එළැඹෙන ජනපතිවරණයේදී එක්සත් ජාතික පක්ෂයේ හෝ එක්සත් ජාතික පෙරමුණේ අපේක්ෂකයා ලෙස සජිත් පේ‍්‍රමදාස නම් කරන්නේ නම් ඔහු මේ වනවිට ඒ සදහා කැමැත්ත පළකර ඇතැයි අනිද්දා වෙත වාර්තා වේ.
එජාප පක්ෂ ප‍්‍රතිසංස්කරණවලදී ඒ සඳහා පෙරමුණ ගන්නේ නැතැයි සහ එජාපයේ නායකත්වයට පැමිණෙන්නට සජිත් පේ‍්‍රමදාස තුළ උනන්දුවක් නැතැයි යන්න ප‍්‍රකාශ කරමින් සජිත් පේ‍්‍රමදාස මහතාට එජාප පසුපෙළ මන්ත්රී කණ්ඩායම තුළින් චෝදනා පැමිණි අතර එම සංවාදය සමගින් පක්ෂය තුළ ඔහුගේ ජනප‍්‍රියත්වය පහළ වැටුණි. පක්ෂය තුළ ඔහු වටා ගොනුවී සිටි තලතා අතුකෝරල, රංජිත් මද්දුම බණ්ඩාර ප‍්‍රමුඛ මන්ත්රී කණ්ඩායමද මේ නිසා ඔහුගෙන් දුරස්විය. මෙම තත්ත්වය සමග පක්ෂයේ නායකත්වයට පැමිණීමට 2025 තෙක් ඉවසාගෙන සිටීම පසෙකලා දැන් ඔහු ඉදිරියට පැමිණ එළඹෙන ජනාධිපතිවරණයේදී පක්ෂයේ අපේක්ෂකයා වීමට කැමැත්තෙන් සිටින බව ඔහුට සමීප ආරංචි මාර්ග ප‍්‍රකාශ කරයි.
මේ පිළිබඳව අනිද්දා වෙත අදහස් දක්වමින් එජාප ප‍්‍රබලයෙකු පැවසුවේ ගෝඨාභය රැුල්ල යටයෑම සහ මෛත‍්‍රීපාල සිරිසේන මහතාද ඉදිරි ජනපතිවරණයට ඉදිරිපත්වීම ආදි තත්ත්වයන් නිසා එජාපයෙන් සජිත් පේ‍්‍රමදාස මහතා ඉදිරිපත් කරන්නේ නම් ඔහුට පහසුවෙන් ජයගන්නට හැකිවනු ඇති බවය. මේ අතර නවීන් දිසානායකට සමීප පිරිස් ප‍්‍රකාශ කරන්නේ ඔහුට 2025 තෙක් කාලය තිබෙන බවය. අවශ්‍ය නම් සජිත් පේ‍්‍රමදාස ජනපති අපේක්ෂකයා ලෙස නම්කරන අතර නවීන් දිසානායක අගමැති අපේක්ෂකයා කිරීම තුළින් එක්සත් ජාතික පාක්ෂිකයන් අතර මෙන්ම තරුණ ප‍්‍රජාව අතරද විශාල පිබිදීමක් ලබාගන්නට හැකිවනු ඇති බව ඔවුහු පවසති. මේ අතර පසුගිය 12 වැනිදා සිරිකොතදී මාධ්‍ය හමුවක් පවත්වමින් නවීන් දිසානායක මහතා ප‍්‍රකාශ කළේ තම පක්ෂයට දිනන්නට පුළුවන් අපේක්ෂකයෙකු සිටින බවය. එම පුද්ගලයා නිසි වේලාවට ඉදිරිපත් කරන බවද ඔහු කීය.
එජාප ජනාධිපතිවරණ අපේක්ෂකයා පිළිබඳව කරුණු විමසීමේදී එජාපය නියෝජනය කරන අමාත්‍යවරයෙකු ප‍්‍රකාශ කළේ ජනපතිවරණයක් අබියසදී තම පක්ෂයේ ජනප‍්‍රියම නායකයා කවුරුන්දැයි මත විමසීමක් කරන බවය. සුවිශේෂම අවස්ථාවක් නොවන විටදී හැර එම මත විමසීමේ ප‍්‍රතිඵලය මත අපේක්ෂකයා තෝරාගන්නා බව ය. රට තුළ මෙන්ම එජාප පාක්ෂිකයන් අතරද සජිත් පේ‍්‍රමදාස මහතාට ඉහළ ජනප‍්‍රියත්වයක් තිබෙන පසුබිමක එවැනි මත විමසීමක් මත පදනම්ව අපේක්ෂකයා තෝරාගතහොත් සජිත් පේ‍්‍රමදාස මහතා එම අපේක්ෂත්වය දිනාගනු ඇති බවට ඔහු විශ්වාසය පළකළේය.
මේ අතර පසුගිය 04 වැනි දා රත්මලානේ පැවැති උත්සවයකදී අමාත්‍ය සජිත් පේ‍්‍රමදාස ප‍්‍රකාශ කළේ ‘දැන් කතාවක් යවනවා මම තාම ලෑස්ති නැහැ කියලා. මම තමුන්නාස්සෙලාට එකක් කියන්න කැමතියි. මම හැම දේකටම රෙඩි. තව කට්ටියක් කියනවා මම රාජ යෝගය එනකම් ඉන්නවා කියලා. මම කියන්න කැමතියි මට රාජ යෝගය උදාවෙලා තිබුණේ ඉපදුණ දවසේ ඉඳලා කියලා.’ යනුවෙනි. එහිදී ඔහු වැඩිදුරටත් ප‍්‍රකාශ කර තිබුණේ තමන් ඕනෑම අභියෝගයක් ජයගන්නට සූදානම් බවය.
