සී.වී. විග්නේෂ්වරන් නිර්මාණය කර ඇති නව පක්ෂය සමඟ ගජේන්ද්‍ර කුමාර් පොන්නම්බලම් නායකත්වය දරන සමස්ත ලංකා දෙමළ කොංග‍්‍රසය සන්ධානගත නොවනු ඇතැයි සමස්ත ලංකා දෙමළ කොංග‍්‍රසයේ ආරංචි මාර්ග පවසයි.
සී.වී. විග්නේෂ්වරන්ගේ නව පක්ෂය සමඟ සුරේෂ් පේ‍්‍රමචන්ද්‍රන් නායකත්වය දරන ඊපීආර්එල්එෆ් පක්ෂය එක්ව සිටීම නිසා ගජේන්ද්‍ර කුමාර් පොන්නම්බලම්ගේ පක්ෂය එයට එකතු නොවීමට තීරණය කර ඇත. ඊ.පී.ආර්.එල්.එෆ්. පක්ෂය පළාත් පාලන මැතිවරණයේදී ආනන්ද සංගරී මහතා නායකත්වය දරන ද්‍රවිඩ එක්සත් විමුක්ති පෙරමුණ සමග සන්ධානගත වීමත්, මැතිවරණයෙන් පසුව ඒකාබද්ධ විපක්ෂය ඇතුළු විවිධ පක්ෂ සමඟ පළාත් පාලන ආයතනවල බලය පිහිටුවීම සඳහා සන්ධානගත වීමත් නිසා ඊපීආර්එල්එෆ් සමඟ එක්විය නොහැකි බව ගජේන්ද්‍රකුමාර පොන්නම්බලම් පෙන්වා දී ඇත. දෙමළ ජාතික සන්ධානය ආණ්ඩුව සමඟ සන්ධානගත වීම පිළිබඳව විරෝධය පළකරමින් රාජපක්ෂලාට හිතවත් කණ්ඩායම් සමඟ සන්ධානත වීම කළ නොහැක්කක් බව ඔහු එයට හේතුව ලෙස දක්වා ඇත.
පසුගිය පළාත් පාලන මැතිවරණයේදී ගජේන්ද්‍ර කුමාර් පොන්නම්බලම්ගේ සමස්ත ලංකා දෙමළ කොංග‍්‍රසය යාපනය දිස්ත‍්‍රික්කයේ මැතිවරණ ප‍්‍රතිඵල හරහා දෙමළ ජාතික සන්ධානයට අභියෝගයක් එල්ලකර තිබුණු අතර පළාත් පාලන ආයතන කිහිපයක වැඩි බලයක් ලබාගැනීමටද සමත් විය.
