ගෝඨාභය රාජපක්ෂ මහතාට ඉදිරි ජනාධිපතිවරණයේදී ජනාධිපති අපේක්ෂක ධුරය ලබාදීමට මහින්ද රාජපක්ෂ මහතා එකඟ වී ඇතැයි පාර්ලිමේන්තු මන්ත්රී උදය ගම්මන්පිළ ඇතුළු ඒකාබද්ධ විපක්ෂයේ පක්ෂ නායකයන් කිහිපදෙනෙකු මාධ්‍ය හරහා ප‍්‍රචාරය කිරීම සම්බන්ධයෙන් දේශපාලන හිතවතුන් කිහිපදෙනෙකු සමඟ මහින්ද රාජපක්ෂ මහතා කේන්තියෙන් කතා කර ඇතැයි වාර්තා වෙයි.
සැප්තැම්බර් 15 වැනිදා කැබිතිගොල්ලෑවේ විහාරස්ථානයක උත්සවයකට ගිය අවස්ථාවේදී මාධ්‍ය විසින් කළ විමසීමකදීද මහින්ද රාජපක්ෂ මහතා කියා ඇත්තේ ගෝඨාභය රාජපක්ෂට ජනාධිපති අපේක්ෂකධුරය ලබා දෙන බව තමන් ප‍්‍රකාශ නොකළ බවයි. ‘ඒක අමු බොරුවක්. මම එහෙම කිව්වෙ නැහැ. ඒක මවාගත්ත කාරණයක්’ යැයි මහින්ද රාජපක්ෂ මහතා එහිදී අදහස් පළ කර තිබුණි. අනිද්දා සමඟ අදහස් දැක්වූ මහින්ද රාජපක්ෂ මහතාට හිතවත් පක්ෂ නායකයෙකු ප‍්‍රකාශ කළේ එම ප‍්‍රකාශයෙන්ද මහින්ද රාජපක්ෂ මහතා කේන්තියෙන් සිටි බව පැහැදිලි වෙන බවයි.
සැප්තැම්බර් 18 වැනිදා පවත්වා ඇති ඒකාබද්ධ විපක්ෂයේ පක්ෂ නායකයන්ගේ සතිපතා හමුවේදීද ඒ පිළිබඳව අදහසක් පළ කර නොමැත.
ගෝඨාභය රාජපක්ෂ ඉදිරි ජනාධිපතිවරණයේදී ජනාධිපති අපේක්ෂකයා කිරීමට මහින්ද රාජපක්ෂ මහතා එකඟ නොවූවත් කෙසේ හෝ එම යෝජනාවට මහින්ද රාජපක්ෂ මහතා එකඟ කරවාගැනීම සඳහා උදය ගම්මන්පිළ මන්ත‍්‍රීවරයා ඇතුළු කණ්ඩායමක් උත්සාහ කරන බවත්, ඒ සම්බන්ධයෙන් මහින්ද රාජපක්ෂ මහතා දැඩි නොකැමැත්තකින් සිටින බවත් එම ප‍්‍රකාශකයා කීය.
මාධ්‍ය හරහා අදහස් පළකිරීමෙන් මහින්ද රාජපක්ෂ මහතා විධායක ජනාධිපති ක‍්‍රමය අහෝසි කිරීමට පක්ෂව සිටි ස්ථාවරය වෙනස් කරවීමට හැකිවූ බව උදය ගම්මන්පිළ මන්ත‍්‍රීවරයා විසින් ප‍්‍රසිද්ධියේ උදම් ඇනීම සම්බන්ධයෙන්ද මහින්ද රාජපක්ෂ මහතා නොසතුටෙන් පසුවන බව එම ප‍්‍රකාශකයා කීය. තමන්ගේ බලයට ඉහළින් ගම්මන්පිළ ඇතුළු කණ්ඩායම කටයුතු කිරීම මහින්ද රාජපක්ෂ මහතාගේ නොසතුටට හේතුව වී ඇත.
අනුරංග ජයසිංහ
