අපගේ බන්දුල ගුණවර්ධන ඇදුරුතුමා නිතර කියන ‘ලෝ මේකර්ස්ලා ටී මේකර්ස්ලා නොවිය යුතුය’ යන වදන සත්‍යයකි. එහෙත් ඇත්තටම සිදුවී ඇත්තේ එතුමාද ඇතුළුව හැට හැත්තෑවක් පමණ දෙනා මුදලාලිගේ ඕඩරයට ප්ලේන්ටී, ටී ආදිය හදන ටී මේකර්ලාගේ තත්වයට වැටීමය. එකී පිරිසටද, ඒ අයට එකතු වන්නට බලාපොරොත්තුවෙන් සිටින ආසන සංවිධායක මට්ටමේ අයටද සිය පක්ෂය නියෝජනය කරන 3436ක පළාත් පාලන සභික පිරිස හරහා ඉතාම ක‍්‍රමානුකූලව පිරිස් රැුස් කළ හැකිය. (යහපාලන ආණ්ඩුව විසින් පළාත් පාලන මැතිවරණය නියමිත කාලයේ පැවැත්වූවා නම් පොදුජන පෙරමුණට මෙතරම් විශාල සභික පිරිසක් හා පළාත් පාලන ආයතන අතිබහුතරයක බලය නොලැබී යා හැකිව තිබිණි.) සොරකම් කරන ලද ජනතා මුදල් ඔවුන් සතුව ඇති නිසා ඕනෑම කටයුත්තකට නිර්ලෝභීව වියදම් කිරීමටද හැකිය. පිරිස් රැුස්කිරීමට කටයුතු කරන අය නාමල් රාජපක්ෂ මහතා පුද්ගලිකව මුණගැසී හෝ දුරකථනයෙන් අමතා ධෛර්යමත් කර ඇති බවද සැලය. සැප්තැම්බර් 5 මෙහෙයුම හා ඉදිරියේ පැවැත්වීමට නියමිත තවත් ක‍්‍රියාකාරිත්වයන්ට සොරකම් කරන ලද ජනතාවගේ මුදල් කෝටි ගණනින් ගමන් ගාස්තු, මත්පැන්, මත්ද්‍රව්‍ය, ආහාරපාන, වෙනත් වියදම් හා සන්තෝසම් ලෙස යෙදවෙනු ඇත.
පවතින තත්ත්වය යටතේ ආණ්ඩු පෙරළිය සඳහා වන මැතිවරණ දෙකම එනම් ජනාධිපතිවරණය හා පාර්ලිමේන්තු මැතිවරණය නියමිත දින වකවානුවලදී පැවැත්වෙනු ඇත. ජනාධිපති මෛත‍්‍රිපාල සිරිසේන මහතා අපේක්ෂකයෙකු ලෙස ඉදිරිපත් නොවන්නේ නම් ලබන වසරේදී ජාතික මැතිවරණ නැත. එසේ නම් අප කල්පනා කළ යුත්තේ රාජපක්ෂලා දෙතුන් දෙනෙකු සමඟ එක්ව ලෝ මේකර්ස්ලා කණ්ඩායමක් මේ කරන්නට යන්නේ කුමක්ද යන්නයි.
2015න් පසුව තෙල් මිල අඩු කිරීම, වැටුප් විශාල ප‍්‍රමාණයකින් වැඩිකිරීම ආදි සහන ජනතාවට ලැබුණි. එහෙත් අපේක්ෂා කළ අයුරු විදේශීය ආයෝජන ගලා ආවේ නැත. එනිසා ආර්ථිකය ප‍්‍රසාරණය වූයේ නැත. එසේ නොවීමට ප‍්‍රධානම හේතුව වූයේ පොදුජන එක්සත් පෙරමුණ හා එජාපය එක්ව ඇතිකරගත් සන්ධාන ආණ්ඩුවෙන් රාජපක්ෂවාදී පිරිස් ඉවත්ව නිර්මාණය කරනු ලැබූ දේශපාලනිකව අස්ථායි වාතාවරණයයි. ඒ සඳහා ඔවුහු නීත්‍යනුකූල විපක්ෂය තිබියදී පොදු විපක්ෂය යයි ලෝකයේ කොහේවත් නැති ජාතියේ පාර්ලිමේන්තු කල්ලියක් අටවා ගත්හ. ආණ්ඩුව පෙරලිය නොහැකි බව හොඳින්ම දැනදැනත් ලබන පෝයට පෙරලනවාය කියමින් කටයුතු කරන අතර තම හෙන්චයියන් වූ නිලධාරී තන්ත‍්‍රයද, වෘත්තීය සමිතිද, විවිධ වූ අන්තවාදී කල්ලිද හරහා නිතර විරෝධතා, කඩාකප්පල්කාරී ක‍්‍රියා, ආගම්වාදී කලකෝලාහල ආදිය ඇතිකිරීම නිසා රට තුළ ගැටලූ සහගත තත්වයක් ඇති බව ජාත්‍යන්තරයට පෙනීගිය හෙයින් මහා පරිමාණ ආයෝජකයන් පැමිණියේ නැත. පැමිණ සිටි සමහරු තම මුදල් කොටස් වෙළඳපළෙන් ඉවත් කර ගත්හ. ජනාධිපතිවරයාගේ නායකත්වයෙන් පොදුජන එක්සත් පෙරමුණ ලෙස තරඟකර ලෝ මේකර්ලා ලෙස පත්ව වෙනම කල්ලියක් ලෙස රජයේ කටයුතු අවුල් කරන්නට පටන්ගත්හ.
පාර්ලිමේන්තු මැතිවරණයක් හෝ ජනාධිපතිවරණයක් කිට්ටු කර එවැනි ක‍්‍රියා මාර්ගයක නිරත වූවා නම් එය බල පෙරළිය සඳහා කරනු ලැබූවක් ලෙස අවබෝධ කරගත හැකිය. ජනමතය ප‍්‍රකාරව ආණ්ඩුවට අවුරුදු කීපයක් තම ප‍්‍රතිපත්ති ක‍්‍රියාවට නගන්නට ඉඩදී තම පක්ෂයේ/ කණ්ඩායමේ බල ව්‍යාපෘතිය ආරම්භ කළා නම් එය සාධාරණය. 2015 අගෝස්තුවේ සිට රාජපක්ෂවාදී පිරිසගේ හැසිරීම නිරීක්ෂණය කරන විට පෙනීයන්නේ ඔවුන් එදා සිටම රටට/ජනතාවට ද්‍රෝහී ලෙස ශ‍්‍රී ලංකා නිදහස් පක්ෂයද දෙකඩ කරමින් තම පෞද්ගලික න්‍යාය පත‍්‍රවලට අනුව ජනතාව රවටමින් ආණ්ඩුවේ කටයුතු අවුල් කිරීමේ ක‍්‍රියාදාමයක නිරතව සිටින බවයි.
මෙම කරුණුද සැලකිල්ලට ගෙන 5 වැනිදා කොළඹට විශාල ජනකායක් එක්රැුස් කිරීම පිළිබඳව කථා කළ යුතුය. ආණ්ඩුවේ කටයුතු අවුල් කර ජනතාව නොමඟ ඇරීමේ බලය පිළිබඳ වන අරමුණට අමතරව තවත් අරමුණු මෙම ව්‍යාපෘතියේ ඇති බව පෙනේ. නාමල් රාජපක්ෂ, බැසිල් රාජපක්ෂ ඇතුළු ‘ජනබලය කොළඹට’ ව්‍යාපෘතියට නායකත්වය දෙන සමහරු බරපතළ අපරාධ වැරදිවල චුදිතයෝය. අධිකරණයට බලපෑම් නොකෙරුණොත් වැරදි ඔප්පු වී දඬුවම් ලැබිය හැකිය. තම ජන බලය පෙන්වා ආණ්ඩුවේ නායකයන් ඞීල්වලට පොළඹවා ගතහොත් ඒ හරහා අධිකරණවලට බලපෑම් කළ හැකි බව ඔවුහු දනිති. (අධිකරණවලට අවශ්‍ය තොරතුරු ලබා නොදෙන්නැයි ආරක්ෂක ප‍්‍රධානීන්ට ජනාධිපතිවරයා දැනටම නියෝග කර ඇති බව සැලය). ඉදිරියේ එන මැතිවරණයකදී සන්ධානගත වීම් පිළිබඳව පවා සමහර විට තීන්දු තීරණ ගැනීමට ඉදිරියේදීත් නැවත නැවතත් පැවැත්වීමට නියමිත මේ ආකාරයේ රැලිද හේතුකාරක වනු ඇත. එමෙන්ම පසුගිය පළාත්පාලන මැතිවරණයේදී එහි ජයග‍්‍රහණය හරහා මහින්ද රාජපක්ෂ අගමැති කළහැකි යයි ජනතාව රැවැට්ටුවා සේ මොකක් හෝ උප්පරවැට්ටියක් කර ගැත්තන් ඉත්තන් නැවත නැවත රවටා ඔවුන්ව තමන් වටා ගාල් කර තබාගැනීමටද මෙවැනි ක‍්‍රියාමාර්ග උපකාරී වේ.
පි‍්‍රයදර්ශනී ආරියරත්න
