ලංකා සමාගම හා සේවක අර්ථසාධක අරමුදල විසින් ආයෝජනය කර තිබුණි. ඒ ශ‍්‍රී ලංකා රක්ෂණ සංස්ථාව රුපියල් බිලියන 8.5ක්, ලිට්රෝ ගෑස් සමාගම රුපියල් බිලියන 5ක් සහ සේවක අර්ථසාධක අරමුදල රුපියල් බිලියන 5ක් වශයෙනි. ඒ ආයෝජනය සඳහා ශ‍්‍රී ලංකා ආණ්ඩුවට සම්පූර්ණ අයිතිය ඇති සමාගමක් පිහිටුවා තිබුණු අතර එය කැන්විල් හෝල්ඩින්ස් (Canwill Holdings )PVT( LTD) පුද්ගලික සමාගම වශයෙන් ලියාපදිංචි කර තිබුණි. එහි අයිතියෙන් 46%ක් ශ‍්‍රී ලංකා රක්ෂණ සංස්ථාව සතුවූ අතර ඉතිරිය 27% බැගින් ලිට්රෝ ගෑස් සමාගමට සහ සේවක අර්ථසාධක අරමුදලට හිමිව තිබුණි. මේ සමාගමේ සභාපතිවරයා වශයෙන් එවක හිටපු ජනාධිපති මහින්ද රාජපක්ෂගේ කාර්ය මණ්ඩල ප‍්‍රධානියා වශයෙන් කටයුතු කළ ගාමිණී සෙනරත්ද, කළමනාකරණ අධ්‍යක්ෂවරයා වශයෙන් පියදාස කුඩාබාලගේද, අධ්‍යක්ෂවරයෙකු වශයෙන් නීල් බණ්ඩාර හපුහින්න ද පත්කර තිබුණි.
මේ ප‍්‍රධාන රාජ්‍ය සමාගම යටතේ තවත් අනුබද්ධ රාජ්‍ය සමාගම් දෙකක් පිහිටුවා තිබූ අතර එකක් වූයේ කොළඹ හයට් හෝටලය ඉදිකිරීම සඳහා පිහිටුවා තිබූ සිනෝ ලංකා හොටෙල්ස් ඇන්ඞ් ස්පා පුද්ගලික සමාගමය. අනෙක වූයේ හයට් රිජන්සි වශයෙන් තවත් තරු හෝටලයක් හම්බන්තොට ඉදිකිරීම සඳහා පිහිටුවා තිබූ හෙලන්කෝ හොටෙල්ස් ඇන්ඞ් ස්පා පුද්ගලික සමාගමය. මේ හෙලන්කෝ සමාගමේ සභාපතිවරයා වශයෙන් ගාමිණි සෙනරත් කටයුතු කර ඇති අතර කළමනාකාර අධ්‍යක්ෂ සහ ප‍්‍රධාන විධායක නිලධාරියා වශයෙන් පියදාස කුඩාබාලගේ කටයුතු කර ඇත. අනෙක් අධ්‍යක්ෂවරයා වශයෙන් නීල් බණ්ඩාර හපුහින්න කටයුතු කර ඇත.
මෙම හෝටල් ව්‍යාපෘතිය ගැන වත්මන් ආණ්ඩුව බලයට පත්වීමෙන් පසු විපරමක් සිදුකර ඇති අතර ඒ අනුව කැබිනට් මණ්ඩල තීරණයක්ද ගෙන ඇත. ඒ 2016.08.16 දින රැුස්වූ කැබිනට් මණ්ඩලයේදීය. එම කැබිනට් මණ්ඩල තීරණය මෙබඳුය.
‘රුපියල් බිලියන 18.5ක් ආයෝජනය කරමින් ග‍්‍රෑන්ඞ් හයට් කොළඹ හෝටලය 2012 ආරම්භ කරන ලදි. එම ඉදිකිරීම් කටයුතු කරන අතරතුර එකී සමාගමට අනුබද්ධ ආයතනයක් වන හෙලන්කෝ හොටෙල්ස් ඇන්ඞ් ස්පා පුද්ගලික සමාගම යටතේ හම්බන්තොට ප‍්‍රදේශයේ හයට් රීජන්සි නම් තවත් හෝටලය ඉදිකිරීම පිණිස රුපියල් බිලියන 4ක මුදලක් ආයෝජනයට තීරණය කර රුපියල් බිලියන 315ක් ඒ සඳහා වියදම් කර ඇතත් අදාල හෝටලය ඉදිකිරීම් කටයුතු සිදු කරනු ලැබ නොමැත. ඒ අනුව එකී හයට් රීජන්සි හෝටලය ඉදිකිරීම් සඳහා වෙන්කර ඇති අරමුදල ග‍්‍රෑන්ඞ් හයට් කොළඹ ඉතිරි ඉදිකිරීම් සඳහා ආයෝජනය කරන්නට රාජ්‍ය ව්‍යවසාය සංවර්ධන අමාත්‍ය කබීර් හෂීම් ඉදිරිපත් කළ අමාත්‍ය මණ්ඩල අනුමත කරන ලදි. රාජ්‍ය ආයතනවල මුදල් තම මූලික අරමුණුවලින් පරිබාහිරව වාණිජ ව්‍යාපාරවල යෙදවීම පිළිබඳව සොයා බැලීමටද තීරණය කරන ලදි.’
එම කැබිනට් මණ්ඩල තීරණය අනුව පැහැදිලි කරුණ වන්නේ රාජ්‍ය ආයතන සතු රුපියල් මිලියන 315ක මුදලක් කිසිදු ඉදිකිරීමක් නොකර හම්බන්තොට හයට් රිජන්සි හෝටලය වෙනුවෙන් කාගේ හෝ සාක්කුවට ගොස් ඇති බවය. බොහෝ විට එම සාක්කුවේ හිමිකරු අදාල සමාගමේ ප‍්‍රධානීන් නොවිය හැකිය. ගාමිණි සෙනරත් පොදු දේපල හෙවත් රාජ්‍ය දේපල අවභාවිත කර නැතැයි සහතික ලැබෙන්නේ ඒ නිසා විය හැකිය.
කෙසේ වෙතත් එම කැබිනට් මණ්ඩල හඳුනාගැනීමෙන් පමණක් හම්බන්තොට හයට් රීජන්සි හෝටලයට අදාල හෙලන්කෝ හොටෙල්ස් සමාගමේ ක‍්‍රියාකාරකම් නවතින්නේ නැත. මේ හෙලන්කෝ හොටෙල්ස් ඇන්ඞ් ස්පා පුද්ගලික සමාගම 2014 ඔක්තෝබර් මස 13 දින සහිතව සමාගම් ලිපි ශීර්ෂයකින් ලංකා බැංකුවේ කොළඹ කෝපරේට් ශාඛාවේ කළමනාකරු අමතා සඳහන් කරන්නේ එම සමාගමේ ගිණුමේ ඇති මුදලින් රුපියල් මිලියන 40ක මුදලක් Jaysons Reality (pvt) LTD ආයතනයට බැර කරන ලෙසයි. එදිනම තවත් ලිපියකින් දන්වන්නේ එම ආයතනයටම තවත් රුපියල් මිලියන 8ක මුදලක් බැර කරන ලෙසයි.
මේ මූල්‍ය අවභාවිතාව පිළිබඳව පොලිස් මූල්‍ය අපරාධ කොට්ඨාසය සිදුකරන විමර්ශනයේදී සමාගම් ලේකම්වරුන් වශයෙන් කටයුතු කරන පී.ආර්. කෝපරේට් සර්විසස් පුද්ගලික සමාගම 2018 මාර්තු 29 දින සහිතව පොලිස් මූල්‍ය අපරාධ කොට්ඨාසය ලිඛිතව අමතමින් සඳහන් කරන්නේ ඔවුන් සමාගම් ලේකම්වරුන් වශයෙන් කටයුතු කළ කැන්විල් හෝල්ඩින්ස් පුද්ගලික සමාගම, සිනෝලංකා හොටෙල්ස් ඇන්ඞ් ස්පා පුද්ගලික සමඟම, හෙලන්කෝ හොටෙල්ස් ඇන්ඞ් ස්පා පුද්ගලික සමාගම, නිල්යාස් හොටෙල්ස් ඇන්ඞ් ස්පා පුද්ගලික සමාගම යන කිසිදු සමාගමක් 2013 වර්ෂයේ සිට 2015 වර්ෂය දක්වා කාලයේදී සිය අධ්‍යක්ෂ මණ්ඩල රැුස්වීම්වලදී ජේසන් රියැලිටි පුද්ගලික සමාගමට රුපියල් මිලියන 48ක මුදලක් ගෙවීමට කිසිදු තීරණයක් ගෙන නොමැති බවත්ය.
හම්බන්තොට හයට් රීජන්සි හෝටලය වෙනුවෙන් පිහිටවූ සමාගම එම හෝටලයේ ඉදිකිරීම් සම්බන්ධයෙන් කිසිදු සම්බන්ධයක් නැති ජේසන් රියලිටි පුද්ගලික සමාගමට මේ ආකාරයට මුදල් ගෙව්වේ ඇයි? එය සමහරවිට ගාමිණී සෙනරත් ඇතුළු එම සමාගමේ ප‍්‍රධානීන් නොදන්නවා වූවාට ඔවුන්ව මෙහෙයවන ඔවුන්ට සුදු සළුපිළි අන්දවන පිරිස් නම් නොඅනුවම දන්නවා ඇත.
මේ වූ කලි ගාමිණී සෙනරත්ලා යොදා ගැසූ එක් ගේමක් පමණය. එවැනි ගේම් බොහොමයක් තව ඇත්තේය. ඒවායින් කිහිපයක්ම පැමිණිලි වශයෙන්ද ගොස් ඇත්තේය. ඒ ආකාරයට පැමිණිල්ලක් වශයෙන් අපරාධ පරීක්ෂණ දෙපාර්තමේන්තුවට ගොස් ඇති එක් කරුණක් වන්නේ ලංකා ඛණිජතෙල් නීතිගත සංස්ථාව හා සිලෝන් පෙට්‍රෝලියම් ස්ටෝරේජ් ටර්මිනල් ලිමිටඞ් යන ආයතනවලට අයත් රටේ හදවත බඳු වත්කම් හා දේපල ප‍්‍රතිරක්ෂණයේදී සිදුකරන ලද වංචාවය. මේ සම්බන්ධයෙන් අපරාධ පරීක්ෂණ දෙපාර්තමේන්තුවේ පිළිතුර වී ඇත්තේ නඩු ගොනු කිරීම සඳහා නීතිපති දෙපාර්තමේන්තුවට ලිපිගොනුව යොමුකර ඇතත් වසර දෙකකට ආසන්න කාලයක් තිස්සේ ඉන් පිළිතුරක් ලැබී නැති බවය.
එවක ශ‍්‍රී ලංකා රක්ෂණ සංස්ථාවේ සභාපති වූයේ හිටපු ජනාධිපති මහින්ද රාජපක්ෂ මහතාගේ කාර්ය මණ්ඩල ප‍්‍රධානී ගාමිණී සෙනරත්ය. පියදාස කුඩාබාලගේ එහි අධ්‍යක්ෂවරයෙක් විය, ධම්මික පෙරේරා ද එහි අධ්‍යක්‍ෂවරයෙක් විය.
ඉහත කී ලංකා ඛණිජතෙල් නීතිගත සංස්ථාවේ හා සිලෝන් පෙට්‍රෝලියම් ස්ටොරේජ් ටර්මිනල් ලිමිටඞ්හි වත්කම් හා දේපලවල රක්ෂණය බාරවී තිබුණේ ශ‍්‍රී ලංකා රක්ෂණ සංස්ථාවටය. ඊට සපුගස්කන්ද පිරිපහදුව, එහි තෙල් තොග, සපුගස්කන්ද පර්යන්තය, පර්යන්තයේ තෙල් තොග හා බොයිලේරුවද, ඔරුගොඩවත්ත පර්යන්තය හා එහි තෙල් තොගද, කටුනායක පිරිපහදුව, තෙල් තොග හා ඩිපෝවද, මුතුරාජවෙල තෙල් තොගද, කොළොන්නාවේ පිහිටි දේපල සහ තෙල් තොගද අයත් වී තිබුණි. 2009 වර්ෂයේදී මේවායේ වටිනාකම තක්සේරු කර තිබුණේ රුපියල් මිලියන 75397ක් ලෙසය. මේ රක්ෂණයේ ප‍්‍රතිරක්ෂණ ගාස්තු වශයෙන් 2009 / 2010 වර්ෂය සඳහා රුපියල් මිලියන 92ක්ද 2010 / 2011 වර්ෂය සඳහා රුපියල් මිලියන 110ක මුදලක්ද රටෙන් පිටට ගොස් තිබුණි. ඒ ලෝකයේ අංක එකේ ප‍්‍රතිරක්ෂණ සමාගම්වල මේ ප‍්‍රතිරක්ෂණය සිදුකරන බව සඳහන් කරමින්ය. ඒ සඳහා බ්‍රෝකර්වරයා වශයෙන් තෝරාගෙන තිබුණේ සුරේෂ් බාලචන්ද්‍රන් නම් පුද්ගලයෙක්ය. ඔහු ඉන්දියාව විසින් රක්ෂණ සඳහා තහනම් කර තිබූ පුද්ගලයෙකි.
බරපතළම ප‍්‍රශ්නය ඇත්තේ එහි නොවේ. කියූ ලෙස ලෝකයේ අංක එකේ ප‍්‍රතිරක්ෂණ සමාගම්වල තබා කිසිදු ප‍්‍රතිරක්ෂණ සමාගමක මේ ප‍්‍රතිරක්ෂණ කටයුතු සිදු නොවී තිබීමය.
එය ලියුම්කරු විසින් එම දිනවල හෙළිදරව් කරනු ලැබීය. එම හෙළිදරව් කිරීමට අදාලව කරුණු විමසූවිට ගාමිණි සෙනරත් උපරිම උත්සාහ කළේ එම හෙළිදරව් කිරීම වැළැක්වීම සඳහාය. හෙළිදරව්ව පළ නොකර ලියුම්කරු ගෙන්වාගෙන සාකච්ඡුාවකට ඔහු උත්සාහ කළේය. හෙළිදරව්ව නතරකරන්නේ නම් එවක මා සේවය කළ පුවත්පතට රක්ෂණ සංස්ථාවේ දැන්වීම් ලබාදෙන බවට බාහිර පුද්ගලයෙකු මාර්ගයෙන් නියෝජ්‍ය කර්තෘවරයාට දැනුම් දී තිබුණි. කර්තෘවරයාගේ පුත‍්‍රයාගේ යහළුවෙකු මාර්ගයෙන්ද එම දැන්වීම් කථාවම කර්තෘවරයාට සන්නිවේදනය කර තිබුණි.
එම හෙළිදරව්වෙන් පසු කර්තෘවරයා මා අමතා කීවේ මාගේ එම හෙළිදරව්ව එවැනි ආකාරයේ ගනුදෙනු සිදුකරන ඉහළ තලයේ මාෆියාව තුළ දැඩි කතාබහට ලක්වී ඇති බවත්, එම මාෆියාවේ කටයුතු පිළිබඳව හෙළිදරව් කරන්නන්ගේ ජීවිත පවා විනාශ කිරීමට එම මාෆියාව සමත් බවත් මට ඇති තොරතුරු මාර්ගවලින් එම මාෆියාවේ ප‍්‍රධානියා කවුදැයි සොයා බලන ලෙසත් මට ප‍්‍රවේශමෙන් සිටින ලෙසත්ය. එමෙන්ම කර්තෘවරයා කීවේ ඔහුගේ මිතුරෙකුගේ මිතුරෙකුගේ බිරිඳක් අදාල මාෆියා කටයුතු මෙහෙයවන කාර්යාලයේ සේවය කරන බත් ඒ මාර්ගයෙන් එම තොරතුරු දැනගැනීමට ලැබුණ බවත්ය.
කෙසේ හෝ ඊළඟ සතිය තුළ අදාළ මාෆියාව මෙහෙයවන්නේ කවුද යන්න සහ එහි කාර්යාලය පවත්වාගෙන යන්නේ කොතැනද යන්න පිළිබඳව යම් තොරතුරු ප‍්‍රමාණයක් දැනගැනීමට මට හැකිවූ අතර ඒ පිළිබඳව කර්තෘවරයා දැනුවත් කරමින් මා කීවේ එම මාෆියාවේ ප‍්‍රධානියා අහවල් රාජපක්ෂ බවය. එය ප‍්‍රතික්ෂේප නොකළ කර්තෘවරයා එය පිළිගත්තේය.
එම කාලයේ ප‍්‍රතිරක්ෂණ කටයුතු වැනි ඉහළ තලයේ සිදුවූ ගනුදෙනු සියල්ලම පාහේ එසේ මාෆියාවක් විසින් කූට ලෙස මෙහෙයවනු ලැබුවත් ඒවා බොහෝ විට රට තුළ සිදුවූ සාමාන්‍ය ගනුදෙනු ආකාරයෙන් හෙළිදරව් වුණේ නැත. උතුරු නැගෙනහිර යුද්ධය පැවති එසමයේ ලංකා ඛණිජතෙල් නීතිගත සංස්ථාවේ දේපලකට ත‍්‍රස්තවාදී ප‍්‍රහාරයක් එල්ලවූයේ නම් ශ‍්‍රී ලංකා රක්ෂණ සංස්ථාව දැඩි මූල්‍ය අර්බුදයකට ලක්වන්නට ඉඩ තිබුණි. ඒ එම දේපල සැබෑ ලෙසම ප‍්‍රතිරක්ෂණය නොකර එම ප‍්‍රතිරක්ෂණ මුදල් කාගේ හෝ සාක්කුවකට ගිය බැවිනි. ඉතිං රාජපක්‍ෂ පාලන සමයේ ඔහුගේ කාර්ය මණ්ඩල ප‍්‍රධානියා රක්ෂණ සංස්ථාවේද සභාපතිවරයා වශයෙන් සිටිමින් සැබෑ ලෙසම රට ආරක්ෂා කළේ ඒ ආකාරයටය.
එවන් හපන්කම් කළ ගාමිණි සෙනරත් හිටපු ජනාධිපති මහින්ද රාජපක්ෂ දකින්නේ කිසිවක් නොකළ බබෙක් ලෙසද?