ජනපති සිරිසේන උම්මත්තකයෙකු සේ හැසිරෙමින් ජේආර් ජයවර්ධන ජනාධිපතිවරයා නිර්මාණය කළ විධායක ජනාධිපති ධුරය ගල්‍රෝලක් බවට පෙරළා ඇත. දැන් ඒ ගල්රෝල ව්‍යවස්ථාදායකයද අධිකරණයද පොඩිපට්ටම් කරමින් ඉදිරියට ඇදෙමින් තිබෙන්නේය. මේ ගෙවෙන දවස් කියන්නේ ළඟ ළඟම එන ලේ වැකි අඳුරු කාලයක් පිළිබඳ ආරංචියයි. කොළඹ හැම තැනමද පරිධියේ ගම්නගර කරාද උද්ඝෝෂණයේ රාව පැතිරෙමින් තිබෙන්නේ ය. ප්රජාතන්ත්රවාදය සුරක්ෂා කරගැනීම සඳහා පුරවැසියෝ ද ඒකාධිපතිවාදය සුරක්ෂා කරගැනීම සඳහා මැරවරයෝ ද දැන් සිටින්නෝ සටනේය. තත්ත්වය එන්න එන්නම බරපතළ වෙමින් මේ කොදෙව්ව ලෝකයෙන් හුදකලා වෙමින් තිබෙන්නේ ය. මේ තත්ත්වය තුළ කොළඹ කේන්ද්‍රීයව පසුගිය දින කිහිපයේ පැවති තත්ත්වයන් පිළිබඳ වාර්තාකරණයකි මේ.
විසිරවීමට විරුද්ධව වාරණයක්
ජනාධිපති සිරිසේන ව්‍යවස්ථා විරෝධි ලෙස රනිල් වික‍්‍රමසිංහ අග‍්‍රාමාත්‍ය ධුරයෙන් පලවා හැරීම සහ නීති විරෝධිව මහින්ද රාජපක්ෂ අගමැති ලෙස පත්කිරීම හරහා රට තුළ විශාල අර්බුදයක් හටගත් අතර එහිම දිගුවක් ලෙස පසුගිය 8 වෙනිදා ජනාධිපති සිරිසේන විසින් පාර්ලිමේන්තුව විසුරවා හරිනු ලැබුවේ ය. එම ක‍්‍රියාව නීතියට පටහැනි බවද ඒ නිසා එම ගැසට් නිවේදනය බල රහිත කරන්න යැයිද ඉල්ලා මූලික අයිතිවාසිකම් පෙත්සම් 13ක් ශ්‍රේෂ්ඨාධිකරණයට විවිධ පක්ෂ සිවිල් සංවිධාන සහ මැතිවරණ කොමිසමේ සාමාජිකයකු විසින් ඉදිරිපත් කරනු ලැබිණි. ඒ පසුගි ය 12 වැනි සදුදා දිනයේදීය. ඒ අනුව අගවිනිසුරු නලීන් පෙරේරා, ප‍්‍රියන්ත ජයවර්ධන සහ ප‍්‍රසන්න ජයවර්ධන යන ත‍්‍රිපුද්ගල විනිසුරු මඬුල්ලක් හමුවේ එදිනම මෙම පෙත්සම් විභාගයට ගනු ලැබූ අතර පසුදා එනම් 13 වැනි දින සවස 6ට පමණ තීන්දුව ප‍්‍රකාශයට පත්කරමින් අධිකරණය ප‍්‍රකාශ කළේ ජනාධිපතිවරයාගේ අදාළ ගැසට් පත‍්‍රය අත්හිටුවන බවය. මැතිවරණයක් පැවැත්වීම වළකාලමින් වාරණ නියෝගයක් ලබාදුන් ශ්‍රේෂ්ඨාධිකරණය ප‍්‍රකාශ කළේ මෙම පෙත්සම් පිළිබඳ වැඩිදුර විභාගය එලැඹෙන දෙසැම්බර් 4,5,6 යන දිනයන්හිදී පැවැත්වෙන බවය. ව්‍යවස්ථාව කඩාබිඳ දැමීමේ ජනාධිපති සිරිසේනගේ ක‍්‍රියාදාමය ආණ්ඩුක‍්‍රම ව්‍යවස්ථා ඉතිහාසයේ පූර්වාදර්ශයක් වීමට තිබුණු හැකියාව අධිකරණයේ මෙම වාරණ නියෝගය සමග වැළකී ගිය අතර ජනාධිපති සිරිසේනට සිය අඩිය පිටුපසට ගන්නට විය. මෙහිදී සිදුවූ එක් සුවිශේෂ සිද්ධියක් වන්නේ ජනාධිපතිවරයා මෙලෙස මැතිවරණයක් කැඳවීම නීතිවිරෝධි බව මැතිවරණ කොමිසමේ සාමාජිකයෙකු වන ආර් රත්නජීවන් හූල් සිය පෙත්සම මඟින් කියා සිටිමය. රත්නජීවන්ගේ ක‍්‍රියාව අගය කළ යුතුය.
පාර්ලිමේන්තුව රැස්වෙයි
අධිකරණය පාර්ලිමේන්තුව විසුරවීමේ ගැසට්ටුව අත්හිටවීම තුළ ඊට ප‍්‍රථමව පාර්ලිමේන්තුව කැඳවීමට ජනාධිපතිවරයා නිකුත්කරනු ලැබූ ගැසට් පත‍්‍රය බලාත්මක විය. ඒ අනුව කථානායක කරූ ජයසූරිය එම ගැසට් පත‍්‍රයේ නියෝග ක‍්‍රියාත්මක කරමින් ඊට අනුව යමින් පසුගිය 14 වැනිදා පෙරවරු 10ට පාර්ලිමේන්තුව කැඳවනු ලැබීය. මෙහිදී නීති විරෝධි අගමැති පාර්ලිමේන්තුව තුළ පිළිගනිමින් කථානායකවරයා විසින් ඔහුට අගමැති අසුනද ඔහුගේ කණ්ඩායමට පාර්ලිමේන්තුවේ ආණ්ඩු පක්ෂයට වෙන්වූ දිසාවේ අසුන්ද ලබා දී තිබුණි.
මෙම නව පාර්ලිමේන්තු සැසිය සඳහා කළුපටි පැළඳ සභා ගර්භයට පැමිණි එජාපයේ පාර්ලිමේන්තු කණ්ඩායම ජනතා විමුක්ති පෙරමුණ, ද්‍රවිඩ සන්ධානය සමග විපක්ෂයේ අසුන් ගත් අතර සැසිය ආරම්භ කරමින් පාර්ලිමේන්තුවේ මහලේකම්වරයා ජනාධිපතිවරයාගේ ප‍්‍රකාශය කියවනු ලැබීය. නව සැසිවාරයක් ආරම්භ කිරීමේදී සාමාන්‍යයෙන් ජනාධිපති අදාළ අවස්ථාවට සහභාගී වියයුතු වුවත් මෙහිදී ඔහු නොපැමිණීම කාගේත් කතාබහට ලක්වූ කාරණාවක් විය. පාර්ලිමේන්තු මහලේකම්වරයාගේ කතාවෙන් පසුව පාර්ලිමේන්තුවේ නීති විරෝධී සභානායක දිනේෂ් ගුණවර්ධන සභාව ආමන්ත‍්‍රණය කළ අතර ඔහු එහිදී පැවසුවේ පාර්ලිමේන්තුවේ ස්ථාවර නියෝගවලට අනුව ජනාධිපතිවරයාගේ කතාවෙන් පසුව පාර්ලිමේන්තුව කල් තැබිය යුතු බවය. ඒ සමග විපක්ෂයේ මන්ත්රීවරුන් එයට විරෝධය දැක්වූ අතර ද්‍රවිඩ සන්ධානයේ සුමන්තිරන් මන්ත‍්‍රීවරයා පාර්ලිමේන්තුවට යෝජනා කළේ ස්ථාවර නියෝග අත්හිටුවන ලෙසය. එයට ඊනියා ආණ්ඩු පක්ෂය විරෝධය දැක්වූ අතර පසුව එම යෝජනාව බහුතර ඡන්දයෙන් සම්මත විය. ඉන්පසුව මහින්ද රාජපක්ෂට විරුද්ධව විශ්වාසභංග යෝජනාවක් ජනතා විමුක්ති පෙරමුණ විසින් ඉදිරිපත් කළ අතර අනතුරුව එයද බහුතරයේ ඡන්දයෙන් සම්මත විය. මෙහිදී මහින්ද රාජපක්ෂගේ ඊනියා ආණ්ඩුවට බහුතරයේ විශ්වාසය අහිමි බව ප‍්‍රකාශ විය. ඒ අනුව මන්ත්රීවරුන් 122 ක් විශ්වාසභංගයට පක්ෂව ඡුන්දය ලබාදී ඇත. පසුව ඔවුන්ගේ අත්සන් ලේඛනයක්ද කථානායකවරයා වෙත ලබා දී ඇත. ඉන්පසුව කථානායකවරයා විසින් පාර්ලිමේන්තුව 15 වෙනිදා උදෑසන 10 තෙක් කල් තබන ලදි. මෙහිදී පාර්ලිමේන්තු මන්තී‍්‍ර වඩිවෙල් සුරේෂ් සහ වසන්ත සේනානායක නැවත රනිල් පාර්ශ්වයට එකතු වූ අතර ඒ.එච්.එම් ෆවුසි සහ පියසේන ගමගේ යන එක්සත් ජනතා නිදහස් සන්ධානයේ මන්තී‍්‍රවරු දෙදෙනාද රනිල් වික‍්‍රමසිංහ මහතාට සහයෝග පළ කරමින් එම පාර්ශ්වයට එකතුවූහ.
කතානායකවරයා පාර්ලිමේන්තුවේ බහුතර මන්ත්රී තීන්දුව පිළිබඳව දැනුවත් කරමින් අදාළ මන්ත‍්‍රීවරුන්ගේ අත්සන් 122ක ලේඛනයක් සමග පසුගිය 14 වැනි දින සවස ජනාධිපතිවරයාට ලිපියක් යොමුකරන්නේය. එම ලිිපියට නොයෙකුත් සාධාරණ නොවන හේතුන් දක්වමින් ජනාධිපති සිරිසේන එදිනම, එනම් 14වැනි දින රාත‍්‍රියේම කථානායකවරයා වෙත පිළිතුරු ලිපියක් යොමුකර ඇත. එම ලිපියට අනුව පාර්ලිමේන්තුවේ තීරණය ජනාධිපතිවරයා විසින් ඉවත දමා ඇත. ඒ අනුව විධායකය විසින් ව්‍යවස්ථදායකය පාගා යටකර දමා ඇත.
මෙම තත්ත්වය තුළ 15 දා පාර්ලිමේන්තුව නැවත රැුස්වෙන අතර ඊනියා අගමැතිවරයා විශේෂ ප‍්‍රකාශයක් කරමින් ජනමතයට හිස නමා ඡන්දයක් පැවැත්වීමට යෝජනා කරන්නේය. එහිදී ලක්ෂ්මන් කිරිඇල්ල අමාත්‍යවරයා එම යෝජනාවට ඡන්ද විමසීමක් ඉල්ලා සිටින අතර එයින් පසුව පාර්ලිමේන්තුව එකම ගාලගෝට්ටියක් වෙන්නේය. මෙහිදී ඊනියා ආණ්ඩුවේ මන්ත‍්‍රීවරුන්ගේ ප‍්‍රහාරයන් හි ඉලක්කය බවට කතානායක කරූ ජයසුරිය පත්වන්නේය. ඉන්පසුව මන්තී‍්‍රවරුන් ගුටුබැට හෝවමාරුවක නිරතවෙන අතර එහිදී පාර්ලිමේන්තුව නැවත කල් තැබෙන්නේය.
මේ අනුව ලංකා රාජ්‍යය දැන් අරාජික වී ඇත. නිසි ලෙස ක‍්‍රියාත්මක පාර්ලිමේන්තුවක් තවදුරටත් දැන් නොපවතින්නේය. ඒකාධිපති වියරුවක් පමණක් ඉතිරිවී ඇත. මෙම තත්ත්වය තුළ ලංකාවේ ඉදිරි අනාගතය අවිනිශ්චිතය.
