හිටපු පාර්ලිමේන්තු මන්ත්‍රී රන්ජන් රාමනායකට ජනාධිපති සමාව ලබා දෙන ලෙස ඉල්ලා ජනාධිපති ගෝඨාභය රාජපක්ෂගෙන් ලිඛිත ඉල්ලීමක් කිරීමට සමගි ජන බලවේගය සූදානමින් සිටින බව වාර්තා වේ. රන්ජන් රාමනායක මන්ත්‍රීවරයා වෙනුවෙන් එම ඉල්ලීම කිරීමට නියමිතය.
විපක්ෂ නායක සජිත් ප්‍රේමදාස පසුගිය සතියේ ගෝඨාභය රාජපක්ෂගෙන් රන්ජන් රාමනායක මහතාට ජනාධිපති සමාව දෙන ලෙස ඉල්ලූ නමුත්, ඒ සඳහා ලිඛිත ඉල්ලීමක් ඉදිරිපත් කරන ලෙස ගෝඨාභය රාජපක්ෂ මහතා ප්‍රතිචාර ලෙස දැනුම් දී ඇතැයි අනිද්දා වෙත අදහස් දැක්වූ සමගි ජන බලවේගයේ උප සභාපතිවරයෙක් කීය. ජනාධිපති සමාව ලබා දීමට නීතිමය ක්‍රියාවලියක් පවතින බවත්, මුලින් ලිඛිත ඉල්ලීමක් අවශ්‍ය බවත් ජනාධිපතිවරයා කී බව ඔහු පැහැදිලි කළේය. විපක්ෂ නායකවරයා එම ඉල්ලීම කළේ, තමන්ට ජනාධිපති සමාව ඉල්ලා සිටින ලෙස අගුණකොළපැළැස්ස බන්ධනාගාරයේ සිර දඬුවම් විඳිමින් සිටින රන්ජන් රාමනායක මහතා කළ ඉල්ලීමක් අනුව බවද ඔහු කීය.■
