ජනාධිපති මෛත්රීපාල සිරිසේන විසින් කැඳවනු ලැබ සැප්තැම්බර් 13වැනි බ්රහස්පතින්දා දහවල් පැවැති හදිසි කැබිනට් රැස්වීම මුළුමනින්ම වෙන් කර ඇත්තේ, ආරක්ෂක මාණ්ඩලික ප්රධානි අද්මිරාල් රවින්ද්ර විජේගුණරත්න අත්අඩංගුවට නොගත යුතු බවට ඇමති මණ්ඩලයට අවධාරණය කිරීම සඳහා බව අමාත්ය මණ්ඩල ආරංචි මාර්ගවලින් අනිද්දා වෙත වාර්තාවේ.
ජනාධිපතිවරයා කැබිනට් රැුස්වීම ආරම්භයේදීම පවසා ඇත්තේ, මේ රැුස්වීමේ කිසිම තොරතුරක් පිටතට නොයා යුතු බවත්, සියලූ දෙනාම සාමූහික වගකීමෙන් ඒ සඳහා කටයුතු කළ යුතු බවත්ය.
අනතුරුව ඇමතිවරුන් ඇමතූ ජනාධිපතිවරයා පවසා ඇත්තේ අද්මිරාල් රවින්ද්ර විජේගුණරත්න අත්අඩංගුවට ගතහොත් රටේ මහජනතාව ආණ්ඩුව සමග උරණ වී, ආණ්ඩුවට පරාජයට පත්වී ගෙදර යෑමට සිදුවන බවත් රාජපක්ෂවරුන්ට යළි බලය හිමිවනු ඇති බවත්ය.
අපරාධ පරීක්ෂණ දෙපාර්තමේන්තුව රාජපක්ෂලාගේ අපරාධ ගැන නොසොයා හමුදා නිලධාරීන් පසුපස පන්නන බවත්, සේනාධිනායකයා හැටියට හමුදා නිලධාරීන් අත්අඩංගුවට ගැනීමට තමා තරයේ විරුද්ධ බවත් ඔහු පවසා තිබේ. ආණ්ඩුව ආරක්ෂා කරගැනීමට නම් හමුදා නිලධාරීන් අත්අඩංගුවට ගැනීම නැවැත්විය යුතු බවද ඔහු අවධාරණය කොට තිබේ.
මේ අවස්ථාවේදී අදහස් දැක්වූ රාජිත සේනාරත්න හා මංගල සමරවීර ඇමතිවරුන් කියා ඇත්තේ, අපරාධවල පරීක්ෂණ ස්වාධීනව ඉදිරියට යෑමට ඉඩ දිය යුතු බවත්, ඒවාට බාධා කිරීමට හෝ ඇඟිලි ගැසීමට ආණ්ඩුවේ කිසිවකුට අයිතියක් නැති බවත්ය.
ඊට ප්රතිචාර දක්වමින් ජනාධිපතිවරයා කියා ඇත්තේ, එහෙනම් ආණ්ඩුවට ගෙදර යන්න සිදුවෙනකම් බලාගෙන ඉන්න කියාය.
විජේදාස රාජපක්ෂ හා තිලක් මාරපන ඇමතිවරුන්ද ජනාධිපතිවරයාගේ අදහස අනුමත කරමින් කරුණු දක්වා තිබේ.
මේ කැබිනට් රැස්වීමට කිසිම කැබිනට් පත්රිකාවක් ඉදිරිපත් කර නොතිබුණු අතර, පැය දෙකකට ආසන්න වේලාවක් පැවැති රැස්වීම සම්පූර්ණයෙන්ම පාහේ වෙන්ව තිබුණේ, ආරක්ෂක මාණ්ඩලික ප්රධානියා අත්අඩංගුවට ගැනීම ගැන කරුනු කියන්නටය.
අගමැති රනිල් වික්රමසිංහ විදේශගතව සිටින නිසා මේ රැුස්වීමට සහභාගි වූයේ නැත.
මෙම කැබිනට් හමුවෙන් පසු මාධ්යයට අදහස් දැක්විමේ ප්රවෘත්ති සාකච්ඡුාවක් පවත්වන බවට මුලින් තීරණය කර තිබුණත් පසුව එම තීරණයද අවලංගු කරනු ලැබීය.
අරුණ ජයවර්ධන
