■ දේශපාලන වාර්තාකරු
‘විසිහය වැනිදා පෝය. අපි දන්නවා ආගමික උස්සව ගොඩාක් නොයෙකුත් පන්සල්වල තියන්න තීන්දු කරලා තියෙනවා. නොයෙකුත් අය තමන්ගේ වන්දනා ගමන්, පුද්ගලික විනෝද සංචාර සැලසුම් කරලා තියෙනවා. සමහරු අවුරුදු උත්සව සැලසුම් කරලා තියෙනවා. අපි ගෞරවයෙන් ඉල්ලනවා, අත්දෙක එක්කාසු කරලා වැඳලා ඉල්ලනවා, මේවා අපි නවත්වමු.’ පසුගිය සති අන්තයට පෙර සෞඛ්‍ය ඇමතිනී පවිත්‍රා වන්නිආරච්චි මාධ්‍ය හමුවකදී ඉල්ලුවාය.
ඉන් පසු සති අන්තය වෙද්දී ජනාධිපති ගෝඨාභය රාජපක්ෂ හපුතලේ, හල්දුම්මුල්ල ප්‍රදේශයට ගොස් තිබුණේ තමන්ගේ කාර්ය මණ්ඩලයත් පිරිවරාගෙනය. ඔහු ඒ ගමනේදී ඉතා වැදගත් පරිපාලන තීන්දු ගැනීමට නියමිතව තිබුණේ නම් කමක් නැත. එහෙත් සිදුව තිබුණේ අලි වැට හැදීම, ගමට බස් රථයක් ලබා දීම වැනි කාරණා සිදුව ඇතිදැයි සොයා බැලීමය. රටේ ජනතාවට ජනාධිපතිවරයා ආදර්ශ ලබා දී තිබුණේ ඒ ආකාරයටය.
මීට පෙරගම්වලට බස් රථ ලබාදීම, අලිවැට දැමීම, පාසල් ගොඩනැගිලි ඉදි කිරීම ආදිය මහා ව්‍යාපෘති මෙන් ප්‍රවර්ධනය කළේ ප්‍රාදේශීය සභා මට්ටමේ දේශපාලනඥයන්ය. දැන් රටේ ජනාධිපතිවරයා ඒවා ප්‍රවර්ධනය කිරීම විහිළුවකි. අනෙක් පැත්තෙන් කොවිඩ්-19 පැතිරෙන සමයේ සංචරණ අඩු කරන්නැයි ජනතාවගෙන් ඉල්ලද්දී ඔහු කාර්ය මණ්ඩල පිරිවරාගෙන ඇවිදීම වැරදි ආදර්ශයකි.
අලුත් අවුරුදු සමයේ රටේ ජනතාවට පරෙස්සම් වෙන්නැයි උපදෙස් දී රාජපක්ෂ පවුලේ උදවිය මැදමුලනට එක් වී මුහුණු ආවරණද නැතිව අවුරුදු සැමරීය. දැන් ජනතාව බුද්ධිමත් නැති බව කියමින් ඇමතිවරුන් අවලාද නගයි. ගම සමඟ පිළිසඳර වැඩසටහන් මාලාවේ මුල්ම වැඩසටහන පැවැත්වූ හල්දුම්මුල්ල වෙලංවිට ගමට ජනාධිපතිවරයා ගමන් කර තිබුණේ හදිසියේ අලි වැට නිරීක්ෂණයට පමණක් විය නොහැක. ඔහු ගියේ තවත් ගමනක කොටසක් ලෙස විය හැක.
ජනාධිපති ගෝඨාභය රාජපක්ෂ ශ්‍රී ලංකා යුධ හමුදාවට බැඳී වසර 50ක් සම්පූර්ණ වෙද්දී, ඔහුත් සමඟ එකට යුධ හමුදාවට බැඳුණු නිලධාරීන් කණ්ඩායම සමඟ දියතලාව හමුදා කඳවුරේ උත්සවයකට සහභාගී වීමේ සූදානමක් තිබුණි. ජනාධිපතිවරයා අප්‍රේල් 24 සහ 25 දින දෙක ගත කිරීමට නියමිතව තිබුණේ එම මිතුරන් සමඟය. ඒ වෙනුවෙන් ඉරිදා පුවත්පත්වලට ලිපි පළ කර තිබුණි. ඒ ගෝඨාභය රාජපක්ෂ සමඟ එකට සිටි මේජර් ජෙනරාල් නන්ද මල්ලවආරච්චිගේ මතකය ඇසුරිනි.
අප්‍රේල් 25 දිනැතිව පළ වූ ඉරිදා පුවත්පත්වලට ලබා දී තිබුණු ලිපි වල මුලින් සඳහන් වී තිබුණේ එකට හමුදාවට බැඳුණු පිරිස එය සැමරීමට සති අන්තයේ එක් වූ බවය. එහෙත්, පසුව ඔවුන්ට උපදෙස් ලැබී තිබුණේ සති අන්තයේ ඔවුන් හමු වූ බව සඳහන් නොකර, හමු වීමට නියමිත බව සඳහන් කරමින් ලිපි නැවත සංස්කරණය කරන ලෙසය. සැලසුම් කර තිබුණු ආකාරයට හමුදා සගයන් සති අන්තයේ දියතලාවේදී හමු වුණාද, නැද්ද යන්න රහසකි. ලිපි ලියූ මාධ්‍යවේදීන් පවා ඒ ගැන දන්නේ නැත. එම හමුව පැවතුණාද? නැද්ද යන්න දැනුම් දී නැත.
සන්ඩේ අයිලන්ඩ් පුවත්පතේ ලේඛක ශමීන්ද්‍ර ෆර්ඩිනෑන්ඩු 2013 ජුනි 13 වැනිදා ලියා තිබුණු ලිපියක ගෝඨාභය රාජපක්ෂ හමුදාවෙන් ඉවත් වූ ආකාරය සඳහන් විය. 1990 ජුනි මාසයේදී ගෝඨාභය රාජපක්ෂ හමුදාවෙන් ඉවත් වී තිබුණි. ඒ, දෙවැනි ඊළාම් යුද්ධය ඇරඹෙද්දී හමුදාවෙන් ඉවත් වෙන ලෙස බිරිඳ අයෝමා රාජපක්ෂ කරන ලද බලපෑම නිසාය. ගෝඨාභය රාජපක්ෂ හමුදාවට බැඳී අවුරුදු 50ක් වීම මහ ඉහළින් සැමරුවාට ඔහු හමුදාවේ සිටියේ අවුරුදු 19ක් පමණි. ඉන් පසු 2006 දක්වා අවුරුදු 16ක්ම හමුදාව අත්හැර දමා සිටියේය. එයින් වැඩි කාලයක් සිටියේ ඇමෙරිකාවේය. ඒ කියන්නේ ගෙවුණු කාලයෙන් අඩක්වත් ඔහු හමුදාවේ ගත කර නැත.
ඉමිටියාස් මාධ්‍යවේදීන් ඉල්ලලා
පාර්ලිමේන්තු සභා ගර්භය තුළ හා ඉන් පිටතදී ඇති වූ සිද්ධින් පිළිබඳ විමර්ශනය කරන කමිටුව අප්‍රේල් 28 වැනිදා රැස් වී තිබුණි. එම රැස්වීමේදී ගැටුම්කාරී තත්වයෙහි සී.සී.ටීවී දර්ශනද නිරීක්ෂණය කර තිබේ.
එම කමිටු රැස්වීම නියෝජ්‍ය කථානායක රංජිත් සියඹලාපිටියගේ ප්‍රධානත්වයෙන් රැස් විය. කෙහෙළිය රඹුක්වැල්ල, රංජිත් මද්දුමබණ්ඩාර, ඉමිටියාස් බාකීර් මාකර් ඇතුළු පිරිසක් එම කමිටු රැස්වීමට සහභාගී වී තිබුණි.
එම අවස්ථාවේ කෙහෙළිය රඹුක්වැල්ල අමාත්‍යවරයා කියා තිබුණේ මන්ත්‍රීවරුන් පාර්ලිමේන්තුවේ අභ්‍යන්තර කටයුතු වීඩියෝ කිරීම තහනම් කරන්නට නිර්දේශ කළ යුතු බවය. එහෙත් එයට එරෙහිව පාර්ලිමේන්තු මන්ත්‍රී ඉමිටියාස් බාකීර් මාකාර් අදහස් දක්වා තිබුණි. ඔහු කියා තිබුණේ තමන් එවැනි තහනමකට කිසිසේත් එකඟ නොවන බවය.
මේ වන විට පාර්ලිමේන්තුවේ කටයුතු සඳහා සහභාගී වීමට මාධ්‍යවේදීන්ටත් තහනම් කර ඇති බව ඔහු සිහිපත් කර තිබුණි. මහජන නියෝජිතයන් පාර්ලිමේන්තුවේ හැසිරෙන ආකාරය දැන ගැනීමට ජනතාවට අයිතියක් ඇති බව ඔහු වැඩිදුරටත් සිහිපත් කර තිබුණි.
පාර්ලිමේන්තුව සජීවීව විකාශය කරන්නේ ඒ සඳහා බව අනෙක් පැත්තෙන් කියා තිබුණත් ඉමිටියාස් මන්ත්‍රීවරයා එයට පිළිතුරු දී තිබුණි. පාර්ලිමේන්තුවේ කටයුතු සජීවීව විකාශය කිරීමෙන් සිදු වන්නේ පාර්ලිමේන්තුවේ පවත්වන කතා සහ එම කතා පවත්වන මන්ත්‍රීවරුන්ගේ මුහුණු විකාශය කිරීම පමණක් බව ඔහුගේ පිළිතුරු වී තිබේ. ඊට අමතරව සිදුවන කටයුතු, මන්ත්‍රීවරුන්ගේ හැසිරීම් ජනතාවට දැන ගැනීමට නම් මාධ්‍යවේදීන් සිටිය යුතු බව ඔහු කියා තිබුණි.
පාර්ලිමේන්තුව එක් දිනක් රැස්වීමේදී මන්ත්‍රීවරුන් 225ක් සහ සේවක මණ්ඩලයේ 1000ක පමණ පිරිසක් පැමිණෙන බවත්, එතරම් පිරිසක් රැස්වෙද්දී මාධ්‍යවේදීන් 20ක් 25ක් නිසා කොවිඩ්-19 පැතිරෙන බව කීම ව්‍යාජයක් බවත් ඔහු කියා තිබුණි. සමාජ දූරස්ථභාවය රැකගෙන ඉතා ඉක්මනින් මාධ්‍යවේදීන්ට පාර්ලිමේන්තුව විවෘත කරන ලෙස ඔහු ඉල්ලා තිබුණි. එයට ප්‍රතිචාර ලෙස කෙහෙළිය රඹුක්වැල්ල මහතා කියා තිබුණේ තව සති දෙකක් පමණ නිරීක්ෂණය කිරීමෙන් පසු මාධ්‍යවේදීන් කැඳවීම සඳහා උත්සාහ කළ යුතු බවය.
චීනය
අප්‍රේල් 28 වැනිදා ශ්‍රී ලංකාවට චීන ආරක්ෂක ඇමති වෙයි ෆෙන්ග් පැමිණීම ශ්‍රී ලංකාවේ මෙන්ම ඉන්දියාවේත් විශාල අවධානයකට ලක් විය. මෙය ශ්‍රී ලංකාවේ පෝට් සිටි ව්‍යාපෘතිය පිළිබඳ විශාල සාකච්ඡාවක් පවතින මොහොතකි. චීනයේ සිට විදේශ කටයුතු අමාත්‍යවරයා හෝ ආර්ථික කටයුතු පිළිබඳ අමාත්‍යවරයෙක් වෙනුවට ආරක්ෂක අමාත්‍යවරයා පැමිණීම විශේෂයෙන් අවධානයට ලක් විය.
ජනාධිපති ගෝඨාභය රාජපක්ෂ සහ අගමැති මහින්ද රාජපක්ෂ වෙන වෙනම මුණ ගැසීමට චීන ආරක්ෂක අමාත්‍යවරයා කටයුතු කර තිබුණි.
මහින්ද රාජපක්ෂ හමුවෙන් පසු, එම හමුවේදී ඔහු දැක්වූ බව සඳහන් අදහස් සහිත නිවේදනයක්ද පළ කර තිබුණි. එහි එක් කොටසක් මෙසේය.
‘මෙම වසංගත තත්ත්වය මගහරවා ගත හැකි එකම ක්‍රමය එන්නත් කිරීම බව මුළු ලෝකයටම දැන් පැහැදිලි වී තිබේ. කොවිඩ් වසංගතය පැතිර ගිය දා සිට සමස්ත ශ්‍රී ලාංකිකයන් වෙනුවෙන් චීනය සීනෝෆාම් එන්නත් 600000 ක් සහ සෞඛ්‍ය ආරක්ෂක උපකරණ ඉතා නොමසුරුව පරිත්‍යාග කිරීම ඉතා අගය කොට සළකමි. මෙම වසංගත තත්ත්වය සමඟ කටයුතු කිරීමේ දී ඉදිරියටත් චීන රජයේ අඛණ්ඩ සහයෝගය අපි බලාපොරොත්තු වෙමු.
පසුගිය සති කිහිපය තුළ කොවිඩ් 19 ආසාධිතයින් පිරිස වැඩිවුව ද රටේ ආර්ථික හා සමාජයීය බලපෑම සළකා මුළු රටම අගුලු නොදැමීමට රජයක් ලෙස අපි තීරණය කළෙමු. පශ්චාත් වසංගත තත්ත්වයට මුහුණ දීම සඳහා තවත් බොහෝ දේ කළ යුතු බවට ඔබත් එකඟ වන බව මට විශ්වාසයි.’
එම නිවේදනයෙහි සඳහන් වන ආකාරයට චීනයේ එන්නත ශ්‍රී ලංකාව වෙත ලැබී ඇත්තේ ලංකාවේ සිටින චීන ජාතිකයන්ට ලබා දීමට නොවේ. එම එන්නතට අනුමැතිය ලබාගැනීමට සඳහා ආණ්ඩුව බලහත්කාරයෙන් මැදිහත් වෙද්දී, එය මාධ්‍යවල පළ වීමෙන් පසු ආණ්ඩුවට අඩිය පසුපසට ගැනීමට සිදු වී තිබුණි. දැන් ඔවුන් බලා ඉන්නේ එම එන්නතට ලෝක සෞඛ්‍ය සංවිධානයේ අනුමැතිය ලැබෙන තුරුය.
‘පරිත්‍යාගයක් ලෙස චීනයෙන් ලැබී ඇති සයිනොෆාම් එන්නත් මාත්‍රා 600,000 ඉදිරි සති කිහිපය තුළ ලෝක සෞඛ්‍ය සංවිධානයේ අනුමැතිය ලැබීමත් සමග මෙරට ජනතාවට ලබාදීමට සැලසුම් කර ඇත.’ යනුවෙන් ගෝඨාභය රාජපක්ෂ මහතාගේ ෆේස්බුක් පිටුවේද පළ වී තිබුණි.
සජිත්
විපක්ෂ නායක සජිත් ප්‍රේමදාස මහතා පසුගිය සතියේ කොවිඩ්-19 සමයේ විවිධ ස්ථානවලට ගමන් කිරීම සහ පුද්ගලයන් මුණ ගැසීම් අවලංගු කොට, ආදර්ශවත් වීම නොතකා හැර තිබුණි. ඔහු අප්‍රේල් 28 වැනිදා නොච්චියාගම හොරුවිල විහාරස්ථානයකට ගමන් කර තිබුණි. විහාරයට එක් වූ පිරිසක් අමතමින් ඔහු කතාවක්ද කර තිබුණි. කෙසේ වෙතත් ඔහු කළ කතාවේදී ආණ්ඩුවේ කොවිඩ්-19 පරිපාලනයේ අඩුපාඩු ගැන විවේචන එල්ල කර තිබුණි. ඉන් පසු ඔහු නැවත කොළඹ පැමිණ 28 වැනිදාම විපක්ෂ නායක කාර්යාලයේදී රක්ෂණ නියෝජිතයන් සමඟ සාකච්ඡාවක් පවත්වා තිබුණි.
අප්‍රේල් 27 වැනිදා ඔහු විදේශ තානාපතිවරුන් හා මහ කොමසාරිස්වරුන් පිරිසක් හමු විය. කැනඩාව, ස්විට්සර්ලන්තය, නෝර්වේ, ඇමෙරිකා එක්සත් ජනපදය, ඕස්ටේ්‍රලියාව යන රටවල රාජ්‍යතාන්ත්‍රික නිලධාරීන් ඔහු සමඟ සාකච්ඡාවට එක්ව සිටියේය.
පාර්ලිමේන්තු මන්ත්‍රීවරුන් වන තලතා අතුකෝරාල, ආචාර්ය හර්ෂ ද සිල්වා, එරාන් වික්‍රමරත්න ඇතුලු මහජන නියෝජිතයින් පිරිසක් එයට සහභාගී වී තිබුණි.
එහිදී ඔවුන් කතා කර තිබුණු මූලික කාරණාවක් වුණේ රජයේ මානව හිමිකම් කඩකිරීම් සහ ප්‍රජාතන්ත්‍රවිරෝධී ක්‍රියාකාරකම් පිළිබඳවය. විපක්ෂයේ දේශපාලන නායකයන්ට එරෙහි ක්‍රියාකාරකම් මෙන්ම, අධිකරණයට බලපෑම් කිරීම් ගැනත් එහිදී කතා කර තිබුණි.
විපක්ෂ නායක සජිත් ප්‍රේමදාසගේ ප්‍රබල සහ අගය කළ යුතු භාවිතාවක් වන්නේ වරින් වර මාධ්‍ය සාකච්ඡා පවත්වා මාධ්‍යවේදීන්ගේ ප්‍රශ්නවලට පිළිතුරු සැපයීමය. මහින්ද රාජපක්ෂ, රනිල් වික්‍රමසිංහ වැනි විපක්ෂ නායකවරුන් නිතර මාධ්‍ය සාකච්ඡාවලට සහභාගී වුණේ නැත. විදේශ තානාපතිවරුන් හමුවීමෙන් පසු මාධ්‍ය හමුවකට සහභාගී වී ප්‍රශ්නවලට පිළිතුරු දීමට ඔහු කටයුතු කළේය.
මාධ්‍ය සාකච්ඡාවේදී ඔහු මෙසේ කීය.
‘දේශපාලන, ආගමික, සංස්කෘතික අයිතිවාසිකම් ගැන සාකච්ඡා කරලා ඒ ගැටළුවලට විසඳුම් ලබා ගැනීම සඳහා විදේශීය ආධාර ලබාගැනීම වගේ කාරණා ගැන සාකච්ඡා කළා. මේ හමු වීම අපේ රටට ආර්ථික, සමාජයීය, දේශපාලනික අගයක් එකතු කරන හමු වීමක්. බලාපොරොත්තු වෙනවා මේ පවත්වන සාකච්ඡා හරහා අපේ රටේ දුකෙන් පෙළෙන ජනතාව, විවිධාකාරයෙන් අසරණභාවයට පත් වී සිටින ජනතාවට වඩාත් සැනසිලිදායක ජන ජීවිතයක්, සෞභාග්‍ය සම්පන්න ජන ජීවිතයක්, ප්‍රජාතන්ත්‍රවාදය ආරක්ෂා කෙරෙන, භාෂණයේ නිදහසේ සිට සෑම නිත්‍යානුකූල අයිතිවාසිකම් සුරකින රටක් නිර්මාණය කරන්නට අද සාකච්ඡා ඉවහල් වේවි කියන එක විශ්වාසය.
ජනතාවගේ නිදහස ආරක්ෂා කරන්න ඕනෑ. ජනතාවගේ ප්‍රජාතන්ත්‍රවාදී අයිතිවාසිකම් ආරක්සා කරන්න ඕනෑ. මන්ත්‍රීවරුන්ගේ දේශපාලන අයිතිවාසිකම් තියෙනවා. කතා කිරීමේ අයිතිය තියෙනවා. ඒවා ආරක්ෂා කිරීම සඳහා අපි සියළුදෙනා සමඟ අත්වැල් බැඳ ගන්නවා. සිවිල් සමාජයේ සියළු දෙනා, ජන සමාජයේ සියළු දෙනා, දේශීය වගේම විදේශීය කණ්ඩායම් සියල්ලක් එක්ක එකතු වෙලා අයිතිවාසිකම් රැක ගන්නවා. සංස්කෘතික අයිතීන්, ආගමික අයිතීන් වගේම ආර්ථික අයිතීන් තියෙනවා. ඒ සියල්ලක් පිළිබඳ සාකච්ඡා කරලා අපේ රටට ආර්ථික, සමාජයීය උපකාර ලබා ගෙන යහපත් රාජ්‍ය පාලනයක් පවත්වාගෙන යෑම පිළිබඳ සාකච්ඡා කළා.’■
