පිළිසඳරට 150 සීමාව නැද්ද?

කොවිඩ් ආසාදිත පුද්ගලයන් හමුවීම බස්නාහිර පළාතෙන් පිට වැඩි වශයෙන් හමුවන්නට පටන් ගැනීමෙන් පසු මිනිසුන් ඒකරාශි වන සියලු අවස්ථා සීමා කළ බව සෞඛ්‍ය බලධාරින් ප්‍රකාශ කරන්නට විය.
ඒ අනුව මංගල හා අවමංගල උත්සවයකට සහභාගි කර ගත හැකි සංඛ්‍යාව නැවතත් 50 දක්වා අඩුකරන බව ප්‍රකාශයට පත්විය. ඊට උත්සව කටයුතුවලට සම්බන්ධ වන පිරිස්වලින් එල්ල වූයේ දැඩි විරෝධයකි. උත්සව කටයුතු සඳහා සහභාගිවන කලාකරුවෝද මාධ්‍ය සාකච්ඡා පවත්වමින් එයට විරෝධය දැක්වූහ.
එම සෞඛ්‍ය තීරණය සම්බන්ධයෙන් කරන ලද විමසීමකදී කොරෝනා ව්‍යාප්තිය වැළැක්වීමේ ජාතික ක්‍රියාන්විත මධ්‍යස්ථානයේ සම ප්‍රධානී යුද හමුදාපති ශවේන්ද්‍ර සිල්වා කියා ඇත්තේ එම උත්සව අවස්ථා 50ක පිරිසකට සීමා කිරීමට කිසිදු තීරණයක් මෙතෙක් ගෙන නැති බවය. එම උත්සව අවස්ථාවන්ට පුද්ගලයන් 150ක උපරිමයක් සහභාගි කරගත හැකි බවත්, එය සිදුකළ යුත්තේ එමෙන් දෙගුණයක් සහභාගි කරගත හැකි ඉඩක බවත් වැඩි දුරටත් අවධාරණය කර ඇත.
වත්මන් කොවිඩ් ව්‍යාප්තිය මත පාසල් විවෘත කිරීම පමාවූ අතර විවෘත කරන ලද පාසල්ද නැවත වසා දැමුණී. එමෙන්ම පාසල්වල සියලු උත්සව අවස්ථා අවලංගු කළේය. ඒ ජනාධිපතිවරයාගේ ප්‍රධානත්වයෙන් පළමු වසරට ළමයින් ඇතුළත් කිරීමේ උත්සවයක් තබමින් හා එම තීරණය එම උත්සවයට පමණක් අවලංගු වන පරිදිය.
උත්සව යන්න මංගල, අවමංගල අවස්ථාවන්ට පමණක් සීමා වන්නේ නැත. සීමාව 50ද 150ද සියලු අවස්ථාවන්ට පොදුවිය යුතුය. එය ජනාධිපතිවරයාගේ ගම සමඟ පිළිසඳරටද අදාල විය යුතුය. අප දකින ගම සමඟ පිළිසඳරට සහභාගි වන පිරිස 150 ඒවා මෙන් කිහිප ගුණයකි. එසේම එම පිරිස මුව ආවරණ පැළැඳ සිටියත් මීටරයක දුර පවත්වාගෙන සිටින්නේ නැත. පෙනී යන්නේ එහි නිර්මාතෘ ජනාධිපතිවරයා පවා එම උපදෙස් ලබාදී නැති බවය.
අපගේ ප්‍රශ්නය වන්නේ පුද්ගලයින් 150 නීතිය ගම සමඟ පිළිසඳරට අදාල වන්නේ නැතිද යන්නය.■