ජනාධිපතිවරයා විසින් තමා රුසියාවේ තානාපතිධුරයට පත්කරනු ලැබ ඇති බැවින්, ඉදිරි අවුරුදු දෙකක කාලය තුළ එම තානාපති ධුරයේ වැඩ කර එන තුරු තමා දැනට දරමින් සිටින උපකුලපති ධුරයේ වැඩ බැලීම සඳහා සුදුස්සකු පත්කරන ලෙස යක්කල වික්‍රමාරච්චි දේශීය වෛද්‍ය විශ්වවිද්‍යාලයේ උපකුලපති මහාචාර්ය ජනිතා ලියනගේ විශ්වවිද්‍යාල ප්‍රතිපාදන කොමිෂන් සභාවෙන් ලිපියකින් ඉල්ලා තිබේ.
විශ්වවිද්‍යාල පනතේ 34(8) යටතේ තමා එම ඉල්ලීම කරන බවද, ඇය සිය ලිපියේ සඳහන් කර තිබේ.
2021 සැප්තැම්බර් 15 වැනිදා දරන එම ලිපියෙන් ඇය කියා ඇත්තේ, 2021 මාර්තු 1 වැනි දින තමා යක්කල වික්‍රමාරච්චි දේශීය වෛද්‍ය විශ්වවිද්‍යාලයේ පළමුවැනි උපකුලපති හැටියට පත්කරන ලද බවත්, එය ජනාධිපතිවරයාගේ ඍජු පත්කිරීමක් බවත්ය.උපකුලපති හැටියට එදින සිට මේ වන තෙක් තමා සේවය කර ඇත්තේ මාස 7ක් පමණක් බවත්, ඒ අතර එළඹෙන ඔක්තෝබර් 1 වැනිදා සිට ඉදිරි වසර 2ක් සඳහා ජනාධිපතිවරයා විසින් තමා රුසියාවේ තානාපති හැටියට නම් කරනු ලැබ ඇති බවත්ය.
2023 සැප්තැම්බර් 30 වැනිදා රුසියානු තානාපති ධුර කාලය අවසන්වූ පසුව, ලංකාවට පැමිණ තමාගේ උපකුලපති තනතුරේ අවුරුදු 3ක් වන ධුරකාලයෙන් ඉතිරි කාලය වන මාස 5ක් නැවත සේවය කිරීමට බලාපොරොත්තු වන බැවින් ඒ වන තෙක් වැඩ බලන උපකුලපතිවරයකු පත්කරන ලෙස ඇය කොමිසමෙන් ඉල්ලා සිටියි.
මේ පිළිබඳ අනිද්දාට පැහැදිලි කළ විශ්වවිද්‍යාලයක හිටපු උපකුලපතිවරයකු පැවසුවේ විශ්වවිද්‍යාල පනතේ 34(8) වගන්තියෙන් ආවරණය ලැබෙන්නේ නිවාඩු ගැනීමේ හේතුවෙන් හෝ රෝග තත්ත්වයක් හේතුවෙන් හෝ ලංකාවේ නොසිටීම හේතුවෙන් හෝ ධුරයේ කටයුතු කිරීමට තාවකාලිකව නොහැකි වන විටක උපකුලපතිධුරයේ වැඩ බැලීමට, කොමිෂන් සභාව විසින් නියෝජ්‍ය උපකුලපතිවරයා පත්කරනු ලැබිය යුතු බවයි. ‘උපකුලපතිවරයකු වෙනුවෙන් එවැනි වැඩ බැලීමේ පත්කිරීමක් කොපමණ කාලයකට කළ හැකිදැයි පනතේ සඳහන්ව නැහැ. නමුත් විශ්වවිද්‍යාලයක අංශ ප්‍රධානියකු වෙනුවෙන් නම් වැඩ බැලිය හැක්කේ මාස තුනක කාලයක් සඳහා පමණක් බව පනතේ නිශ්චිතව දැක්වෙනවා.’ ඔහු පැවසීය. ජනිතා ලියනගේ මහත්මිය මේ ඌනතාව ප්‍රයෝජනයට ගෙන, රුසියාවේ තානාපතිධුරයේ සියලු වරප්‍රසාදද ලබාගෙන නැවත පැමිණ ඉතිරි කාලය විශ්වවිද්‍යාලයේ උපකුලපති ධුරයේ වැඩ කිරීමට සැලසුම් කර ඇති බව පෙනෙන බවද ඔහු පවසයි.
අනිද්දාට දැනගන්නට ඇති පරිදි, සැප්තැම්බර් 16 වැනිදා රැස්වූ විශ්වවිද්‍යාල ප්‍රතිපාදන කොමිෂන් සභාව, ජනිතා ලියනගේ මහත්මියගේ ලිපිය සම්බන්ධයෙන් ජනාධිපති ලේකම්වරයාගෙන් උපදෙස් පතා ලිපියක් යවා තිබේ.
ඒ ගැන අප කළ විමසීමකට පිළිතුරු දුන් කොමිසමේ සභාපති මහාචාර්ය සම්පත් අමරතුංග කීවේ, අවුරුදු දෙකක කාලයක් සඳහා වැඩ බැලීමට තාවකාලිකව කිසිවකු පත්කළ හැකිද යන්න හෝ පුවත්පත් දැන්වීම් පළ කර වෙනත් උපකුලපතිවරයකු අලුතෙන් පත්කරනවාද යන්න හෝ ගැන කොමිසම ජනාධිපති ලේකම්වරයාගෙන් තීරණයක් බලාපොරොත්තු වන බවයි. ‘මේ පත්වීම ජනාධිපතිවරයා ඍජුව කරන ලද්දක් නිසා මෙන්ම, වැඩ බැලිය හැකි කාලය ගැන පනතේ කිසිවක් සඳහන්ව නැති නිසාත් අපි ඒ ගැන ජනාධිපති ලේකම්වරයාගෙන් විමසුවා’යැයි අමරතුංග මහතා කීවේය. ‘උපකුලපති ධුරයක් සම්බන්ධයෙන් මෙවැනි තත්වයක් ඇතිවුණේ පළමුවැනි වරටයි’ ඔහු කියයි.
යක්කල වික්‍රමාරච්චි ආයුර්වේද විශ්වවිද්‍යාලයේ උපකුලපතිනි ආචාර්ය ජනිතා ලියනගේ මෙන්ම ඇගේ සැමියා වන ශ්‍රී ජයවර්ධනපුර විශ්වවිද්‍යාලයේ උපකුලපති මහාචාර්ය සුදන්ත ලියනගේද වියත්මගේ ඉදිරිපෙළ සාමාජිකයෝය. ඇය වියත්මගට එකතුවන විට සිටියේ ගම්පහ වික්‍රමාරච්චි ආයුර්වේද වෛද්‍ය විද්‍යාලයේ අධිපති තනතුර උසුලමිනි. ගෝඨාභය රාජපක්‍ෂ මහතා ජනාධිපතිධුරයට පත්වූ වහාම ඇය විශ්වවිද්‍යාල ප්‍රතිපාදන කොමිෂන් සභාවේ නියෝජ්‍ය සභාපති ලෙස ජනාධිපතිවරයා විසින් ලෙස පත්කරනු ලැබුවාය.
ඒ අනුව ඇය යක්කල වික්‍රමාරච්චි ආයුර්වේද වෛද්‍ය විද්‍යාලයේ අධිපතිකම සහ විශ්වවිද්‍යාල ප්‍රතිපාදන කොමිසමේ නියෝජ්‍ය සභාපතිකම එකවිට දැරූ අතර, වික්‍රමාරච්චි වෛද්‍ය විද්‍යාලය විශ්වවිද්‍යාලයක් බවට පත්කරනු ලැබීමෙන් පසුව එහි පළමුවැනි උපකුලපතිධුරයට පත්කරනු ලැබුවාය. එවිට, ප්‍රතිපාදන කොමිසමේ තනතුරෙන් ඉල්ලා අස්වී ඇය උපකුලපති ධුරය භාරගත් අතර, දැන් උත්සාහ කරන්නේ අලුතෙන් ලැබෙන රුසියානු තානාපතිධුරයද ලබාගනිමින් එහි සේවය අවසන් කර නැවත උපකුලපති තනතුරෙහිම රැඳී සිටින්නටය.
තවමත් ළදරු විශ්වවිද්‍යාලයක් වන බැවින් ගම්පහ වික්‍රමාරච්චි විශ්වවිද්‍යාලයේ උපකුලපතිවරයාට විශාල කාර්යභාරයක් පැවරී ඇති නිසාත්, උපකුලපතිවරයකුගේ බලතල වැඩබලන උපකුලපතිවරයකුට නොමැති නිසාත්, අවුරුදු දෙකක් වැනි දීර්ඝ කාලයකට වැඩබලන අයකු පත්කළහොත්, එම විශ්වවිද්‍යාලයේ විශාල පරිපාලන අවුල් ඇතිවනු ඇති බව අපට මුලින් කරුණු දැක්වූ හිටපු උපකුලපතිවරයා පැහැදිලි කළේය.■
