- මේ එක් එක් අමාත්යාංශය එකින් එක ගෙන බැලූ විට පෙනෙන කාරණය වී ඇත්තේ මේ හමුදා නිලධාරීන්ගේ ආගමනයෙන් පසු රටට දැනෙන විශේෂ සමත්කමක් එම අමාත්යාංශ පෙන්වා නැති බවය.
යුද්ධය කළ හමුදාවට කොවිඩ් මර්දනය මහා කජ්ජක්දැයි ඇසුවාට එහි කෙරුවාව දැන් රටම දනී. ඒ ගැන විස්තර කිරීම පුන පුනා කීමක් වැනිය. යුද්ධය කළ තමාට රට කරවන්නත් දෙන්න යැයි ගෝඨාභය රාජපක්ෂ කී නිසා ඔහුට දැන් ජනතාව දැන් රටත් භාර දී ඇත. එහි කෙරුවාව ද අමුතුවෙන් විස්තර තළ යුතු නැත. දිනෙන් දින හා තැනින් තැන ජනාධිපතිවරයා සහ ඔහුගේ ආණ්ඩුවේ සාමාජිකයින් ඒ බව අපට පෙන්නුම් කරමින් සිටිති.
අමතරව යුද්ධයේදී ඔහු සමඟ කටයුතු කළ හා ඔහු සමඟ සිටි හමුදා සාමාජිකයින්ටත් දැනට සිටින අයට වඩා හොඳින් රටේ පරිපාලන වගකීම් දැරිය හැකි යැයි කියමින් ජනාධිපතිවරයා ඔවුන්ව රටේ තීරණාත්මක තනතුරුවලට පත්කරනු ලැබූහ. එහි එක් ප්රතිඵලයක් මේ වනවිට මහින්දානන්ද අලුත්ගමගේ ඇමතිවරයා ප්රකාශයට පත්කර තිබේ. ඒ ඔහු අමාත්ය ධුරය දරණ කෘෂිකර්ම අමාත්යාංශයේ ලේකම්කමෙන් විශ්රාමික මේජර් ජෙනරාල් සුමේධ පෙරේරාට ඉල්ලා අස්වන ලෙස කියූ බව කියමින්ය. ඊට හේතු වශයෙන් ඔහු කියා තිබුනේ ලේකම්වරයාගේ සෙමින් ගමන අමාත්යාංශයේ වේගවත් ගමනට නොගැලපෙන බවය.
මහින්දානන්ද ඇමතිවරයා එම ප්රකාශය කර තිබුනේ කෘෂිකර්ම අමාත්යාංශ ලේකම්කමින් සුමේධ පෙරේරා ඉවත්වූ බවට මාධ්ය වාර්තා පලවීමෙන් පසුය. ඇමතිවරයාගේ එම අදහස් දැක්වීම්වලින් පසු ඊට ප්රතිචාර වශයෙන් පෙරේරා මහතා මේවනවිට කියා ඇත්තේ ඔහුගේ ඉල්ලා අස්වීම වෙනත් කාරණා මත සිදුවන්නක් බවත්, එම තනතුරෙන් මුදා හරින ලෙස ජනාධිපතිවරයාගෙන් ඔහු ඉල්ලීමක් කර ඇති බවත්ය.
මෙහිදී ඇත්ත කියන්නේ මහින්දානන්ද ඇමතිවරයාද නැතහොත් විශ්රාමික මේජර් ජෙනරාල්වරයාද යන්න පැහැදිලි නැතත්, ජනාධිපතිවරයාගේ අති සමීපයෙක් වන සුමේධ පෙරේරා සම්බන්ධයෙන් හේතු රහිතව මහින්දානන්ද ඇමතිවරයා එවැන්නක් කියනු ඇතැයි සිතිය නොහැකිය. මන්ද සුමේධ පෙරේරා යනු කෘෂිකර්ම අමාත්යාංශ ලේකම්කමට පත්කිරීමට පෙර ජනාධිපතිවරයා පත්කරන ලද කාර්යසාධක බලකා කිහිපයකම සාමාජිකයකු ලෙස පත්කරන ලද විශ්වාශවන්තයකු වන බැවිනි. 2015 ජනාධිපතිවරණ ප්රතිඵල නිකුත් කිරීම අත්හිටුවා රට හමුදාව අතට ගන්නට ගිය මෙහෙයුමේ ප්රධානියකු වශයෙන් සිටියේද ඔහුය. ඒ අනුව මෙය ජනාධිපතිවරයාට එරෙහි ආණ්ඩුව අභ්යන්තර ඝට්ටනයේ ප්රකාශනයක් ලෙසින්ද අයකුට විග්රහ කරගත හැකිය.
එහෙත් අපේ අවධානය ඒ සඳහා නොවේ. මේ හමුදා ලොක්කන්ගේ වැඩකාර කම සාකච්ඡා කිරීම සඳහා පමණය. සුමේධ පෙරේරා පත්කළා යැයි කියා අප දන්නා රටට දැනෙන විප්ලවයක් කෘෂිකර්ම අමාත්යාංශයේ සිදුවූයේ නැත. පොහොර මිලදී ගැනීම් සම්බන්ධයෙන් ගත්කළ කාර්යක්ෂම හා අඩුමිල වැනි රටට වැඩදායි කිසිවක් වී නැත. මහා පරිමාණ හාල් මෝල් හිමියන්ගේ වී මිලදී ගැනීමේ බලය බිඳින්නට කිසිවක් කිරීමට හැකිවී නැත. සමහර විට එම කටයුතු තිබෙන්නේ බාහිරට පෙනෙවාටත් වඩා අසතුටුදායක මට්ටමෙන් විය හැකිය. මන්ද මේ හමුදා ලොක්කන්ට සිවිල් පරිපාලනයට අදාල දේවල් මුල සිට අලුතෙන් ඉගෙන ගන්නට සිදුවී ඇති නිසාය. පරිපාලනයේ එකේ පන්තියට ඇතුලත් කළ යුතු අය උසස් පෙළට ඇතුලත් කළ විට සිදුවන්නේ මේ වැනි දේය.
මේ වනවිට කැබිනට් හා රාජ්ය අමාත්යාංශ ලේකම ධුර දරණ හිටපු සහ ඉන්නා හමුදා සාමාජිකයින් සංඛ්යාව 06කි. ඒ ආරක්ෂක අමාත්යාංශ ලේකම් ජෙනරාල් කමල් ගුණරත්න (ඔහු රාජ්ය ආරක්ෂක රාජ්ය අමාත්යාංශයේද ලේකම්වරයාය ) ඉහත කී කෘෂිකර්ම අමාත්යාංශ ලේකම් විශ්රාමික මේජර් ජෙනරාල් සුමේධ පෙරේරා, විදේශ අමාත්යාංශ ලේකම් අද්මිරාල් ජයනාත් කොළඹගේ, මහජන ආරක්ෂක අමාත්යාංශ ලේකම් විශ්රාමික මේජර් ජෙනරාල් ජගත් අල්විස්, සෞඛ්ය අමාත්යාංශ ලේකම් මේජර් ජෙනරාල් සංජීව මුණසිංහ, වනජීවි රැකවරණ, අලිවැට හා අගල් ඉදිකිරීම් රාජ්ය අමාත්යාංශයේ ලේකම් විශ්රාමික මේජර් ජෙනරාල් පාලිත ප්රනාන්දු, බන්ධනාගාර කලමනාකරණ හා සිරකරුවන් පුනරුත්ථාපන රාජ්ය අමාත්යාංශයේ ලේකම් විශ්රාමික මේජර් ජෙනරාල් වී ආර් සිල්වා යන අයය.
මේ එක් එක් අමාත්යාංශය එකින් එක ගෙන බැලූ විට පෙනෙන කාරණය වී ඇත්තේ මේ හමුදා නිලධාරීන්ගේ ආගමනයෙන් පසු රටට දැනෙන විශේෂ සමත්කමක් එම අමාත්යාංශ පෙන්වා නැති බවය. විදෙස් සංචාරක බුබුළු, නිදහස් දින සංදර්ශන පැවැත්වූවන්ගේ බුබුළු කොවිඩ් පතුරුවමින් දැන් පුපුරා ගොස් ඇත. රටට වැඩිම විදේශ විනිමයක් රැගෙන එන මැදපෙරදිග ශ්රමිකයින් නිවැදි ලෙස රටට ගෙන්වා ගැනීමේ වැඩපිළිවෙලක් නැත. එම රටවල ඔවුන් ඉන්නේ අන්ත අසරණ තත්වයේ අනාථවීය. රටේ පාතාලය යහතින් කටයුතු කරන බව සිදුවන මිනීමැරුම් හා මත්ද්රව්ය ජාවාරම් පිළිබඳ සිදුවීම් වලින් පෙනේ. අධික අවදානම නිසා බන්ධනාගාර ගතවූවන්ගේ නොසන්සුන්තා අතිමහත්ය. කොවිඩ් එන්නත් කරනයද දැන් ප්රමුඛතා අනුපිළිවෙලින් පිට පැන ඇත. ඒ අස්සේ රටේ බොහෝ ගම්මානවලට අලි කරදරේය. ඒ නිසා උපවාසද පටන් ගෙන ඇත.
මේ ලැයිස්තුව මේ ආකාරයට දිගටම ලිවිය හැකිය. පොදුවේ රටේ දුර්වලතාවය අතරේ හමුදා ලොක්කන්ට භාර දී ඇති අමාත්යාංශ විෂයන්ට අයත් කාරණා ඉස්මතු වී පෙනේ. යුද්ධයේ දී සමත් මෙන් පෙන්වූ ජනාධිපති ගොඨාභය රාජපක්ෂගේ හමුදා ලොක්කන්ගේ සිවිල් පරිපාලනයේ වැඩ කිඩ හෙවත් කෙරුවාව එසේය. එයද රාජ්ය ආයතනවලට පත්කර ඇති හිටපු හමුදා ලොක්කන්ගේ කෙරුවාවට අමතරවය.■
