රේඛා නිලූක්ෂි හේරත්
මීගමුව ගේට්වේ පාසලේ සිසුන් 9 දෙනෙකුට සිදුවූ අපචාර සිදුවීමක් සම්බන්ධයෙන් සිදුකළ පරීක්ෂණයක් හේතුවෙන් ජාතික ළමා ආරක්ෂණ අධිකාරියේ හිටපු සභාපතිනිය වන මරිනි ද ලිවේරා මහත්මියට තවමත් දුරකථනයෙන් තර්ජන එල්ලවෙමින් පවතින බව වාර්තා වෙයි. පරීක්ෂණය මරිනි ද ලිවේරා මහත්මිය ජාතික ළමා ආරක්ෂක අධිකාරියේ තනතුරෙන් ඉවත් කිරීමෙන් පසුව නැවතී තිබෙන බව ළමාරක්ෂක අධිකාරියේ අභ්‍යන්තර ආරංචි මාර්ග පවසයි. එම පරීක්ෂණය සිදුකළ සමයේද එය නවත්වන්නැයි බලපෑම් රැුසක් පැමිණි බවත් එම ආරංචිමාර්ග ප‍්‍රකාශ කරයි. එම පරීක්ෂණය නවත්වන ලෙස ජනාධිපති ලේකම් කාර්යාලයේ ඉහළ නිලධාරියෙකුද මරිනි ද ලිවේරා මහත්මිය ළමාරක්ෂක අධිකාරියේ සභාපතිනියව සිටි සමයේදී දුරකථනයෙන් දැනුම් දී ඇතැයි වැඩිදුරටත් වාර්තා වෙයි.
මේ වසරේ ජනවාරි 12 වන දින මීගමුව ගේට්වේ විද්‍යාලයේදී සිදුවීම සිදු වී ඇත. එම සිදුවීම පිළිබඳව අපයෝජනයට ලක් වූ දරුවන්ගේ මාපියන් විසින් සීදුව පොලිසියට පැමිණිලි කර ඇත. ජනවාරි 23 වන දින පොලිසිය එම සිදුවීම සමථයකට පත්කර ඇති නමුත් ඉන් පසුව පාසල තුළදී එම දරුවන් දිගින් දිගටම කොන්කර ඇති අතර පසු ගිය ජනවාරි 29 වන දින ජාතික ළමා ආරක්ෂණ අධිකාරියට ඒ පිළිබඳව ලද පැමිණිල්ලකින් පසුව පරීක්ෂණය ආරම්භ කර ඇත.x
ඉන්පසුව ජනාධිපති ලේකම් කාර්යාලයෙන් ඉහත කී ඇමතුම ලබා දී ඇත. එහෙත් මරිනි ද ලිවේරා මහත්මිය විසින් එම අණ නොතකා පරීක්ෂණ කටයුතු ඉදිරියට ගෙන ගොස් ඇත. කෙසේ වෙතත් එම පරීක්ෂණ ඉදිරියට කරගෙන යෑමට නොහැකි වී ඇත්තේ පසුගිය අපේ‍්‍රල් 09 වැනිදා මරිනි ද ලිවේරා මහත්මිය කාර්යාලයට ගිය අවස්ථාවේදී ඇය තනතුරෙන් ඉවත් කර ඇතැයි දැනුම් දී තිබීම නිසාය. ජාතික ළමාරක්ෂක අධිකාරියේ සභාපතිවරයා පත්කිරීමේ බලය ඇත්තේ ජනාධිපති ලේකම් කාර්යාලයටය.
එම සිදුවීමෙන් පසුව අදාළ පරීක්ෂණය සඳහා සම්බන්ධ වී සිටි නිලධාරීන් හතර දෙනෙකු මේ වනවිට දිවයිනේ විවිධ ප‍්‍රදේශවලට මාරු කර යවා ඇත.
මේ පිළිබඳව විමසුමකදී ජාතික ළමා ආරක්ෂක අධිකාරියේ හිටපු සභාපතිනි මරිනි ද ලිවේරා මහත්මිය ප‍්‍රකාශ කළේ තමා විසින් පරීක්ෂණ රැුසක් ආරම්භ කර තිබුණු නමුත් තමන් පැය කිහිපයක් තුළ තනතුරෙන් ඉවත් කිරීම නිසා එම පරීක්ෂණ නතර වූ බවයි. තමන්ට තවමත් එම සිදුවීම පිළිබඳව තර්ජන එල්ලවෙන බව ඇය එහිදී ප‍්‍රකාශ කළාය.
මේ සිදුවීම පිළිබඳව විමසීමට ජනාධිපති ලේකම් ඔස්ටින් ප‍්‍රනාන්දු මහතා සම්බන්ධ කර ගැනීමට උත්සහ කළද එය අසාර්ථක විය.x
