■ අරුණ ජයවර්ධන
මට්ටක්කුලිය ප්‍රදේශයේ එල්ලේ ක්‍රීඩකයකු පැහැරගෙන ගොස් ඝාතනය කර ඔහුගේ සිරුර ගලක ගැටගසා කැලණි ගඟට විසිකර දැමීමෙන් පසු ගොඩගසා තිබියදී හමුවිය. ඒ ගැන පොලිස් විමර්ශන ඇරඹුණු විට, ඝාතනය පිටුපස සිටින්නේ මට්ටක්කුලිය යුද හමුදා කඳවුරේ බුද්ධි අංශ නිලධාරීන් පිරිසක් බව හෙළිදරව් වී තිබේ.
පසුගිය සති අන්තයක දිවයින පුවත්පත රසවත් ලෙස වාර්තා කර තිබුණ අන්දමට, මේ පුද්ගලයා මැරූ බුද්ධි අංශ හමුදා සෙබළුන්ට, ඔවුන් ආධුනිකයන් නිසා මරණකරුගේ බඩ කපා ගඟට දමන්නට අමතක වී තිබේ. බඩ කපා දැමුවේ නම්, මළසිරුර වතුරේ පාවෙන්නේ නැත. පුද්ගලයා සදාකාලිකවම අතුරුදහන් තත්වයක් ඇති වන අතර, අපරාධකරුවන්ට දඬුවම් නොලබා සිටිය හැක.
මේ බිහිසුණු කතා කියවන විට අපට මතක් වන්නේ, කොළඹ අවටදී තරුණ ශිෂ්‍යයන් 5 දෙනකු ඇතුළු 11 දෙනකු පැහැරගෙන ගොස් ත්‍රිකුණාමලයේ නාවික හමුදා කඳවුරේ ගන්සයිට්හි සිරකර තබාගෙන පසුව මරාදැමූ අපරාධයයි. එහිදීද ඝාතකයන් පාවිච්චි කළ බවට අපරාධ විමර්ශනවලින් හෙළිවුණේ මේ බඩ කපා මුහුදට දැමීමේ ක්‍රමවේදයයි. ඒ නිසා අදටත් ඒ අසරණයන්ගේ මළසිරුරු සොයාගන්නට නැත. අපරාධය කළවුන් ආණ්ඩුවේ හිතවතුන් නිසා, ඔවුන් ගලවාගන්නට ආණ්ඩුවම ඉදිරියට ඇවිත් ජනාධිපති කොමිෂන් සභා පවත්වා විත්තිකරුවන්ගේ නිර්දෝෂීභාවය තහවුරු කළ අතර, එහි ප්‍රධන සැකකරුවකු වූ වසන්ත කරන්නාගොඩ මහතාට එරෙහිව තවදුරටත් නඩු නොකියන බව නීතිපතිවරයා උසාවියටද දන්වා ඇත.
මට්ටක්කුලිය මිනිමැරුමේදී, මරණකරු මත්ද්‍රව්‍ය අලෙවිකරුවකු බවද, ඔහු ‘ඉවත්කිරීම’ සමාජයට යහපතක් බවද කඳවුරේ බුද්ධි අංශය බාර නිලධාරියාට ඒත්තු ගන්වා තිබුණු බවද, සාමාන්‍ය සෙබළුන් අපරාධයට එකතු වුණේ එම ‘යහපත් චේතනාවෙන්’ බවද හෙළිදරව් වි තිබේ.
මත්ද්‍රව්‍ය ජාවාරම්කරුවන් සමාජයෙන් ඉවත් කර සමාජයට යහපතක් කිරීමේ නිල නොවන රාජකාරියක් හමුදාව පවරාගෙන කටයුතු කර ඇති බව ඒ කතාවෙන් පැහැදිලි වෙයි.
ඊටත් වඩා පුදුමය නම්, මේ ඝාතනය සම්බන්ධයෙන් හමුදා බුද්ධි අංශ සාමාජිකවයන් කිහිප දෙනකුම අත්අඩංගුවට ගෙන තිබියදී, ‘හමුදා බුද්ධි අංශ සාමාජිකයන් අත්අඩංගුවට ගැනීමෙන් ඔවුන් අධෛර්යමත් වී පාස්කු ප්‍රහාරය සිදුවුණායැ’යි පහුගිය කාලයේ පැය විසිහතරේම මොරගෑ වියතුන් දැන් නිශ්ශබ්දව සිටින්නේ ඇයිද යන්නයි. ගලගොඩඅත්තේ ඥානසාර භික්‍ෂුව තවත් අන්තවාදී ප්‍රහාරයක් ඕනෑම මොහොතක සිදුවෙතැයි අනතුරු අඟවාද තිබියදී, මේ විදියට හමුදා බුද්ධි අංශ සාමාජිකයන්ට විරුද්ධව කටයුතු කිරීමෙන් ඔවුන් අධෛර්යයට පත්වී, අන්තවාදී ප්‍රහාරයකින් රට ගලවාගන්නට ඉදිරියට නොපැමිණෙන්නට ඉඩ තිබෙනවා නොවේද? එසේ නම්, කොයි මොහොතක හෝ ප්‍රහාරයක් එල්ල වෙතැයි කියන මෙවැනි භයානක අවස්ථාවක මෙසේ කටයුතු කිරීමෙන් මේ ආණ්ඩුවද යහපාලන ආණ්ඩුව හමුදා බුද්ධි අංශවලට කළ ‘මහා විනාශය’ම නැවත කරමින් සිටිනවා නොවේද?
මේවා ඉතාම භයානක නමුත් විහිළු සහගත කතාය.
යහපාලන ආණ්ඩුව කාලයේ යුද නාවික හමුදාවල බුද්ධ අංශ සාමාජිකයන් අත්අඩංගුවට ගත්තේ නඩු පැවරුවේ ඔවුන් යුද්ධය කළ නිසා නොවේ. යුද්ධයට මුවාවී, යුද්ධ භූමි කලාපයෙන් පිටතදී කළ කප්පම් සඳහා පැහැරගැනීම්, අතුරුදහන් කිරීම්, ඝාතන ආදිය සම්බන්ධයෙනි. උදාහරණයක් හැටියට නාවික හමුදාවේ බුද්ධි අංශ සාමාජිකයන් අත්අඩංගුවට ගත්තේ අහිංසක තරුණ ශිෂ්‍යයන් 5දෙනකු ඇතුළු 11 දෙනකු කප්පම් ලබාගැනීම සඳහා පැහැරගෙන ගොස් ඝාතනය කිරීම ගැනය. යුද හමුදා බුද්ධි අංශ සාමාජිකයන් අත්අඩංගුවට ගත්තේ. ලසන්ත වික්‍රමතුංග ඝාතනය, ප්‍රගීත් එක්නැලිගොඩ පැහැරගෙන ගොස් අතුරුදහන් කිරීම, උපාලි තෙන්නකෝන් පැහැරගෙන යන්නට තැත් කිරීම, කිත් නොයාර් පැහැරගෙන ගොස් හිංසා කිරීම වැනි අපරාධයන් ගැනය. ඒ කාලයේ විපක්‍ෂයේ සිට අද ආණ්ඩුවේ තනතුරු හොබවන ජාතික චින්තන හා එසේ නොවන වියතුන් උගතුන් මේවා පෙන්වූයේ, හමුදා බුද්ධි අංශ අඩපණ කිරීමට යහපාලන ආණ්ඩුව සංවිධානාත්මකව කළ දේවල් හැටියටය. 2019 පාස්කු ඉරිදා ත්‍රස්ත ප්‍රහාරය සිදුවුණේ එලෙස හමුදා බුද්ධි අංශ අඩපණ කිරීම නිසා බවය. මේ අමූලික බොරුවලින් මුළු සමාජයම රෝගි කළ අතර, එහි ප්‍රතිඵලයක් ලෙස 69 ලක්‍ෂයක් ඓතිහාසික වැරදි තීරණයක් ගත්හ. අද මුළු රටම විඳවන්නේ ඒ ලක්‍ෂ 69හි අමනොඥ තීරණයේ පසුවිපාකය.
මට්ටක්කුලියේදී පුද්ගලයකු මරා දැමීම ගැන බුද්ධි අංශ සාමාජිකයන් අත්අඩංගුවට ගැනීමෙන් යුද හමුදාවේ හෝ වෙනත් හමුදාවක, පොලිසියේ බුද්ධි අංශ අධෛර්යමත් වන බව අද කිසිම කෙනෙක් විශ්වාස කරන්නේ නැත. ආණ්ඩුවේ බුද්ධිමතුන් කවුරුත් අද එහෙම කියන්නේත් නැත. හැම කෙනකුම කියනු ඇත්තේ, බුද්ධි අංශ සාමාජිකයන් නෙවෙයි මොකා වුණත්, කළ අපරාධයට නීතියෙන් විපාක විඳිය යුතුය කියාය.
එහෙම නම්, යහපාලන ආණ්ඩුව කාලයේ අපරාධ විමර්ශන බුද්ධි අංශ අඩපණ කිරීමක් හැටියට පෙන්නුවේ ඇයි? උත්තරය පැහැදිලිය. රටේ ආරක්‍ෂාව නැතිකළායැයි යහපාලන ආණ්ඩුවට අසත්‍ය චෝදනා ආරෝපණය කර බලය ඩැහැගැනීමටය. ඒ සඳහා බුද්ධිමතුන් සියලු දෙනාගේ සහභාගිත්වයෙන් ‘මානසික මෙහෙයුමක්’ (ඡිහ-දච) සැලසුම්සහගතව පවත්වාගෙන යන ලදි. අද වන තුරුත් පාස්කු මහමොළකරුවන් හමුනොවීමේ හේතුවක්ද එය විය හැකිය.
දැන් මේ සිදුවන දේ එක පැත්තකින් යහපත් වන්නේ පරණ බොරු තේරුම් ගැනීමට ඒවා උදව් වන නිසාය.■
