■ ප්රියාශා හෙට්ටිහේවා
වෙනත් රටවල අපද්රව්ය මුදල් ගෙවා ලබා ගැනීමක් කාබනික පොහොර ආනයනය මගින් නිර්මාණය විය හැකි බව සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න පවසයි.
මින් පෙර ලන්ඩන් නගරයෙන් සායනික අපද්රව්ය මෙරටට ගෙන් වූ අවස්ථාවක් වාර්තා වූ අතර එවන් අවස්ථාවලදී විදෙස් රටවල අපද්රව්ය වෙනත් රටකට යවා එම රටට මුදල් ගෙවීම ද අදාළ විදෙස් රටවල් සිදු කරන බව ඔහු පැවසීය.
කරුණාරත්න මහතා පැවසුවේ, ඉහත කාරණය වෙනස් මුහුණුවරකින් කාබනික පොහොර ආනයනයේදී සිදු විය හැකි බව ය.
එනම් වෙනත් රටවල ඉලෙක්ට්රොනික අපද්රව්ය ආදිය කුඩු කර නයිටේ්රට් මුසුකර කාබනික පොහොර ලෙස මෙරටට ගෙන ඒමේ අවදානමක් පවතින බව ඔහු පවසයි.
ශාක නිරෝධායන පනත අනුව වෙනත් රටක කාබනික පොහොර හෝ පස් මෙරටට ආනයනය කිරීමට නොහැකි බවත් ආනයනය කරන්නේ නම් එයට වෙන ම ක්රියාවලියක් සැකසීමට වන බවත් ඔහු පැවසීය.
නීතිඥ ජගත් ගුණවර්ධන ‘අනිද්දා‘ සමග පැවසුවේ, කාබනික පොහොර රට තුළ නිෂ්පාදනය කළ යුතු බවත් ආනයනය කිසිසේත් නොකළ යුතු බවත් ය.
ව්යාධිකාරක, ආක්රමණික ආගන්තුක ජීවීන්, පළිබෝධකයින් ආනයනික කාබනික පොහොර සමග රටට ඇතුළුවීමේ ඉහළ අවදානමක් පැවතීම එයට හේතුව ලෙස ඔහු පෙන්වා දුන්නේය.
කාබනික පොහොර ආනයනයට මතු වූ විරෝධතා සමග රට තුළ කාබනික පොහොර නිපදවන බව කෘෂිකර්ම අමාත්යවරයා පසුව පැවසුව ද 2021/2022 මහ කන්නය සඳහා කාබනික පොහොර ආනයනය කිරීමට කැබිනට් අනුමැතිය මේ වන විට ලැබී තිබේ.
පාකිස්තාන-ශ්රී ලංකා නිදහස් වෙළෙඳ ගිවිසුම යටතේ මෙරටට සහල් මෙට්රික් ටොන් 6,000ක් ආනයනය කිරීමට කැබිනට් අනුමැතිය ලැබුණු බව අගෝස්තු 17 වන දා කැබිනට් පත්රිකාවේ සඳහන් වන අතර ඒ පිළිබඳව අදහස විමසූ විට කරුණාරත්න මහතා පැවසුවේ, විදෙස් රටවලින් ආනයනය කරන සහල් වසර දෙකක කාලයක් කල් තබා ගත හැකි බවට එම අසුරනවල සඳහන් වන බව ය.
රසායනික ද්රව්ය යොදා කල් තබා ගත හැකි පරිදි සැකසූ සහල් කාබනික පොහොර යොදා සකසන ලද ඒවා නොවන බවත් රජයේ වස විෂෙන් තොර යන සංකල්පයට ඒවා අනුකූල නොවන බවත් ඔහු පැවසීය.■
