සීඅයිඩීයටත් පිස්සු – පාර්ලිමේන්තු මන්ත්‍රිනි ඩයනා ගමගේ
මට කිසිම පිළිතුරක් දෙන්න නැහැ. ඔය චෝදනා එල්ල කරන අයට පිස්සු. සීඅයිඩීයටත් පිස්සු.
ඩයනා බි්‍රටිෂ් යනුවෙන් ඇගේ ද්විත්ව පුරවැසිභාවය පිළිබඳ අපි මීට පෙර හෙළිදරව් කළෙමු. එහිදී අප පුවත්පතෙන් ඩයනා ගමගේ මන්ත්‍රීවරියගෙන් කළ විමසීම්වලදී ඇය කියා තිබුණේ අධිකරණයට අදාල කරුණු ඉදිරිපත් කරන බවය. දැන් අධිකරණය ඉදිරියට ප්‍රශ්නය පැමිණ ඇත.
සමගි ජන බලවේගයේ ජාතික ලැයිස්තු මන්ත්‍රිනී ඩයනා ගමගේ සිය බි්‍රතාන්‍ය පුරවැසිභාවය පිළිබඳ තොරතුරු වසන් කරමින් කටයුතු කිරීම තුළ ආගමන හා විගමන පනත සහ දණ්ඩ නීති සංග්‍රහය කඩ කර ඇති බව කොළඹ ප්‍රධාන මහේස්ත්‍රාත් අධිකරණයට බී වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව හෙවත් සීඅයිඩීය දැනුම් දී තිබුණි. එම බී වාර්තාව ඉදිරිපත් කර තිබුණේ සමාජ ක්‍රියාකාරිකයෙකු වන ඕෂල ලක්මාල් හේරත් 2020 නොවැම්බර් 02 දා කළ පැමිණිල්ලක් පිළිබඳ විභාග කිරීමෙන් පසුය.
ඇය ශ්‍රී ලංකාවේ නීතිවිරෝධීව රැඳී සිටින බි්‍රතාන්‍ය පුරවැසිභාවය හිමි කාන්තාවක් බව එහි ඇති කරුණු අනුව පෙනී යයි. එහි සඳහන් කරුණු අනුව ඇගේ මන්ත්‍රීධුරය අහෝසි වීම පමණක් නොව, කූඨ ලේඛන සැකසීමට අදාලව දඬුවම් ලැබීමටත් ඇයට සිදු වනු ඇත. ඇය අපරාධ නඩු විධාන සංග්‍රහ පනතේ 11 වැනි පරිච්ඡේදයේ 115 වගන්තියට අයත් වරදක් කර ඇති බව එම වාර්තාවේ කරුණු සඳහන් වේ.
බී 48037/1/21 අංකය සහිතව අප්‍රේල් 27 වැනිදා ඉදිරිපත් කළ එම බී වාර්තාවෙන් අපරාධ පරීක්ෂණ දෙපාර්තමේන්තුවේ තැනැත්තන් වෙළඳාම් හා ජාවාරම් විමර්ශන ඒකකය එම කරුණු ඉදිරිපත් කර තිබුණි. ඇගේ උප්පැන්න සහතික, ජාතික හැඳුනුම්පත් සහ විදේශ ගමන් බලපත්‍ර පිළිබඳ එම වාර්තාවේ කරුණු සඳහන් කර ඇත.
සීඅයිඩීය මෙම විමර්ශනයේදී ඇය සතු විදේශ ගමන් බලපත්‍ර පිළිබඳ ආගමන විගමන දෙපාර්තමේන්තුවෙන් විමසා ඇත.
එහිදී මුලින් හෙළිදරව් වී ඇත්තේ ඇය එන්5091386 අංකය දරණ 2014 ජනවාරි 24 දිනැති ගුවන් ගමන් බලපත්‍රයක් පරිහරණය කර ඇති බවය. එය ලබාගෙන ඇත්තේ 2004 දෙසැම්බර් 22 නිකුත් කළ 658534399වී අංකය දරන ජාතික හැඳුනුම්පත සහ අංක 6553 අංකය සහිත උප්පැන්න සහතිකය ඉදිරිපත් කරමිනි.
ඇය 2018 අගෝස්තු 07 දිනැති ඕඑල් 5654794 අංකය දරණ රාජකාරී විදේශ ගමන් බලපත්‍රයක් ද පරිහරණය කර තිබේ. එය පෙර සඳහන් ජාතික හැඳුනුම්පත සහ අංක 4683 දරණ වෙනත් තවත් උප්පැන්න සහතිකයක් ඉදිරිපත් කරමින් ලබාගෙන තිබේ. එම රාජකාරී හැඳුනුම්පත සඳහා මුදල් අමාත්‍යාංශයේ අතිරේක ලේකම් පාලන තනතුරේ සිටි රමණි ගුණවර්ධනගේ ඉල්ලීමක් හා මුදල් අමාත්‍යාංශයේ ලේකම්වරයාව සිටි ආර්.එම්.එස්. සමරතුංගගේ ලිපියක් ඉදිරිපත් කර ඇතැයි විමර්ශනයේදී සඳහන් කර ඇත.
ආර්.එම්.එස්. සමරතුංග මහතා ප්‍රකාශයක් දෙමින් කියා ඇත්තේ රන්මිණිතැන්න ටෙලි සිනමා ගම්මානයේ සභාපතිනිය ලෙස ඩයනා ගමගේ මහත්මිය සේවය කළ බවත්, එම තනතුරේ සේවය කළ බවට තමන් සාමාන්‍ය රාජකාරී පරිපාටිය යටතේ ලිපියක් ඉදිරිපත් කළ බවත්ය.
රමණි ගුණවර්ධන මහත්මිය කියා ඇත්තේ රාජකාරී ගුවන් ගමන් බලපත්‍රයක් ලබා ගැනීමට තමන්ගෙන් ඉල්ලීමක් කළ බවත්, අවශ්‍ය ලිපි ලේඛන ඉදිරිපත් කර තිබූ බැවින් තමන් ආගමන විගමන දෙපාර්තමේන්තුවට ලිපියක් යොමු කළ බවත්ය.
ආගමන විගමන දෙපාර්තමේන්තුවේ නියෝජ්‍ය පාලක චම්පික දිනුෂාන් රාමවික්‍රමගෙන් මේ පිළිබඳ ප්‍රකාශයක් ලබා ගත් බව වාර්තාවේ සඳහන්ය. ඔහුගේ ප්‍රකාශ අනුව ඇය සතුව අංක 09942515 සහ අංක 521398876 සහිත බි්‍රතාන්‍ය ගුවන් ගමන් බලපත්‍ර තිබී ඇත. ඒවා තිබියදී ඒ බව වසන් කොට ශ්‍රී ලාංකික පුරවැසියෙකු ලෙස පෙනී සිටිමින් ගුවන් බලපත්‍ර ලබාගෙන තිබේ. 1948 අංක 18 දරණ පුරවැසි පනත අනුව විදේශීය රටක පුරවැසිභාවය ලබා ගන්නා ශ්‍රී ලාංකිකයෙකුට මෙරට පුරවැසිභාවය අහෝසි වන බවද ඔහු ප්‍රකාශ කර තිබේ.
එම බී වාර්තාවේ වැඩිදුරටත් සඳහන් වන්නේ ආගමන විගමන දෙපාර්තමේන්තුවේ වීසා හා ප්‍රත්‍යන්ත පාලක කුසුමාවේල් අතුකෝරාළ මහත්මියගේ ප්‍රකාශයක් අනුව අංක 521398876 සහිත බි්‍රතාන්‍ය ගුවන් ගමන් බලපත්‍රය පාවිච්චි කරමින් ශ්‍රී ලංකාවට පැමිණීම සඳහා ඩයනා ගමගේ මහත්මිය කිහිප වතාවක් ශ්‍රී ලංකාවේ වීසා ලබාගෙන ඇති බවය. ඒ බව ආගමන විගමන දෙපාර්තමේන්තුවේ දත්තවල සඳහන් වන බවය.
එලෙස බි්‍රතාන්‍ය ජාතික කාන්තාවක ලෙස ලංකාවට පැමිණීමට වීසා ලබා ගත් ඇය, ඒ අතරතුරේම 2004 දී ලාංකික ජාතික හැඳුනුම්පතක් ලබා ගෙන ඇත. ඒ පිළිබඳ පුද්ගලයන් ලියාපදිංචි කිරීමේ දෙපාර්තමේන්තුවේ නියෝජ්‍ය කොමසාරිස් ඉෂංකා වීරකෝන්ගේ ප්‍රකාශයක් ලබා ගෙන තිබේ. ඇය කියා ඇත්තේ 2004 දෙසැම්බර් 22 වැනිදා ඇය ජාතික හැඳුනුම්පත ලබා ගෙන ඇති බවය. ඒ සඳහා පානදුර, කෙසෙල්වත්ත ප්‍රදේශයේ ලිපිනයක් ඉදිරිපත් කර ඇත. ඇය වැඩිදුරටත් කියා ඇත්තේ ශ්‍රී ලාංකික ද්විත්ව පුරවැසිභාවය ලබා ගත් කෙනෙකු එය ලබාගත් දින සිට මාස 06ක් ඇතුළත පුද්ගලයන් ලියාපදිංචි වීමේ දෙපාර්තමේන්තුවේ ලියාපදිංචි විය යුතු බවය.
මීට අමතරව තිඹිරිගස්යාය ප්‍රාදේශීය ලේකම් කාර්යාලයේ අතිරේක දිස්ත්‍රික් රෙජිස්ට්‍රාර් ජීවනි කරුණාරත්නගෙන් ලබා ගත් ප්‍රකාශයක් අනුව ඩයනා ගමගේ මහත්මියගේ අංක 6553 අංකය සහිත උප්පැන්න සහතිකයේ සඳහන් කරුණු වැරදි බවත් හෙළි වී තිබේ. අතිරේක දිස්ත්‍රික් රෙජිස්ට්‍රාර්වරිය කියා ඇත්තේ මෙම උප්පැන්න සහතිකයේ දකුණු කොළඹ ලෙස සඳහන්ව ඇති නමුත් එවැනි කොට්ඨාශයක් කොළඹ දිස්ත්‍රික්කයේ නොමැති බවය. ඒ අනුව එය ව්‍යාජ උප්පැන්න සහතිකයක් බව ඇය පෙන්වා දී තිබේ. ඇය පිළිබඳ අධිකරණ කටයුතු තවම අවසන්ව නැත. කරුණු අනුව දැනට පෙනී යන්නේ ඇය කූඨ ලේඛන සකසමින් තමන්ගේ පුරවැසිභාවය වසන් කර ඇති බවය. මේ පිළිබඳ පිළිතුරු හැකියාව ඉදිරියේදී ඩයනා ගමගේ මහත්මියට ලැබෙනු ඇත.
කෙසේ වෙතත් ඩයනා ගමගේ යනු ‘දේශ හිතෛෂී අරමුණු’ ඇතිව සමගි ජන බලවේගයට තම පවුලේ දේශපාලන පක්ෂය පුද දී, 20 වන සංශෝධනයට අත එසවූ කෙනෙක් බව සිහි තබාගත යුතුය.■
