රේඛා නිලූ‍ක්ෂි හේරත් / ලසන්ත රුහුණගේ
කෘෂිකර්ම අමාත්‍යාංශයට අයිති මිලියන ගාණක් වටිනා ඉඩමක් ප‍්‍රබල දේශපාලන හස්තයක් විසින් අත්පත් කර ගෙන එහි කුඹුක් සෙවණ නමින් හෝටලයක් පවත්වාගෙන යමින් සිටින බව වාර්තා වෙයි.
කෘෂිකර්ම අමාත්‍යාංශය ක‍්‍රියාත්මක වූ පැරණි ගොඩනැඟිල්ල වන බත්තරමුල්ල රජමල්වත්ත මාවතේ ගොවිජන මන්දිරය නමින් හැඳින්වූ ගොඩනැඟිල්ල ඉදිරිපස ඇති අදාළ ඉඩමෙහි කුඹුක් සෙවණ නමින් කුඩා හෝටලයක් මෙසේ බලහත්කාරයෙන් පවත්වාගෙන යයි.
මීට වසර කිහිපයට පෙර මේ ඉඩමට ව්‍යාජ ලෙස අනුරාධපුර ප‍්‍රදේශයේ දේශපාලන පවුලක් හා සම්බන්ධ ඒ. දිසානායක නමැත්තෙකු විසින් බලහත්කාරයෙන් ඇතුළු වී තිබුණි. පසුව එම ඉඩම සම්බන්ධයෙන් කඩුවෙල මහේස්ත‍්‍රාත් අධිකරණයෙහි නඩුවක් විභාග වී ඇති අතර එය කෘෂිකර්ම අමාත්‍යාංශයට හිමි ඉඩමක් බව එහිදී ඔප්පු විය.
මේ පිළිබඳව විමසුමකදී කෘෂිකර්ම අමාත්‍යාංශයේ ඉහළ නිලධාරියෙකු අනිද්දාට පැවසුවේ, කෘෂිකර්ම අමාත්‍යාංශයට අයත් පැරණි ගොඩනැගිල්ල පාර්ලිමේන්තුවට භාරදී ඇති බැවින් වර්තමාන තත්වය නොදන්නා බවත් කලකට ඉහතදී එක්තරා පුද්ගලයෙකු ව්‍යාජ ඔප්පුවක් සදාගෙන මේ ඉඩමට හිමිකම් කියූ බවත් නඩු මාර්ගයෙන් එය විසඳාගත් බවත් ය.
විශ්වාසදායක ආරංචිමාර්ග හරහා වාර්තාවන ආකාරයට ඉඩමෙහි කිසිදු අවසරයක් නොමැතිව තාවකාලික ගොඩනැගිල්ලක් ඉදි කොට, එහි හෝටලයක් පවත්වාගෙන යන්නේ ප‍්‍රබල දේශපාලන පවුලකට සම්බන්ධ පවුලක් විසිනි.x
