බන්ධනාගාර කටයුතු පිළිබඳ රාජ්‍ය අමාත්‍ය ලොහාන් රත්වත්ත අනුරාධපුර බන්ධනාගාරයේ සිරකරුවන් සිර මැදිරිවලින් එළියට ගෙන පිස්තෝලයක් ගෙන තර්ජනය කිරීම සම්බන්ධයෙන් අපරාධ පරීක්ෂණ දෙපාර්තමේන්තුවට හෙවත් සීඅයිඩීයට පැමිණිලි කිරීමට සිරකරු අයිතිවාසිකම් සුරැකීමේ කමිටුව තීරණය කර ඇත.
එම කමිටුවේ සභාපති නීතිඥ සේනක පෙරේරා ඒ සම්බන්ධයෙන් අනිද්දා කළ විමසීමකදී පැවසුවේ රාජ්‍ය අමාත්‍ය ලොහාන් රත්වත්ත සිරකරු අයිතිවාසිකම් දිනය සමරන සැප්තැම්බර් 12 වැනිදා අනුරාධපුර බන්ධනාගාරයට රාත්‍රියේ ගොස් එහි රඳවා සිටින නඩු කටයුත්තක් ඇති දෙමළ තරුණයකු සිර මැදිරියෙන් එළියට කැඳවා ගිනි අවියක් පෙන්නමින් ඔහුට ඇති චෝදනා පිළිගන්නා ලෙස තර්ජනය කිරීම බරපතල සිදුවීමක් බවය.
එම බරපතල සිදුවීම තුළ ගිනි අවියක් භාවිතා කිරීම, ජාත්‍යන්තර සිවිල් හා දේශපාලන අයිතිවාසිකම් පිළිබඳ සම්මුති පනත උල්ලංගනය කිරීම, අධිකරණයට අපහාස කිරීම, බන්ධනාගාර ආඥා පනත උල්ලංගනය කිරීම හා මූලික අයිතිවාසිකම් උල්ලංගනය කිරීම යන කරුණු දක්නට ලැබෙන බවත් එම කරුණු සම්බන්ධයෙන් පරික්ෂා කරන ලෙස ස්ීඅයිඩීයට කරන පැමිණිල්ලෙන් ඉල්ලා සිටින බවත් ඔහු පැවසීය.
එසේම ඔහු අවධාරණය කළේ මිනිස් ඝාතන වැනි අපරාධ පිළිබඳ චෝදනා ඇති ලොහාන් රත්වත්ත වැනි අයකු බන්ධනාගාර විෂය සම්බන්ධයෙන් රාජ්‍ය ඇමතිවරයා ලෙස පත්කිරීම ආණ්ඩුවේ විද්‍යාත්මක ඇමතිකම් ලබාදීමේ විහිළුව තවදුරටත් ඔප්පු කරන බවයි■.
