ආණ්ඩුව උපාධිධාරීන් යොදා දත්ත එකතු කරන්නේ ඇයි?

පසුගිය සතියෙහි වව්නියාව නගරයේ  පාසල්වලට පැමිණි පුද්ගලයන් කිහිපදෙනෙකු තමන් බුද්ධි අංශ සාමාජිකයන් යැයි පවසා පාසල්වල සේවය කරන ගුරුවරුන්ගේ ජාතික හැඳුනුම්පත් අංකය සහ දූරකථන අංක එකතු කර තිබුණු බව වාර්තා විය. තමන් බුද්ධි අංශයෙන් යැයි පැවසූ පමණින් බියට පත් වූ ඇතැම් ගුරුවරුන් තමන්ගේ ජාතික හැඳුනුම්පත් අංකය හා දූරකථන අංක ලියා දී තිබුණි. එහෙත්, සැලකිය යුතු ප්‍රමාණයක පිරිසක් අනන්‍යතාව ඉදිරිපත් නොකළ එම නිලධාරීන්ට තමන්ගේ දත්ත ලබා දීම ප්‍රතික්ෂේප කර ඇත. එම ගුරුවරුන් පවසා ඇත්තේ, ‘තමන් බුද්ධි අංශ සාමාජිකයන් බවත්, තම විස්තර ලබා ගන්නා බව හා එයට හේතුව දක්වා ලිපියක් ලබා දෙනවා නම් පමණක්’ තමන්ගේ දූරකථන අංකය සහ ජාතික හැඳුනුම්පත් අංකය පිළිබඳව විස්තර ලබා දිය හැකි බවය. ඉන්පසුව පැමිණි පුද්ගලයන් බුද්ධි අංශ සාමාජිකයන් බවට ලිපියක්  ලියා දී එම ගුරුවරුන්ගේ දත්ත ලබාගෙන ගොස් ඇත.

ඒ පිළිබඳ විමසූ විට හමුදා මාධ්‍ය ප්‍රකාශක බි්‍රගේඩියර් චන්දන වික්‍රමසිංහ පැවසුවේ තමන් එවැනි මෙහෙයුමක් පිළිබඳ තොරතුරු නොදන්නා බවය. එය ප්‍රශ්න සහගත තත්වයකි.

කෙසේවෙතත් මෑත කාලයේ යුද හමුදාව දත්ත එකතු කිරීමේ අවස්ථා කිහිපයක්ම වාර්තා විය. බුද්ධි අංශ විවිධ හේතු දක්වමින් සමාජය වෙත මුදාහැරීමේ සිදුවීම් වාර්තා විය.

උතුරෙන් එවැන්නක් වාර්තා විය. රටේ අනෙක් ප්‍රදේශවලින් පසුගිය සතියේ වාර්තා වුණේ බුද්ධි අංශ නොව, උපාධිධාරී රැකියාලාභීන් යොදවමින් හමුදාව තොරතුරු එකතු කරමින් සිටින බවය. (රජය උපාධිධාරීන් රැකියා සඳහා බඳවාගත් අවස්ථාවේ උතුරු පළාතේ පුද්ගලයන් බඳවාගත්තේ නැත.)

උපාධිධාරීන්

ආණ්ඩුව ඉහළින් ක්‍රියාත්මක කළ රැකියා ලබා දීමේ වැඩ සටහන යටතේ තෝරා ගත් රැකියාලාභී උපාධිධාරීන්ගේ නම් පසුගිය අගෝස්තු 16 දින ජනාධිපති ලේකම් කාර්යාලයේ වෙබ් අඩවියේ පළ කර තිබුණි. එහි සඳහන් වී තිබුණේ එසේ පත්වීම් ලබන අය සැප්තැම්බර් 01 දින තමන්ට ආසන්න ප්‍රාදේශීය ලේකම් කාර්යාලයට වාර්තා කරන ලෙසය.

ඉන්පසුව මාධ්‍ය හරහා වාර්තා වුණේ රාජ්‍ය අංශයට බඳවා ගත් උපාධිධාරීන් 50,000 ක් වෙනුවෙන් යුද්ධ හමුදාව මැදිහත් වී කරනු ලබන පුහුණු වැඩසටහන් මාලාවක් සැප්තැම්බර් 14 දින සිට රට පුරා ස්ථාපිත ආරක්ෂක සේනා මූලස්ථාන, රෙජිමේන්තු මධ්‍යස්ථාන, යුද්ධ හමුදා ඒකක සහ පුහුණු පාසල්හිදී ආරම්භ කරනු ලබන බවය. ඒ අනුව බඳවාගත් උපාධිධාරීන්ට දෙන්නට සූදානම් වන්නේ හමුදා පුහුණුවකි.

රාජ්‍ය අංශය වෙත බඳවාගනු ලබන මෙම උපාධිධාරීන්ගේ මානසිකත්වය බඳවා ගැනීමේ සිට විශ්‍රාම දිවිය දක්වාම යහපත් ලෙස පවත්වාගෙන යාමෙහි අවශ්‍යතාව කෙරෙහි අවධානය යොමු කරමින් පවත්වනු ලබන යුද්ධ හමුදා පුහුණු පාඨමාලාව නායකත්වය, කළමනාකරණය, අවධානය, විශ්වාසය සහ දිගුකාලීන හා කෙටිකාලීන අරමුණු සඳහා ඵලදායී හා කාර්යක්ෂමව කටයුතු කිරීම, ඔවුන්ගේ සංකල්පීය අවබෝධය ප්‍රවර්ධනය කිරීම ආදි පුහුණුවෙහි ‘අරමුණු’ ලැයිස්තුවක් යුද්ධ හමුදා මාධ්‍ය අංශය සැප්තැම්බර් 14 වන දින නිකුත් කර තිබුණු මාධ්‍ය නිවේදනයේ සදහන් වී තිබුණි. මේ ‘හමුදා නායකත්වය’ ගැන අප අමුතුවෙන් මෙහි විග්‍රහ කරන්නට යන්නේ නැත. හමුදා පුහුණුවකින් දෙන්නේ කුමනාකාරයේ නායකත්වයක්ද යන්න අප මීට පෙරත් කතා කර ඇත.

අවුරුදු ගණනාවක් පුරා අධ්‍යාපනය හදාරා උපාධියක් ලබා ගත්  රාජ්‍ය අංශයට හෝ පෞද්ගලික අංශයට බඳවා ගන්නා තරුණ තරුණියන් යුද්ධ හමුදා කඳවුරුවලට හෝ යුද්ධ හමුදාව පවත්වාගෙන යනු ලබන පුහුණු පාසල්වලට දමා දෙන්නට යන ‘නායකත්ව පුහුණුව’ මිලිටරි මානසිකත්වයකින් ක්‍රියාත්මක කරන වැඩක් බව පැහැදිලිය. 

මෙවැනි මිලිටරි පුහුණු, මිලිටරි අධ්‍යාපන ක්‍රමවේද නැපෝලියන් බොනපාට්ගේ කාලයේ පවා අමුතු එකක් නොවීය. හිට්ලර්ගේ කාලයේත් ඒවා තිබුණි. දැන් කිම් ජොං උන් යටතේත් ඒවා ඇත. ඒ ගැන තවත් මොනවා විස්තර කරන්නද?

ගෝඨාභය රාජපක්ෂ ජනාධිපතිවරයා පත්වූ දවසේ සිට  යම් ස්ථානයක් හෝ ගමකට ගිය අවස්ථා බහුතරයකදීම එම ස්ථානයේ හෝ ගමේ යම් ප්‍රශ්නයක් තිබූ අවස්ථාවක ජනාධිපතිවරයා දූරකථන ඇමතුම් ලබා දී ප්‍රශ්න විසඳන්න කියන්නේ යුද හමුදාපති ශවේන්ද්‍ර සිල්වාටය. රටේ විවිධ විෂයන්වලට ඇමතිවරුන් හා රාජ්‍ය අංශයේ නිලධාරීන් පත් කර තිබියදී ජනාධිපතිවරයා මේ ආකාරයෙන් යුද හමුදාපතිවරයාට ප්‍රශ්න විසඳන්න යැයි කීම නැවත සිතා බැලිය යුතු කාරණාවකි.

මෙලෙස හමුදාව යෙදීම, හමුදාවට බාරදීම හොඳ දෙයක් බව ඇතැම් පුරවැසියන් කල්පනා කරනවා විය හැකිය. හමුදාවට වැඩ බාරදී ලෝකයේ බොහෝ රටවල ප්‍රශ්නත් නොවිසඳී, අන්තිමේ මහා විනාශයන් සිදු වූ හැටි ඔවුහු නොදනිති.

සමහරවිට, මෑත කාලයේ හාල් ප්‍රශ්නය විසඳීම හමුදාවට බාර දී නාගත් හැටිත්, ජනාධිපතිවරයා පත් වූ විගස කොළඹ වාහන තදබදය නවතන්නට හමුදාව යොදා නාගත් හැටිත් අමතක විය නොහැකිය. ලංකාවේ ලොකුම කොවිඞ්-19 පොකුර හමුදාවක් ඇතුළේ හැදුණු හැටිත් අමතක නොකළ යුතුය.

පුහුණුව

මෙලෙස බඳවාගත් උපාධිධාරීන්ට ලබාදෙන පුහුණුව ගැන අපි සොයා බැලුවෙමු. දේශන, සාකච්ඡා, එළිමහන් පුහුණු ක්‍රියාකාරකම්, සමූහ ක්‍රියාකාරකම්, අධ්‍යයන චාරිකා, ශක්‍යතා අධ්‍යයන සහ ක්ෂේත්‍ර අධ්‍යයන මගින්  මෙම පුහුණුවීම් කිරීමට නියමිතව ඇත. එම පුහුණුවීම් කටයුතුවලට යුද්ධ හමුදා පුහුණු ආයතනයන්, විශ්වවිද්‍යාල ප්‍රතිපාදන කොමිෂන් සභාව, ස්වදේශ කටයුතු අමාත්‍යාංශය, තෝරාගත් රාජ්‍ය හා පෞද්ගලික අංශය ඇතුළු තවත් රාජ්‍ය ආයතන කිහිපයක් සම්බන්ධවන බව යුද හමුදා මාධ්‍ය අංශයෙන් කළ විමසීමකදී පැවසීය. එසේම මෙම පුහුණු වැඩසටහන සාර්ථක කරගැනීම වෙනුවෙන් යුද්ධ හමුදා මූලස්ථානයේ පුහුණු අධ්‍යක්ෂ මණ්ඩලය  විවිධ ක්ෂේත්‍රයන්ට අදාළ සම්පත්දායකයන් සමඟ නිරන්තරයෙන් සම්බන්ධ වන බවත් එම වාර්තාවල සදහන් විය.

බඳවාගත් ගත් උපාධිධාරීන්ට යුද හමුදා කඳවුරු සහ පුහුණු පාසල්වල ලබා දෙන්නේ කුමන පුහුණුවක් දැයි යුද හමුදා මාධ්‍ය අධ්‍යක්ෂ හා මාධ්‍ය ප්‍රකාශක බි්‍රග්‍රේඩියර් චන්දන වික්‍රමසිංහගෙන් විමසූ විට ඔහු මෙසේ පැවසීය.

‘මේ වෙනකොට මාධ්‍යවල කතාවක් යනවා, බඳවාගත් උපාධිධාරීන්ට හමුදා පුහුණුව ලබා දෙනවා කියලා. එහෙම කිසිම පුහුණුවක් අපි දෙන්නේ නැහැ.  දැනට උපාධිධාරීන් 49,000 කට ආසන්න සංඛ්‍යාවක් පාඨමාලාව කරන්න අපි බඳවාගෙන ඉන්නවා. පියවර පහක් විදියට මේ අයට අපි පුහුණුවක් ලබා දෙනවා.

මුල් පියවර වශයෙන් නායකත්ව හා සාමූහික ක්‍රියාකාරකම් ප්‍රවර්ධනය පුහුණුවක් සැප්තැම්බර් 14 සිට ඔක්තෝබර් 03 දක්වා ලබා දෙනවා. දෙවනි පියවර විදියට ඔක්තෝබර් 12 සිට  31 දක්වා කළමනාකරණ පුහුණුව ලබා දෙනවා. තුන්වැනි පියවර විදියට රාජ්‍ය අංශයේ සහ පෞද්ගලික අංශයේ  ආයතන පුහුණුව නොවැම්බර් 09 සිට 28 දක්වා  ලබාදෙනවා. හතරවෙනි පියවර විදියට දෙසැම්බර් 07 දින සිට 28 දක්වා සාමූහික කටයුතු හා ක්ෂේත්‍ර අධ්‍යයනය සහ සහජීවනය පිළිබඳව පුහුණුවක් ලබා දෙනවා. අවසන් අදියර ලෙස 2021 ජනවාරි 04 වෙනිදා සිට  23 දින දක්වා අවස්ථානුකූලව කටයුතු කිරීම පිළිබඳව පුහුණුවක් අපි ලබා දෙනවා.

රාජ්‍ය ආයතනයක් තුළ හෝ වෙනත් ආයතනයක් තුළ වැඩ කරද්දී යම් කෙනෙක්ට නායකත්වයක් ලබා ගත යුතු තත්වයක් ඇති වෙනවා. එහිදී ඒ කෙනා දැනගත යුතුයි තමන් නායකයෙක් ලෙස කටයුතු කරනවා නම් තමන් ඇඳ පැළඳිය යුත්තේ කෙසේද, කතා කරන්නේ කොහොමද, හැසිරෙන්නේ කොහොමද කියලා. සමාජයක් තුළ තමන් යම් කිසි කටයුත්තක් කරද්දී ඇති වෙන ප්‍රශ්න තමන් නිරාකරණය කරන්නේ කොහොමද කියලා තමන් දැනගන්න ඕනෑ. යම් කාර්යයක් කරන විට තමන් නම්‍යශිලී වෙන්නේ කොහොමද, ආයතන තුළ තීරණ ගන්නේ කෙසේද  සහ තමන්ගේ පෞරුෂත්වය හදාගන්නේ කෙසේද කියා අපි මූලිකව කියා දෙනවා.

මීට අමතරව සමාජ සිරිත්විරිත්, ප්‍රධානියෙක් විදියට ආයතනයක්  තුළ වැඩ කරන හැටි, ශ්‍රී ලංකාවේ ඉතිහාසය සහ රටේ නීතීයට අනුව තමන්ගේ රාජකාරිය කරන්නේ කෙසේද කියලා  අපි ඔවුන්ට කියා දෙනවා.’

ඒ අතර හමුදාව යටතේ පුහුණුව ලබන එම උපාධිධාරීන්ට අමතු වැඩක් බාර දී ඇති බවත් වාර්තා විය.

දත්ත එකතු කිරීම

පුහුණු කඳවුරුවල සිටින උපාධිධාරීන් දිවයිනේ විවිධ ස්ථානවලට යවා ප්‍රදේශයේ සිටින පුද්ගලයන්ගේ පෞද්ගලික දත්ත එකතු කිරීමේ ව්‍යාපෘතියක් මේ දිනවල  දියත් කර ඇත. අලුතින් බඳවාගත් උපාධිධාරීන් නිවෙස්වලට පැමිණ නිවසේ සිටින පුද්ගලයන්ගේ සහ යම් කෙනෙකු රැකියාවක් සදහා නිවසෙන් පිටව සිටිනවා නම් ඒ පුද්ගලයන්ගේ තොරතුරු විමසා ඇත. වාහනයක් තිබේද, වාහනයේ අංකය කුමක්ද වැනි තොරතුරු පවා ඉල්ලා ඇත. මේ ආකාරයෙන් තොරතුරු එකතු කරන්නේ ඇයිද, තමන් කවුද යැයි නිවැසියන් තොරතුරු එකතු කිරීමට පැමිණි අයගෙන් විමසීම් කළ විට තමන් අලුතින් බඳවා ගත් උපාධිධාරීන් බවත්, තමන් මෙසේ එවන ලද්දේ දිස්ත්‍රික් ලේකම් කාර්යාලයෙන් බවත් නිවැසියන්ට පවසා ඇත.

මෙම උපාධිධාරීන් ප්‍රශ්නාවලියක් සමග එක් එක් ප්‍රදේශවලට යවනවාදැයි ඇසු අවස්ථාවේදී යුද හමුදා මාධ්‍ය ප්‍රකාශක බිග්‍රේඩියර් චන්දන වික්‍රමසිංහ පැවසුවේ යම් රාජ්‍ය නිලධාරියෙකු පාඨමාලාවක් කරන විට ඒ නිලධාරියාව පුරුදු පුහුණු කළ යුතු බවත්, ඔවුන් ජනතාව සමඟ සම්බන්ධ වී රාජකාරී කළ යුතු බවත්, ඒ නිසා මේ  ආකාරයෙන් මිනිස්සු අතරට යැවිය යුතු බවත්ය.

ස්වදේශ කටයුතු අංශයේ  අතිරේක ලේකම් කේ.ජී. ධර්මතිලකගෙන් දිස්ත්‍රික්ක ලේකම් කාර්යාල මගින් උපාධිධාරීන් දත්ත එකතු කිරීමට යවනවාදැයි විමසු අවස්ථාවේදී ඔහු පැවසුවේ තමන්ට මාධ්‍යවලට පිළිතුරු ලබා දිය නොහැකි බවත් විෂය භාර අමාත්‍යංශ ලේකම් කමල් ගුණරත්නගෙන් විමසීමක් කරන ලෙසත්ය.

මහා පරිපාලන අවුලක අග මුල වැටහෙන්නේ ඒ අස්සේය. දැන් රාජ්‍ය පරිපාලන අමාත්‍යාංශයේ ලොක්කා ආරක්ෂක අමාත්‍යාංශයේ ලේකම්ය. ආරක්ෂක ලේකම්වරයා හිටපු හමුදා නිලධාරියෙකි. ආරක්ෂක ඇමති කෙනෙක් නැත. බොහෝ පරිපාලන නිලධාරීන්ට දැන් හමුදා නීතියය. මාධ්‍යවලට කතා කිරීම තහනම්ය. ගෙයින් ගෙට ගොස් තොරතුරු එකතු කිරීමේ කටයුත්ත බාරදුන්නේ හමුදාවද? දිස්ත්‍රික් ලේකම්වරුන්ද? කියා සොයා වැඩක් නැත. දෙකම පාලනය වෙන්නේ එකම තැනකිනි.

මීට පෙර අමාත්‍යාංශ බෙදීම ගැටලු සහගත බව පිළිබඳ පැහැදිලි කරමින් හිටපු අමාත්‍යාංශ ලේකම්වරයෙකු සහ පරිපාලන සේවා නිලධාරීන්ගේ සංගමයේ හිටපු සභාපතිවරයෙකු වන අශෝක පීරිස් පෙන්වාදී තිබුණේ මෙවැනි කාරණාය.

ඇතැම් පුරවැසියන්ට තම දත්ත එකතු කිරීම ගැටලුවක් නොවෙයි. එහෙත් නූතන ලෝකය තුළ පුරවැසියන් පාලනය කිරීම සඳහා පාවිච්චි කරන ශක්තිමත්ම අවිය වන්නේ දත්තය. එය හුදෙක් ‘ආරක්ෂාව’ පිළිබඳ මාතෘකාවක් නොවේ. නිදහස හා ප්‍රජාතන්ත්‍රවාදය පිළිබඳ මාතෘකාවකි. ඒ නිසා ග්‍රාම නිලධාරීන්, ජන හා සංඛ්‍යාලේඛන දෙපාර්තමේන්තුව, පුද්ගලයන් ලියාපදිංචි කිරීමේ දෙපාර්තමේන්තුව වැනි විධිමත් ආයතනවලට පරිබාහිරව උපාධිධාරීන් යොදා ආරක්ෂක අමාත්‍යාංශය අමුතුවෙන් දත්ත එකතු කරන්නේ කුමන හේතුවක් නිසාදැයි අප විමසිල්ලෙන් සිටිය යුතුය.■