තමා මාධ්‍ය වෙත කරන ප‍‍්‍රකාශ හිතාමතාම විකෘති කරමින් ඇතැම් මාධ්‍ය රට තුළ දේශපාලන ආරවුල් ඇතිකිරීමේ උත්සාහයක නිරතව සිටින බව දූෂණ විරෝධී බලකායේ නාමල් කුමාර පවසයි.
ඔහු මේ බව පවසන්නේ ගෝඨාභය රාජපක්‍ෂ හා මෛතී‍්‍රපාල සිරිසේන ජනාධිපතිවරයා ඝාතනයට අමාත්‍ය සරත් ෆොන්සේකා සම්බන්ධ බවට තමා අපරාධ පරීක්‍ෂණ දෙපාර්තමේන්තුවට පවසා ඇතැයි යනුවෙන් පළවන මාධ්‍ය වාර්තා ගැන ‘අනිද්දා’ පුවත්පත කළ විමසීමකට පිළිතුරු වශයෙනි.
‘මම කිසිම අවස්ථාවක සී.අයි.ඞීයට එහෙම ප‍‍්‍රකාශයක් දීලා නැහැ. මම දුන්න ප‍‍්‍රකාශවල තියෙන්නේ සරත් ෆොන්සේකා ඇමතිතුමා, නියෝජ්‍ය පොලිස්පති නාලක සිල්වා සමග සම්බන්ධතා පැවැත්වූ බවයි. ඉන් එහාට මම සී.අයි.ඞීයට කිව්වා කියන දේවල් බොරු. මම මොකටද සී.අයි.ඞීයට කියපු නැති දේවල් මාධ්‍යයට කියන්නේ.’ වැඩිදුරටත් ඔහු පැවසීය.
ධම්මික ප්‍රියර්ශන
