තමන්ව පීසීආර් පරීක්ෂණයට ලක් කරන ලෙස ඉහළ නිලධාරීන්ගෙන් කරන ලද ඉල්ලීමක් ඉටු නොකළ බවත් තමන්ට කොවිඞ්-19 රෝගය ඇතිදැයි සැකයක් ඇති බවත්, එබැවින් සේවයෙන් ඉවත්ව දින 14ක ස්වයං නිරෝධායනයට යොමුවන බවත් ප‍්‍රකාශ කළ කොළඹ සෞඛ්‍ය වෛද්‍ය නිලධාරියාව සහ මහජන සෞඛ්‍ය පරීක්ෂකවරුන්ව නැවත බලහත්කාරයෙන් සේවයට කැඳවා ඇති බව වාර්තා වේ.
අදාල නිලධාරීන් සිදු කරන්නේ කඩා කප්පල්කාරි ක‍්‍රියාවක් බව පවසමින් ඔවුන්ට යලි සේවයට වාර්තා කරන ලෙස නියෝගයක් ලැබී ඇත.
අනිද්දා සමඟ අදහස් දැක්වූ නිලධාරීන් කිහිපදෙනෙකු ප‍්‍රකාශ කළේ තමන් හෝ වෙනත් නිලධාරියෙකුට කොවිඞ්-19 ආසාදනය වී තිබුණහොත්, සාමාන්‍ය පුරවැසියන්ට රෝගය පැතිරීමේ අවදානමක් ඇති බවය.
අපේ‍්‍රල් 30 වන දින ස්වයං නිරෝධායනය වෙමින් සිටි මහජන සෞඛ්‍ය පරීක්ෂකවරුන් 08 දෙනෙකු සේවයට වාර්තා කර ඇති අතර අනෙක් නිලධාරින්ද ඉදිරි දිනවලදී තමන් කළ යුත්තේ කුමක්දැයි තීරණයක් ගන්නා බව කොළඔ නගර සභාවේ සෞඛ්‍ය අංශ දැනුවත් කර ඇති බව වාර්තා වේ.
කොළඹ 12 බණ්ඩාරණායක මාවත ප‍්‍රදේශයේ සේවය කළ අදාල සෞඛ්‍ය නිලධාරීන්ව පීසීආර් පරීක්ෂණයට යොමු කළ බව කොළඔ නගර සභාවේ ප‍්‍රධාන වෛද්‍ය නිලධාරි වෛද්‍ය රුවන් විජයමුණි අපේ‍්‍රල් 29 වැනිදා මාධ්‍ය වලට පවසා තිබුණි. බණ්ඩාරනායක මාවතේ සේවයේ යෙදෙමින් සිටි අදාල සෞඛ්‍ය නිලධාරීන්ව පීසීආර් පරීක්ෂණයට යොමු කළ බවත් එම පරීක්ෂණ වලින් අදාල නිලධාරීන්ට කොවිඞ් වැළදී නැති බව තහවුරු වුණ බවත් ඔහු කියා ඇත.
කෙසේ වෙතත් සේවයෙන් ඉවත් වූ නිලධාරීන් ප‍්‍රකාශ කරන්නේ එම පීසීආර් පරීක්ෂණ අපේ‍්‍රල් 19 සහ 20 යන දිින වල එම පරික්ෂණ සිදුකළ බවත්, එය උපුටා දක්වමින් මේ මොහොතේ තමන්ට රෝගය නැතැයි ප‍්‍රකාශ කළ නොහැකි බවය. බණ්ඩාරනායක මාවතේ කොවිඩ් 19 ආසාදිත රෝගීන් 90 කට ආසන්න සංඛ්‍යාවක් සමඟ සමීපව සම්බන්ධ වී සේවය කිරීම නිසා තමන්ට එදිනෙන් පසුව කොවිඞ්-19 ආසාදනය වී ඇතිදැයි සැකයක් පවතින බවත්ය. සතියකට වරක්වත් තමන් ඇතුළු නිලධාරීන්ව පරීක්ෂාවට ලක් කළ යුතු බව ඔවුන්ගේ මතයය. අනෙකුත් රටවල රෝගීන් අතර සේවය කරන නිලධාරීන්ව සතියකට වරක්වත් පරීක්ෂාවට ලක් කරන බව ඔවුන් පෙන්වාදෙයි.
බණ්ඩාරනායක මාවතේ සේවය කරන නිසා තමන්ටත් කොවිඞ් වැළදී ඇති බව පවසමින් තම නෑදෑ හිතවතුන්ගෙන් කොන් කිරීමට ලක්වන බවත් එබැවින් තම කණ්ඩායම විශාල මානසික ආතතියකට ලක්ව සිටින බවත් ඔවුහු පැවසූහ.
සබැඳි පුවත්
