සුළුතර ජනවර්ග පීඩාවට පත්කරන ස්වෝත්තමවාදී අදහස් යනු ලංකාව පමණක් මුහුණදෙන ප‍්‍රශ්නයක් නොවෙයි. මේ වෙද්දී ඇමෙරිකාව, ඉන්දියාව වැනි රටවල්වලට පවා ස්වෝත්තමවාදී අදහස් පැතිරයෑම බරපතළ ප‍්‍රශ්නයක්ව තිබෙනවා. දේශපාලන නායකයන්ගේ පැහැදිලි ආශීර්වාදයෙන් ඒ රටවල ස්වෝත්තමවාදී අදහස් සාමාන්‍යකරණය වෙමින් පැතිර යනවා. අද බි‍්‍රතාන්‍යයද මුහුණදෙන ප‍්‍රධාන දේශපාලන අභියෝගයක් වන්නේ ස්වෝත්තමවාදී අදහස් පැතිර යෑමයි.
බි‍්‍රතාන්‍ය රජයට බ්‍රෙක්සිට් ප‍්‍රශ්නය අවසාන කරගැනීමට නොහැකි වී තිබෙන්නේද ස්වෝත්තමවාදී අදහස් පැතිරයන නිසායි. ගෙවුණු සතියේදී බි‍්‍රතාන්‍යයෙහි ස්වෝත්තමවාදී අදහස් පැතිරගොස් ඇති අන්දම පැහැදිලි කරන දත්ත එකතුවක් ප‍්‍රසිද්ධ කර තිබුණේ ‘ඔපීනියුම්’ නම් ආයතනයෙනුයි.
බ්‍රෙක්සිට් අර්බුදය දේශපාලනයට පැමිණීමෙන් පසුව බි‍්‍රතාන්‍යයේ සුළුතර ජනවර්ගවලට අයත් පුද්ගලයන් අතරින් 71%ක් ජාතිවාදී පීඩාවලට මුහුණදෙන බව ඔපීනියුම් ආයතනය කර ඇති සමීක්ෂණයකින් පෙන්වාදෙනවා. එහිදී සුළුතර ජනවර්ගවලට අයත් පුද්ගලයන් සමීක්ෂණයට ලක් කළා. 2016ට පෙර ජාතිවාදී පීඩාවන් පිළිබඳව සුළුතර කණ්ඩායම්වලින් ලබාගත් දත්ත හා 2019 පෙබරවාරි මාසයේදී ලබාගත් වත්මන් දත්ත සංසන්දනය කර තිබෙනවා.
2016දී බ්‍රෙක්සිට් පිළිබඳ ජනමත විචාරණය පැවැත්වීමෙන් පසුව, වැඩිවැඩියෙන් ජාතිවාදී පීඩාවන්ට බි‍්‍රතාන්‍යයේ සුළුතර ජනකොටස් මුහුණදී තිබෙන බව සමීක්ෂණයෙන් පවසනවා. සමීක්ෂණය පැති රැුසකින් ජාතිවාදී පීඩාවන් ගැන සොයාබලා තිබුණා. ආයතන තුළ අපහසුතාවට පත්කිරිම, පළිගැනීම, උසස්වීම් ලබා නොදීම, වාග් ප‍්‍රහාරයන්ට ලක් කිරීම, වැරදි තොරතුරු ප‍්‍රචාරය කිරීම ආදි ක‍්‍රියාවන්ට මුහුණදීමට සිදුවීම මෙන්ම ශාරීරික හිංසනයට මුහුණදීමද ජාතිවාදී පීඩාවන් අතර තිබෙනවා.
බ්‍රෙක්සිට් ඡුන්ද විමසීමට පෙර සුළුතර ජනවර්ගවල පුද්ගලයන්ගෙන් 58%ක් පමණ පීඩාවන්ට මුහුණදී තිබුණා. ඒ සංඛ්‍යාවද බරපතළ තත්වයක්. හිරු නොබසින අධිරාජ්‍යය යැයි කලෙක තමන්ව හඳුන්වාගත් බි‍්‍රතාන්‍යයේ වැසියන්, සුළුතර ජනවර්ගවලට පීඩාකාරී ලෙස හැසිරීම පුදුමයක් විය නොහැකියි. කාලය ඉදිරියට ගමන් කරද්දී මේ තත්වය ක‍්‍රමයෙන් යහපත් අතට හැරෙනු ඇතැයි ඕනෑම කෙනෙකුගේ බලාපොරොත්තුව වෙන්නට ඇති, ශිෂ්ටාචාරය ඉදිරියට යන නිසා. එහෙත් බ්‍රෙක්සිට් ආගමනයෙන් පසුව ජාතිකවාදය, දේශපේ‍්‍රමය, ජාතිකාභිමානය බි‍්‍රතාන්‍යය දේශපාලන සංවාදවල ඉදිරියට ගෙනැවිත් තිබුණා. ලංකාවේ ජාතිකාභිමානය සිංහලයන්ට පමණක් සීමා වූ දෙයක් ලෙස වර්ධනය වී ඇතිවා මෙන්ම බි‍්‍රතාන්‍යයේ ජාතිකාභිමානය සුදු ජාතික බි‍්‍රතාන්‍යයන්ට පමණක් සීමා වූ අදහසක් ලෙස වර්ධනය වී තිබුණා. ඒ නිසාම විදේශ රටවලින් එරටට ගිය සුළුතර ජනකොටස්වලට සුදු ජාතික බි‍්‍රතාන්‍යයන්ගේ පීඩාවන්ට මුහුණදෙන්නට සිදුවී තිබුණා.
සමාජ මාධ්‍යවලද ජාතිවාදය සාමාන්‍යකරණය වී තිබෙනවා. සමාජ මාධ්‍යවල ජාතිවාදය දෙගුණයකටත් වඩා වර්ධනය වී තිබෙනවා. පෙර කී සමීක්ෂණය අනුව 2016 දී 37%ක්ව තිබුණු සමාජ මාධ්‍යවල ජාතිවාදී අදහස් දැක්වීම් 50% දක්වා වර්ධනය වී තිබෙනවා. එයිනුදු වැඩිපුරම ජාතිවාදී අදහස් පළකරන්නේ වයස අවුරුදු 18-34 අතර තරුණ පරම්පරාව බව හඳුනාගෙන තිබෙනවා.
සමීක්ෂණයේදී තවත් තත්වයන් කිහිපයක් ගැන අවධානය යොමුකර තිබුණා. හාස්‍යමය වැඩසටහන්වලදී හාස්‍යය මතුකිරීම පිණිස ජාතිවාදී අදහස් පළකිරිම 2016දී 30%-40%ක් අතර තිබුණත්, අද 50% ඉක්මවා තිබෙනවා. සංක‍්‍රමණිකයන් පිළිබඳ වෛරී අදහස් පළකිරීම 30%ට අඩු මට්ටමේ තිබී 50% ඉක්මවන තත්වයට වර්ධනය වී තිබෙනවා. මාධ්‍යවල ජාතිවාදී අදහස් පළකිරීම 25% පමණ සිට 40% දක්වා වර්ධනය වී තිබෙනවා.
ආසියාවෙන් සංක‍්‍රමණය වූ සුළුතර කොටස් හා කළු ජාතිකයන් ලෙස පීඩාවට පත්වෙන පුද්ගලයන්ද හඳුනාගෙන තිබුණා. ඒ අනුව කළු ජාතිකයන් ඉහළම මට්ටමේ පීඩාවට මුහුණදෙන සුළුතර ජනවර්ගය ලෙස හඳුනාගෙන තිබුණා. 2016 දී කළු ජාතිකයන් පීඩාවට පත්ව තිබුණේ 59%ක් පමණයි. එය අද 74%ක් දක්වා වර්ධනය වී තිබෙනවා. ඔවුන් අතරිනුත් සුළුතර කාන්තාවන් මුහුණදෙන පීඩාව ඉහළටම වර්ධනය වී තිබෙනවා. බි‍්‍රතාන්‍යයේ සුළුතර ජනවර්ගවලට අයත් පුද්ගලයන් 10 දෙනෙකුගෙන් 7 දෙනෙකුම ජාතිවාදී අදහස් බි‍්‍රතාන්‍යයෙහි බරපතළ ලෙස පැතිරගොස් ඇතැයි විශ්වාස කරන බවත් සමීක්ෂකයන් පෙන්වනවා.
මේ සමීක්ෂණය පිළිබඳව ගාර්ඩියන් වෙබ් අඩවියේ පළවූ ලිපියකින් පෙන්වාදෙන්නේ ජාතිය පදනම් කරගත් අපරාධ ප‍්‍රමාණයත් වැඩිව ඇති බවයි. 2018දී එංගලන්තයේ හා වේල්සයේ ජාතිය පදනම් කරගත් සිදුවීම් 71,251ක් වාර්තා වී ඇතැයි කියනවා. එය 2013 වර්ෂයේ තිබුණු තත්ත්වය දෙගුණ වීමක්.
ප‍්‍රසිද්ධ පුද්ගලයන් ජාතිවාදී අදහස් පළකිරීමේ සිදුවීම්ද වර්ධනය වී ඇති බව මාධ්‍ය පවසනවා. බීබීසීයේ සේවය කළ ඩැනී බේකර්ද, මේගන් මර්කෙල් හා හැරී කුමරුට දරුවෙකු හිමිවීමෙන් පසුව කුඩා චිම්පන්සියෙකු සමඟ සිටින යුවළකගේ ඡුායාරූපයක් මාධ්‍යවල පළ කර තිබුණේ මේගන් මර්කෙල්ගේ සම්භවය ගැන සිය ජාතිවාදී අදහස් ප‍්‍රකට කරමින්. ඉන්පසුව බීබීසීය ඩැනී බේකර් සේවයෙන් නෙරපුවා. සමාජ මාධ්‍යවල මෙවැනි අන්තවාදී අදහස් එළිපිට පළකිරීමේ සිදුවීම් දිගටම වර්ධනය වී තිබුණා. බි‍්‍රතාන්‍යයේ සුළු ජාතික පාපන්දු ක‍්‍රීඩකයන්ටද පාපන්දු පිටියේ මෙන්ම සමාජ මාධ්‍යවලද ජාතිවාදී අදහස්වලට මුහුණදෙන්නට සිදුවූ බව වාර්තා කර තිබුණා.
මේ අතර බි‍්‍රතාන්‍යයේ ඉස්ලාමෝෆෝබියාව හෙවත් ඉස්ලාම් ජාතිකයන් කෙරෙහි ඇති කරගන්නා අනිසි බිය වර්ධනය වී ඇති බවද චෝදනා එල්ලවෙනවා. දක්ෂිණාංශික පක්ෂයක් වන යුකිප් පක්ෂයත්, කන්සර්වේටිව් පක්ෂයත් ඉස්ලාම් විරෝධී අදහස් පතුරවද්දී ලේබර් පක්ෂයේ කන්සර්වේටිව් අදහස් දරන මන්ත‍්‍රීවරුන්ටද ඉස්ලාමෝෆෝබියාව පිළිබඳ චෝදනා එල්ලවෙනවා.
මේ දිනවල යුරෝපා පාර්ලිමේන්තුව සඳහා මැතිවරණය පැවැත්වෙනවා. බි‍්‍රතාන්‍යය තවමත් යුරෝපා සංගමයෙන් ඉවත්ව නැති නිසා බි‍්‍රතාන්‍යයේද එම මැතිවරණය පැවැත්වෙනවා. එයට ඉදිරිපත්ව සිටින අපේක්ෂකයන් වන යුකිප් පක්ෂයේ කාල් බෙන්ජමින්, ස්වාධීන අපේක්ෂකයෙකු වන ටොමී රොබින්සන් වැනි අය අන්ත ජාතිවාදී අදහස් දැක්වීම ගැන ප‍්‍රසිද්ධියට පත්ව සිටිනවා. ඒ නිසාම ක‍්‍රමයෙන් ජාතිවාදී අදහස් ඇති අය ඉදිරියට පැමිණ ඒ අදහස් ප‍්‍රසිද්ධියේ නිර්භයව ප‍්‍රකාශ කරන්නට පටන්ගෙන තිබෙනවා.
බි‍්‍රතාන්‍යයේ ලේබර් පක්ෂයේ සාමාජිකයෙකු වන, ජාතිවාදයට එරෙහිව අදහස් දක්වන දේශපාලනඥයන් අතර ප‍්‍රමුඛයෙකු වන ඬේවිඞ් ලැමී පවසන්නේ, මේ සමීක්ෂණයේ සොයාගැනීම් දෙසට දැඩිව අවධානය යොමු කළ යුතු බවයි. එමෙන්ම ‘රනිමෙඬේ පදනම’ නම් චින්තකයන්ගේ එකතුවෙහි ප‍්‍රධාන විධායක ඕමාර් ඛාන් පෙන්වාදෙන්නේ බ්‍රෙක්සිට් යනු ජාතිවාදයේ මූලාශ‍්‍රය නොවුණත්, එය ජාතිවාදී අදහස් පිටකිරීමේ සිදුවීම් වර්ධනය කරන්නට හේතුවක් වී තිබෙන බවයි. ඇත්තෙන්ම බ්‍රෙක්සිට් කරළියට එන්නට පෙර සිටම බි‍්‍රතාන්‍යයෙහි සුළුතරය පීඩාවට පත්කරන ජාතිවාදී අදහස් තිබුණු බව ඔහු පෙන්වනවා. එහෙත් ඒ තත්වය යහපත් අතට හැරෙන්නට නොදී, තවත් දරුණු තත්වයකට වර්ධනය කරන්නට බ්‍රෙක්සිට් හේතුවූ බව ඔහු පෙන්වනවා.
ශිෂ්ටාචාරය යා යුත්තේ ඉදිරියට වුණත්, මේ ප‍්‍රවණතාවලින් පෙනෙන්නේ ලෝකයේම ජනවාර්ගික පීඩනය නොසිතූ ලෙස වර්ධනය වී ඇති බවයි. එනම් ශිෂ්ටාචාරය පසුපසට යමින්, එකිනෙකා අතර සැකය, බිය හා ගැටුම් ඇතිවීමේ පසුබිමක් නිර්මාණය වී තිබෙන බවයි. නවසීලන්තයේ අගමැතිනිය ජෙසින්ඩා ආර්ඩෙන් වැනි සුළුතරයක් හැර ලෝකයේ බොහෝ දේශපාලන නායකයන් ඉන්නේ මේ ප‍්‍රවණතාවන් පරාජය කිරීමේ සැබෑ වුවමනාවක් වෙනුවට ඒ ප‍්‍රවණතා වර්ධනය කොට දේශපාලන වාසි ලබාගැනීමේ පටු අරමුණකයි. බි‍්‍රතාන්‍යයේ මීළඟ නායකත්වයටත් යෝජනා වෙන ප‍්‍රසිද්ධ නායකයෙකු වන බොරිස් ජොන්සන්, වත්මන් ඇමෙරිකානු ජනාධිපති ඩොනල්ඞ් ට‍්‍රම්ප් ආදින් ස්වෝත්තමවාදී අදහස්වල ප‍්‍රමුඛ ප‍්‍රකාශකයන් බවට පත්ව සිටිනවා. x
x අනුරංග ජයසිංහ
