- රාජපක්‍ෂවරුන් වන්දනා කරයි.
- අධිකරණයේ නඩු ඉල්ලා අස්කරගන්න කියයි.
- චුදිතයන් නිදොස්කර නිදහස් කරන්න කියයි.
- අධිකරණයත් නීතිපතිත් ඊට යටත් වේවිද?
ජනාධිපති ගෝඨාභය, 2015-19 අතර කාලයේ සිදුවූ දේශපාලන පළිගැනීම් ගැන විමර්ශනය කිරීමට පත්කළ ජනාධිපති කොමිෂන් සභාවේ නිර්දේශ ක්‍රියාත්මක කරන්නට ඇමති මණ්ඩලය තීරණය කළ බව මාධ්‍ය වාර්තා කළේය. මේ වන විට, කොමිෂන් සභාව ජනාධිපතිවරයාට ඉදිරිපත් කළ වාර්තාව නිල නොවන ආකාරයෙන් ප්‍රසිද්ධියට පත්වී තිබේ.
වාර්තාව කියවන විට, ලංකාවේ ජනාධිපති කොමිෂන් සභා දේශපාලන පළිගැනීම් සඳහා කොයිතරම් අපයෝජනය කරන්නේද යන ප්‍රශ්නය පළමුව ඇතිවේ. දෙවනුව ඇතිවන්නේ, විශ්‍රාමලත් ශ්‍රේෂ්ඨාධිකරණ හා අභියාචනාධිකරණ විනිසුරුවරුන්ට මේ තරම් අපකීර්තිමත්, පහළ තැනකට වැටිය හැකිද? වැටිය යුතුද? යන ප්‍රශ්නයි. තුන්වැන්න, මෙවැනි කැළෑ කොමිසමක් අභියෝගයට ලක්කරන්නට සමත් නීතියක් හා බලවත් දේශපාලන ව්‍යාපාරයක් ලංකාවේ නැතිද යන්නයි. සිව්වැනි ඉතාමත්ම වැදගත් ප්‍රශ්නය නම්, මෙවැනි කැළෑ කොමිසමකින් දෙන නියෝග නීතිපතිවරයාත්, ශ්‍රේෂ්ඨාධිකරණ ඇතුළු අධිකරණ පද්ධතියත් පිළිගන්නේද යන්නයි. නැතිනම්, එය අධිකරණයට කළ අපහාසයක් ලෙස සලකා තම ගෞරවය රැකගැනීම සඳහා කටයුතු කරන්නේද යන්නයි.
අප සිතන අන්දමට නම්, රන්ජන් රාමනායක අධිකරණයට අපහාස, අගෞරව කිරීම ගැන අවුරුදු හතරක සිරදඬුවමක් නියම කළ අධිකරණයට, දැන් තමන්ගේ ගෞරවය රැකගැනීම පිළිබඳ අම්ල-භෂ්ම පරීක්‍ෂණයකට මුහුණ දීමට සිදුව ඇත්තේය.
ශ්‍රී ලංකා නීතිඥ සංගමය ඒ ගැන කරන්නේ මොනවාද? කැළෑ කොමිසමකින් තමන් වෘත්තියේ යෙදෙන අධිකරණයට බලවත් අපහාසයක් කර තිබියදී නීතියේ පාලනය රැකගැනීමට කැපවී සිටින නීතිඥ සංගමය ප්‍රතිචාර දක්වන්නේ කෙසේද?
ප්‍රකට නීතිඥවරයකු මෙන්ම රටේ අධිකරණ පද්ධතිය ගැන ගෞරවයෙන් ක්‍රියාකරන අධිකරණ ඇමතිවරයා තමා සිටින ඇමති මණ්ඩලය අනුමත කළ මේ නිර්දේශ ගැන දක්වන ප්‍රතිචාරය කුමක්ද?
කොමිෂන් සභාවේ වාර්තාව පටන්ගන්නේම විහිළුකාර රාජපක්ෂ වන්දනාවකිනි. ඒ වචනවලින් සංකේතවත් වන්නේ කොමිසමේ සාමාජිකයන් වන උපාලි අබේරත්න, චන්ද්‍රා ජයතිලක හා චන්ද්‍රා ප්‍රනාන්දු කොයිතරම් රාජපක්ෂ අන්තේවාසිකයන්ද යන්නයි. ඒ වාගේම කොයිතරම් නොපැසුණු අයද යන්නයි. ඒ විතරක් නොවේ. මේ තුන්දෙනා, ලෝකයේ සිදුවන දේ ගැන කොයිතරම් අන්ධද යන්නයි. ඒ වාගේම, සිදුවන දෙයින් තමන්ට වුවමනා කොටසක් අල්ලාගෙන පක්‍ෂපාතී අර්ථකථන දෙන්නට කොයිතරම් සමතුන්ද යන්නයි. මෙවැනි අමනොඥයන් තිදෙනකු මුලසුන හෙබවූ කොමිසමකින් නීතියේ පාලනය බිඳවැටීමක් මිස වෙනත් යහපතක් බලාපොරොත්තු වන්නේ කෙසේද?
මේ, කොමිෂන් වාර්තාවේ පෙරවදන හෙවත් පසුබිම කියවන්න.
පසුබිම
ඉන්දියන් සාගරයේ මුතු ඇටය යැයි විරුදාවලිය ලත් මෙම මනරම් දිවයිනෙහි ඒකීයභාවය ඉතිහාසයේ විවිධ යුගයන්හි එල්ල වූ විදේශීය ආක්‍රමණවලින් සහ දේශීය වශයෙන් පැනනැගුණු ආක්‍රමණික ස්වභාවයේ කැරලිවලින් සුනු විසුනු වී ගියේය. එවැනි සෑම අවස්ථාවකදීම යුගයේ වීරයන් පහළ වූ අතර ඔවුන් ආක්‍රමණිකයින් මෙන්ම දේශීය කැරලිකරුවන් ද පලවා හැර රටේ ඒකීයභාවය සුරක්ෂිත කිරීමට අභීතව සටන් කළහ.
අවසන් වශයෙන් බි්‍රතාන්‍ය ජාතිකයින් ශ්‍රී ලංකාව ඔවුන්ගේ යටත් විජිතයක් බවට පත්කරගෙන ශතවර්ෂාධික කාලයක් ගෙන ගිය පාලනයෙන් රට මුදවා ගැනීමට මහත් අරගලයක් සිදු කරමින් 1948 වර්ෂයේ දී නිදහස ලබාගෙන ඒකීය රාජ්‍යයක් තුළ ලාංකික ජනතාවට සාමකාමී ලෙස ජීවත්වීමේ වරම ලබා දීමට මෙම දිවයිනේ බිහි වූ ජාතික වීරයින් ට අවකාශය ලැබිණි.
එසේ වුවත් එසේ ලබාගත් නිදහසට 1971 වර්ෂයේ දියත් කළ ත්‍රස්තවාදී කැරැල්ලෙන් බරපතල හානි පැමිණුනි. ත්‍රස්තවාදීන් කැරැල්ලේ ගිනි පුපුරු නිවී යාමටත් ප්‍රථම 1976 වර්ෂයේ දී යාපනය නගරාධිපති දොරේ අප්පා මහතාට වෙඩි තබමින් ද්‍රවිඩ ඊලාම් විමුක්ති කොටි ත්‍රස්තවාදීන් විසින් නැවතත් ශ්‍රී ලංකාවේ ඒකීයභාවයට සහ සාමකාමීත්වයට බාධා පමුණුවමින් සිවිල් වැසියන් ඝාතනය කරමින් රට දෙකඩ කර වෙනම පාලනයක් ඇති කිරීම සඳහා ඇමෙරිකාව එංගලන්තය ඇතුළු බටහිර රාජ්‍ය කිහිපයක ආශීර්වාදයෙන් යාපනය ප්‍රදේශය මුල් කරගෙන ලේ හලන බිහිසුණු අරගලයක් දියත් කළහ.
1975 වර්ෂයෙන් පසුව මෙරට පාලනය භාරගත් ජනාධිපති ජේ ආර් ජයවර්ධන, ජනාධිපති ආර් ප්‍රේමදාස, ජනාධිපති චන්ද්‍රිකා බණ්ඩාරනායක කුමාරතුංග සහ අග්‍රාමාත්‍ය රනිල් වික්‍රමසිංහ යන රාජ්‍ය නායකයන් මෙම ද්‍රවිඩ ඊලාම් ත්‍රස්තවාදී කැරැල්ල මැඩ පැවැත්වීමට අසමත් වූහ.
මෙම කාලය තුළදී මෙම ත්‍රස්තවාදී කැරැල්ල කොතෙක් දුරට වර්ධනය වූවා ද කිවහොත් 2005 වන විට ලංකාවේ පැරණිම රාජධානිය වූ අනුරාධපුරයෙන් ඔබ්බට යාපනය දෙසට සාමාන්‍ය පුද්ගලයෙකුට යාමට නොහැකි වන අන්දමට මෙම දිවයිනෙහි පාලන තන්ත්‍රය දෙකඩ වී ගොස් තිබුණි.
අවුරුදු 30කට වැඩි මෙම අඳුරු යුගය තුළ ද්‍රවිඩ ඊලාම් කොටි ත්‍රස්තවාදීන් බෞද්ධයින්ගේ මුදුන් මල්කඩ වූ ද ලෝක උරුමයක් වූ ද ශ්‍රී දළදා මාලිගාව, ශ්‍රී මහා බෝධිය ඇතුළු බෞද්ධ සිද්ධස්ථාන රැසක් විනාශ කර ලෙයින් තෙත් කළහ. ජනාධිපති රණසිංහ ප්‍රේමදාස ඇතුළු දේශපාලනඥයින්, සිවිල් පුරවැසියන්, ත්‍රිවිධ හමුදා සහ පොලිස් නිලධාරීන්, බෞද්ධ භික්ෂූන් වහන්සේලා ඇතුළු විශාල පිරිසක් ඝාතනය කළහ. කටුනායක ගුවන් තොටුපල ඇතුළු මහජන දේපල බෝම්බ දමා විනාශ කළහ. 2005 වර්ශය වන විට ශ්‍රී ලංකාව වන විට අරාජික තත්වයක් කරා ළඟා වෙමින් තිබුණි.
මෙවන් අඳුරු යුගයක දී 2005 වර්ෂයේ පැවති ජනාධිපතිවරණය ජයග්‍රහණය කරමින් මහින්ද රාජපක්ෂ මැතිතුමා ශ්‍රී ලංකාවේ ජනාධිපතිවරයා වශයෙන් තේරී පත් වූ අතර එතුමාගේ ප්‍රධානත්වයෙන් නව රජයක් බිහිකර ආරක්ෂක ලේකම්වරයා වශයෙන් පත් වූ වර්තමාන ජනාධිපති ගෝඨාභය රාජපක්ෂ මැතිතුමාගේ හමුදා අත්දැකීම් උපයෝගී කරගෙන ත්‍රිවිධ හමුදාව සහ පොලිස් බලකාය මෙහෙයවමින් ඊලාම් කොටි ත්‍රස්තවාදීන්ගේ යුද්ධයට එරෙහි මානුෂීය සටන නව මුහුණුවරකින් දියත් කරන ලදී.
අවුරුදු කීපයක් පුරා සිදුකරන ලද බිහිසුණු සටන්වලින් පසුව 2009 වර්ෂයේ මැයි 19 වන දින ඊලාම් කොටි ත්‍රස්තවාදීන් පලවා හරිමින් ශ්‍රී ලංකාව නැවතත් ඒකීය රාජ්‍යයක් බවට පත් කිරීමට මෙම වීරෝදාර නායකයන්ට සහ රණවිරුවන්ට හැකිවිය.
ද්‍රවිඩ ඊළාම් ත්‍රස්තවාදීන් පෝෂණය කළ බටහිර නායකයන්ට මෙම විජයග්‍රහණය ඔවුන්ගේ මනදොල සපුරන්නක් නොවීය. එබැවින් ද්‍රවිඩ ඊලාම් යුද්ධයේ අවසන් මානුෂීය සටනේදී යුද අපරාධ සිදු කළ බවට අභූත චෝදනා ඊලාම් යුද්ධයේ සැබෑ විරුවන්ට එරෙහිව ද්‍රවිඩ ඩයස්පෝරාවෙන් පන්නරය ලද බටහිර නායකයන් විසින් එල්ල කරන ලදී.
2015 ජනවාරි 8 වන දින පිහිටුවනු ලැබූ නව රජය මේ සඳහා සුදුසුම තෝතැන්න බවට තෝරාගත් බටහිර නායකයින් නව රජයේ අනුග්‍රහය ඇතිව එක්සත් ජාතීන්ගේ මානව හිමිකම් සැසියේ දී 30/1 යෝජනාවලිය සම්මත කර ගන්නා ලදී. මෙම යෝජනාවලිය දඩමීමා කරගත් නව රජය තම සිතැඟි ඉටුකර ගැනීමේ අභිප්‍රාය ක්‍රියාත්මක කරමින් තම දේශපාලන සතුරන්ගෙන් පළිගැනීමේ ක්‍රියාවලිය ආරම්භ කළ බවටත් එසේම දේශපාලන පළිගැනීම සඳහා අග්‍රාමාත්‍යවරයාගේ විෂය පථය යටතේ ක්‍රියාත්මක කෙරුණු දූෂණ විරෝධී කමිටුව නමැති නිල නොවන සංවිධානයක් පිහිටුවා එහි නිර්දේශයන් ඒ සමගම පිහිටුවා ගත් මූල්‍ය අපරාධ විමර්ශන කොට්ඨාසය නැමැති නිල නොවන පොලිස් ඒකකයක් මගින් ද එසේ ම අල්ලස් හෝ දූෂණ චෝදනා විමර්ශන කොමිෂන් සභාව, ශ්‍ර්‍රීි ලංකා පොලිසියේ පොලිස් විශේෂ විමර්ශන ඒකකය සහ අපරාධ පරීක්ෂණ දෙපාර්තමේන්තුව මගින් ද ක්‍රියාත්මක කළ බවටත් සඳහන් කරමින් පළිගැනීමට ලක්වූ පුද්ගලයන්ගෙන් පැමිණිලි ගලා එන්නට විය.
මහින්ද රාජපක්ෂ සහ ආරක්ෂක ලේකම් ගෝඨාභය රාජපක්ෂ ඇතුළු යුද විරුවන්ට එරෙහිව අසත්‍ය නඩු පවරා ඔවුන් රක්ෂිත බන්ධනාගාර ගත කර ඇමරිකාව හා බි්‍රතාන්‍ය ඇතුළු බටහිර රාජ්‍ය නායකයින් සහ එක්සත් ජාතීන්ගේ මානව හිමිකම් කොමිසම සතුටු කිරීමට නව රජය ක්‍රියා කරන බවට විවිධ මාධ්‍ය ඔස්සේ ප්‍රසිද්ධියේම චෝදනා එල්ලවිය. යුද නායකයින් හා රණවිරුවන් සිරගත කිරීම සඳහා අවශ්‍ය කටයුතු සම්පාදනය කරන ලෙසට තමන්ට මෙම දේශපාලනයෙන් බලපෑමක් බලපෑම් කරන බවට රාජ්‍යතන්ත්‍රයේ ඉහළ නිලතල දැරූ නිලධාරීන් ප්‍රසිද්ධියේම නව රජයට එරෙහිව චෝදනා කළහ.
අල්ලස් හෝ විමර්ශන කොමිෂන් සහාව, මූල්‍ය අපරාධ විමර්ශන කොට්ඨාශය, පොලිස් විශේෂ විමර්ශන ඒකකය සහ අපරාධ පරීක්ෂණ දෙපාර්තමේන්තුව මහජනයා විසින් සිදුකරනු ලබන සමහර පැමිණිළි නොසලකා හරින බවට දේශපාලන පළිගැනීම සඳහා රජයට අවශ්‍ය පැමිණිළි විභාග කර නඩු පැවරීම් සිදු කරන බවටත් චෝදනා එල්ල විය.
එබැවින් මෙම පැමිණිලි සහ චෝදනා පිළිබඳව පරීක්ෂණ සිදු කිරීමට 2019 නොවැම්බර් 16 වැනි දින පැවති ජනාධිපතිවරණ බලයට පැමිණි ගෝඨාභය රාජපක්ෂ මැතිතුමා විසින් මෙම කොමිෂන් සභාව ස්ථාපිත කිරීමට පියවර ගන්නා ලදි.’
මේ පෙරවදනත්, එහි පාවිච්චි කර ඇති 5වැනි ශ්‍රේණියේ සිසුන් රචනා ලියන වචනත්, එහි ඇති වන්දනාමානනයත් අපට පෙන්වා දෙන්නේ කුමක්ද? තමන්ට පැවරී ඇති රාජකාරිය කිරීමට කිසිම සුදුසුකමක් මේ තුන්දෙනාට නැති බවයි. ඒ සඳහා අවශ්‍ය මධ්‍යස්ථ සිහිකල්පනාවකුත්, ලෝකය ගැන දැනුමකුත්, ඉස්පාසුවකුත් ඔවුන්ට නැති බවයි.
මීට පෙරද අප ලියා ඇති පරිදි, යහපාලන ආණ්ඩුව විසින් දූෂණ විරෝධී කමිටුව හා දූෂණ විරෝධී කමිටු ලේකම් කාර්යාලය පිහිටුවීම සඳහා තීරණය කළේ එම ආණ්ඩුවේ ඇමති මණ්ඩලයයි. ඊට අදාළ මූල්‍යමය ප්‍රතිපාදන වෙන්කිරීම, අවශ්‍ය නිලධාරීන් බඳවාගැනීමට අනුමැතිය දීම කළේද ඇමති මණ්ඩලයයි. ඒ නිසා, එය ජනාධිපති මෛත්‍රීපාල සිරිසේන, අගමැති රනිල් වික්‍රමසිංහ ඇතුළු සියලුම ඇමතිවරුන්ගේ සාමූහික වගකීමකි. අගමැති ලෙකම්වරයා විසින් කරන ලද නිල ඉල්ලීමකට, නීතිපති දෙපාර්තමේන්තුවෙන් සොලිසිටර් ජෙනරාල් ජනාධිපති නීතිඥ කපිල වෛද්‍යරත්න හා නියෝජ්‍ය සොලිසිටර් ජෙනරාල් තුසිත් මුදලිගේ කමිටුවේ කාර්ය සඳහා යෙදවූයේ නීතිපතිවරයාගේ නියමයෙනි. ඒ ගැන විස්තර මීට පෙර අනිද්දා පුවත්පතේ පළවී තිබේ. එහෙව් නීත්‍යනුකූල ආයතනයක්, මේ කොමිසමට අනුව, ‘රාජ්‍ය නොවන සංවිධානයකි.’ වාර්තාව පුරා ඔවුන් දූෂණ විරෝධී කමිටුවටත්, ලේකම් කාර්යාලයටත් පාවිච්චි කර ඇති හැඳින්වීම එයයි. ඔවුන්ගේ නිගමනය වන්නේ, එවැනි රාජ්‍ය නොවන සංවිධානයකට මුදල් වියදම් කිරීම, රජයේ නිලධාරීන් සේවයේ යෙදවීම අපරාධයක් බවයි. ආණ්ඩුක්‍රම ව්‍යවස්ථාව උල්ලංඝනය කිරීමක් බවයි.
මේ අද්විතීය දැනුම කොමිසමට දී ඇත්තේ කවුද? ජනාධිපති නීතිඥ විජේදාස රාජපක්‍ෂය. පුදුමයකට මෙන්, මේ මහතා, එවකට ඇමති මණ්ඩලයේද සාමාජිකයෙකි. ඉහත කී සාමූහික වගකීමෙන් බැඳෙන්නෙකි. තමා කමිටුව පත්කිරීම ගැන විරුද්ධ වීම නිසා ඇමති මණ්ඩලය තුළ තමාට එරෙහිව මතයක් පැනනැගුණු බව ඔහු කොමිසම හමුවේ කියා තිබේ. එහෙත්, ප්‍රකට කාරණය නම් කුමක්ද? නීති විරෝධී ආයුධ ජාවාරමක් ගැන සහ පාවෙන අවි ගබඩාවක් පවත්වාගෙන යෑම ගැන බරපතළ චෝදනා ලැබූ නිශ්ශංක සේනාධිපති සමග විජේදාස රාජපක්ෂ මහතා සමීප සම්බන්ධතා පැවැත්වූ බවයි. ඔවුන්ගේ පවුල් එකම රථයේ විදේශ රටවල සංචාරවල යෙදුණු ඡායාරූප ඒ කාලයේ සමාජ මාධ්‍ය අවකාශයේ සුලබ විය.
කොමිසමේ අමනොඥබව එක උදාහරණයක් මගින් පමණක් වුවද පැහැදිලි කළ හැකිය.
මරණ දඬුවම් ලැබ බන්ධනාගාරගතව සිටින දුමින්ද සිල්වා වෙනුවෙන් ඔහුගේ පියා මේ කොමිසමට ගියේය. ඒ වන විට, කොමිසමේ පැමිණිලි ගැනීමේ කාලය අවසන්ව, විමර්ශනද අවසන්ව, වාර්තාව ලිවීමට පමණක් ජනාධිපති විසින් සති දෙකක කාලයක් ලබාදී තිබුණ අවස්ථාවක් විය. ඒ අනුව, එක, පැමිණිල්ල බාරගත්තේ අවසාන දිනයට පසුවය. දෙක, පැමිණිල්ල පිළිගත් කොමිසම, දින දෙකක් තුළ ප්‍රකාශ ලියාගෙන, දුමින්ද සිල්වාගේ පියාගෙන් (පමණක්) සාක්‍ෂිද පුදුම හදිසියකින් ලබාගත්තේය. තුන, දුමින්ද සිල්වා රජයේ සේවකයෙක් නොවේ. කොමිසම පත්කර තිබුණේ 2015න් පසු රජයේ සේවකයන්ට සිදුවූ දේශපාලන පළිගැනීම් ගැන සෙවීමටය. හතර, දුමින්ද සිල්වාට විරුද්ධව චෝදනා නැගුණේ 2015න් පසු නොවේ. 2011 ඔක්තෝබර් 8 පළාත් පාලන මැතිවරණයේදී කළ ඝාතනයක් ගැනය. මහින්ද රාජපක්ෂ ආණ්ඩුව කාලයේදීය. එනිසා කොමිසමේ නිල විමර්ශන කාලයට ඒ කාලය හසු නොවේ. පහ, දුමින්ද ගැන ත්‍රිපුද්ගල මහාධිකරණය දුන් තීන්දුව, දුමින්ද විසින්ම අභියාචනය කරන ලදුව, ශ්‍රේෂ්ඨාධිකරණය විසින් එලෙසම තහවුරු කරන ලදි.
එහෙව් කාරණයක් ගැන මේ කොමිසම කියන්නේ කුමක්ද?
‘කොළඹ මහාධිකරණයේ නඩුවේ අධිචෝදනා පත්‍රයෙහි දැක්වෙන සියලුම චෝදනාවලින් දුමින්ද සිල්වා නිදොස් කොට නිදහස් කළ යුතුය. දුමින්ද සිල්වා වරදකරු කිරීම පිළිබඳ නඩු තීන්දුව පුළුල් විනිශ්චය මණ්ඩලයක් මගින් අධිකරණ සමාලෝචනයක් සඳහා නීතිපතිවරයා විසින් ශ්‍රේෂ්ඨාධිකරණය වෙත ඉල්ලීමක් කළ යුතුය.’ යනුවෙනි.
මෙවැනි කොමිසමක වාර්තාවක්, අප සැලකිය යුත්තේ නීතියේ පාලනයට කෙරෙන මහා විනාශයක් ලෙස නොවේද?
මේ කොමිසමේ තීරණ හා නිර්දේශවලින් සමහරකි.
1. අද්මිරාල් ඔෆ් ද ෆ්ලීට් වසන්ත කුමාර ජයදේව කරන්නාගොඩ (පැමිණිලි අංකය 01-2020, 5-2020)
කොළඹ කොටුව මහේස්ත්‍රාත් අධිකරණයෙහි ගොනු කරඇති බී732/09 වාර්තාවෙහි සියලුම චෝදනාවලින් නිදොස් කර නිදහස් කළ යුතුය. කොළඹ ත්‍රිපුද්ගල මහාධිකරණයේ පවරා ඇති 1448/2020 දරන නඩුවේ අධිචෝදනා පත්‍රය ඉල්ලා අස්කර ගැනීම මගින් එකී අධිචෝදනා පත්‍රය නිෂ්ප්‍රභ කර පැමිණිලිකරු සියලු චෝදනාවලින් නිදොස් කොට නිදහස් කළ යුතුය.
2. හේවා ගුණරත්න භාෂ්වර සේනාංක (816/2020)
කොළඹ කොටුව මහේස්ත්‍රාත් අධිකරණයෙහි බී2881/2016 වාර්තාවෙහි සියලුම චෝදනාවලින් නිදොස් කොට නිදහස් කළ යුතු ය. භාෂ්වර සේනාංක සහ දොන් සතරසිංහ ජයවීරට එරෙහිව කොළඹ මහාධිකරණය ඉදිරියේ පවරා ඇති අංක එච්සී 50/2018 අධිචෝදනා පත්‍රය ඉල්ලා අස්කර ගැනීමෙන් නිදොස් කොට නිදහස් කළ යුතුය.
3. උදය ප්‍රභාත් ගම්මන්පිල (545/2020)
කොළඹ කොටුව මහේස්ත්‍රාත් අධිකරණයෙහි බී2254/2015 වාර්තාව ඉල්ලා අස්කර ගෙන සියලුම චෝදනාවලින් නිදොස් කර නිදහස් කළ යුතුය. කොළඹ මහාධිකරණයේ 8394/2016 සහ 8395/2016 අධිචෝදනා පත්‍ර ඉල්ලා අස්කර ගැනීම මගින් නිදොස් කොට නිදහස් කළ යුතුය.
4. යෝෂිත කණිෂ්ක රාජපක්ෂ (1963/2020)
කඩුවෙල මහේස්ත්‍රාත් අධිකරණයෙහි ගොනු කර ඇති බී 9823/2015 වාර්තාවෙහි චෝදනාවලින්ද, ගල්කිස්ස මසේත්‍රාත්අධිකරණයෙහි ගොනුකර ඇති බී828/2016 වාර්තාවෙහි සියලුම චෝදනාවලින්ද නිදොස් කොට නිදහස් කළ යුතුය. කොළඹ මහාධිකරණයේ පවරා ඇති අංක එච්සී 8331/16 දරන අධිචෝදනා පත්‍රය ඉල්ලා අස්කර ගැනීම මගින් සියලු චෝදනාවලින් නිදොස් කොට නිදහස් කළ යුතුය.
4. රොහාන් වැලිවිට (1964/2020)
කඩුවෙල මහේස්ත්‍රාත් අධිකරණයේ බී9823/2015 වාර්තාවේ සියලුම චෝදනාවලින් නිදොස් කෙට නිදහස් කළ යුතුය. කොළඹ මහාධිකරණයේ එච්සී 8331/16 අධිචෝදනා පත්‍රය ඉල්ලා අස්කරගැනීමෙන් චෝදනාවලින් නිදොස් කොට නිදහස් කළ යුතුය.
5. නාලක ගොඩහේවා (432/2020)
අලුත්කඩේ අංක 3 මහේස්ත්‍රාත් අධිකරණයේ බී787/15 දරන බී වාර්තාවෙහි චෝදනාවලින් නිදොස් කොට නිදහස් කළ යුතුය. කොළඹ මහාධිකරණයේ 8133/15 අධිචෝදනා පත්‍රය ඉල්ලා අස්කර ගැනීමෙන් නිදොස් කෙට නිදහස් කළ යුතුය.
6. වැඩෙනකොණ්ඩ ආරච්චිගේ නිශාන්ත ආසිරි ප්‍රනාන්දු සහ සෙල්ලකපු කමින්ද හර්ෂජිත් කොළඹ කොටුව මහේස්ත්‍රාත් අධිකරණයේ බී884/16 බී වාර්තාවෙහි චෝදනාවලින් නිදොස් කොට නිදහස් කළ යුතුය. මීතලාවේ මහින්දානන්ද අලුත්ගමගේ හා නලින් රුවන්ජීව ප්‍රනාන්දුට කොළඹ මහාධිකරණයේ එච්සී/පීටීබී/02/02/2019 අධිචෝදනා පත්‍රය ඉල්ලා අස්කර ගැනීමෙන් චෝදනාවලින් නිදොස් කොට නිදහස් කිරීම.
7. පොල්පාගොඩ ගමගේ තිළිණ සජෝත වින්සන්ට් (04/2020)
නුගේගොඩ මහේස්ත්‍රාත් අධිකරණයේ 1912/16 බී වාර්තාවේ සියලුම චෝදනාවලින් නිදොස් කොට නිදහස් කළ යුතුය. කොළඹ මහාධිකරණයේ එච්සී555/2019 අධිචෝදනා පත්‍රය ඉල්ලා අස්කර ගැනීමෙන් චෝදනාවලින් නිදොස් කොට නිදහස් කළ යුතුය.
8. අරුමාදුර වින්සන්ට් ප්‍රේමලාල් සිල්වා (1969/2020)
අරුමාදුර රෙමෙලෝ දුමින්ද සිල්වාට එරෙහිව කොළඹ මහාධිකරණයේ එච්සී 7781/15 නඩුවේ අධිචෝදනා පත්‍රයෙහි දැක්වෙන සියලුම චෝදනාවලින් නිදොස් කොට නිදහස් කළ යුතුය. කොළඹ මහාධිකරණයේ එච්සී 8331/16 දරන අධිචෝදනා පත්‍රයේ සඳහන් වරදවලට දුමින්ද සිල්වා වරදකරු කොට මහාධිකරණය විසින් මරණ දඬුවම සහ සිර දඬුවම් නියම කර එකී දඬුවම් ශ්‍රේෂ්ඨාධිකරණය විසින් අනුමත කරනු ලැබු අවස්ථාවේදී, මෙම කොමිසම ඉදිරියේ ඉදිරිපත් කෙරුණු නව සාක්‍ෂි මහාධිකරණයේ සහ ශ්‍රේෂ්ඨාධිකරණයේ සලකා බැලීම සඳහා ඉදිරිපත් නොකිරීමෙන් යුක්තිය අවගමනය වී ඇති හෙයින් දුමින්ද සිල්වා වරදකරු කිරීම පිළිබඳ නඩු තීන්දුව පුළුල් විනිශ්චය මණ්ඩලයක් මගින් අධිකරණ සමාලෝචනයක් සඳහා නීතිපතිවරයා විසින් ශ්‍රේෂ්ඨාධිකරණය වෙත ඉල්ලීමක් කළ යුතුය.
9. ලලිත් ජයසිංහ (115/2020)
පැල්මඩුල්ප මහේස්ත්‍රාත් අධිකරණයේ බී757/2017 වාර්ාතාවෙහි චෝදනාවලින් නිදොස් කොට නිදහස් කළ යුතුය. කොළඹ මහාධිකරණයේ එච්සීආර් 215/2017 අධිචෝදනා පත්‍රය ඉල්ලා අස්කර ගැනීමෙන් සියලු චෝදනාවලින් නිදොස් කොට නිදහස් කළ යුතුය.
10. ප්‍රේම ආනන්ද උදලාගම (238/2020)
ගල්කිස්ස මහේස්ත්‍රාත් අධිකරණයේ බී93/2009 වාර්තාවේ චෝදනාවලින් නිදොස් කොට නිදහස් කළ යුතුය. ගම්පහ මහාධිකරණයේ එච්සී 212/19 දරන අධිචෝදනා පත්‍රය ඉල්ලා අස්කරගෙන චෝදනාවලින් නිදොස් කොට නිදහස් කළ යුතුය.
11. සිවනේසතුරෙයි චන්ද්‍රකාන්තන් (885/20)
මඩකලපුව මහේස්ත්‍රාත් අධිකරණයේ බී 1357/05 වාර්තාවේ චෝදනාවලින් නිදොස් කොට නිදහස් කළ යුතුය. මඩකලපුව මහාධිකරණයේ එච්සීඩී/3057/17 අධිචෝදනා පත්‍රය ඉල්ලා අස්කරගැනීමෙන් චෝදනාවලින් නිදොස් කොට නිදහස් කළ යුතුය.
12. ජාලිය චිත්‍රාන් වික්‍රමසූරිය (1116/2020)
කොටුව මහේස්ත්‍රාත් අධිකරණයේ බී21/2016 වාර්තාවේ චෝදනාවලින් නිදොස් කොට නිදහස් කළ යුතුය. ශ්‍රී ලංකා රජයේ ඉල්ලීම පරිදි පැමිණිලිකරුට එරෙහිව ඇමරිකානු රජය විසින් පනවා ඇති විදේශ ගමන් තහනම ඉවත් කරලීම සඳහා ලංකා රජය විසින් ඊට අවශ්‍ය කෙරෙන නියෝග සහ හෝ නිවේදන ඇමරිකානු රජය වෙත යවා පැමිණිලිකරුට එරෙහිව ක්‍රියාත්මක වන එකී විදේශ ගමන් තහනම ඉවත් කරවා ගැනීමට ශ්‍රී ලංකා විදේශ අමාත්‍යාංශය වහාම ක්‍රියාත්මක විය යුතුය.
13. සමන්සිරි දිසානායක හා සුජාතා දමයන්ති ජයරත්න (402/2020, 206/2020)
දෙදෙනාට එරෙහිව ගාල්ල මහේස්ත්‍රාත් අධිකරණයේ බී 44146/15 වාර්තාවේ චෝදනාවලින් නිදොස් කොට නිදහස් කළ යුතුය. සමන්සිරි දිසානායකට එරෙහිව කොළඹ මහාදිකරණයේ එච්/සී/ටීඒබී/751/19 නඩුවේ අධිචෝදනා පත්‍රය ඉල්ලා අස්කර ගැනීමෙන් චෝදනාවලින් නිදොස් කොට නිදහස් කළ යුතුය.
14. නිශ්ශංක යාපා සේනාධිපති (50/2020)
ගාල්ල මහේසත්‍රාත් අධිකරණයේ බී 32528/15 සහ 44146 බී වාර්තාවේ සියලුම චෝදනාවලින් නිදොස් කොට නිදහස් කළ යුතුය. කොළඹ මහාධිකරණයේ එච්සීබී 25/2017 අධිචෝදනා පත්‍රය ඉල්ලා අස්කර ගැනීමෙන් නිදොස් කොට නිදහස් කළ යුතුය.
15. මෝසස් රංගජිව නෙවමාල් (07/20)
ත්‍රිපුද්ගල මහාධිකරණය ඉදිරියේ විභාගවෙමින් පවතින එච්සී(ටීඒබී) 03/19/493 නඩුව තවදුරටත් පවත්වා ගෙන යන්නේද යන්න සම්බන්ධයෙන් නීතිපතිවරයා විසින් මෙම වාර්තාව තුළ හෙළිදරව් වන්නාවූ කරුණු සලකා බලා තීරණයක් ගත යුතුය.
16. ලමාහේවාගේ එමිල් රංජන් (12/2020)
ත්‍රිපුද්ගල මහාධිකරණය ඉදිරියේ විභාගවෙමින් පවතින එච්සී(ටීඒබී) 03/19/493 නඩුව නිර්මාණය කරන ලද සාවද්‍ය සාක්‍ෂි මත ගොඩනගන ලද්දක් බවට වූ දෝෂාරෝපණයන් නීතිපතිවරයාගේ අවධානයට යොමු කළ යුතු ය. එය තවදුරටත් පවත්වාගෙන යන්නේද යන්න නීතිපතිවරයා විසින් සලකා බැලිය යුතුය.
17. උදයංග වීරතුංග (1081/2020)
එෆ්සීඅයිඩීය විසින් කොටුව මහේස්ත්‍රාත් අධිකරණයට අසත්‍ය කරුණු ඉදිරිපත් කරනු ලැබූ බී639/15 නඩුවෙන් ලබාගත් සිතාසිය නියමිත කාර්ය පටිපාටියට අනුකූලව බාර දීමට ක්‍රියා නොකිරීම.
ගුවන් හමුදාවට මිග් යානා මිලදී ගැනීමෙන් බලවත් මූල්‍ය අක්‍රමිකතාවක් කොට ඇතැයි උපකල්පනය යටතේ කොටුව මහේස්ත්‍රාත් අධිකරණයේ ඉදිරිපත් කර ඇති බී 639/15 නඩු කටයුත්ත සම්බන්ධයෙන් නීතිපතිවරයා මැදිහත්ව වැඩිදුර ක්‍රියාත්මක වීමක් සිදු නොකරන බවට අධිකරණයට වාර්තා කළ යුතුය.
කොටුව මහේස්ත්‍රාත් අධිකරණය 2017.01.04 දින උදයංග වීරතුංග නමට ඇති සියලුම බැංකු ගිණුම්වල ගනුදෙනු නැවත දන්වන තුරු අත්හිටුවීමට නිකුත් කරන ලද අධිකරණ නියෝගය ඉවත්කරන මෙන් නීතිපතිවරයා අධිකරණයෙන් ඉල්ලීමක් කළ යුතුය.
මහ බැංකුවේ මූල්‍ය බුද්ධි ඒකකයේ අධ්‍යක්‍ෂවරයා විසින් 2015.04.29 දින සිට උදයංග වීරතුංග නමට ඇති බැංකු ගිණුම් තාවකාලිකව අක්‍රිය කරනු ලැබ පසුව බස්නාහිර පළාත්බද මහාධිකරණය විසින් නිකුත් කරන ලද නියෝගය මත අක්‍රිය කිරීමේ කාලසීමාව දීර්ඝ කරනු ලැබ ඇති බැවින් මහ බැංකුවේ මූල්‍ය බුද්ධි ඒකකයේ අධ්‍යක්‍ෂවරයා විසින් එකී ගිණුම් අක්‍රිය කිරීමේ නියෝගය අවලංගු කිරීම හෝ නැවත දීර්ඝ නොකිරීම.
18. කර්නල් ෂම්මි අර්ජුන කුමාරරත්න (24/2020)
හෝමාගම මහේස්ත්‍රාත් උසාවියේ බී7417/2015 වාර්තාවේ සියලු චෝදනාවලින් නිදොස් කොට නිදහස් කළ යුතුය.
කොළඹ මහාධිකරණයේ එච්සී(ටීඒබී) 725/19 අධිචෝදනා පත්‍රය ඉල්ලා අස්කර ගැනීම තුළින් නිදොස් කොට නිදහස් කළ යුතුය.
හෝමාගම කලාපයේ මහාධිකරණ නඩු අංක එච්සී 209/19 අධිචෝදනා පත්‍රය ඉල්ලා අස්කර ගෙන නිදොස් කොට නිදහස් කළ යුතුය.
19. තිරුකුමාර් නඩේසන් 1968/2020
එෆ්සීඅයිඩීයට අසත්‍ය පැමිණිල්ලක් ඉදිරිපත් කර නඩේසන් හා බැසිල් රාජපක්‍ෂට එරෙහිව බී8674/15 වාර්තාව මගින් අසත්‍ය පැමිණිල්ලක් ගොනුකිරීමට කටයුතු කළ අයට එරෙහිව නිසි අධිකරණය ඉදිරියේ නඩු පැවරිය යුතුය.
20. ධම්මික අමල් කරුණාසේකර, බණ්ඩාර දිසානායක බුලත්වත්ත, නිශාන්ත ජයතිලක, චාමික සුමිත්, චන්ද්‍රාභය ජයසූරිය, ප්‍රභාත් දුමින්ද වීරරත්න, පේඩිගේ නිශාන්ත කුමාර, ලසන්ත විමලවීර
ගල්කිස්ස මහේස්ත්‍රාත් අධිකරණයේ බී 1535/08 වාර්තාවේ චෝදනාවලින් නිදොස් කොට නිදහස් කළ යුතුය.
21. සුමිත් රණසිංහ (03/2020)
කොළඹ කොටුව මහේස්ත්‍රාත් අධිකරණයේ බී732/2009 වාර්තාවේ සියලු චෝදනාවලින් නිදොස් කොට නිදහස් කළ යුතුය.
22. ප්‍රසාද් චන්දන කුමාර හෙට්ටිආරච්චි
මහේස්ත්‍රාත් අධිකරණයේ 7439/2/6 නඩුවේ සියලු චෝදනාවලින් නිදොස් කොට නිදහස් කළ යුතුය.
කොළඹ මහාධිකරණයේ එච්සී(ටීඒබී)1448 නඩුවේ අධිචෝදනා පත්‍රය ඉල්ලා අස්කරගැනීම මගින් සියලු චෝදනාවලින් නිදොස් කොට නිදහස් කළ යුතුය.■
තවත් විස්තර ලබන සතියේ
