රටේ සෞඛ්‍ය සේවාව ගුණාත්මකව පවත්වා ගැනීමට ඉල්ලීම් 15 ක් මුල් කර ගනිමින් හෙට පෙරවරු 7.00 සිට දහවල් 12.00 දක්වා සෞඛ්‍ය කාර්ය මණ්ඩල රාජකාරියෙන් ඉවත්ව සිටීමට තීන්දු කර ඇති බව සෞඛ්‍ය වෘත්තීයවේදීන්ගේ විද්වත් සංගමයේ සභාපති රවි කුමුදේශ් පවසයි.
කොවිඩ් වසංගත තත්ත්වය තුළ ජන ජීවිත සුරක්ෂිත කිරීම සඳහා රටේ සෞඛ්‍ය සේවාව ගුණාත්මකව පවත්වා ගැනීමට සෞඛ්‍ය කාර්ය මණ්ඩලවලට පහසුකම් කඩිනමින් ලබා දෙන ලෙස ඉල්ලා ඇති අතර, ඊට යහපත් ප්‍රතිචාර නොලැබීම හෝතුවෙන් එයට විරෝධය දැක්වීමක් ලෙස සෞඛ්‍ය වෘත්තීය එකමුතුව හෙට මේ ආකාරයෙන් රාජකාරියෙන් ඉවත්ව සිටින බව නිවේදනයක් නිකුත් කරමින් එම එම සංගමය ද දන්වා තිබේ.
ශ්‍රී ලංකා ජාතික රෝහල, මහනුවර මහ රෝහල, යාපනය ශික්ෂණ රෝහල, මඩකලපුව ශික්ෂණ රෝහල, අනුරාධපුරය ශික්ෂණ රෝහල, පේරාදේණිය ශික්ෂණ රෝහල, කළුබෝවිල ශික්ෂණ රෝහල, කරාපිටිය ශික්ෂණ රෝහල, රත්නපුරය ශික්ෂණ රෝහල යන රෝහල් ඒ අනුව රාජකාරියෙන් ඉවත්ව සිටින (වෝක් අවුට්) අතර, ශ්‍රී ලංකාවේ සියලුම රෝහල් දහවල් 12.00 සිට 12.30 දක්වා නිහඬ විරෝධතාවයක නියැළෙන බවත් එහි සඳහන්ය.■
